Li Jeovae «chajal lec ta sba ta sat» stekel li krixchanoetike
«[Li Jeovae] chajal lec ta sba ta sat ti cʼusi ta spas ti jnaclejetique.» (SAL. 11:4, Ch.)
1. ¿Kʼu yelan stalelal li krixchanoetik ti lek xkil jbatik xchiʼukike?
¿KʼU YELAN chkaʼi jbatik ta stojolal li krixchanoetik ti oyutik ta yoʼontonik ta melele, ti chalbutik kʼusi tsnopik kʼalal oy kʼusi ta jakʼbetike, ti ta sjunul yoʼonton tskoltautik kʼalal jaʼo ta jkʼantik koltaele xchiʼuk ti ta stojobtasutik ta slekil yoʼontonik kʼalal chtun tajmek kuʼuntike? (Sal. 141:5; Gál. 6:1.) Ta melel, toj lek xkil jbatik xchiʼukik. Jaʼ jechik tajmek li Jeova xchiʼuk xNichʼone. Jech onoʼox, jaʼ noʼox stukik ti oyutik tajmek ta yoʼontonike, xchiʼuk xtok maʼuk tsaʼ slekilal stukik kʼalal oy kʼusi tspasike; moʼoj, yuʼun ti kʼusi noʼox tskʼanike jaʼ ti tskoltaik li yajtunelik sventa «xcʼot yichʼic li mero xcuxlejalique» (1 Tim. 6:19; Apo. 3:19).
2. ¿Kʼu to yepal oy ta yoʼonton yajtuneltak li Jeovae?
2 Li jtsʼibajom Davide xi laj yakʼ ta ilel kʼu to yepal oyutik ta yoʼonton li Jeovae: «Chajal lec ta sba ta sat ti cʼusi ta spas ti jnaclejetique», xi (Sal. 11:4). Kʼuchaʼal chkiltike, maʼuk noʼox yilojutik li Diose, moʼoj, yuʼun chajal lek ta sat kʼukelantik. Xi la stsʼiba xtok li Davide: «Laj xa anaʼ lec li cʼusi oy ta coʼntone, yuʼun liʼ chtal aqʼuelun ta acʼubal. [...] Muʼyuc cʼusi chopol laj atabun», xi (Sal. 17:3). Jamal xvinaj ti snaʼoj onoʼox lek ti venta yuʼun Jeova ti kʼusi tspas li Davide, xchiʼuk ti kʼux chaʼi mi jaʼ laj yakʼ ta yoʼonton spasel li kʼusitik chopol tsnope o ti tsnop ta yoʼonton spasel li kʼusitik chopole. ¿Mi batsʼi kuxul chavil Jeova kʼuchaʼal laj yil Davide?
Jaʼ tskʼel oʼontonal li Jeovae
3. ¿Kʼusitik chakʼ kiltik ti muʼyuk bu toj tsots chchapan jpaltailtik li Jeovae?
3 Li kʼusi mas oy ta yoʼonton tskʼel li Jeovae jaʼ li koʼontontike, jaʼ xkaltik, ti kʼuyelan yoʼonton li jun krixchanoe (Sal. 19:14; 26:2). Akʼo mi jech, maʼuk tskʼel li jsetʼ-juteb jchopoliltike yuʼun skʼanojutik tajmek. Jkʼelbetik skʼoplal Sara, li yajnil Abrahame, ti muʼyuk jamal xkʼopoj kʼalal la xchiʼin ta loʼil jun anjel ti yichʼoj sbekʼtale; akʼo mi jech, li anjele muʼyuk kʼusi mas tsots laj yalbe yuʼun xil ti chiʼe xchiʼuk ti chkʼexave (Gén. 18:12-15). Jaʼ jech ek li moltotil Jobe, «la snop ti jaʼ xjelov stuqʼuil jech chac cʼu chaʼal Diose»; akʼo mi jech, li Jeovae laj yakʼbe bendision, yuʼun snaʼoj kʼu to yepal laj yil svokol ta yok-skʼob li Satanase (Job 32:2; 42:12). Jaʼ jech kʼot ta pasel xtok kʼalal tsots kʼusi laj yalbe j-alkʼop Elías li meʼon ants ta Sareptae. Li Jeovae muʼyuk x-ilin, yuʼun snaʼoj ti chat tajmek yoʼonton ta skoj ti cham li jun noʼox skerem li ants taje (1 Rey. 17:8-24).
