Jsaʼtik li beiltasel chakʼ Dios ta skotol li kʼusitik ta jpastike
«Li Diose jaʼ Dios cuʼuntic o sbatel osil; jaʼ jtojobtasvanej cuʼuntic o sbatel osil.» (SAL. 48:14.)
1, 2. ¿Kʼu yuʼun skʼan jsaʼtik li beiltasel chakʼ Jeovae, ti maʼuk jpat koʼonton ta jtojolaltike, xchiʼuk kʼusitik ta jtakʼtik li ta xchanobil liʼe?
¡TOJ kʼun ti jloʼla-o jbatik li ta kʼusitik chʼabal sbalile o li kʼusi tsokesvane! (Pro. 12:11.) Mi ta melel oy kʼusi ta jkʼan ta jpastik ti mu lekuke, li koʼontontike ep ta jyalel srasonal chalbutik sventa jpastik (Jer. 17:5, 9). Jaʼ yuʼun xi pʼij la skʼanbe Jeova li jtsʼibajom yuʼun Salmoe: «Tacbun tal li luz avuʼune xchiʼuc li cʼusitic melele, yuʼun jaʼ acʼo stojobtasicun batel», xi (Sal. 43:3). La spat yoʼonton ta stojolal Jeova, maʼuk li ta kʼusitik snaʼ uni jutuke, jaʼ la stʼuj li lekil tojobtasele. Jech ek li voʼotike, lek me ti jkʼanbetik Dios akʼo xi sbeiltasutike.
2 Pe, ¿kʼu yuʼun jaʼ mas skʼan jpat-o koʼontontik li ta beiltasel chakʼ Diose ti maʼuk li ta yan kʼusitike? ¿Bakʼin ti skʼan jsaʼtike? ¿Kʼusi talelalil tskoltautik ta saʼel? ¿Kʼuxi tsbeiltasutik li Jeovae? Li xchanobil liʼe jaʼ tstakʼbutik li sjakʼobiltak ti tsotsik skʼoplal taje.
¿Kʼu yuʼun xuʼ jpat-o koʼontontik li ta beiltasel chakʼ Jeovae?
3-5. ¿Kʼu yuʼun jpatoj-o sjunul koʼontontik li ta beiltasel chakʼ Jeovae?
3 Li Jeovae jaʼ li jTotik ta vinajele (1 Cor. 8:6). Toj lek xojtikinutik xchiʼuk xil li kʼusitik oy ta koʼontontik noxtoke (1 Sam. 16:7; Pro. 21:2). Xi laj yal li ajvalil Davide: «Voʼot xavotquinun cʼalal chichoti, xchiʼuc cʼalal chivaʼi aqʼueloj tal ta nom scotol li cʼusitic ta jnope. Acʼo me muʼyuc toʼox chlocʼ ta que li cʼusi chcale, pero li voʼote, Mucʼul Dios, avotquinoj xa onoʼox», xi (Sal. 139:2, 4). Ta sventa ti xojtikinutik lek li Diose, snaʼoj ta melel li kʼusi jaʼ sventa jlekilaltike. Maʼuk noʼox taje: yuʼun li stuke snaʼ skotol. Mu kʼusi ti mu xile. Toj echʼ noʼox xaʼibe smelolal li kʼusitike, mi jaʼuk xkoʼolaj kʼuchaʼal li krixchanoetike. Xojtikinbe xa onoʼox stsutseb ta slikebal li kʼusitik chichʼ pasele (Isa. 46:9-11; Rom. 11:33). «Stuc noʼox [...] ti echʼem sbijile.» (Rom. 16:27.)
