Muʼyuk laj yichʼik ta mukʼ li lokʼole

Kʼalal echʼem xa ox kʼuuk sjalil ti la xvaychinta mukʼta lokʼol li ajvalil Nabukodonosore, la spas jun mukʼta lokʼol ti pasbil ta oroe. Li lokʼole te la svaʼan ta stenlejaltik Dura. Vaʼun, la stak ta ikʼel skotol li buchʼutik mas tsots skʼoplalik ta sjunul lum sventa xbatik ta yeloval li lokʼole, ikʼatik ek li Sadrak, Mesak xchiʼuk Abednegoe. Xi laj yal mantal li ajvalile: «¡Mi laj avaʼiik chlik bakʼuk li okʼes, arpa xchiʼuk li yan stijobiltak sone, skʼan xakejan abaik ta stojolal li lokʼole. Buchʼuuk noʼox ti mu skejan sba ta stojolale chichʼ tikʼel ochel li ta orno ti xtiltun skʼakʼale!». ¿Kʼusi chanop? ¿Mi ta van skejan sbaik ta stojolal lokʼol li oxvoʼ j-ebreoetike? O ¿mi jaʼ noʼox van chichʼik ta mukʼ li Jeovae?

Laje, laj yal mantal ajvalil ti akʼo xichʼ tijel li sone. Vaʼun, keji skotolik xchiʼuk lik yichʼik ta mukʼ li lokʼole. Pe mu jechuk la spasik li Sadrak, Mesak xchiʼuk Abednegoe. Pe oy jayvoʼ viniketike laj yilik xchiʼuk xi bat yalbeik li ajvalile: «Li oxvoʼ j-ebreoetike muʼyuk laj yichʼik ta mukʼ li lokʼol apasoje». Vaʼun, takatik ta ikʼel yuʼun Nabukodonosor li oxvoʼ j-ebreoetike xchiʼuk xi albatike: «Chkakʼ anopik yan velta mi chavichʼik ta mukʼ li lokʼole. Mi mu xakʼan xavichʼik ta mukʼe, ta jtikʼoxuk ochel li ta orno ti xtiltun skʼakʼale. Mi junuk dios xuʼ skoltaoxuk lokʼel ta jkʼob». Xi laj yal li oxvoʼ j-ebreoetike: «Mu persauk xavakʼ jnopkutik yan velta. Xuʼ yuʼun skoltaunkutik li Jdioskutike. Ajvalil, akʼo mi mu skoltaunkutik, pe muʼyuk chkichʼkutik ta mukʼ li lokʼole».

Solel ilin tajek li Nabukodonosore. Xi laj yalbe li sviniktake: «¡Vukub velta x-echʼ to skʼakʼal xatsanik jech kʼuchaʼal chapasik onoʼoxe!». Laje, xi laj yalbe li yajsoltarotake: «¡Chukik li viniketik liʼe xchiʼuk jipik ochel li ta ornoe!». Ta skoj ti toj kʼokʼ tajek li ornoe, chamik li soltaroetik kʼalal nopajik batele. Kʼalal te xa ox oyik ta yut orno li oxvoʼ j-ebreoetike, li Nabukodonosore la skʼel ochel li yut ornoe, jaʼ to laj yile chanvoʼik xa li buchʼutik chanavik ta yut ornoe, maʼuk xa noʼox oxvoʼik. Xiʼ tajek li ajvalile, vaʼun xi la sjakʼbe li yaj-abteltake: «¿Mi mu oxvoʼuk noʼox li viniketik la jiptik ochel ta kʼokʼe? Pe chanvoʼ xa viniketik te oyik chkil, pe li june ¡xkoʼolaj ta jun anjel yilel!».

Li Nabukodonosore nopaj batel li ta ornoe xchiʼuk xi tsots laj yale: «¡Lokʼanik tal, voʼoxuk li yajtuneloxuk Dios ti toj toyol oye!». Skotolik labal sba laj yilik ti muʼyuk kʼakʼem lokʼik tal li Sadrak, Mesak xchiʼuk Abednegoe. Mi jutebuk kʼakʼem snukulilik, stsatsal sjolik, skʼuʼ spokʼik mi jaʼuk yikʼinojik chʼail.

Xi laj yal li ajvalile: «¡Toj mukʼ li Dios yuʼun Sadrak, Mesak xchiʼuk Abednegoe! La stak tal yaj-anjel sventa tskolta li yajtuneltake. Stuk noʼox jech li Sdiosike».

Jpʼel ta yoʼontonik tukʼ laj yakʼ sbaik ta stojolal Jeova li oxvoʼ j-ebreoetike, mu ventauk kʼusi kʼot ta stojolalik. Li voʼot une, ¿mi tukʼ-o chavakʼ aba ek?