La xchʼunbeik smantal Jeova li chanvoʼ keremetike

Li Nabukodonosore laj yikʼ batel ta Babilonia li buchʼutik tsots yabtelik ta Judae, vaʼun laj yalbe Aspenas ti jaʼ yichʼoj yabtel ta snail pasob mantal ti akʼo skʼel li buchʼutik tsots yabtelike. Jech xtok, albat yuʼun Nabukodonosor ti akʼo stʼuj jayvoʼuk keremetik ti lek tsotsike xchiʼuk ti lekuk pʼijike. Li keremetik taje ta xichʼik lek chanubtasel oxib jabil sventa xichʼ akʼbel tsots yabtelik li ta Babiloniae. Skʼan xchanik lek li akadio kʼop ta Babiloniae xchiʼuk skʼan xchanik stsʼibael xtok. Jech xtok, skʼan slajesik li veʼlil ti chakʼik ta sna ajvalile. Li keremetik laj yichʼik tʼujele te skʼoplalik li Daniel, Ananias, Misael xchiʼuk Asariase. Pe jelbat sbiik yuʼun li Aspenase jaʼ xa la sbiinik jech kʼuchaʼal li jbabiloniaetike: Beltsasar, Sadrak, Mesak xchiʼuk Abednego. ¿Kʼusi chanop? ¿Mi xuʼ van xnamajesatik ta stojolal Jeova ta skoj li chanubtasel ch-akʼbatike?

Li chanvoʼ keremetike jpʼel ta yoʼontonik ti ta xchʼunbeik li smantal Jeovae. Jech xtok, snaʼojik lek ti mu stakʼ slajesbeik sveʼel li ajvalile, yuʼun li ta Smantal Jeovae chal ti mu stakʼ slajesik li jlom veʼlil taje. Jech oxal, xi la skʼanbeik vokol li Aspenase: «Avokoluk, mu me xasujunkutik ti akʼo jlajeskutik li sveʼel ajvalile». Pe xi laj yal li Aspenase: «Mi muʼyuk lek chaveʼike xchiʼuk mi laj yil ajvalil ti ipoxuke, voʼoxuk me ta akojik mi la smilun li ajvalile».

Pe oy kʼusi la snop li Daniele, xi laj yalbe li jchabivaneje: «Avokoluk, paso preva avil lajunebuk kʼakʼal, jaʼ noʼox akʼbun jlajeskutik li kʼusitik chchʼi ta balumile xchiʼuk akʼbun kuchʼkutik voʼ. Vaʼun, koʼoltasunkutik xchiʼuk li yan keremetik ti koʼol sveʼelik xchiʼuk li ajvalile». Lek laj yaʼi li jchabivaneje.

Kʼalal echʼ lajuneb kʼakʼale, vinaj ti mas lek tsotsik li Daniel xchiʼuk li oxvoʼ yamigotake. Xmuyubaj tajek li Jeovae, yuʼun la xchʼunbeik smantal. Jech xtok, li Daniele akʼbat spʼijil yuʼun Jeova yoʼ xaʼibe smelolal kʼusiuk vaychil xchiʼuk kʼusiuk noʼox ti ch-akʼbat yil li krixchanoetike.

Kʼalal tsʼaki oxib jabil ti chanubtasatike, li Aspenase laj yikʼ batel ta stojolal Nabukodonosor li keremetike. Li ajvalile la xchiʼinan ta loʼil, vaʼun laj yakʼ venta ti mas pʼijik li Daniel, Ananias, Misael xchiʼuk Asariase ti jaʼ mu sta li yan keremetike. Jaʼ yuʼun, la stʼuj sventa teuk x-abtejik li ta spasob mantale. Jaʼ yuʼun, kʼalal oy kʼusitik tsotsik skʼoplal tskʼan tspas li ajvalile, tsjakʼbe baʼyel li chanvoʼ keremetike. Li chanvoʼ keremetike akʼbat mas spʼijilik yuʼun Jeova ti jaʼ mu sta li buchʼutik ch-abtejik ta stojolal ajvalile xchiʼuk li buchʼutik tspasik majiae.

Li Daniel, Ananias, Misael xchiʼuk Asariase muʼyuk te oyik li ta slumalike, pe te oy ta sjolik ti jaʼik yajtuneltak Jeovae. Li voʼote, ¿kʼusi van chapas ti muʼyukuk te achiʼuk li atot ameʼe? ¿Mi te van ta ajol ti jaʼ yajtunelot Jeovae?