Jchantik lek «cʼalal to ta yut cʼusi tsnop li Diose»

«Li Chʼul Espiritue snaʼoj scotol. Yotquinoj cʼalal to ta yut cʼusi tsnop li Diose.» (1 CORINTIOS 2:10.)

1. Alo kaʼitik jayibuk chanubtasel ta Vivlia ti chakʼ tajmek muyubajel chaʼiik li buchʼutik chlik xchanike.

JUTUK mu jkotoltikuk li yajtsʼaklomutik Cristoe xvul ta joltik ti xi jmuyubaj tajmek kʼalal laj kichʼtik chanubtasel ta sba velta li ta mantaletik ta Vivliae. Te laj chantik ti kʼu yuʼun toj tsots skʼoplal li sbi Jeovae, kʼu yuʼun chakʼ akʼo to oyuk vokolil li Diose, kʼu yuʼun ti chbatik ta vinajel jlom krixchanoetike xchiʼuk ti kʼusi smalaojik li yan tukʼil krixchanoetike. Yikʼaluk van oy xa onoʼox jkʼelojtik li Vivliae, pe muʼyuk van bu kabinojbetik smelolal jech kʼuchaʼal ep krixchanoetik avie. Xi jkoʼolaj kʼuchaʼal jun vinik ti chlokʼ ta xanbal ti ikʼ to osile. Kʼalal chlokʼ batele mu to xil lek osil. Pe kʼalal chlik lokʼuk talel kʼakʼale, kʼunkʼun chlik yil li kʼusitike. Vaʼun, kʼalal lek xa xojobal li Kʼakʼale, chil ti alakʼik sba li kʼusitik ta spat xokone, tsta ta ilel xtok li kʼusitik nom oye. Jaʼtik jech ikʼot ta jtojolaltik ek: kʼalal laj kichʼtik koltael ta yaʼibel lek smelolal li Chʼul Tsʼibetike te laj kiltik ta sba velta «cʼalal to ta yut cʼusi tsnop li Diose» (1 Corintios 2:8-10).

2. ¿Kʼu yuʼun ta onoʼox xi jmuyubaj-o kʼalal ta jchantik li sKʼop Diose?

² Vaʼun chaʼa, ¿mi bal noʼox van ti jaʼ noʼox ta «jkʼeltik jutuk» li melel mantaletik ta Vivliae? Li jpʼel kʼop «cʼalal to ta yut cʼusi tsnop li Diose», ti xie, jaʼ skʼan xal li spʼijil Diose ti akʼo mi makal ta stojolal jutuk mu skotoluk li krixchanoetike, akʼbil snaʼik ta sventa chʼul espiritu li yajtsʼaklomtak Cristoe (1 Corintios 2:7). ¡Jaʼ jun chanubtasel ti muʼyuk noʼox spajeb chakʼbutik li spʼijilal Diose! Ta skoj ti muʼyuk noʼox spajebe, mi jaʼuk onoʼox bu chkojtikintik stekel li kʼusi tsnop Jeova xchiʼuk li stalelale. Pe mi ta jchantik to batel «cʼalal to ta yut cʼusi tsnop li Diose», jaʼ me jech xi jmuyubaj-o sbatel osil jech kʼuchaʼal lik jchantik li kʼusitik baʼyel skʼan chanel ta Vivliae.

3. ¿Kʼu yuʼun skʼan jnabetik lek srasonal li kʼusitik jchʼunojtike?

³ Pe ¿kʼu yuʼun skʼan jchantik «cʼalal to ta yut cʼusi tsnop li Diose»? Yuʼun li kʼusi tstsatsubtas xchʼunel koʼontontike maʼuk noʼox li yojtikinel kʼusitik jchʼunojtike, moʼoj, yuʼun skʼan jnabetik srasonal xtok. Li Chʼul Tsʼibetike tstijbe yoʼonton yajtsʼaklomtak Cristo ti akʼo stunesik li «spʼijil rasonal» sventa «jech chlic [yojtikinik] batel cʼusi tscʼan li Diose, jaʼ li cʼusitic lec chile, li cʼusitic tuqʼue» (Romanos 12:1, NM, 2). Jech noxtok, mi xkaʼibetik smelolal li kʼusi tskʼanbutik Jeovae, jaʼ me ta sjunul koʼontontik ta jchʼunbetik-o smantal. Jaʼ yuʼun chaʼa, li yojtikinel «cʼalal to ta yut cʼusi tsnop li Diose» jaʼ chakʼ kipaltik sventa xkuch kuʼuntik li sujel ta mulile xchiʼuk jaʼ chakʼ «ti oyuc ta coʼntontic ta spasel ti cʼusi leque» (Tito 2:14, Ch).

