Li Ajvalilal ti te oy-o sbatel osile

Jun akʼobale, oy kʼusi labal sba la xvaychinta li ajvalil Nabukodonosore. Ta skoj ti laj yat tajek yoʼontone, solel mu x-och svayel. Jaʼ yuʼun, la stak ta ikʼel li buchʼutik tspasik majiae xchiʼuk xi laj yalanbee: «Albeikun smelolal li kʼusi la jvaychintae». Xi la stakʼike: «Ajvalil, albunkutik ti kʼusi la avaychintae». Xi laj yal li Nabukodonosore: «¡Moʼoj, voʼoxuk chavalbeikun li kʼusi la jvaychine, yuʼun ta jmiloxuk mi muʼyuk laj avalbeikune!». Xi laj yalik yan veltae: «Pe albunkutik li kʼusi la avaychintae, vaʼun chkalbotkutik kʼusi smelolal». Xi la stakʼ li ajvalile: «Jaʼ noʼox chaloʼlaikun. ¡Albeikun li kʼusi la jvaychintae!». Xi la stakʼike: «Muʼyuk buchʼu xtakʼ yuʼun li kʼusi chajakʼe. Li kʼusi chajakʼe toj tsots».

Li Nabukodonosore ilin tajek, jaʼ yuʼun laj yal mantal ti akʼo xichʼik milel skotol li pʼijil viniketik ta jteklume xchiʼuk ti akʼo yichʼik milel ek li Daniel, Sadrak, Mesak xchiʼuk Abednegoe. Jaʼ yuʼun, li Daniele la skʼanbe vokol ti akʼo to smala li ajvalile, vaʼun la spasik orasion xchiʼuk yamigotak sventa xkoltaatik yuʼun li Jeovae. ¿Kʼusi van la spas li Jeovae?

Li Daniele akʼbat iluk yuʼun Jeova ti kʼusi la xvaychinta Nabukodonosore xchiʼuk li kʼusi smelolale. Li ta yokʼomale, li Daniele ay skʼopon li yajtunel ajvalile xchiʼuk xi laj yale: «Mu xamilik li pʼijil viniketike. Voʼon ta xkal kʼusi la xvaychinta li ajvalile». Laje, ikʼat batel ta stojolal li Nabukodonosore. Li Daniele xi laj yalbe li ajvalile: «Laj xa yakʼ avil Dios li kʼusi chkʼot ta pasel ta tsʼakale. Li avayiche jaʼ liʼe: laj avil jun mukʼta lokʼol ti pasbil ta oro li sjole, li stiʼ yoʼonton xchiʼuk li xchibal skʼobe ta plata pasbil, li xchʼut xchiʼuk li xchibal yoʼe ta kovre pasbil, li xchibal yakane ta tsatsal takʼin pasbil, li snukʼtak yakan kʼalal to ta sniʼtak yoke kapal pasbil ta tsatsal takʼin xchiʼuk ta achʼel. Laje, laj yichʼ pitsel tal jpʼej ton ta vits, vaʼun xjipip to kʼotel li ta snukʼtak yakan lokʼol ti kapal ta tsatsal takʼin xchiʼuk ta achʼele, jech toj lilijel kʼot, vaʼun li spukukale kuchat batel ta ikʼ. Li tone pas ta jun mukʼta vits ti noj yuʼun spʼejel li balumile».

Vaʼun, xi laj yal li Daniele: «Li smelolal avayiche jaʼ liʼe: li sjol lokʼol ti pasbil ta oroe jaʼ skʼoplal li ajvalilal avuʼune. Ti bu pasbil ta platae jaʼ jun ajvalilal ti chtal ta tsʼakal mi laj li ajvalilal avuʼune. Li kovree jaʼ smelolal yan ajvalil ti chtal ta tsʼakale xchiʼuk ti jaʼ tsventain spʼejel balumile. Li ajvalilal chtale tsots tajek kʼuchaʼal li takʼine. Ta slajebal xae, ta xtal jun ajvalilal, bakʼintike lek tsots kʼuchaʼal li takʼine, bakʼintik xtoke kʼun kʼuchaʼal achʼel, jaʼ jech chchʼak sba li ajvalilale. Li ton ti pas ta jun vitse jaʼ skʼoplal li Ajvalilal yuʼun Diose, ti jaʼ chakʼbe slajeb li yan ajvaliletike xchiʼuk te oy-o sbatel osil».

Li Nabukodonosore la skejan sba xchiʼuk la snijan sba ta yeloval li Daniele. Xi laj yale: «Li Adiose jaʼ laj yakʼ anaʼ li kʼusi la jvaychintae. Mi jaʼuk xkoʼolaj xchiʼuk yan diosetik». Li Nabukodonosore muʼyuk la smil li Daniele, yuʼun la svaʼan ta bankilal yuʼun skotol li pʼijil viniketike xchiʼuk la svaʼan ta ajvalil ta sjunul li yosilal Babiloniae. ¿Mi laj avakʼ venta kʼuxi takʼbat s-orasion yuʼun Jeova li Daniele?