Jchʼamtik me li pas mantal yuʼun Jeovae
«Me jcʼanojtic o li Diose, ta jchʼunbetic li smantaltaque. Muʼyuc tsots ta chʼunbel chcaʼitic li smantaltaque.» (1 JUAN 5:3.)
1, 2. 1) ¿Kʼu yuʼun ep krixchanoetik ti muʼyuk lek chaʼiik ti xchʼunik mantale? 2) ¿Mi xtojob van sventainel sba stukik ta melel li buchʼutik mu skʼanik pasel ta mantal jutuke?
LI AVIE ep krixchanoetik ti muʼyuk lek chaʼiik ti chchʼunbeik smantal yan krixchanoe. Mu labaluk ta aʼyel ti xi chalike: «Xi tojob jventainel jba jtuk, muʼyuk buchʼu chalbun kʼusi ta jpas», xiik. ¿Mi xtojob van ta sventainel sba stukik ta melel li buchʼutik jech stalelalik taje? Muʼyuk. Ep ti jaʼ noʼox tspasik li kʼusi tspas yantike xchiʼuk jaʼ «[chchanbeik] stalel li cristianoetic liʼ ta banamile» (Rom. 12:2). Mu xtojob ta sventainel sba stukik, yuʼun jaʼ jechik kʼuchaʼal chal jtakbol Pedro liʼe: «Mozoinbilic o yuʼun li cʼusi chopol tscʼan sbecʼtalique», xi (2 Ped. 2:19). Jaʼ yakal tspasik «li cʼusi sventa noʼox banamile, jech chac cʼu chaʼal tscʼan li banquilal ti ta icʼ chanove, ti tsots svuʼele», jaʼ xkaltik, li Satanase (Efe. 2:2).
2 Xi stoyoj sba laj yal jun jtsʼibajome: «Voʼon ta jnop jtuk li kʼusi melel chkaʼie, mu jaʼuk chalbun jtot jmeʼ, mi jaʼuk junuk pale, junuk jchanubtasvanej ta relijion Hindú xchiʼuk maʼuk chalbun li Vivlia xtoke», xi. Melel onoʼox ti oy krixchanoetik ti tsots tajmek tspasvanik ta mantale xchiʼuk mu van staik-o jchʼunbetik smantalik. ¿Pe mi jaʼ van mas lek ti jpʼajtik stekel mantale? Kʼalal chkiltik jutuk li kʼusi chal periodikoetike te chkiltik ti toj chopolik kʼusitik chkʼot ta pasel kʼalal jech jtalelaltike. Kʼux ta alel ti jaʼ ep mu xchʼamik ta j-echʼel beiltasel li krixchanoetik kʼalal jaʼo chtun tajmek li avi kʼakʼale.
Ti kʼuyelan chkiltik li pasel ta mantale
3. ¿Kʼuxi laj yakʼik ta ilel li jchʼunolajeletik ta baʼyel siglo ti muʼyuk bu sjovil chchʼunbeik smantal li j-abtel krixchanoetike?
3 Li yajtsʼaklomutik Cristoe jelelutik ta stojolal li yan krixchanoetik ta balumil ta sventa li pasel ta mantale. Pe taje maʼuk skʼan xal ti skotol xa ta jovil jchʼuntik li kʼusi chkichʼtik kʼanbele. Oy bateltike mu stakʼ jpastik li kʼusi tskʼanbutik li buchʼutik tsventainutike. Jaʼ jech ikʼot ta stojolal li jchʼunolajeletik ta baʼyel sigloe. Jech kʼuchaʼal liʼe, kʼalal albatik yuʼun bankilal pale xchiʼuk j-abteletik ta Sanedrín ti mu xa xcholik mantal li jtakboletike, muʼyuk bu xchʼunik. Jaʼ mas tsots skʼoplal laj yaʼiik li slekubtasbel yoʼonton Diose, mu jaʼuk li j-abtel krixchanoetike (kʼelo Hechos 5:27-29).
