¿Kʼusi chal Vivlia ta sventa li nikel, nojelal ta voʼ o yan kʼusitike?

Li kʼusi chal Vivliae

Li Diose maʼuk chakʼ li nikel, nojelal ta voʼ o yan kʼusitik ti chkʼotanuk ta pasele. Moʼoj, li kʼusie tsvul yoʼonton ta stojolal li buchʼutik jech chil svokolike. Li nikel, nojelal ta voʼ o yan kʼusitike jaʼ li kʼusitik chkil-o jvokoltik yuʼune, pe poʼot xa slajesbe skʼoplal li Ajvalilal yuʼun Diose. Pe yoʼ to mu xkʼot ta pasele, li Diose tspatbe yoʼonton li buchʼutik jech chil svokolike (2 Korintios 1:3).

• ¿Kʼu yuʼun xuʼ jchʼuntik ti maʼuk jun kastigo yuʼun Dios li nikel, nojelal ta voʼ o yan kʼusitike?

• Li nikel, nojelal ta voʼ o yan kʼusitike, ¿mi jaʼ svinajeb ti kuxulutik xa ta slajebal kʼakʼale?

• ¿Kʼuxi tskolta Dios li buchʼutik chil svokolik ta nikel, nojelal ta voʼ o yan kʼusitike?

• ¿Mi tskoltautik van Vivlia sventa chapalukutik mi tal nikel, nojelal ta voʼ o yan kʼusitike?

• Tekstoetik ta Vivlia ti xuʼ spatbe yoʼonton li buchʼutik chil svokolik ta nikel, nojelal ta voʼ o yan kʼusitike

¿Kʼu yuʼun xuʼ jchʼuntik ti maʼuk jun kastigo yuʼun Dios li nikel, nojelal ta voʼ o yan kʼusitike?

Li ta Vivliae chal ti la stunesbe yip kʼusitik ta balumil li Diose. Pe jelel xchiʼuk li nikel, nojelal ta voʼ o yan kʼusitike. ¿Kʼu yuʼun?

• Li nikel, nojelal ta voʼ o yan kʼusitike chil-o svokol skotol li krixchanoetike. Li ta Vivliae chal ti la stunesbe yip kʼusitik ta balumil ta voʼne li Jeova sventa xakʼbe kastigo li chopol krixchanoetike, jaʼ noʼox kuxul laj yikta li buchʼutik lekike. Kʼalaluk la slajes Dios li jteklum Sodoma xchiʼuk Gomorrae, jaʼ kuxul laj yikta li Lot ti jaʼ jun lekil krixchanoe xchiʼuk li chaʼvoʼ stsebetake (Jenesis 19:29, 30). Li Jeovae xojtikinbe li kʼusi oy ta yoʼonton li vaʼ krixchanoetike, jaʼ yuʼun jaʼ noʼox la slajes li buchʼutik chopolike (Jenesis 18:23-32; 1 Samuel 16:7).

• Li nikel, nojelal ta voʼ o yan kʼusitike ta anil noʼox chtal. Pe yanuk li yip kʼusitik ta balumil ti la stunes Diose, baʼyel chalbe li chopol krixchano ti chakʼbe kastigoe. Li buchʼutik la xchʼunik li vaʼ tojobtasele kuxul komik (Jenesis 7:1-5; Mateo 24:38, 39).

• Xuʼ van jaʼ ta skoj li kʼusi tspasik li krixchanoetik ti chtal nikel, nojelal ta voʼ o yan kʼusitike. ¿Kʼuxi taje? Jaʼ ta skʼoj ti sokesojik li osil balumile,ti tsvaʼan snaik li bu chnoj ta voʼe xchiʼuk li bu chjel xkʼixnal o sikil balumile (Apokalipsis 11:18). Jaʼ yuʼun, maʼuk ta smul Dios li kʼusitik chkʼotanuk ta pasele, jaʼ ta skoj li kʼusitik tspasik li krixchanoetike (Proverbios 19:3).

Li nikel, nojelal ta voʼ o yan kʼusitike, ¿mi jaʼ svinajeb ti kuxulutik xa ta slajebal kʼakʼale?

