XCHANOBIL 56
Koltao aba yoʼ jmojuk oy li tsobobbaile
Kʼalal te jchiʼuktik li kermanotaktike, jech chkaʼi jbatik kʼuchaʼal li ajvalil Davide: «¡Kʼelavilik! Toj lek xchiʼuk toj kʼupil sba ti jmoj oyik li steklumal Diose» (Salmo 133:1). Mu ta jecheʼuk noʼox ti lek jmoj tsobolutike, yuʼun jkotoltik oy kʼusi jbainojtik spasel.
1. ¿Kʼusi lek chavil tspas li steklumal Diose?
Ti jech xabat ta yan tsobobbail, ta yan lum xchiʼuk ti yan˗o skʼopike, xuʼ jun avoʼonton chavaʼi aba. ¿Kʼu yuʼun? Yuʼun li stestigoutik Jeova ta spʼejel balumile koʼol li vunetik ta jtunestik yoʼ jchantik li Vivliae. Jech xtok, chkakʼtik persa ti xkakʼtik ta ilel ti jkʼanoj jbatike. Buyuk noʼox nakalutik, jkotoltik ta jkʼantik «vokol ta sbi li Jeovae» xchiʼuk ti jmojuk xijtun ta stojolale (Sofonias 3:9).
2. ¿Kʼusi xuʼ xapas sventa jmojuk oy li tsobobbaile?
Xi chal li Vivliae: «Ta sjunuluk me avoʼonton xakʼan abaik tajek ta jujuntal» (1 Pedro 1:22). ¿Kʼuxi xuʼ xavakʼ ta akuxlejal li mantal liʼe? Jaʼ ti maʼuk xavakʼ ta avoʼonton li spaltail yantike, jaʼ kʼelo li slekil talelalike. Mu me tʼujbiluk noʼox buchʼu xachiʼin, akʼo persa yojtikinel yan ermanoetik ti jelel bu likemik tale xchiʼuk ti jelel kʼusi nopem xaʼiik spasele. Jech xtok, akʼo persa ti xabul lokʼel ta avoʼonton mi oy kʼusi chopol chanop ta stojolal li yantike (kʼelo 1 Pedro 2:17).a
3. ¿Kʼusi xuʼ xapas mi lik akʼop xchiʼuk junuk ermanoe?
Akʼo mi jmoj oyutik, bateltike chlik jkʼoptik o ta jyayijesbe jba koʼontontik ta skoj ti jpasmulilutike. Jaʼ yuʼun, xi chalbutik li Skʼop Diose: «Jechuk-o me tsʼikbo abaik ta jujuntal». Xi to chal xtok: «Jech kʼuchaʼal muʼyuk la sjalanboxuk perton li Jeovae, jech me skʼan xapasik ek» (kʼelo Kolosenses 3:13). Akʼo mi ep ta velta ta jyayijesbetik yoʼonton li Jeovae, chakʼutik ta perton. Jaʼ yuʼun, skʼan xkakʼtik ta perton li kermanotaktik eke. Mi la avakʼ venta ti chopol laj yaʼi sba avuʼun junuk ermanoe, kʼelo kʼuxi xuʼ xachapan ta anil li akʼopike (kʼelo Mateo 5:23, 24).b
JCHANTIK TO BATEL MAS
Nopbo skʼoplal kʼusitik xuʼ xapas sventa jmojuk oy xchiʼuk junuk noʼox yoʼonton li tsobobbaile.
¿Kʼusitik van xuʼ xapas sventa xachapan akʼopik xchiʼuk junuk ermanoe?
4. Mu me xatʼujvan
Ta jkʼan chkakʼtik ta ilel ti jkʼanojtik skotol li kermanotaktike. Pe xuʼ van vokol chkaʼitik mi toj jelelik kʼuchaʼal voʼotike. ¿Kʼusi xuʼ skoltautik? Kʼelik Echos 10:34, 35 xchiʼuk albeik skʼoplal li sjakʼobiltak liʼe:
Li Jeovae tskʼan ti xkʼot ta stestigo skotol li krixchanoetike, mu ventauk bu likemik tal. Vaʼun chaʼa, ¿kʼu yelan skʼan xavil ek li krixchanoetike?
Li bu nakalote, ¿kʼu yuʼun aviloj ti chpʼajvan li krixchanoetike? ¿Kʼu yuʼun muʼyuk lek ti jech xapas eke?
Kʼelik 2 Korintios 6:11-13 xchiʼuk albeik skʼoplal li sjakʼobil liʼe:
¿Kʼusi xuʼ xapas sventa masuk to xakʼan li ermanoetike?