4. ¿Buchʼutik li yajtuneltak Dios ti chalbe skʼoplal Tsʼibetik ta Hebreo Kʼop ti muʼyuk bu xakʼ sbaik ta pasel ta mantal ta stojolal yan krixchanoetike?
4 Jaʼ jech la spasik ep yajtuneltak Dios ek ti kʼalal muʼyuk toʼox li yajtsʼaklomtak Cristoe. Li Moisese «muc scʼan ti ch-albat scʼoplal jaʼ smeʼ li stseb faraone. Jaʼ la scʼan ti coʼol acʼo yichʼ utsʼintael xchiʼuc li xchiʼiltaque, jaʼ li steclumal Diose», akʼo mi «iʼilintaat yuʼun li faraone» (Heb. 11:24, 25, 27). La spʼaj li kʼusi albat yuʼun yajnil Potifar li Josee, akʼo mi snaʼoj ti xuʼ spasbat kʼusi chopole (Gén. 39:7-9). Li Daniel eke «icʼot ta yoʼnton ti mu xuʼ ta soques sba ta scoj li sveʼel yuchʼum ajvalile», akʼo mi mu kʼunuk ta chʼamel laj yaʼi li bankilal j-abtel ta Babiloniae (Dan. 1:8-14). Taje jaʼ chakʼ kiltik ti oy yajtuneltak Dios ta voʼne ti tukʼ laj yakʼ sbaik ta stojolal li kʼusi toj leke, akʼo mi oy kʼusi xuʼ xkʼot ta pasel ta skoj. Muʼyuk la xchʼunbeik smantal junuk krixchano sventa lek x-ilatik, jaʼ me jech muʼyuk ta jpastik ek.
5. ¿Kʼu yelan jtalelaltik ta stojolal j-abteletik li yajtunelutik Diose, ti mu xi jkoʼolaj xchiʼuk li krixchanoetik ta balumile?
5 Pe kʼelavil, ti jpʼel-o koʼontontike maʼuk ta jboliltik ti jech ta jpastik li yajtunelutik Diose. Maʼuk ti yuʼun yalel ta jkʼan ta jtoy jbatik ta stojolal li ajvaliletik xtoke, jech kʼuchaʼal tspas li krixchanoetik ta balumile. Ti jech ta jpastike yuʼun jaʼ baʼyel ta jkʼan ta jchʼamtik li pas mantal yuʼun Jeovae, maʼuk li kʼusi chal junuk krixchanoe. Kʼalal tskontrainbe smantal Dios li smantal krixchanoe jnaʼojtik onoʼox lek kʼusi skʼan jpastik. Jech kʼuchaʼal la spas li jtakboletike, jaʼ ta jchʼunbetik smantal Dios, mu jaʼuk li krixchanoetike.
6. ¿Kʼu yuʼun jaʼ onoʼox lek ta jtojolaltik ti jchʼunbetik li smantaltak Diose?
6 ¿Kʼusi tskoltautik ta xchʼamel li pas mantal yuʼun Diose? Jaʼ ti jchʼuntik li tojobtasel chal Proverbios 3:5, 6: «Jaʼ noʼox pato avoʼnton ta stojol li Mucʼul Diose; mu me jaʼuc xapat avoʼnton yuʼun li abijil atuque. Acʼo sventain Mucʼul Dios scotol li cʼusi chapase, yuʼun jaʼ xuʼ chayicʼot batel ta tuqʼuil be», xi. Jnaʼojtik ti jaʼ onoʼox ta sventa jlekilaltik skotol li kʼusi tskʼanbutik Diose (kʼelo Deuteronomio 10:12, 13). Xi laj yalbe stuk Jeova li steklumal Israele: «Vuʼun li Mucʼul Diosun avuʼune, vuʼun ta jchanubtasot cʼusi lec ta pasel ta sventa alequilal; vuʼun ta jtojobtasot bu beal tscʼan chatam batel», xut. Xi to laj yal xtoke: «Toj lec ti lajuc achʼun li cʼusitic laj calbote, yantic iʼepaj batel alequilal jech chac cʼu chaʼal nojelal ucʼum ti jechuque; muʼyuc spajeb chata cʼusi lec jech chac cʼu chaʼal nab ti mu xpaj ta yucʼlajetele», xi (Isa. 48:17, 18). Li yajtsʼaklomutik Cristoe jpatoj koʼontontik yuʼun taje. Jnaʼojtik ti jaʼ mas lek ta jtojolaltik ti jchʼunbetik li smantaltak Diose.