4. ¿Kʼusi smakoj li xchanel lek Vivliae?

⁴ Sventa xkaʼibetik lek smelolal li kʼusi kʼalal to ta yut tsnop Diose skʼan me jchan jVivliatik. Mu baluk noʼox ti ta jbaba kʼeltik jutuk li mantale, moʼoj, skʼan lek tajmek ta jkʼeltik sventa jech xkakʼtik venta kʼuyelan tstsʼakubtas batel li kʼusi jnaʼojtik xa onoʼoxe (2 Timoteo 1:13). Skʼan xkaʼibetik srasonal li kʼusi chichʼ alele. Kʼalal ta jchantik li Vivliae, skʼan jnopbetik lek smelolal xtok kʼuyelan ta jtunestik li kʼusi la jchantike sventa jech lek kʼusi xkʼot ta nopel kuʼuntik xchiʼuk kʼuyelan xuʼ jkoltatik li jchiʼiltaktike. «Scotol li scʼop Dios tsʼibabil comele jaʼ laj yacʼ ta naʼel ta sventa svuʼel stuc li Diose. Jech lec chtun [kuʼuntik]», jech oxal kʼalal ta jchantike skʼan me teuk smakoj «scotol li scʼop chlocʼ ta ye Diose» (2 Timoteo 3:16, 17; Mateo 4:4). Melel onoʼox ti tsots skʼan xkakʼtik persa xchanel li Vivliae, pe jech noxtok xuʼ xlik jkʼupintik. Jech noxtok, li yaʼibel smelolal «cʼalal to ta yut cʼusi tsnop li Diose» mu toj tsotsuk.

Li Jeovae chakʼbe spʼijil li buchʼutik bikʼit chakʼ sbaike

5. ¿Buchʼutik xuʼ xaʼiik «cʼalal to ta yut cʼusi tsnop li Diose»?

⁵ Mu me buchʼu snop ti mu xaʼibe smelolal «cʼalal to ta yut cʼusi tsnop [Dios]» ta skoj noʼox ti muʼyuk pʼij echʼ ta chanune o ta skoj ti muʼyuk bu nopem xaʼi skʼelel vune. Kʼalal liʼ toʼox oy ta Balumil li Jesuse, ¿buchʼutik laj yakʼbe snaʼ Jeova li kʼusi tskʼane? Maʼuk li pʼijil krixchanoetike o li buchʼutik lek xtojobike, moʼoj, jaʼ li buchʼutik «muʼyuc chanubtasbilic, xchiʼuc ti muʼyuc yabteli[k]» ti bikʼit laj yakʼ sbaik ta chanubtasel yuʼun li Yajtunele, li Jesuse. Jaʼ jechik kʼuchaʼal ololetik ti mu xkoʼolajik kʼuchaʼal li buchʼutik xchanojik lek vune (Mateo 11:25; Hechos 4:13). Ta sventa li kʼusi «chapal xa yuʼun Dios ta sventa ti buchʼutic cʼux ta xaʼie», li jtakbol Pabloe xi laj yalbe li yajtsʼaklomtak Cristoe: «Laj xa yacʼ jnaʼcutic ta sventa li Chʼul Espiritue. Yuʼun li Chʼul Espiritue snaʼoj scotol. Yotquinoj cʼalal to ta yut cʼusi tsnop li Diose», xi (1 Corintios 2:9, Ch, 10).

6. ¿Kʼusi skʼan xal li 1 Corintios 2:10?