4, 5. ¿Kʼuxi laj yakʼ ta ilel slekil yoʼonton ta stojolal Abimelec li Jeovae?
4 Ta skoj ti xil kʼusi oy ta koʼontontik li Jeovae, ta xichʼ ta mukʼek li krixchanoetik ti maʼuk jchʼunolajeletike. Jkʼelbetik skʼoplal Abimelec, jun ajvalil ta Gerar ta slumal jfilistaetik. Mu snaʼ mi jaʼ yajnil Abraham li Sarae, jaʼ yuʼun laj yikʼ echʼel sventa chikʼ. Pe kʼalal mu to chbat ta mas li Abimeleque, oy kʼusi albat yuʼun Jeova ta xvayich: «Jnaʼ lec ti laj achʼun ti muʼyuc amul ti jech laj apase, jech muʼyuc laj cacʼ achiʼin yuʼun jech mu xata amul ta jtojol. Jaʼ yuʼun liʼ ta orae acʼbo sutel yajnil li vinique, yuʼun li stuque jaʼ jun jʼalcʼop. Jaʼ ta scʼan vocol ta atojol, yuʼun acʼo to cuxian», x-ute (Gén. 20:1-7).
5 Ta melel onoʼox, ti jechuk oy ta yoʼonton li Jeovae tsots laj yakʼbe kastigo jechuk li Abimeleque, ti chichʼ ta mukʼ jecheʼ diosetike. Akʼo mi jech, li Jeovae snaʼoj onoʼox ti lek yoʼonton la spas sba ti vaʼ kʼakʼal taje. Jaʼ yuʼun sventa mu xchame, ta xkʼuxul yoʼonton laj yalbe ti kʼusi skʼan spas sventa x-akʼe ta pertone. ¡Jaʼ jun mukʼta muyubajel chkaʼitik ti chkichʼtik ta mukʼ jun Dios kʼuchaʼal taje!
6. ¿Kʼuxi la xchanbe stalelal sTot li Jesuse?
6 Ta sventa ti lek tukʼ chchanbe stalelal sTot li Jesuse, jaʼ tskʼelbe slekil talelaltak li yajtsʼaklomtake xchiʼuk oy onoʼox ta yoʼonton chakʼanan ta perton (Mar. 10:35-45; 14:66-72; Luc. 22:31, 32; Juan 15:15). Li stalelale jaʼ jech tajmek kʼuchaʼal laj yal stuk ta sventa li yabtel akʼbile: «Ti la stac tal liʼ ta banamil Xnichʼon li Diose, mu yuʼunuc tal yacʼbe stoj smul ti cristianoetique. Jaʼ tal scolta» (Juan 3:17). Ta melel, li Jeova xchiʼuk Jesuse toj echʼ xa noʼox skʼanojutik-o, jech kʼuchaʼal chkiltik ti oy ta yoʼontonik ti jtatik kuxlejal sbatel osile (Job 14:15). Kʼalal jnaʼojtik ti skʼanojutik li Jeovae xkaʼibetik lek smelolal ti kʼu yuʼun tskʼelutike, ti kʼuyelan chilutike xchiʼuk ti kʼusi tspas ta sventa ti kʼuyelan chilutike (kʼelo 1 Juan 4:8, 19).
Ta slekil yoʼonton tskʼelutik lek
7. ¿Kʼu yuʼun tskʼelutik lek li Jeovae?