4 Jech noxtok, li Jeovae skʼanojutik xchiʼuk tskʼan ti kʼusi lek ta jtojolaltike (Juan 3:16; 1 Juan 4:8). Li kʼanelal taje jaʼ chtijbat-o yoʼonton ti chakʼbutik kʼusitike. Xi la stsʼiba li jchʼunolajel Santiagoe: «Scotol li cʼusi leque xchiʼuc li cʼusitic lec tucʼ chijʼacʼbate jaʼ te ta xlic tal ta vinajel. Jaʼ chistacbutic tal li Jtotic Dios ti la spas li cʼusitic chacʼ xojobale», xi (Sant. 1:17). Li buchʼutik chakʼ sbaik ta beiltasel ta stojolale ta me sbalinbeik ta jyalel li slekil yoʼontone.
5 Ta slajebale, stuk noʼox skotol xuʼ yuʼun li Jeovae. Li jtsʼibajom yuʼun Salmoe xi laj yale: «Li bochʼo chabibil yuʼun li Bochʼo te oy ta vinajele, ti oy ta xyaxinal li Bochʼo echʼem svuʼele, jech chal ta stojol li Mucʼul Diose: “Voʼot jpojubbailot, voʼot jnacʼubbailot, voʼot Diosot cuʼun, jpatoj o coʼnton ta atojol”», xi (Sal. 91:1, 2). Kʼalal ta jtamtik echʼel li beiltasel chakʼ Jeovae, jaʼ me ta jsaʼtik li pojelal ta yaxinal Dios ti ta onoʼox xchabiutike. Akʼo mi xkiltik kontrainel, jaʼ me ta xikutik. Mi jaʼuk onoʼox bu chi yiktautik (Sal. 71:4, 5; kʼelo Proverbios 3:19-26). Jech kʼuchaʼal chkiltike, li Jeovae snaʼoj li kʼusi sventa jlekilaltike, jaʼ tskʼan li kʼusi sventa jlekilaltike xchiʼuk oy sjuʼel sventa chakʼbutik li kʼusi sventa jlekilaltike. ¡Mu me bu lek ta jyalel mi ta jpʼajtik li beiltasel chakʼe! Jkʼeltik tana un bu ti ta jkʼantik akʼo sbeiltasutike.
¿Bu ti jkʼantik beiltasel yuʼun Diose?
6, 7. ¿Butik ti chtun kuʼuntik li beiltasel chakʼ Diose?
6 Ta melel, chtun kuʼuntik li beiltasel chakʼ Dios ta sjunul jkuxlejaltike: ta jbikʼtaltik kʼalal to ta jmalubeltik. Li jtsʼibajom yuʼun Salmoe xi laj yale: «Li Diose jaʼ Dios cuʼuntic o sbatel osil; jaʼ jtojobtasvanej cuʼuntic o sbatel osil», xi (Sal. 48:14). Jech kʼuchaʼal li jtsʼibaej salmoe, li yajtsʼaklomutik Cristoe pʼijutik xchiʼuk skotol ora ta jkʼanbetik Jeova ti akʼo sbeiltasutike.
7 Pe kʼelavil, oy bakʼintik ti chtun tajmek kuʼuntik li beiltasel chakʼ Diose. Yikʼaluk van jaʼo kʼalal mu xa xnel jvokoltik chkaʼitike, ta skoj ti yakal ta jnuptantik kontrainele o ti tsakbilutik ta tsatsal chamele, o jaʼo ti kʼalal chʼabal xa kabteltike (Sal. 69:16, 17). Mi jech ta jnuptantik taje xuʼ me xi jnopaj ta stojolal Jeova, yuʼun me jaʼ chakʼ kipaltik sventa xkuch kuʼuntik xchiʼuk jaʼ tskoltautik sventa lek kʼusi xkʼot ta nopel kuʼuntik. ¡Jaʼ jun muyubajel ti jnaʼojtike! (Kʼelo Salmo 102:17.) Jech ta melel, oy to onoʼox bu yan ti ta jkʼantik beiltasel ta stojolal noxtoke. Jech kʼuchaʼal liʼe, kʼalal chkalbetik lekil aʼyej sventa Ajvalilal yuʼun Dios li jlakʼnataktike ta jkʼantik ti akʼo sbeiltasutik li Diose, yuʼun jaʼ noʼox jech xuʼ lek kʼusi xkʼot ta pasel kuʼuntik. Skotol velta kʼalal oy kʼusi ta jnop ta jpastike —mi jaʼ sventa chʼayob oʼontonal, ti kʼuyelan ta jmeltsan jbatike, li sventa kamigotaktike, sventa abtelal, sventa chanun o sventa kʼusiuk yan—, skʼan me oyuk ta joltik li smantaltak Diose sventa pʼijukutik ti kʼusi ta jpastike. Ta melel, skotol ora ta jkʼantik li beiltasel chakʼ Diose.