⁶ Li chʼul espiritue, ¿kʼu yelan ti «snaʼoj scotol [ti] yotquinoj cʼalal to ta yut cʼusi tsnop li Diose»? Muʼyuk bu chakʼbe yil ta jujuntal li yajtsʼaklomtak Cristo li kʼusi melelik ta Vivliae, moʼoj, yuʼun li Jeovae tstunes xchʼul espiritu sventa tsbeiltas li s-organisasione. Li kʼusitik xojtikinik ta Vivlia li s-organisasion taje, chakʼbe snaʼ li steklumal Diose, ti jmoj tsobol chichʼik ta mukʼ Jeovae (Hechos 20:28; Efesios 4:3-6). Ta spʼejel balumile, li tsobobbailetike koʼol kʼusi chapanbil yuʼunik sventa chchanik, mu epuk jabiletik ch-echʼ sventa chchaʼchanik li kʼusi xchanojik xa onoʼox ta Vivliae. Jaʼ jech taje, ta stojolal li tsobobbaile, li chʼul espiritue tskolta krixchanoetik sventa xchʼies stalelalik ti bikʼit chakʼ sbaike ti persa skʼan jech stalelalik sventa xaʼibeik smelolal «cʼalal to ta yut cʼusi tsnop li Diose» (Hechos 5:32).

¿Kʼusi smakoj batel ti «cʼalal to ta yut cʼusi tsnop li Diose»?

7. ¿Kʼu yuʼun ep krixchanoetik mu xaʼiik ti «cʼalal to ta yut cʼusi tsnop li Diose»?

⁷ Mu me jnoptik ti tsots tajmek ta aʼiel ti «cʼalal to ta yut cʼusi tsnop li Diose». Melel onoʼox ti mukul ta stojolal jutuk mu skotoluk krixchanoetik li yojtikinel taje. Pe maʼuk skʼan xal ti vokol tajmek ta tael li spʼijilal Diose, yuʼun ti kʼusie, li krixchanoetike —ti loʼlabilik yuʼun pukuje— tspʼajik li koltael chakʼ Jeova ta stojolal s-organisasione (2 Corintios 4:3, 4).

8. ¿Kʼusi ti ta yut chalbe skʼoplal Pablo li ta kapitulo 3 ta skarta sventa j-efesiotike?

⁸ Li ta kapitulo 3 ta skarta Pablo sventa j-efesioetike te chakʼ ta ilel ti «cʼalal to ta yut cʼusi tsnop li Diose», te smakoj batel ep kʼusitik melel ta Vivlia ti xojtikin jutuk mu stekeluk yajtuneltak Jeovae, jech kʼuchaʼal li svinajeb buchʼu jaʼ li Nitilulal ti albil onoʼox skʼoplale, li Ajvalilal yuʼun Mesiase xchiʼuk li spatobil yoʼonton jtsop krixchanoetik ti tʼujbilik lokʼel sventa chbatik ta vinajele. Li Pabloe xi laj yale: «Li cʼusi mucul toʼoxe, ti muc xʼacʼbat snaʼic li cristianoetic ta voʼone ijelovic liʼ ta banamile. Pero liʼ ta orae laj xa yacʼbe snaʼ ta sventa Chʼul Espíritu li chʼul jʼalcʼopetic yuʼune xchiʼuc li yajtacbolaltaque. Jaʼ ti scʼoplal coʼol xuʼ chcuʼunintic li cʼusi chacʼ Diose, xchiʼuc ti jun noʼox jbecʼtal chijcʼot ta jcotoltique, ti coʼol xuʼ ta jtatic cʼuxubinel jcotoltic ta sventa Cristo[e]», xi. Jech noxtok, li Pabloe xi laj yale: «Jaʼ cabtel chcacʼ lec ta naʼel ta jamal cʼu xʼelan yutsil li cʼusi nopbil ta voʼone, ti epal jabil muc xacʼ ta naʼel li Dios ti la spas scotol cʼusitic oye», xi (Efesios 3:5-9).

9. ¿Kʼu yuʼun jaʼ jun matanal ti xkaʼibetik smelolal «cʼalal to ta yut cʼusi tsnop li Diose»?