7 Toj chopol me mi ta jnoptik ti xkoʼolaj kʼuchaʼal polisia ta vinajel li Jeovae, ti jaʼ noʼox tspaʼiutik tal ta toyol ti tskʼan tstsakutik kʼalal jaʼo oy kʼusi chopol ta jpastike. Pe ti buchʼu tsots tajmek tsaʼ jmultike jaʼ li Satanase (Apo. 12:10). Jech onoʼox, li stuke tspas ta chopol li kʼusi lek oy ta yoʼonton li jun krixchanoe (Job 1:9-11; 2:4, 5). Pe mu jechuk maʼ Diose. Jaʼ yuʼun xi laj yalbe Dios li jtsʼibajom yuʼun salmoe: «Mucʼul Dios, ti tauc xavacʼ ta aventa li jmulcutique, ¿bochʼo xuʼ lec vaʼal chcom ta atojol ti jechuque?», xi (Sal. 130:3). Jamal ta aʼibel li stakʼobil taje: mi junuk buchʼu vaʼal chkom (Ecl. 7:20). Maʼuk tskʼel tajmek li jpaltailtike, moʼoj, yuʼun ta xkʼuxul yoʼonton xchiʼuk ta slekil yoʼonton tskʼelutik li Jeovae, jech kʼuchaʼal jun totil ti chchabi ti mu skʼan kʼusi chopol xkʼot ta stojolal li skʼanben nichʼnabtake. Sventa mu jta jvokoltike, chakʼ kiltik kʼusitik ti jkʼuniltike xchiʼuk li jchopoliltike (Sal. 103:10-14; Mat. 26:41).
8. ¿Kʼuxi chchanubtas xchiʼuk tstukʼibtas yajtuneltak li Jeovae?
8 Sventa chakʼ ta ilel ti skʼanojutik li Diose chchanubtasutik xchiʼuk tstukʼibtasutik ta Vivlia xchiʼuk ta sventa li veʼlil chakʼbutik ta stojolal li «jʼabtel ti jun [«tukʼ», NM] yoʼnton [...], ti lec bije» (Mat. 24:45; Heb. 12:5, 6). Jech xtok, tskoltautik ta stojolal li tsobobbaile xchiʼuk «laj yakʼ krixchanoetik kʼuchaʼal matanaletik» (Efe. 4:8, NM). Jech xtok, yakʼoj lek venta kʼuyelan chkiltik li chanubtasel chakʼbutik kʼuchaʼal totile xchiʼuk tsabe smelolal kʼuxi tskoltautik-o. Toj lek jamal chal li Salmo 32:8: «Vuʼun ta jbijubtasot; vuʼun ta jchanubtasot lec. Ta xcacʼbot lec avil bu beal tscʼan chabat; scotol cʼacʼal te oy o jsat ta atojol». ¡Toj tsots skʼoplal ti jchikintabetik skotol ora li kʼusi chalbutik Jeovae! Skʼan bikʼit xkakʼ jbatik ta stojolal, jaʼ ti jaʼ Jchanubtasvanej kuʼuntik xchiʼuk jTotik ti lek kʼanvaneme (kʼelo Mateo 18:4).
9. ¿Kʼusi ti chopol ti mu stakʼ jpastike, xchiʼuk kʼu yuʼun?
9 Mu me stakʼ ti jvalopatintik taje xchiʼuk mu me xkakʼtik stsatsubtas koʼontontik li toyobbaile, ti chʼabal xchʼunel koʼontontike o li «loʼlael yuʼun mulile» (Heb. 3:13; Sant. 4:6). Jechtik onoʼox, li krixchano ti jech chlik spas taje jaʼ xa me chlik stikʼ ta snopben li kʼusi chopole xchiʼuk li kʼusi chopol tskʼan oʼontonale. Yikʼaluk van xlik spʼaj li pʼijil tojobtaseletik chal Vivliae, pe maʼuk noʼox taje, li kʼusi mas to chopole jaʼ ti mu xa skʼan xikta li xchopol talelale, vaʼun jaʼ jech tspas sba ta yajkontra Dios. ¡Toj chopol xa noʼox maʼ taje! (Pro. 1:22-31.) Jaʼ jech kʼot ta stojolal li Caine, li sba skeremik Adán xchiʼuk Evae.