Li kʼusi xibal sba chkʼot ta pasel kʼalal ta jpʼajtik li beiltasel chakʼ Diose
8. ¿Kʼusi te smakoj li kʼusi kʼot ta pasel ta skoj ti la snop tsloʼ Eva li sat teʼ ti mu stakʼ sloʼe?
8 Skʼan me oyuk ta joltik ti skʼan xlokʼ ta koʼontontik xchʼunel li beiltasel chakʼ Diose. Muʼyuk bu tsujutik mi mu jkʼantike. Li baʼyel krixchano ti muʼyuk bu la skʼan la xchʼunbe li smantaltak Jeovae jaʼ li Evae, ti kʼusi kʼot ta stojolale jaʼ chakʼ kiltik ti tsots kʼusi chkʼot ta pasel kʼalal jech ta jpastike. Jnoptik noʼox avaʼi kʼusi te smakoj li kʼusi kʼot ta nopel yuʼune. Li Evae la sloʼ li sat teʼ ti mu stakʼ loʼele, yuʼun tskʼan «[chkoʼolaj] jech chac cʼu chaʼal Dios» sventa chojtikin «cʼusi lec xchiʼuc cʼusi chopol» (Gén. 3:5). Kʼalal jech la spase, la spojbe sderecho Dios; la snop stuk li kʼusi lek ta sventae xchiʼuk li kʼusi chopole, mu jaʼuk laj yakʼ sba ta beiltasel ta stojolal Dios. Jaʼ jech la spʼaj li mukʼul pas mantal yuʼun Jeovae. Li Evae la skʼan tsventain sba stuk, li smalal ti Adán sbie jech la stoy sba ek (Rom. 5:12).
9. ¿Kʼusi xkoʼolaj-o li spʼajbel smantal Diose, xchiʼuk kʼu yuʼun toj bol kʼalal jech chichʼ pasele?
9 Jaʼ me jech ek un, mi muʼyuk ta jtsaktik ta venta li smantaltak Jeovae yakal me ta jpʼajbetik li mukʼul pas mantal yuʼune. Jnopbetik skʼoplal liʼe, jun krixchano ti chkʼot ta tsobobbaile nopem xa xaʼi skʼelel pornografia. Li krixchano taje snaʼojbe lek li smantal Dios ta sventa li kʼusitik ibal sbae xchiʼuk snaʼoj ti mu jaʼuk stakʼ jloʼiltatike. Vaʼun chaʼa, ¿kʼuxi xa noʼox un ti kʼupil sba chil ta kʼelel ti jaʼ noʼox li kʼusi tskʼan bekʼete? (Efe. 5:3.) Kʼalal tspʼajbe smantal Dios li krixchano taje, ta melel jaʼ tspʼaj li mukʼul pas mantal yuʼun Jeovae xchiʼuk li yabtele (1 Cor. 11:3). Toj bol me ti jech la snop tspase, yuʼun jech kʼuchaʼal laj yal Jeremiase «muc sventainojuc stuc yorail li cristianoe, ti mu xuʼ yuʼun tspas mantal stuc li cʼusi chcʼot ta pasel ta stojole» (Jer. 10:23).