7. ¿Kʼusi skʼan jpastik akʼo mi mu xkaʼibetik smelolal skotol junuk mantal ta Vivlia?
7 Jchʼamojbetik pas mantal yuʼun jDiostik li jchʼunolajelutike xchiʼuk ta jchʼunbetik smantal akʼo mi mu xkaʼibetik smelolal stekel ti kʼu yuʼun jech tskʼanbutik li ta sKʼope. Pe taje maʼuk skʼan xal ti jech noʼox jchʼunojtike, moʼoj, yuʼun jpatoj koʼontontik ta stojolal; jaʼ jech chkakʼtik ta ilel ti jpatoj tajmek koʼontontik ta stojolal ti jaʼ snaʼoj li kʼusi sventa jlekilaltike. Jech xtok, jaʼ jech chkakʼtik ta ilel ti jkʼanojtike, yuʼun xi la stsʼiba li jtakbol Juane: «Me jcʼanojtic o li Diose, ta jchʼunbetic li smantaltaque», xi (1 Juan 5:3). Pe oy to me kʼusi smakoj li chʼun mantal ti skʼan oyuk ta joltike.
Jchanubtas jnopbentik sventa snaʼ stʼujel
8. ¿Kʼuxi tskoltautik ta xchʼamel li pas mantal yuʼun Jeova ta skoj ti jchanojtik xa leke?
8 Li Vivliae chalbutik ti skʼan «[jchantik] lec, ti cʼun xa ta tʼujel [chkaʼitik] li cʼusi leque xchiʼuc li cʼusi chopole» (Heb. 5:14). Jaʼ yuʼun chaʼa, ti kʼusi ta jkʼantike maʼuk ti naka noʼox ta jchʼunbetik li smantal Jeovae, moʼoj, yuʼun ti ta jchʼunbetike jaʼ ti xkiltik li kʼusi lek xchiʼuk li kʼusi chopol jech kʼuchaʼal chal smantale. Ti kʼusi ta jkʼantike jaʼ ti xkaʼibetik smelolal ti toj pʼijik li chanubtasel yuʼun Diose, yoʼ jech xkaltik kʼuchaʼal li jtsʼibaej salmo liʼe: «Oy ta coʼnton ta jchʼun li amantale», xi (Sal. 40:8).
9. ¿Kʼuxi ta jchanubtas jol koʼontontik jech kʼuchaʼal tskʼan smantaltak Diose, xchiʼuk kʼu yuʼun tsots skʼoplal ti jech jpastike?
9 Sventa oyuk lek sbalil chkiltik li smantal Dios jech kʼuchaʼal li jtsʼibaej salmoe, skʼan me jnopbetik lek skʼoplal li kʼusi ta jkʼeltik ta Vivliae. Jech kʼuchaʼal liʼe, kʼalal ta jchantik kʼusi tskʼanbutik Jeova ta jtosuk kʼusie, xuʼ xi jakʼbe jbatike: «¿Kʼu yuʼun lek pʼij li mantal o li beiltasel liʼe? ¿Kʼu yuʼun jaʼ sventa jlekilal ti ta jchʼune? ¿Kʼusi chkʼot ta stojolalik li buchʼutik muʼyuk chchʼunike?». Jaʼ me jech ta jchanubtas jol koʼontontik kʼuchaʼal chal smantal Dios mi jech ta jpastike, ti kʼusi chkʼot ta pasel une, yikʼaluk van jaʼ xkʼot ta nopel kuʼuntik li kʼusi lek chil Diose. Xuʼ me jech «[jnaʼtik-o] lec cʼusi tscʼan yoʼnton li Cajvaltique», yoʼ jech ta jchʼunbetik li smantale (Efe. 5:17). Pe mu onoʼox me kʼunuk ta pasel maʼ taje. ¿Kʼu yuʼun?
