Chikʼik batel ta Roma li Pabloe

Kʼalal bat ta yoxibal velta ta cholmantal li Pabloe, te tsuts yuʼun ta Jerusalen, vaʼun te laj yichʼ chukel. Pe jun akʼobal kʼalal jaʼo te tikʼil ta chukele, xi albat yuʼun li Jesuse: «Batan ta Roma, yuʼun te chbat achol mantal». Vaʼun, laj yikʼik batel ta Sesarea li jtakbol Pabloe, te laj yichʼ tikʼel ta chukel chib jabil. Kʼalal jaʼo chichʼ chapanel yuʼun li ajvalil ti Festo sbie, xi laj yal li Pabloe: «Ta jkʼan ti jaʼuk xchapanun li Sesar ta Romae». Xi la stakʼ li Festoe: «Lek, mi jaʼ chakʼan akʼo xchapanot li Sesare, te ta jtakot batel». Vaʼun, la stikʼik batel ta jkot varko li Pablo sventa xbat li ta Romae. Te chiʼinat batel yuʼun Lukas xchiʼuk Aristarko.

Pe kʼalal te xa ox oyik ta yutil nabe, tal tsatsal ikʼal voʼ, vaʼun te makatik jayibuk kʼakʼal. Jech oxal, la snopik ti te chcham skotolike. Pe xi albatik yuʼun li Pabloe: «Mu xaxiʼik, yuʼun li ta jvayiche, xi laj yalbun jun anjele: ‹Mu xaxiʼ, yuʼun persa chakʼot li ta Romae xchiʼuk skotol li buchʼutik te oyik ta varkoe ta xkolik ek›. Jaʼ yuʼun, oyuk me stsatsal avoʼontonik, yuʼun muʼyuk chijcham».

Kʼalal oy xa ox ta 14 kʼakʼal majatik yuʼun li tsatsal ikʼaloʼe, la staik ta kʼelel jun lum ti kakal ta oʼlol nabe, Malta sbi. Pe te matsʼi komel li svarkoike, vaʼun lilij sjunul. Akʼo mi jech, kuxul kʼotik kʼalal to ta tiʼ nab li 276 krixchanoetik ti te toʼox tikʼilik ta varkoe. Junantike nuxinajik batel, pe li yantike kajiik batel ta svokʼolil li varkoe. Vaʼun, te chabiatik yuʼun li krixchanoetik ta Maltae xchiʼuk tsanbat skʼokʼik sventa xkʼatinik.

Kʼalal echʼ xa ox oxib ue, li soltaroetike laj yikʼik batel ta jkot varko li Pablo sventa xbat ta Romae. Kʼalal kʼote, tal nupatuk yuʼun ermanoetik li jtakbol Pabloe, vaʼun lik stojbe ta vokol Jeova xchiʼuk tsatsub yoʼonton. Akʼo mi chukbil batel li Pabloe, laj yakʼik ti xchʼamun jpʼej na ti chabibil ta jun soltaroe, te kom chib jabil. Kʼalal chkʼot vulaʼanatuk yuʼun krixchanoetik li Pabloe, chcholbe skʼoplal li Ajvalilal yuʼun Diose xchiʼuk chchanubtasan ta sventa li Jesuse. Jech xtok, tstsʼibabe batel kartaetik li tsobobbailetik ta Asia Menor xchiʼuk li ta Judeae. Ta melel, jaʼ tunesat yuʼun Jeova li Pablo sventa spukbe skʼoplal li Ajvalilal yuʼun Dios ta yantik lumetike.