10. ¿Kʼu yuʼun skʼan jnoptik lek kʼu yelan ta jtunestik ti xuʼ jtʼuj jtuktik ti kʼusi ta jkʼantike?
10 Oy buchʼutik chchibal kʼoptaik li kʼusi laj yal Jeremiase, yuʼun tsnopik ti mi laj yakʼ Dios ti akʼo jnop jtuktik ti kʼusi ta jkʼantike, mu la staʼo ti chchapanutik kʼalal jech ta jpastike. Akʼo mi jech, mu me xchʼay ta joltik ti akʼo mi jaʼ jun matanal yakʼoj Dios ti ta jnop jtuktike, oy me kʼusi jbainojtik noxtok. Jaʼ jech, stekel ti kʼusi ta jpastik xchiʼuk chkaltike ta onoʼox me xkichʼtik-o chapanel (Rom. 14:10). Xi laj yal li Jesuse: «Li cʼusi oy ta avoʼntonique jaʼ jech chlocʼ ta aveic», xi. Xi laj yal noxtoke: «Ta yut yoʼnton cristiano ta xlic tal li cʼusi chopol tsnope, li milvaneje, li mulivajele, li cʼopanejbaile, li eleqʼue, li epalcʼope, li xchopolcʼoptael yantique», xi (Mat. 12:34; 15:19). Jech kʼuchaʼal chkiltike, li kʼusi ta jpastik xchiʼuk kʼusi ta xkaltike jaʼ svinajeb ti kʼusi oy ta koʼontontike, jaʼ ti kʼu kelantik ta melele. Jaʼ yuʼun, li yajtsʼaklomtak Cristo ti lek pʼijike jaʼ onoʼox tsaʼik li beiltasel chakʼ Jeovae. Li yajtsʼaklomtak Cristo taje «tucʼ yoʼntonic» ch-ilatik yuʼun Jeova, jaʼ yuʼun lek kʼusi tspasbatik (Sal. 125:4).
11. ¿Kʼusi ta jchantik ta sventa li j-israeletike?
11 Jvules ta joltik li kʼusi kʼot ta stojolal j-israeletike. Kʼalal lek kʼusi la snopike xchiʼuk ti la xchʼunbeik li smantal Jeovae, ipojatik (Jos. 24:15, 21, 31). Pe kʼelavil un, nopajtik noʼox ch-echʼik ta mas ta skoj ti xuʼ snop stukike. Xi albatik ta skʼakʼalil Jeremiase: «Muʼyuc xischʼunbeicun. Mi jaʼuc laj yaqʼuic ta venta. Cʼajomal noʼox yacʼojbeic yipal ta spasel ti bu icʼbil yoʼntonic yuʼune. Cʼalal oy scʼoplal ta sutic talel ta jtojole, cʼajomal stoyel yaʼiic laj svalopatinicun comel», xi (Jer. 7:24-26, Ch). ¡Toj kʼux ta alel! Mu me jchʼunbetik smantal koʼontontik ta skoj jboliltik o ta skoj ti jaʼ jkʼanojtik tajmek li kʼusi stakʼ kʼupinele xchiʼuk ti jpʼajbetik li beiltasel chakʼ Jeovae. Mi jech ta jpastike, yakal me xi jsut ta valopat, maʼuk ti yakal xi jxanav echʼele.
¿Kʼusi skʼan sventa jchʼuntik li beiltasel chakʼ Diose?
12, 13. 1) ¿Kʼusi talelalil tstij koʼontontik ta xchʼunel li beiltasel chakʼ Diose? 2) ¿Kʼu yuʼun tsots skʼoplal ti oyuk xchʼunel oʼontonale?