Li kʼusi tspas yaʼi Satanás yoʼ tsokes li pas mantal yuʼun Diose
10. Alo kaʼitik junuk ti kʼu yelan tskʼan tsokesbe pas mantal yuʼun Dios li Satanase.
10 Voʼne xa tajmek li kʼusi yakal ta spasel Satanás yoʼ tsokes yaʼi li pas mantal yuʼun Diose, jaʼ yuʼun ep ta tos ti kʼuyelan chvinaj ta stojolal krixchanoetik ti kʼuyelan tskʼan sventain sba stuke. Jnoptik avaʼi ti kʼusi kʼotem ta pasel ta sventa li nupunel ti jaʼ slikesoj Diose. Toj jutuk yichʼojik ta mukʼ li avi kʼakʼale. Ep krixchanoetike jaʼ lek chaʼiik ti muʼyuk bu chnupun xchiʼuk li xchiʼilik ta nakleje xchiʼuk ep xtok ti tsabeik smelolal kʼuyelan xuʼ xkolik ta stojolal li xchiʼilik ta nupunele. Yikʼaluk van jech chalik kʼuchaʼal chal jun ojtikinbil ants ti chlokʼ tajmek ta television ti xi laj yale: «Li nupunel ta jun vinik xchiʼuk ta jun antse vokol onoʼox chaʼiik. Mu xkojtikin junuk krixchano ti tukʼ yakʼoj sba ta stojolal xchiʼil ta nupunele o ti oy ta yoʼonton jeche», xi. Ta skoj ti muʼyuk lek kʼusi kʼotem ta pasel yuʼun stuke, xi laj yal jun vinik ti lek ojtikinbil chlokʼ ta television eke: «Mu jnaʼ lek mi stalel onoʼox ti jun noʼox krixchano chi jnaki jchiʼuktik sjunul jkuxlejaltike», xi. Lek ti xi jakʼbe jbatik ta jujuntale: «¿Mi ta jchʼunbe smantal Jeova ta sventa li nupunele? ¿O mi jaʼ kakʼoj ch-abtej ta jtojolal li stalelal balumil ti jaʼ tspas li kʼusi tskʼan bekʼete?».
11, 12. 1) ¿Kʼu yuʼun vokol chaʼiik xchʼamel pas mantal yuʼun Jeova li jlom kerem-tsebetike? 2) Alo kaʼitik jtosuk kʼusi kʼotem ta pasel ti jaʼ chakʼ kiltik ti maʼuk jun pʼijilal ti muʼyuk ta jchʼunbetik smantal xchiʼuk li beiltasel chakʼ Jeovae.
