Chaʼkuxi skerem li jun meʼon antse

Kʼalal jaʼo yorail kʼepelale, li Jeovae la skʼopon li Eliase, xi laj yalbee: «Batan ta lum Sarepta, te nakal jun meʼon ants, jaʼ ta smakʼlinot». Kʼalal kʼot ta stiʼ jteklum li Eliase, te laj yil jun meʼon ants ti yakal tstsob yuni siʼe, te la skʼanbe jun vaso yaʼal. Kʼalal chbat xa ox yichʼ tale, xi to laj yalbe li antse: «Avokoluk, ichʼbun tal jutuk pan jveʼ noxtok». Pe xi la stakʼ li antse: «Muʼyuk jpan, yuʼun kʼajomal oy juteb j-arina xchiʼuk juteb j-aseite sventa jpas jveʼkutik xchiʼuk li kole». Xi takʼav li Eliase: «Mu xaxiʼ, yuʼun li Jeova Dios yuʼun Israele yaloj ti mi chapasbun junuk pan jveʼe, muʼyuk ta xlaj li a-arina xchiʼuk li a-aseitee, jaʼ to mi laj yakʼ voʼ yan veltae».

Vaʼun, li meʼon antse bat ta sna, yuʼun bat spasbe pan sveʼ li Elias ti jaʼ yaj-alkʼop Jeovae. Ta skoj ti la xchʼun li meʼon antse, oy-o sveʼelik li ta kʼepelaltik jech kʼuchaʼal laj yal onoʼox li Jeovae. Jech muʼyuk bu xlaj li s-arina xchiʼuk li s-aseitee.

Ta tsʼakale, oy kʼusi toj kʼux kʼot ta pasel, yuʼun tsots ipaj skerem li meʼon antse, vaʼun cham. Jaʼ yuʼun, tsots la skʼanbe vokol li Eliase. Vaʼun, li Eliase la spet li kereme xchiʼuk laj yikʼ muyel ta jun kuarto ta xchaʼkojal li nae. Kʼalal laj xa ox xpuchʼan ta teme, xi laj yalbe li Jeovae: «Jeova, Dios kuʼun, ¡avokoluk, chaʼkuxeso li kerem liʼe!». ¿Mi xanaʼ kʼu yuʼun toj labal sba ti jech la spas li Jeovae? Yuʼun muʼyuk toʼox buchʼu jech yichʼoj chaʼkuxesel. Jech xtok, maʼuk j-israeletik li ants xchiʼuk skereme.

Vaʼun, li kereme chaʼkuxi yan velta. Jaʼ yuʼun, li Eliase xi laj yalbe li meʼon antse: «¡Kʼelavil, chaʼkuxi xa li avole!». Solel muyubaj tajek li antse, vaʼun xi laj yalbe li Eliase: «Avie, laj xa jnaʼ ti jaʼ yaj-alkʼopot Jeovae xchiʼuk jaʼ te likem tal li kʼusi chavale, jaʼ yuʼun chkʼot ta pasel».