Yiloj skotol li Jeovae xchiʼuk jaʼ jech tspas ti kʼuyelan chile
10. ¿Kʼu yuʼun la spʼaj Jeova li matanal laj yakʼ Caine, xchiʼuk kʼusi la spas li Caine?
10 Jun veltae laj yakʼbe smoton Jeova li Caine, jaʼ jech la spas ek li yitsʼin ti Abel sbie. Pe li Diose maʼuk noʼox la skʼel li matanal laj yakʼike, moʼoj, yuʼun la skʼel xtok li kʼusi oy ta yoʼontonike. Lek laj yilbe li matanal laj yakʼ Abele, yuʼun laj yakʼ ta ilel ti oy lek xchʼunel yoʼonton ta stojolal li Jeovae, yan li matanal yuʼun Caine la spʼajbe, yuʼun laj yakʼ ta ilel ti oy bu muʼyuk spatoj yoʼonton ta stojolal Jeovae (Gén. 4:4, 5; Heb. 11:4). Kʼux ta alel, pe li Caine muʼyuk bu laj yakʼ ta yoʼonton. Muʼyuk bu la sjel stalelal, kʼajomal noʼox la skontrain tajmek li yitsʼine (Gén. 4:6).
11. ¿Kʼuxi laj yakʼ ta ilel ti sok tajmek yoʼonton li Caine, xchiʼuk kʼusitik ta jchantik te?
11 Li Jeovae laj yakʼ venta ti chopol be stamoj echʼel li Caine. Ta slekil yoʼonton la xchiʼin ta loʼil xchiʼuk laj yalbe ti mi lek tspas sbae lek ch-ile. Pe bu cha ta un, li Caine la spʼaj li tojobtasel yuʼun Jpasvanej yuʼune xchiʼuk la smil li yitsʼine. Sok ta jyalel li yoʼontone, yuʼun kʼalal xi jakʼbat yuʼun Jeovae: «¿Bu oy li avitsʼin Abele?», ti x-utee, xi muʼyuk smelol takʼave: «Mu jnaʼ. ¿Me yuʼun jaʼ cabtel ta jchabi li quitsʼine?», xi (Gén. 4:7-9). ¡Toj echʼ xa noʼox xloʼlavan li koʼontontike! ¡La spʼaj li tojobtasel laj yakʼ stuk Diose! (Jer. 17:9.) Mu me jchʼay ta joltik ti kʼusi ta jchantik ta sventa taje xchiʼuk li ta yantik loʼiletik ta Vivlia ti jechtik kʼuchaʼal taje. Skʼan jlokʼestik ta anil ta joltik li kʼusitik chopol ta jnoptik xchiʼuk ta jkʼantike (kʼelo Santiago 1:14, 15). Mi chi j-akʼbat tojobtaseletik ta Vivliae, ta sjunul me koʼonton jchʼamtik, yuʼun me jaʼ svinajeb ti skʼanojutik li Jeovae.
Muʼyuk nakʼal maʼ muliletike
12. ¿Kʼusi tspas Jeova ta sventa li muliletike?
12 Oy buchʼutik tsnopik ti xuʼ nakʼal chkom li kʼusitik chopol tspasik mi muʼyuk bu ilbilike (Sal. 19:12). Pe ti xkaltik leke, muʼyuk nakʼal maʼ li muliletike, yuʼun «scotol chajal ta sba ta sat stuc li Bochʼo tsta yorail chcʼot calbetic cʼusi la jpastique» (Heb. 4:13). Li Jeovae jaʼ jun Jchapanvanej ti tskʼel li kʼusi oy kʼalal to yutil koʼontontike xchiʼuk tukʼ chchapanutik ti kʼuyelan jtatik-o ta sventa li jmultike. Tspasbutik me perton Dios mi ta jsutes koʼontontike, yuʼun xi chale: «Jcʼuxubinvanejun, toj lec coʼnton, muc ta aniluc chiʼilin; toj ep cʼuxubinel cuʼun, xchiʼuc melel cʼusi chcal», xi. Pe «me [ta] yutsil coʼnton ta jsaʼilan o jmultic» ta stojolale o ti chi jloʼlavan ta jtalelaltike xchiʼuk ti kak nopbil kuʼuntike, ta persa me chakʼ jtojtik (Éxo. 34:6, 7; Heb. 10:26). Taje jaʼ te chvinaj ti kʼusi la spas ta stojolal Acán, Ananías xchiʼuk Safirae.