⁹ Li Pablo noxtoke laj yal ti «ta sventa steclumal Dios[e] chlic snaʼic [li] jʼalmantaletic te oyic ta vinajel ti ep ta chop sbijil li Diose» (Efesios 3:10). Li anjeletike ta stabeik sbalil kʼalal chilik kʼuyelan tsbeiltas stsobobbail yajtsʼaklomtak Cristo li Jeovae, yuʼun jaʼ jech chojtikinik lek li spʼijil Diose. ¡Jaʼ jun mukʼta matanal ti xkaʼibetik smelolal li kʼusitik oy ta yoʼontonik snaʼel li anjeletike! (1 Pedro 1:10-12.) Te une, li Pabloe chalbutik ti akʼo «[xkaʼibetik] smelol xchiʼuc scotol yantic yuʼuntac Dios cʼu sjamlej, cʼu snatil, cʼu staylej, cʼu smucʼul» li xchʼunel koʼontontik kʼuchaʼal yajtsʼaklomutik Cristoe (Efesios 3:11, 18). Jkʼelbetik echʼel jun chibuk skʼelobil ti kʼusitik kʼalal to ta yut kʼusi tsnop Dios ti yikʼaluk van muʼyuk bu jchanojtik jeche.

Skʼelobiltak li kʼusitik kʼalal to ta yut tsnop Diose

10, 11. Jech kʼuchaʼal chal Vivliae, ¿bakʼin ipas ta bankilal snitilulal ants li Jesús ti albil xa onoʼox skʼoplale?

¹⁰ Kʼuchaʼal jnaʼojtike, li Jesuse jaʼ li bankilal li ta snitilulal «antse», ti jaʼ li yajnil Dios ta vinajel te albil ta Génesis 3:15. Sventa jsabetik smelolal kʼalal to ya yut kʼusi tsnop Dios ta sventa taje, xuʼ van xi jakʼbe jbatike: «¿Bakʼin ipas ta Nitilulal ti albil xa onoʼox skʼoplal li Jesuse? ¿Mi jaʼo van ta junuk kʼakʼal kʼalal muʼyuk toʼox bu talem ta balumile, kʼalal ivokʼ kʼuchaʼal krixchanoe, kʼalal laj yichʼ voʼe o jaʼo kʼalal chaʼkuxiem xaʼoxe?».

¹¹ Li Diose yaloj xa onoʼox ti «antse» —li s-organisasion te ta vinajele— ta la x-ayan snitilulal xchiʼuk ta la xpechʼbe ta tekʼel sjol li chone. Pe li «antse», li yajnil Diose, ta smilal noʼox jabil echʼ ti chʼabal-o snitilulal sventa tslajes li Satanás xchiʼuk yabtele. Jaʼ yuʼun li j-alkʼop Isaiase laj yal ti xkoʼolaj kʼuchaʼal jun ants ti mu snaʼ x-alaje xchiʼuk ti «oy ep svocol[e]» (Isaías 54:1, 5, 6). Kʼot yorail un, li Jesuse vokʼ ta Belén. Akʼo mi jech, kʼalal yichʼ xaʼox voʼe —kʼalal laj yichʼ tʼujel ta chʼul espiritu xchiʼuk ti kʼalal kʼot ta xnichʼon Dios ta espiritue— jaʼo xi laj yal li Jeovae: «Liʼi jaʼ Jnichʼon», xi (Mateo 3:17; Juan 3:3). Vul xaʼox ta lokʼel un li bankilal snitilulal antse. Ta mas jelavele laj yichʼ tʼujel ta chʼul espiritu yan yajtsʼaklomtak Jesús, vaʼun jaʼ jech kʼotik ta xnichʼnab Dios. Ta skoj ti jal tajmek chat yoʼonton ti mu x-alaje, li «antse» ti jaʼ li yajnil Jeovae xuʼ xa me «cuxetuc noʼox [yoʼonton]» (Isaías 54:1; Gálatas 3:29).

