Li tayal kʼelob osil ta Babele

Kʼalal echʼem xa ox li nojelal ta voʼe, li skeremtak Noee laj yil ep yalab xnichʼnabik. Kʼalal epajik xa ox li yutsʼ yalalike, la spuk sbaik batel li ta balumile, jech kʼuchaʼal albatik yuʼun li Jeovae.

Pe oy junantik utsʼ alaliletike muʼyuk la xchʼunbeik smantal Jeova, yuʼun kʼajomal xi laj yalike: «Jlikestik spasel jun muk’ta lum xchiʼuk jun tayal kʼelob osil, akʼo kʼotuk kuʼuntik k’alal to ta vinajel. Mi jech ta jpastike, lek chkichʼtik-o ojtikinel».

Pe li Jeovae muʼyuk bu lek laj yil li kʼusi yakal tspas li krixchanoetike. Jaʼ yuʼun, la spajes li abtelale. ¿Kʼuxi van la spas? Laj yakʼ ti akʼo kʼopojikuk ta jeltos kʼopetike. Ta skoj ti mu xa xaʼibe sba skʼopike, la xkechanik svaʼanel li tayal kʼelob osile. Jaʼ yuʼun, li jteklum taje Babel laj yakʼbeik sbi ti jaʼ smelolal: «Mu xaʼibe sbaik». Jech te lik batikuk ta naklej ta yantik osil. Pe jech-o chopol tajek kʼusi la spasik ti bu nakiik ta jujuntale. ¿Mi oy to van buchʼu la xchʼunbe smantal li Jeovae? Jaʼ ta jkʼeltik li ta yan xchanobile.