5. Mu xajalanbe perton xchiʼuk lajesbo yoʼonton li avermanoe
Akʼo mi muʼyuk onoʼox tsaʼ smul ta jtojolaltik li Jeova sventa xkakʼtik ta pertone, li stuke muʼyuk bu tsjalanbutik perton. Kʼelik Salmo 86:5 xchiʼuk albeik skʼoplal li sjakʼobiltak liʼe:
Li versikulo liʼe, ¿kʼusi chakʼ jchantik ti kʼu yelan ch˗akʼvan ta perton li Jeovae?
¿Mi oy ta avoʼonton chatoj ta vokol ti ch˗akʼvan ta perton li Jeovae? ¿Kʼu yuʼun ti jech chavale?
¿Bakʼin van ti xuʼ vokol chkaʼitik ti junuk noʼox koʼontontik xchiʼuk li kermanotaktike?
Mi ta jkʼantik ti jmoj tsobolutik xchiʼuk li kermanotaktike, ¿kʼusi skʼan jchanbetik li Jeovae? Kʼelik Proverbios 19:11 xchiʼuk albeik skʼoplal li sjakʼobil liʼe:
Kʼalal oy buchʼu chopol kʼusi tspasbot o chalbote, ¿kʼusi van xuʼ xapas sventa xachapan li akʼopike?
Bateltike voʼotik ti oy kʼusi chopol chkaltik ti chopol˗o chaʼi sba kuʼuntik li yantike. Mi jaʼ jech kʼot ta pasele, ¿kʼusi van xuʼ jpastik? Kʼelik li VIDEOE xchiʼuk albeik skʼoplal li sjakʼobil liʼe:
Li ermana laj kiltik ta videoe, ¿kʼuxi chchapan skʼopik xchiʼuk li yan ermanae?
6. Jaʼ kʼelbo slekil talelal li avermanotake
Kʼalal chkojtikintik mas li kermanotaktike, maʼuk noʼox chkilbetik li slekil talelalike, yuʼun chkilbetik xtok li spaltailike. ¿Kʼusi xuʼ jpastik sventa jaʼuk jkʼelbetik li slekil talelalike? Kʼelik li VIDEOE xchiʼuk albeik skʼoplal li sjakʼobil liʼe:
¿Kʼusi xuʼ skoltaot sventa jaʼuk xakʼelbe slekil talelal li avermanotake?
Li Jeovae jaʼ tskʼel li jlekil talelaltike. Kʼelik 2 Kronikas 16:9 sbavokʼal xchiʼuk albeik skʼoplal li sjakʼobil liʼe:
¿Kʼu yelan chavaʼi aba ti anaʼoj ti jaʼ tskʼel alekil talelal li Jeovae?
Akʼo mi oy xchopoliltak li jun kʼupil sba diamantee, ep sbalil. Akʼo mi jmulavil li kermanotak eke, ta sat Jeovae toj ep sbalilik.
JUNANTIKE XI CHALIKE: «Mi voʼon ta jkʼan perton un, jaʼ chtal skʼanbun perton jechuke».
¿Kʼu yuʼun skʼan oyuk ta koʼontontik ti xkakʼtik ta perton li yantike?
¿KʼUSI LA ACHAN?
Mi chavakʼ ta perton li avermanotake xchiʼuk mi akʼanojane, jmoj me oy li tsobobbaile.
Svulesobil ta joltik
¿Kʼusi xuʼ xapas sventa mu chopoluk kʼusi xanop ta stojolal li yantike?
¿Kʼusi xuʼ xapas mi lik akʼop xchiʼuk junuk ermanoe?
¿Mi oy ta avoʼonton chavakʼ perton jech kʼuchaʼal tspas li Jeovae? ¿Kʼu yuʼun ti jech chavale?
XUʼ TO XAKʼEL LIʼE
Kʼelavil kʼusi laj yal Jesus ti tskoltautik sventa mu chopoluk kʼusi jnoptik ta stojolal yantike.
¿Mi skʼan van jkʼantik perton mi ta jnoptik ti muʼyuk kʼusi chopol jpasojtike?
«Jun koʼontontik mi la jkʼantik pertone» (Li Jkʼel-osil ta toyole, 1 yuʼun noviembre ta 2002)
Kʼelavil kʼusi koltaatemik-o yantik sventa mu xt’ujvanike.
Mu chopoluk k’usi jnoptik ta skoj li k’usi chil no’ox jsatike (5:06)
Kʼelavil kʼuxi xuʼ xachapan akʼopik xchiʼuk junuk ermano sventa oyuk jun oʼontonal li ta tsobobbaile.
«Ta slekiluk koʼontontik jchapan li jkʼoptike» (Li Jkʼel-osil ta toyole, mayo ta 2016)