Chakʼ chanubtasel li Ajvalilale: Tstojobtas buchʼutik tsventain li Ajvalile

STSEʼET noʼox asat chakʼel jun kerem ti yakal tsjelubtas jun mantal ta plataformae. Jaʼ jun ermano ti kerem to ti jaʼ to baʼyel velta tsjelubtas jun mantal ta jun asambleae. Kʼalal yakal chachikintabee chanopbe skʼoplal xtok ti kʼu to yelan chichʼ tojobtasel li steklumal Diose. Xvul to ta ajol ti kʼu toʼox yelan la sjelubtas mantal ta slikebale, pe xamuyubaj kʼalal chavil ti kʼu xa yelane. Lik chʼiuk mas ta mantal kʼalal ay ta Chanob vun sventa Abtelal ta Prekursor, achʼtik to xtoke ay xchiʼuk yajnil ta Chanob vun sventa j-al lekil aʼyejetik yuʼun Ajvalilal yuʼun Dios. Kʼalal yakal tstʼax skʼobik li ermanoetik ta skoj ti toj lek la sjelubtas mantal li ermanoe, chakʼel li ermanoetik ta apat axokone xchiʼuk chanopbe skʼoplal ti kʼu yelan chichʼ chanubtasel li steklumal Diose.

Li Vivliae laj onoʼox yal ti chchanubtasat yuʼun Dios li buchʼutik oyik ta jteklum taje (Is. 54:13). Li yorail taje jaʼ xa li avie. Li chanubtasel chkichʼtike maʼuk noʼox ta jtatik li ta jvuntike, te ta jtatik xtok li ta tsobajeletike, ta asamblea xchiʼuk yan chanob vunetik ti chakʼ chanubtasel sventa xichʼ pasel jtosuk abtelal li ta s-organisasion Jeovae. Li ta jvokʼ liʼe te ta jchanbetik skʼoplal ti skotol li chanubtasele jaʼ sprevail ti yakal xa chventainvan li Ajvalilal yuʼun Diose.