12 Li kʼanelal kuʼuntik ta stojolal Jeovae jaʼ me tstij koʼontontik ta xchʼunbel li beiltasel chakʼe (1 Juan 5:3). Akʼo mi jech, oy to kʼusi skʼan mas, mu jaʼuk noʼox li kʼanelale. Xi laj yal li Pabloe: «Ta sventa xchʼunojel coʼntontic chijxanov batel; maʼuc ta sventa yuʼun jqʼueloj xa ta jsatic», xi (2 Cor. 5:6, 7). ¿Kʼu yuʼun toj tsots skʼoplal li xchʼunel oʼontonale? Veno, li Jeovae «chistojobtasu[tik] batel ta tuqʼuil be», pe li be taje maʼuk ch-ikʼvan echʼel ta jun kuxlejal ti oy lek kʼulejale o ti ep matanaletike (Sal. 23:3). Jaʼ yuʼun skʼan xkakʼ lek jsatik ta sventa li xchʼunel oʼontonal ti ep tajmek matanaletik ta mantal chakʼe, ti jaʼ tstaik li buchʼutik chtunik ta stojolal Diose (kʼelo 2 Corintios 4:17, 18). Li xchʼunel oʼontonale jaʼ tskoltautik ti akʼo xi jmuyubaj noʼoxe, akʼo mi jutuk kʼusi oy kuʼuntik (1 Tim. 6:8).
13 Li Jesuse laj yal ti melel yichʼel ta mukʼ Diose oy la kʼusi ta xkiktatik komel ta skoj, ta sventa taj xtoke skʼan me oyuk xchʼunel koʼontontik (Luc. 9:23, 24). Oy jlom yajtuneltak Diose ep kʼusitik yiktaojik komel xchiʼuk tsots tajmek li xkuxlejalike: yilojik povreal, ilbajinel, pʼajel xchiʼuk yichʼojik kontrainel (2 Cor. 11:23-27; Apo. 3:8-10). Kuchem yuʼunik xchiʼuk muʼyuk bu chʼayem-o yuʼunik li muyubajele, koliyal ti staoj-o yav li xchʼunel yoʼontonike (Sant. 1:2, 3). Kʼalal staoj yav li xchʼunel koʼontontike, jnaʼojtik ta melel ti jaʼ onoʼox mas lek ti jchʼuntik li beiltasel chakʼ Jeovae xchiʼuk ti jaʼ onoʼox sventa jlekilaltike. Ta melel, li buchʼutik tukʼ-o chakʼ sbaike ta me sta smotonik, ti xtoj-o ta jyalel li vokoliletik chichʼ nuptanel avie (Heb. 11:6).
14. ¿Kʼu yuʼun bikʼit laj yakʼ sba li Agare?
14 Sventa jchʼuntik li beiltasel chakʼ Diose skʼan me bikʼit xkakʼ jbatik. Jaʼ jech chakʼ kiltik li Agar ti jaʼ yajtunel Sarae. Kʼalal laj yakʼ venta Sara ti mu x-alaje, laj yalbe smalal ti akʼo xchiʼin ta vayel li yajtunele. Kom yol li Agare, ti jaʼ xnichʼon Abrahame, vaʼun lik stoy sba ta stojolal li smeʼ ajvale. Vaʼun, li Sarae «tsots lic yutsʼinta» li Agare jaʼ yuʼun ijatav. Te une, tae yuʼun jun yaj-anjel Jeova xchiʼuk xi albate: «Sutan batel ta stojol li avajvale. Chʼunbo scotol li cʼusitic chayalbote», x-utat (16:2, 6, 8, 9). Tskʼan xa van yaʼi Agar ti yanuk-o mantal laj yichʼ albele, yuʼun sventa xchʼun li kʼusi albat yuʼun anjele skʼan me stukʼibtas li stalelale. Akʼo mi jech, bikʼit laj yakʼ sba xchiʼuk la spas li kʼusi albat yuʼun anjele, koliyal taje li yol ti Ismael sbie, lek chabibil ivokʼ li ta skarpana Abrahame.