11 Mi yajtsʼaklomot Cristo ti keremot o ti tsebote naʼo me ti voʼot tukʼ skʼelojot li Satanás eke. Yuʼun li stuke mu skʼan ti xa chʼam li pas mantal yuʼun Jeovae. Jaʼ yuʼun tstunes li «cʼusi stalel ta scʼupin li queremetique» xchiʼuk li sujel chakʼ yan keremetik o tsebetik ti chakʼik akʼo xa chʼun ti toj vokol la ta pasel li kʼusi chal smantaltak Diose (2 Tim. 2:22). Mu me xa chʼun. Akʼo persa ta stsakel ta mukʼ ti toj lek pʼij li smantaltak Jeovae. Jech kʼuchaʼal liʼe, xi chal li Vivliae: «Tscʼan chacomtsanic li mulivajele», xi (1 Cor. 6:18). Xi xa jakʼbe abae: «¿Kʼu yuʼun lek pʼij li mantal liʼe? ¿Kʼusi sbalil ta jta mi ta jchʼune?». Yikʼaluk van oy buchʼutik xavojtikin ti muʼyuk la xchʼunike xchiʼuk ti tsots la staʼo svokolik ta skoje. Xchiʼuk yikʼaluk van mu xa bu te oyik ta steklumal Jeova xtok. ¿Mi mas van xmuyubajik xa naʼ un? ¿Mi mas van lek xkuxlejalik ti jaʼ mu sta jech kʼalal chtunik toʼox ta stojolal Diose? ¿Mi oy van kʼusi achʼ staojik ta sventa li muyubajel ti mu jnaʼtik voʼotik li yajtunelutik Diose? (Kʼelo Isaías 65:14.)
12 Voʼne xa jutuke oy kʼusi la stsʼiba jun yajtsʼaklom Cristo ti Sharon sbie, jkʼeltikik: «Muʼyuk la jchʼunbe li smantal Jeovae, vaʼun la jta jun jmilvanej chamel, jaʼ li sidae. Nopajtik noʼox ta jnop ti xi muyubaj tajmek ti kʼalal ep jabil tukʼ li tun ta stojolal Jeovae», xi. Li Sharone laj yakʼ venta ti maʼuk jun pʼijilal ti kʼalal muʼyuk xchʼunbe li smantal Diose xchiʼuk laj yakʼ venta xtok ti jaʼ lek ti tsotsuk skʼoplal laj yile. Jech, li smantaltak Jeovae tspojutik. Kʼalal vukub toʼox xemana stsʼibaoj Sharon taje jaʼo cham. Li kʼusi toj chopol kʼot ta pasel taje jaʼ chakʼ kiltik ti muʼyuk kʼusi lek ch-akʼbatik yuʼun Satanás li buchʼutik tskap sbaik ta stojolal li kʼusitik chopole. Ep tajmek kʼusi chakʼ maʼ ta alele, pe ta skoj ti «jaʼ mero smeʼ jʼepalcʼop[e]» mi jaʼuk onoʼox bu chakʼ, jaʼ jech ivinaj ta sventa ti kʼusi laj yalbe Evae (Juan 8:44). Jamal ta aʼyel chaʼa, ti kʼusi mas lek ta jtojolaltike jaʼ ti jchʼamtik li pas mantal yuʼun Jeovae.
Mu me jkʼantik ti ta jventain jba jtuktike
13. ¿Kʼu yuʼun mu stakʼ ti ta jkʼan ta jventain jba jtuktike?
13 Sventa jchʼamtik li pas mantal yuʼun Jeovae, skʼan me mu jkʼan ti jventain jba jtuktike. Mi jtoybautike yikʼaluk me jaʼ jech xlik jpastik, ti ta jnoptik ti muʼyuk buchʼu persa skʼan sbeiltasutike. Jech kʼuchaʼal liʼe, yikʼaluk van mu jkʼantik tajmek jchʼamtik li tojobtasel chakʼ li buchʼutik chbeiltasvanik ta steklumal Diose. Pe skʼan me jvules ta joltik ti Jeovae yakʼoj j-abtel ti tukʼ yoʼonton, ti lek pʼije, sventa chakʼ li veʼlil ta mantal ta yoraile (Mat. 24:45-47). Jaʼ yuʼun skʼan bikʼit xkakʼ jbatik ta yakʼel venta ti jaʼ jech chchabi li steklumal avie. Jechutikuk me kʼuchaʼal li tukʼil jtakboletike. Kʼalal ilinik jlom yajtsʼaklomtak xchiʼuk ti laj yiktaik li Jesuse, xi la sjakʼbe li yajtakboltake: «¿Me chasutic batel ec li voʼoxuque?», xi. Xi la stakʼ li Pedroe: «Cajval, ¿bochʼo yan chbat jchiʼincutic? Voʼot noʼox chavalbuncutic li cʼop sventa cuxlejal sbatel osile», xi (Juan 6:66-68).
