Li jkʼel vunetike tskʼan snaʼik
¿Mi jaʼ van skastigo Dios li nikele o nojelal ta voʼe o li yan kʼusitike?
Li Diose maʼuk me ta stunes li kʼusitik tsots chkʼot ta pasel jech kʼuchaʼal nojelal ta voʼ, nikel o yan kʼusitik sventa chakʼbe kastigo li krixchanoetike. Muʼyuk onoʼox bu jech spasoj, xchiʼuk muʼyuk-o bu jech ta spas. ¿Kʼu yuʼun? Yuʼun, jech kʼuchaʼal chal li Vivlia ta 1 Juan 4:8, li «Diose jaʼ stalel ta xcʼanvan o».
Li Diose ta skoj skʼanel ta spas skotol. Jech oxal li kʼanele muʼyuk chakʼbe svokol li buchʼutik muʼyuk smulike, o jech kʼuchaʼal ta xal li Vivliae, «li cʼanvaneje mu xacʼbe svocol yan cristiano» (Romanos 13:10). Jech noxtok, «li Diose mu snaʼ spas cʼusi chopol» (Job 34:12).
Pe, ¿mi mu yalojuk xa onoʼox Vivlia ti chtal «tsots niqueletic» xchiʼuk yantik vokoliletik li ta jkʼakʼaliltike chaʼa? (Lucas 21:11.) Jech ta melel. Pe jech kʼuchaʼal li buchʼu chchanbeik skʼoplal ti kʼuyelan ch-echʼ jujun kʼakʼale (meteorólogos), kʼalal ta xilik ti chtal jun tsatsal ikʼal voʼe maʼuk ta smul li kʼusitik chkʼotan ta pasele, jech li Jeova eke maʼuk ta smul li tsatsal vokoliletik chkʼotan ta pasel ta skoj li kʼusitik yaloj xa onoʼox ta sKʼope, li ta Vivliae. Ti mi maʼuk ta skoj Dios li kʼusitik tsots chkʼot ta pasel ti chakʼ tajek vokolile, vaʼun chaʼa, ¿kʼu yuʼun jech chkʼot ta pasel?
Li Vivliae ta xal «ti oyic ta scʼob pucuj (o Diablo) scotol li yan cristianoetic liʼ ta banamile» (1 Juan 5:19). Yuʼun li stuke jmilvanej xa onoʼox ikʼot ta slikebal kʼalal lik stoy sbae, ta slikebal li krixchanoetike, kʼalal to ta jkʼakʼaliltik (Juan 8:44). Jaʼ yuʼun, muʼyuk sbalil ta xil xkuxlejal li krixchanoetike, ti xuʼ ta kʼusuk noʼox ora xakʼbe slajebe. Ta skoj ti jaʼ noʼox tsaʼ kʼusi tskʼan stuk li Satanase, mu ta naʼeteluk ti oy kʼusi xchapanoj ta balumil sventa jaʼ xa noʼox saʼik ek li kʼusi tskʼan yoʼontonik li krixchanoetike. Ta skoj taje, kʼotem yorail ti epal utsʼ alaliletike batemik ta naklej ti butik xibalik sba yuʼun oy kʼusitik tsots xuʼ chkʼot ta pasel ta skoj li balumile o li krixchanoetike (Efesios 2:2; 1 Juan 2:16). Jech-o xal, jlom li kʼusitik chkʼotanuk ta pasel ti chkil-o jvokoltike jaʼ ta skoj ti jaʼ noʼox tsaʼik li kʼusi tskʼan stukik li krixchanoetike (Eclesiastés 8:9). ¿Mi ta van xi j-echʼ ta mas kʼalal jech chkaltik taje?
Toj labal sba ta ilel ti jutuk mu skotoluk li kʼusitik ep chkʼot ta pasele jaʼ ta skoj li krixchanoetike. Jech kʼuchaʼal jnoptik noʼox avaʼi, li vokoliletik la snupik li jnaklejetik leʼ ta jteklum Nueva Orleans ta Estados Unidos kʼalal laj yil svokolik ta skoj li tsatsal ikʼal voʼ Katrinae, o ta sventa ti ep buchʼutik laj yichʼ svokolik ta skoj ti mukul kom ta achʼel snaik li krixchanoetik ti nakalik ta stiʼiltik nab te ta Venezuela. Ti vaʼtik kʼuyelan kʼotanuk ta pasele o yan vokoliletike, jech kʼuchaʼal tsatsal ikʼ xchiʼuk tsatsal voʼe ep kʼusitik tsotsik kʼotanuk ta pasel yuʼun, jutuk mu skotoluk taje jaʼ ta skoj li krixchanoetike: ta sventa ti muʼyuk xchanojbeik skʼoplal kʼuyelan ch-echʼ jujun kʼakʼale, ti mu lekuk bu tsvaʼan snaike, ta skoj ti muʼyuk tsnopik lek li kʼusitik ta tspasike, ta skoj ti mu lekuk chbat ta nopel yuʼunik li ajvaliletike xchiʼuk xtok, ti mu xchʼunik mantal kʼalal ta xichʼik pʼijubtasele.
Jkʼeltik jun kʼusi tsots kʼot ta pasel ta skʼakʼalil li Jesuse. Lom yalel jun kʼelob-osil te ta Siloé vaʼun chamik vaxaklajuneb krixchanoetik (Lucas 13:4). Li kʼusi kʼot ta pasele jaʼ van ta skoj li krixchanoetike, o ta skoj li «muʼyuk malabil chkʼot ta pasel» kuʼuntik li kʼusitike o xuʼ van ta xchibal. Pe maʼuk jun kastigo laj yakʼ li Diose (Eclesiastés 9:11, NM).
Jaʼ yuʼun chaʼa, ¿mi oy van yakʼoj taluk stuk Dios junuk tsatsal vokolil? Oy, pe li tsatsal vokoliletik yakʼoj talele mu xkoʼolaj kʼuchaʼal li jaʼ ta skoj stuk balumile o ta skoj li krixchanoetike, yuʼun kʼalal jechtik la spas li Diose tʼujbil noʼox laj yakʼ, oy skʼoplal ti jech la spase xchiʼuk chapbil noʼox ti jech kʼotanuk ta pasel yuʼune. Chib skʼelobil taje jaʼ ti kʼalal tal nojelal ta voʼ ta spʼejel Balumile ta skʼakʼalil li jmoltotik Noee xchiʼuk ti kʼalal laj yichʼ jinesel li jteklum Sodoma xchiʼuk Gomorra ta skʼakʼalil li Lote (Génesis 6:7-9, 13; 18:20-32; 19:24). Ti vaʼ kastigo laj yakʼ Diose jaʼ laj yakʼbe slajeb skotol li krixchanoetik ti mu skʼan sjel stalelike xchiʼuk jaʼ kuxul iktaatik li tukʼil krixchanoetik ta sba sat li Diose.
Yuʼun xtok li Jeova Diose oy ta skʼob skotol sventa chakʼbe slajeb svokol li krixchanoetike xchiʼuk slekubtasel li kʼutik yelan chikta komel li tsatsal vokoliletike. Pe maʼuk noʼox taje: yuʼun oy ta yoʼonton jech spasel xchiʼuk xuʼ yuʼun xtok. Sventa chkʼot ta pasel li kʼusi tskʼan yoʼontone, li Diose svaʼanoj kʼuchaʼal jun Ajvalil li xNichʼone, li Jesucristoe, sventa «tscolta li bochʼotic abul sbaique xchiʼuc li bochʼotic oy svocolic ti muʼyuc bochʼo chcoltaatique» (Salmo 72:12).