12, 13. ¿Kʼusitik tekstoal ta Vivlia chakʼ ta ilel ti jtsop yajtsʼaklomtak Cristo tʼujbilik ti liʼ to oyik ta Balumile, jaʼik li «jʼabtel ti jun [«tukʼ», NM] yoʼnton [...], ti lec bije»?

¹² Li xchibal skʼelobil kʼusitik kʼalal to ta yut tsnop Dios ti akʼbil kojtikintike jaʼ li skʼoplal 144,000 ti stʼujoj lokʼel Jeova ta stojolal krixchanoetike (Apocalipsis 14:1, 4). Li yajrextikoutik Jeovae xkaʼibetik smelolal ti jtsop yajtsʼaklomtak Cristo tʼujbilik ti kuxulik ta Balumil te van buuk orae, jaʼik li «jʼabtel ti jun [«tukʼ», NM] yoʼnton [...], ti lec bije», yuʼun jech kʼuchaʼal laj yal Jesuse, «ta smacʼlin» ta yorail li xchiʼiltak ta abtele (Mateo 24:45). Vaʼun chaʼa, ¿mi xuʼ xkalbetik skʼoplal ta Vivlia taje? ¿Mi mu van jaʼuk laj yalbe skʼoplal Jesús buchʼuuk noʼox yajtsʼaklom ti tsmakʼlin ta mantal li yermanotake?

¹³ Li Diose xi onoʼox yalojbe li jteklum Israele: «Voʼoxuc testigooxuc cuʼun, voʼoxuc cajtuneloxuc [«kajtunelot», NM], vuʼun la jtʼujoxuc», xut (Isaías 43:10). Pe kʼelavil, li ta sjabilal 11 yuʼun nisán ta sjabilal 33 ta jkʼakʼaliltike, li Jesuse laj yal ti spʼajoj xa Dios li lum taje, yuʼun maʼuk xa yajtunel chaʼi. «Ta xlocʼ batel ta atojolic li ventainel yuʼun Diose. Jaʼ te ta xbat ta stojolic li bochʼotic lec tstucʼulanique», xut li jbabeetik ta Israele. Xchiʼuk xi laj yalbe li krixchanoetike: «Aʼyo avaʼyic, ictabil chcom o li alumalique», xi (Mateo 21:43; 23:38). Jaʼ jech, li steklumal Israele muʼyuk bu tukʼ laj yakʼ sba xchiʼuk muʼyuk bu pʼij la spa sba ta stojolal Jeova (Isaías 29:13, 14). Jaʼ yuʼun, kʼalal la sjakʼ Jesús buchʼu li j-abtel ti tukʼ yoʼonton xchiʼuk ti lek pʼije, li kʼusi la sjakʼ ta melele jaʼ ti buchʼu lumal ti tukʼe xchiʼuk ti lek pʼij ti ch-och ta xkʼexol li Israel sventa jech chkom ta j-abtel yuʼun li Diose. Li jtakbol Pedroe la stakʼ ti kʼalal la stsʼibabe echʼel karta li stsobobbail yajtsʼaklomtak Cristo ti tʼujbilike: «Voʼoxuque [...] chʼul mucʼta lum xa cʼotemoxuc, yuʼuninojoxuc xa li Diose», xi (1 Pedro 1:4; 2:9). Li steklumal ta mantale —li «Israel chcʼotic ta sventa Diose»— jaʼ ikʼot ta achʼ yaj-abtel Jeova (Gálatas 6:16). Jech kʼuchaʼal li sjunul steklumal Israel ta voʼne ti «kajtunelot» x-utate, ti jun noʼox albat skʼoplale, li yajtsʼaklomtak Cristo tʼujbilik ti kuxulik ta Balumil te van buuk orae jaʼik li jun noʼox «jʼabtel ti jun [«tukʼ», NM] yoʼnton [...], ti lec bije». ¡Jaʼ jun matanal jtaojtik ti chkichʼtik makʼlinel yuʼun li yaj-abtel Diose!

Xuʼ me kʼupil chkaʼitik li xchanel Vivlia ta jtuktike

14. ¿Kʼu yuʼun xuʼ xlik jkʼupintik li xchanel Vivliae, ti maʼuk noʼox ta jkʼeltike?