15. ¿Butik ti skʼan bikʼit xkakʼ jbatik sventa jchʼamtik li beiltasel chakʼ Jeovae?
15 Yikʼaluk van skʼan jbikʼtajes jbatik ek sventa xkakʼ sbeiltasutik li Jeovae. Jnoptik ta sventa li kʼusitik liʼe. Jun ermanoe yikʼaluk van skʼan xchʼun ti muʼyuk lek chil Jeova jtosuk chʼayob oʼontonal ti lek chil li stuke. Yikʼaluk van oy junuk ermano noxtoke chopol kʼusi la spasbe yan krixchano, vaʼun skʼan skʼanbe perton, o ti oy kʼusi muʼyuk lek la spas xchiʼuk ti skʼan jamal xale. ¿Pe mi la spas tsatsal mulil jun ermano une? Skʼan bikʼit xakʼ sba xchiʼuk xalbe li moletike. Yikʼaluk oy buchʼu xichʼ lokʼesel ta tsobobbail. ¿Kʼusi skʼan spas sventa x-och yan velta ta tsobobbail? Skʼan bikʼit xakʼ sba sventa akʼo sutes yoʼonton xchiʼuk akʼo yikta li xchopol talelale. Ta sventa taje xchiʼuk ta sventa kʼusitik yantike, tspat me oʼontonal li kʼusi chal Proverbios 29:23: «Li jtoybae ta syalesat yuʼun li stoyobbaile; yan li bochʼo biqʼuit chacʼ sbae ta xʼichʼat ta mucʼ».
¿Kʼuxi tsbeiltasutik li Jeovae?
16, 17. ¿Kʼuxi xuʼ jtabetik lek sbalil li beiltasel chakʼ Vivliae?
16 Ti bu noʼox lek chlik talel li beiltasele jaʼ li ta sKʼop Dios yakʼoj ta naʼele, li Vivliae (kʼelo 2 Timoteo 3:16, 17). Mi ta jkʼan ta jtabetik lek sbalile, mu me baʼyeluk ta jmalatik ti kʼusi tsots xkʼot ta pasel ta jtojolaltike, vaʼun ti jaʼ to jsaʼtik li koltael ta Vivliae. Moʼoj, yuʼun skʼan jnopes jbatik ta skʼelel jujun kʼakʼal (Sal. 1:1-3). Jaʼ me jech chkojtikintik lek li tojobtaseletik ti yakʼoj ta naʼel Diose. Jech ta jnoptik kʼuchaʼal Diose xchiʼuk lek me chapalutik sventa stsal kuʼuntik kʼusiuk vokolil, akʼo mi muʼyuk jmalaojtik.
17 Pe jech noxtok, tsots me skʼoplal ti jnoptik lek li kʼusi ta jchantik ta Vivliae xchiʼuk ti jpastik orasion ta sventae. Kʼalal ta jnopbetik skʼoplal li kʼusi chal Vivliae, ta jtatik mantal ti xuʼ chkakʼ ta jkuxlejaltik kʼalal oy kʼusi ta jnuptantike (1 Tim. 4:15). Mi kʼot ta pasel tsots vokolile, jpastik orasion ta stojolal Jeova sventa jkʼanbetik ti akʼo xi sbeiltasutike. Li xchʼul espiritue tskoltautik ta svulesel ta joltik li beiltaseletik ti jchanojtik xa onoʼox ta Vivliae o li ta vunetik kuʼuntike (kʼelo Salmo 25:4, 5)
18. ¿Kʼuxi tsbeiltasutik Jeova ta stojolal li kermanotaktike?