13. ¿Kʼusi ti chopol tijbat-o yoʼonton ta melel ti jech la saʼ smul li Acane?
13 Li Acane la spʼaj ta jyalel li mantal laj yakʼ Diose, laj yichʼ tal juteb li kʼusitik la staik ta lum Jericoe xchiʼuk la snakʼ ta sna, laj van skoʼoltas sjolik ta melel xchiʼuk li yutsʼ yalale. Manchuk mi snaʼoj ti jaʼ jun tsatsal mulil ta stojolal Dios li kʼusi la spase, yuʼun kʼalal vinaj li smule xi laj yale: «Jtaoj xa jmul ta stojol li Mucʼul Diose», xi (Jos. 7:20). Sok yoʼonton kʼuchaʼal Caín eke. Jpʼel skʼoplal ti ayan pichʼ oʼontonal yuʼune, jaʼ yuʼun loʼlavan. Ta sventa ti jaʼ yuʼun Jeova li kʼusi la stsobik ta Jericoe, jaʼ laj yelkʼanbe xkaltik li kʼusitik yuʼun Jeovae, jun tsatsal mulil ti toj tsots la stojik xchiʼuk yutsʼ yalale (Jos. 7:25).
14, 15. ¿Kʼu yuʼun staik-o skastigo Dios li Ananías xchiʼuk Safirae, xchiʼuk kʼusi chakʼ chantik taje?
14 Li Ananías xchiʼuk Safirae jaʼ jun nupultsʼakal te ta tsobobbail ta Jerusalén. Kʼalal jaʼ toʼox yechʼel li Pentecostés ta sjabilal 33, li tsobobbail taje ayan skomon takʼinik (la stsobik ti kʼuyepal xlokʼ ta oʼontonale) sventa chakʼbeik kʼusitik chtun yuʼun li achʼ jchʼunolajeletik ti te oyik ta Jerusalén ti nom likemik tale. Veno, li Ananiase la xchon yosil, akʼo mi snaʼoj li yajnile la sjutik kʼop, laj yalik ti ta la xakʼik skotol li stojol yosilike, pe bu cha ta un jlom noʼox laj yakʼbeik li stojole. Ta melel, yuʼun van tskʼanik ti lekuk skʼoplalik ta stojolal li ermanoetike. Pe ti vaʼ yelan la spasike jaʼ loʼlavanej. Ta skʼelobil juʼelal, li Jeovae laj yakʼ vinajuk ta stojolal jtakbol Pedro li loʼlaele, ti jaʼ xa laj yalbe Ananiase. Vaʼun, yal ta lum xchiʼuk cham, ta tsʼakal jutuk une jaʼ jech kʼot ta stojolal li yajnil eke (Hech. 5:1-11).
15 Li Ananías xchiʼuk Safirae mu yuʼunuk ta jech noʼox kʼunibik. Yuʼun kak xa onoʼox snopojik ti tsloʼlaik li jtakboletike. Pe ti kʼusi mas to chopole jaʼ ti «[epal kʼopojik] ta stojol li Chʼul Espiritue [...] [xchiʼuk] jaʼ [epal kʼopojik] ta stojol Dios». Ti kʼusi la spas Jeovae jamal chakʼ kiltik ti oy ta yoʼonton chchabi stsobobbail ta stojolal jloʼlavanejetike, ti chakʼik onoʼox venta ti «¡toj xiʼbal me sba me lijʼoch xaʼox ta scʼob li cuxul Diose!» (Heb. 10:31).
Tukʼ me xkakʼ jbatik skotol ora
16. 1) ¿Kʼuxi tsokes yaʼi yajtuneltak Dios li Satanase? 2) ¿Kʼusitik tstunes Diablo sventa tsokes li krixchanoetik ti bu nakalote?