¹⁴ Kʼalal mas xkaʼibetik smelolal jtosuk kʼusi chal Vivliae, xi jmuyubaj tajmek, yuʼun chkiltik ti tstsatsub li xchʼunel koʼontontike. Jech oxal, li xchanel Vivliae —ti maʼuk noʼox ta jkʼeltike— xuʼ chlik jkʼupintik. Jaʼ yuʼun chaʼa, kʼalal cha kʼel vunetik yuʼun yajtsʼaklomtak Cristoe, xi xa jakʼbe abae: «¿Mi oy kʼusi achʼ chakʼ jnaʼ li kʼusi chchapbe smelolal liʼe? ¿Mi xuʼ van xkalbe skʼoplal yan tekstoetik ta Vivlia o xkalbe srasonaltak ti jech yaʼuk li kʼusi chal li mantal liʼe?». Mi oy kʼusi cha jakʼ ti cha kʼan cha nabe stakʼobile tsako ta vun, vaʼun jaʼo xa chanbe skʼoplal kʼalal cha chan avun ta yan veltae.

15. ¿Kʼusi jtosukal xchanel vun ti xuʼ chakʼ mas jkʼupintik li xchanel Vivliae? ¿Xchiʼuk kʼusi tskoltautik sventa oyuk-o sbalil?

¹⁵ ¿Kʼusi jtosukal xchanel vun xuʼ chakʼ mas jpʼijiltik xchiʼuk ti ta jkʼupintike? Jech kʼuchaʼal liʼe, xuʼ van jkʼelbetik smelolal kʼalal to ta yut kʼusi tsnop Dios ta sventa li tratoetik yakʼoj ti tstabeik sbalil li krixchanoetike. Jech noxtok xuʼ jchantik li albil kʼopetik ti chalbe skʼoplal Jesuse o jkʼeltik ta jujun versikulo junuk slivroal albil kʼopetik ta Vivlia. Yan ti kʼusi stakʼ pasel noxtoke jaʼ ti jkʼelbetik li sloʼil xkuxlejal yajrextikotak Jeova avie, xuʼ van jaʼ jkʼeltik li livro Los testigos de Jehová, proclamadores del Reino de Dios mi oy ta junuk kʼop ti xkaʼitike.a Jech noxtok xuʼ jchantik yan velta li «Preguntas de los lectores» ti lokʼesbilik ta La Atalaya leʼ xa tale, yuʼun ta melel tskoltautik yaʼibel smelolal jayibuk tekstoetik. Jkʼelbetik lek li sprevailtak chal ta Vivlia ti kʼu yuʼun jech chal li ta mantale. Jaʼ me jech ta xtojob li «spʼijil nopbenal» kuʼuntike xchiʼuk ti xi jtojob ta skʼelel kʼusi lek xchiʼuk kʼusi chopole (Hebreos 5:14, NM). Jech noxtok, mi ta jtsʼibatik ta jVivlia jtuktik o ta jlikuk vune, li kʼusi ta jchantike oy-o me sbalil ta jtojolaltik xchiʼuk li buchʼutik ta jchanubtastike.

Koltao avalab anichʼnabik sventa skʼupinik li xchanel Vivliae

16. ¿Kʼu yelan xuʼ xchanubtas yalab xnichʼnabik li totil-meʼiletik sventa skʼupinik xchanel Vivlia li ololetike?

¹⁶ Ep me tajmek kʼusi xuʼ spasik li totil-meʼiletik sventa stijbeik yoʼonton yalab xnichʼnabik ta spasel li kʼusitik ta mantale. Skʼan me stsakik lek ta venta ti xaʼibeik smelolal ta yut kʼusi tsnop Dios li ololetike. Lek van ti xavalbeik ti akʼo sabeik smelolal junuk loʼile xchiʼuk ti jech xa jakʼbeik kʼusi la xchanik kʼalal cha chanunajik xchiʼuk avutsʼ avalalike. Li chanun taje jaʼ me yorail xtok sventa xa chanik xchiʼukik ti kʼuyelan tspakbeik skʼoplal li kʼusitik xchʼunojike xchiʼuk ti kʼuyelan xuʼ xakʼik ta ilel ti melel li kʼusi xchanojike. Jech noxtok, li koltael chakʼ foyeto Veamos «la buena tierra»b sbie xuʼ te xavakʼbeik yojtikin li lumetik chal Vivliae xchiʼuk ti jaʼ jech xaʼibeik mas smelolal li loʼiletik li ta skʼelel Vivlia ta jujun xemanae.