14, 15. ¿Kʼu yuʼun skʼan bikʼit xkakʼ jbatik ta xchʼunel li tojobtaseletik ta Vivliae?
14 Ti ta jchʼamtik li pas mantal yuʼun Jeovae te smakoj ti ta jkʼan ta jchʼuntik li kʼusi chal ta sKʼope. Jech kʼuchaʼal liʼe, li j-abtel ti tukʼ yoʼonton, ti lek pʼije nopajtik noʼox chalbutik ti «viqʼuiluc me jsatic [xchiʼuk] cuxuluc me coʼntontic» (1 Tes. 5:6). Toj jtunel li tojobtasel ta slajeb kʼakʼal kuxulutik liʼe, ta skoj ti ep «jaʼ noʼox tspasic cʼusi tscʼan stuquic. Ta xbat yoʼntonic yuʼun taqʼuin[e]» (2 Tim. 3:1, 2). ¿Mi ta van x-abtej ta jtojolaltik ek li talelaletik taje? Tana. Mi maʼuk sventa kabteltik ta stojolal Dios ta jyalel li kʼusi ta jkʼan ta jtatike, xiʼel me jaʼ xbat ta koʼontontik li saʼel kʼusitike o ti xi jvay ta mantale (Luc. 12:16-21). Ta melel, li kʼusi jaʼ jun pʼijilale jaʼ ti jchʼuntik li tojobtaseletik ta Vivliae xchiʼuk ti mu jaʼuk noʼox xkichʼ jbatik ta kʼux li ta jkuxlejaltike, ti jech onoʼox stalelal li sbalumil Satanase (1 Juan 2:16).
15 Li veʼlil ta mantal ti jaʼ chakʼ talel li j-abtel ti tukʼ yoʼonton, ti lek pʼije chkʼot ta tsobobbailetik ti jaʼ tsjelubtas li jkʼelvanej yajtsʼaklomtak Cristoe. Xi chalbutik mantal li sKʼop Diose: «Chʼunbeic me cʼusi chayalboxuc li bochʼotic sventainojoxuque; ichʼic me ta mucʼ. Yuʼun jaʼ ta xchabioxuc, yuʼun tsnaʼic ti ta onoʼox xcʼot yalic ta stojol Dios ti cʼu xʼelan ch-abtejique. Me chavichʼic ta muqʼue, xcuxet noʼox yoʼnton ch-abtejic; muʼyuc bu chloʼilaj yoʼnton avuʼunic. Yuʼun muʼyuc cʼusi chataic ec me jech chapasique», xi (Heb. 13:17). ¿Mi jaʼ van skʼan xal ti tukʼik ta jyalel li moletik taje? Moʼoj. Jmulaviletik onoʼox ek xchiʼuk jaʼ noʼox stuk Dios snaʼoj lek taje. Akʼo mi jech, tskʼan ti akʼo jchʼunbetik smantalike. Kʼalal ta jkoltatik li moletik ti jpas muliletik eke, jaʼ me jech chkakʼtik ta ilel ti jchʼamojtik li pas mantal yuʼun Jeovae.
Tsots skʼoplal ti bikʼit xkakʼ jbatike
16. ¿Kʼuxi chkakʼtik ta ilel ti kichʼojtik ta mukʼ li Jesús ti jaʼ li Jolil ta stsobobbail jchʼunolajele?