Jech. Li albil kʼopetik ta Vivliae kak xa onoʼox yaloj ti kʼalal poʼot xa xlaj skotol li kʼusitik oy ta balumile o «li ta slajebal xa kʼakʼale», chtal nikel, nojelal ta voʼ o yan kʼusitik (Mateo 24:3; 2 Timoteo 3:1). Li Jesuse laj yalbe skʼoplal kʼu yelan jkuxlejaltik avi kʼalal xi laj yale: «Chtal viʼnal xchiʼuk ch˗echʼ nikel ta buyuk noʼox» (Mateo 24:7). Poʼot xa slajesbe skʼoplal Dios li kʼusi kʼux ip chkaʼitike xchiʼuk li vokoliletik ti tey skʼoplal ek li nikel, nojelal ta voʼ o yan kʼusitike (Apokalipsis 21:3, 4).

¿Kʼuxi tskolta Dios li buchʼutik chil svokolik ta nikel, nojelal ta voʼ o yan kʼusitike?

• Li Diose tspatbe yoʼonton ta Vivlia li buchʼutik chil svokolike. Jamal yaloj ta Skʼop ti tsvul yoʼonton ta jtojolaltike xchiʼuk ti chil svokol ek kʼalal chkil jvokoltike (Isaias 63:9; 1 Pedro 5:6, 7). Jech xtok, chalbutik ti tslajesbe skʼoplal li nikel, nojelal ta voʼ o yan kʼusitik ta sbatel osile (Kʼelo li rekuadro «Tekstoetik ta Vivlia ti xuʼ spatbe yoʼonton li buchʼutik chil svokolik ta nikel, nojelal ta voʼ o yan kʼusitike»).

• Li Diose tstunes yajtuneltak sventa tspatbe yoʼonton li buchʼutik chil svokolike. Li albil kʼopetike chal ti li Jesuse tspatbe yoʼonton li buchʼutik «vochʼem yoʼontonik» xchiʼuk skotol li buchʼutik «chat yoʼontonike» (Isaias 61:1, 2). Li yajtuneltak Jeova avie chakʼik persa sventa xchanbeik stalelal li Jesuse (Juan 13:15).

  Li Diose tstunes yajtuneltak sventa skolta li buchʼutik chil svokolik ta nikel, nojelal ta voʼ o yan kʼusitik (Echos 11:28-30; Galatas 6:10).

¿Mi tskoltautik van Vivlia sventa chapalukutik mi tal nikel, nojelal ta voʼ o yan kʼusitike?

Jech. Akʼo mi li Vivliae maʼuk jun livro sventa chalbutik kʼusi xuʼ jpastik kʼalal mi tal nikel, nojelal ta voʼ o yan kʼusitike, yichʼojan beiltaseletik ti jtunel kuʼuntike. Jech kʼuchaʼal liʼe:

• Kak chapan aba. Li Vivlia chal ti «li buchʼu pʼije tsta ta ilel li vokolile, vaʼun tsnakʼ sba» (Proverbios 22:3). Lek ti xachapan aba sventa mi oy kʼusi chkʼot ta pasele. Kʼalal chachapan abae, lek ti oyuk jun amochila ti te tikʼil li kʼusitik jtunel avuʼune xchiʼuk xuʼ xanopik xchiʼuk avutsʼ avalal bu chbat anakʼ abaik kʼalal mi tal nikel, nojelal ta voʼ o yan kʼusitike. Laje, chanilanik li kʼusi anopojike.

• Teuk me ta ajolik ti jaʼ mas tsots skʼoplal li akuxlejalike ti jaʼ mu tsta li kʼusi x˗ayan kuʼuntike. Xi chal li Vivliae: «Muʼyuk kʼusi chkichʼtik tal jsetʼuk kʼalal chijvokʼ liʼ ta balumile xchiʼuk muʼyuk kʼusi chkichʼtik batel jsetʼuk kʼalal chijchame» (1 Timoteo 6:7, 8). Skʼan chkikta komel jnatik xchiʼuk li kʼusi x-ayan kuʼuntik sventa kuxul xijkome. Jvules ta joltik ti jaʼ mas tsots skʼoplal li kuxlejaltike ti jaʼ mu tsta li kʼusi x-ayan kuʼuntike (Mateo 6:25).