17. ¿Kʼu yuʼun skʼan oyuk noʼox smelolal jchʼakbetik yorail ta sabel mas smelolal li kʼusi chal Vivliae?

¹⁷ Melel onoʼox chaʼa, li sabel mas smelolal li kʼusi chal Vivliae mas me tstsatsub-o xchʼunel koʼontontik. Akʼo mi toj kʼupil chkaʼitik, mu me stakʼ ti te xbat-o kʼakʼal ti jech mu xa xachapan aba ta sventa li tsobajeletike, yuʼun me jaʼ jech chakʼbutik yan chanubtasel li Jeova ta sventa li «jʼabtel ti jun [«tukʼ», NM] yoʼnton [...], ti lec bije». Pe jvules me ta joltik noxtok ti kʼalal ta jsabetik mas smelolal li kʼusi ta jchantike mas me tsots skʼoplal ta aʼiel kʼalal chkakʼ jaytosuk jloʼiltik ta tsobajeletike, jech kʼuchaʼal li ta Xchanel Livro yuʼun Tsobobbaile o li kʼusitik mas tsotsik skʼoplal ta xchanel Vivlia jujun xemana ti ch-echʼ ta Chanob vun sventa Kabteltik yuʼun Diose.

18. ¿Kʼu yuʼun oy sbalil ti xkakʼbetik yipal ta xchanel «cʼalal to ta yut cʼusi tsnop li Diose»?

¹⁸ Jaʼ jech, li xchanel kʼalal to ta yut kʼusi chal sKʼop Diose xuʼ tsnopajesutik mas ta stojolal Jeova. Li Vivliae chal ti kʼu yuʼun toj tsots skʼoplale: «Li jbijiltique lec chtun cuʼuntic jech chac cʼu chaʼal lec chtun cuʼuntic li taqʼuine. Pero li bijubtasele jaʼ tsots stu, yuʼun li bochʼo oy lec sbijile ta xpojat yuʼun», xi (Eclesiastés 7:12). Jaʼ yuʼun, oy sbalil ti xkakʼbetik lek yipal yaʼibel smelolal li kʼusitik sventa mantale. Stekel li buchʼutik chchanbeik lek smelolal li kʼusitik kʼalal to ta yut kʼusi tsnop Diose, li Vivliae xichalbee: «Chlic avotquin batel cʼusi tscʼan li Diose», xi (Proverbios 2:4, 5).

[Tsʼibetik ta yok vun]

¿Mi xchapbe kuʼuntik smelolal?

• ¿Kʼusitik ti «cʼalal to ta yut cʼusi tsnop li Diose»?

• ¿Kʼu yuʼun muʼyuk ta jtabetik spajeb ta xchanel li kʼusitik kʼalal to ta yut tsnop Diose?

• ¿Kʼu yuʼun oy ta yok-skʼob skotol yajtsʼaklomtak Cristo li yojtikinel «cʼalal to ta yut cʼusi tsnop li Diose»?

• ¿Kʼusi stakʼ jpastik sventa jtabetik mas sbalil li kʼusitik «cʼalal to ta yut cʼusi tsnop li Diose»?

[Lokʼol ta pajina 28]

¿Bakʼin ipas ta Nitilulal ti albil xa onoʼox skʼoplal li Jesuse?

[Lokʼol ta pajina 31]

Li totil-meʼiletike xuʼ xalbe yalab xnichʼnabik ti akʼo sabeik smelolal junuk loʼil ta Vivlia kʼalal skʼan to xchanunajik xchiʼuk yutsʼ yalalike