16 Mu me xchʼay ta joltik ti jaʼ mero Jolil ta tsobobbail li Jesuse (Col. 1:18). Taje jaʼ me jun srasonal ti skʼan bikʼit xkakʼ jbatik li ta beiltasel chakʼ moletike xchiʼuk ti xkichʼantik lek ta mukʼe (1 Tes. 5:12, 13). Jchʼunej mantaletik ek li moletike xchiʼuk jech chakʼik ta ilel kʼalal chalbeik smantal Dios ta tsobobbaile, yuʼun maʼuk chalik li kʼusi tsnop stukike. Jech kʼuchaʼal chal Vivliae «mu echʼemuc xbat snopel [yuʼunik] jech chac cʼu chaʼal chal li scʼop Diose», yuʼun maʼuk chalik li kʼusi tsnopike (1 Cor. 4:6).
17. ¿Kʼu yuʼun xibal sba li kʼusi chlik jkʼantik tajmeke?
17 Jtekeltik li ta tsobobbaile skʼan me jchabi jbatik ti mu jsaʼ jmukʼulal jtuktike (Pro. 25:27). Melel, jaʼ jech itsʼuj jun yajtsʼaklom Cristo ti xojtikin Juane. Xi la stsʼiba li jtakbole: «Li Diotrefese muc xichʼ ta mucʼ, yuʼun tscʼan ti jaʼ chcom ta banquilal stuque. Jaʼ yuʼun cʼalal me litale, ta xcalbe yaʼay ti chopol cʼusi tspase, yuʼun chopol chalilan batel jcʼoplalcutic», xi (3 Juan 9, 10). Taje jaʼ chakʼ kiltik ti tsots skʼoplal ti jchʼaytik lokʼel mi oy xa kʼusi chlik jkʼantik tajmeke. Xi chalbutik li Vivliae: «Li toybaile jaʼ chacʼutic ta vocol; me mucʼ noʼox chcacʼ jbatique jaʼ chisyalesutic ta lum», xi. Ti buchʼu chchʼam li pas mantal yuʼun Jeovae skʼan me mu stoy sba, yuʼun mi tstoy sbae mu me bu ichʼbil ta mukʼ (Pro. 11:2; 16:18).
18. ¿Kʼusir tskoltautik ti jchʼamtik li pas mantal yuʼun Jeovae?
18 Jpastik me bu kʼalal xuʼ kuʼuntik ti mu jchanbetik li balumil ti tsventain sba stuke xchiʼuk jchʼamtik me li pas mantal yuʼun Diose. Jnopilanbetik me skʼoplal li mukʼta matanal kuʼuntik ti jaʼ ti chi jtun ta stojolal Jeovae. Ti jech oyutik ta steklumale jaʼ svinajeb ti yikʼojutik tal ta xchʼul espiritue (Juan 6:44). Jaʼ yuʼun jtsaktik me tajmek ta mukʼ ti kʼuyelan oyutik ta stojolal Diose. Kakʼtik persa ta yakʼel ta ilel ta sjunul jkuxlejaltik ti mu jkʼan jventain jba jtuktike xchiʼuk ti jaʼ jchʼamojtik li pas mantal yuʼun Jeovae.
¿Mi xvul ta ajol?
• ¿Kʼusi smakoj ti ta jchʼamtik li pas mantal yuʼun Jeovae?
• ¿Kʼuxi tskoltautik ta xchʼamel li pas mantal yuʼun Jeova ta skoj ti jchanojtik xa leke?
• ¿Kʼu yelan tskʼan tsokesbe yaʼi pas mantal yuʼun Dios li Satanase?
• ¿Kʼu yuʼun skʼan bikʼit xkakʼ jbatik sventa jchʼamtik li pas mantal yuʼun Jeovae?
[Lokʼol ta pajina 18]
«Jaʼ tsots scʼoplal baʼyuc ta [jchʼunbetik] smantal Dios; mu jaʼuc tscʼan baʼyuc ta [jchʼunbetik] smantal cristiano»
[Lokʼol ta pajina 20]
Jaʼ onoʼox me jun pʼijilal kʼalal jaʼ ta jchʼunbetik li smantal Diose
[Lokʼol ta pajina 21]