16 Li Satanase yakʼojbe tajmek yipal ta sokeselutik xchiʼuk tskʼan ti mu xa lekuk xilutik li Diose (Apo. 12:12, 17). Li kʼusitik chopol ta yoʼontone jamal xvinaj liʼ ta balumile yuʼun jaʼ batem ta yoʼontonik li mulivajele xchiʼuk li majbaile. Jech kʼuchaʼal liʼe, li avie kʼun xa ta kʼelel li pornografia ta komputadoraetike xchiʼuk li ta yantik aparatoetike. Pe mu me xi jpʼaj ta junuk spetsʼtak li Diabloe. Jaʼ lek jechuk xkaltik kʼuchaʼal xi laj yal Davide: «Ta jcʼan jaʼ noʼox ta jpas o li cʼusi tuqʼue; jech coʼnton ti jaʼ ta jpas o cʼusi lec te ta jpasubmantale», xi (Sal. 101:2).
17. 1) ¿Kʼu yuʼun tsvinajes Jeova ta yorail o ta tsʼakal to jutuk li muliletik ta mukule? 2) ¿Kʼusi skʼan oyuk ta koʼontontik xkakʼbetik yipal spasel?
17 Li Jeova avie muʼyuk xa bu chalbe yajtuneltak ta skʼelobil juʼelal li muliletike o li loʼlaeletik chkʼot ta pasele, jech kʼuchaʼal la spas bakʼintik ta voʼnee. Akʼo mi jech, yiloj skotol li kʼusi chkʼot ta pasele xchiʼuk chakʼ vinajuk mi sta yoraile xchiʼuk mi jech sta-o chile. Jaʼ yuʼun xi laj yal li Pabloe: «Oy bochʼo ta xvinaj ta ora smulic ti cʼalal muʼyuc to chichʼic chapanele, pero oy tsʼacal to ta xvinaj», xi (1 Tim. 5:24). Li srasonal ti mas tsots skʼoplal ti tsvinajes Jeova li kʼusitik chopol ta jpastike jaʼ ti jaʼ jun Dios ti chkʼanvane. Ta sventa ti skʼanoj li stsobobbaile, oy kʼusitik tspas yoʼ lekuk sake. Jech xtok, ta xkʼuxubin li buchʼutik sutesoj xa yoʼontonik ta melel ti laj toʼox spasik mulile (Pro. 28:13). ¡Toj tsots me skʼoplal chaʼa ti xkakʼbetik yipal ti ta sjunuluk koʼontontik xi jtun ta stojolal Diose xchiʼuk ti jpʼajtik skotol li kʼusitik tsokesutike!
Ta sjunuluk koʼontontik xi jtun ta stojolal li Diose
18. ¿Kʼusi tskʼan oyuk ta yoʼonton skerem li ajvalil Davide?
18 Li ajvalilal Davide xi laj yalbe li skereme: «Jquerem Salomón, otquino me lec li Dios cuʼun, vuʼun li atotune. Junuc me avoʼnton, yutsiluc me avoʼnton tunan yuʼun. Yuʼun xotquin cʼusi ta jnoptic; snaʼ cʼusi oy ta coʼntontic», xut (1 Cró. 28:9). Li Davide mu skʼan ti jaʼ noʼox xchʼun Jeova li skereme. Jaʼ tskʼan ti akʼo xkʼuxubinbe li slekil yoʼonton ta stojolal li yajtuneltake. Ta melel, jaʼ jech skʼan jkʼuxubin jkotoltik ek.
19, 20. Jech kʼuchaʼal chakʼ ta ilel Salmo 19:7-11, ¿kʼusi nopaj-o ta stojolal Dios li Davide, xchiʼuk kʼuxi xuʼ jchanbetik?
19 Li Jeovae snaʼoj ti buchʼu lek yoʼontonike ta xnopajik ta stojolal xchiʼuk xpatet yoʼonton chaʼiik ta skoj ti chojtikinbeik li slekil talelaltake. