Jun ajvalilal ti xkoʼolaj kʼuchaʼal mukʼta teʼe

Jun akʼobale, li Nabukodonosore oy kʼusi la xvaychinta ti xiʼo tajeke. Jaʼ yuʼun, la stak ta ikʼel li pʼijil viniketik sventa x-albat kʼusi smelolal li xvayiche, pe mi junuk buchʼu x-al yuʼun. Ta tsʼakal une, la stak ta ikʼel li Daniele.

Li Nabukodonosore xi laj yalbe li Daniele: «Li ta jvayiche laj kil jpets teʼ ti batsʼi nat tajek chʼie xchiʼuk ti kʼot kʼalal to ta vinajele. Skotol li krixchanoetik ti oyik kʼalal to stiʼiltak balumile tstaik ta ilel li teʼe. Lek kʼupilik sba yanal xchiʼuk ep tajek sat. Te chtal xkux yoʼontonik ta yolon skotol li chonbolometike, jech xtok li mutetike te tal spas stasik li ta skʼobkʼobtak teʼe. Laje, yal tal jun anjel ta vinajel xchiʼuk xi tsots avane: ‹¡Lomesik li teʼe xchiʼuk tsʼetbeik li skʼobkʼobtake! Yan li xchumanile te iktaik. Chukik lek ta tsatsal takʼin xchiʼuk ta kovre. Chjel yoʼonton li teʼe, yuʼun maʼuk xa chichʼbe yoʼonton jun vinik, jaʼ xa chichʼbe yoʼonton jkot chonbolom. Vukub jabil jech chkom-o, vaʼun skotol chakʼik venta ti jaʼ Ajvalil stuk li Diose xchiʼuk ti xuʼ svaʼan ta ajvalil ti buchʼu skʼan yoʼontone›».

Li Jeovae laj yakʼbe snaʼ Daniel li kʼusi smelolal li vaychile. Xiʼ tajek Daniel kʼalal laj yaʼibe smelolale. Xi laj yale: «¡Ay, ajvalil, lek ti jaʼuk xkʼot ta stojolal avajkontra li kʼusi laj avil ta avayiche, pe voʼot chkʼot ta atojolal! Jaʼ akʼoplal li mukʼta teʼ laj yichʼ tuchʼele. Chavichʼ lokʼesel li ta ajvalilale xchiʼuk chlik aloʼ tsʼiʼlel jech kʼuchaʼal teʼtikal chonbolometik. Pe li anjele laj yal ti akʼo yiktabeik komel li xchumanile. Taje jaʼ skʼan xal ti cha-och yan velta ta ajvalile».

Echʼ xa ox jun jabil, vaʼun li Nabukodonosore jaʼo te yakal chanav ta sjol snail spasob mantal, te lik skʼel batel ti kʼu yutsil li Babiloniae. Xi laj yale: «¡Toj labal xa noʼox sba li jteklum jpasoje! ¡Jtuk xa noʼox jech!». Kʼalal yakal jech chale, oy buchʼu kʼopoj tal ta vinajel ti xi laj yale: «¡Ajvalil Nabukodonosor!, chkalbot avaʼi ti maʼuk xa ajvalilote».

Li vaʼ ora taje, lik xchuvajil li Nabukodonosore xchiʼuk jech lik spas sba kʼuchaʼal jkot teʼtikal chonbolom. Jaʼ yuʼun, la slokʼesik li ta spasob mantale xchiʼuk bat xchiʼin ta naklej li chonbolometik ta osiltike. Natub tajek stsotsil sjol ti xkoʼolaj xa kʼuchaʼal skʼukʼumal aguilae xchiʼuk natub tajek sniʼ yichʼak ti xkoʼolaj xa kʼuchaʼal sniʼ yichʼak mute.

Kʼalal echʼ vukub jabile, lekub yan velta li Nabukodonosore xchiʼuk vaʼanat ta ajvalil yan velta yuʼun Jeova te ta Babilonia. Vaʼun, xi laj yal li Nabukodonosore: «Ta xkalbe slekilal li Jeovae, li Ajvalil ta vinajele. Li avie, jnaʼoj xa ti jaʼ noʼox stuk Ajvalil li Jeovae. Xuʼ yuʼun ta sbikʼtajesbe skʼoplal li buchʼutik tstoy sbaike xchiʼuk xuʼ svaʼan ta ajvalil ti buchʼu xal yoʼontone».