18 Yan ti bu ta jtatik xtok li beiltasel chakʼ Diose jaʼ li ta stojolal kermanotaktike. Jvokʼ li kermanotik ti tsots skʼoplale jaʼ li «jʼabtel ti jun [«tukʼ», NM] yoʼnton [...], ti lec bije» xchiʼuk li Jtsop Jbeiltasvanej yuʼun ti chtun ta yajkʼopojele. Li j-abtele chakʼilanbutik veʼlil ta mantal li ta vunetike, li ta tsobajeletike xchiʼuk li ta mukʼtik tsobajeletike (Mat. 24:45-47; koʼoltaso xchiʼuk Hechos 15:6, 22-31). Jech noxtok, li ta tsobobbaile oy ermanoetik ti lek xa yijik ta mantale, mas to li moletike, ti lek chapalik sventa chakʼik koltael xchiʼuk tojobtaseletik ti lokʼemik ta Vivliae (Isa. 32:1). Li kerem-tsebetik ti naka yajtsʼaklomtak Cristo ta snailike oy jun koltael ti toj tsots skʼoplal staojik noxtoke: jaʼ li stot smeʼik ti akʼbil yabtelik yuʼun Dios sventa xtukʼibtasatike. Jaʼ ti buchʼu onoʼox skʼan skʼanbeik beiltasele (Efe. 6:1-3).
19. ¿Kʼusitik bendision ta jtatik ti ta jsaʼtik skotol ora li beiltasel chakʼ Jeovae?
19 Jaʼ jech, ep ta tos ti kʼuyelan tsbeiltasutik li Jeovae xchiʼuk jtunestik me ti bu kʼalal xuʼ kuʼuntik li beiltasel chakʼe. Jvokʼ kʼakʼal ti kʼalal tukʼ laj yakʼ sbaik li j-israeletike, xi laj yalbe skʼoplalik ta stojolal Dios li ajvalil Davide: «Voʼot ti la spat yoʼnton ta atojol li jmoltot jyameʼ ta voʼonee; la spat yoʼnton, jech laj acolta. La scʼanic vocol ta atojol, jech laj acolta loqʼuel ta mozoil. Muc alticuc la spat yoʼntonic ta atojol; muc xavacʼ ta qʼuexlal», xut (Sal. 22:3-5). Mi jpatoj koʼontontik ta stojolal Diose xchiʼuk li ta beiltasel chakʼe, mu me bu chkakʼ jbatik ta kʼexlal ek; chkʼot ta pasel ta melel ti kʼusi jpatoj-o koʼontontike. Ta skoj ti chkakʼbetik sventain skotol Jeova li kʼusi ta jpastike ti maʼuk ta jpat koʼontontik ta jtuktike, ep me tajmek ta jtatik bendision li avie (Sal. 37:5). Pe mi tukʼ-o kuch kuʼuntike ta me xjalij sbatel osil li bendisionetik ta jtatike. Xi la stsʼiba li Davide: «Li Mucʼul Diose jaʼ lec scʼanoj li bochʼo tucʼ cʼusi tspase, mu scomtsan o li bochʼo lecubtasbilic xa yuʼune, scotol ora xchabioj o [...]. Li bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o», xi (Sal. 37:28, 29).
¿Mi xuʼ xavalbe smelolal?
• ¿Kʼu yuʼun xuʼ jpat koʼontontik li ta beiltasel chakʼ Jeovae?
• ¿Kʼusi xkoʼolaj-o kʼalal ta jpʼajbetik li beiltasel chakʼ Jeovae?
• ¿Butik ti persa bikʼit xakʼ sba li yajtsʼaklom Cristoe?
• ¿Kʼuxi tsbeiltasutik Jeova li avi kʼakʼale?
[Lokʼol ta pajina 8]
¿Mi ta skotolal avoʼonton yakal cha saʼ li beiltasel chakʼ Jeovae?
[Lokʼol ta pajina 9]
Li Evae la spʼaj li mukʼul pas mantal yuʼun Jeovae
[Lokʼol ta pajina 10]
¿Kʼusi stalelal skʼan Agar sventa xchʼun li beiltasel akʼbat yuʼun anjele?
[Lokʼol ta pajina 11]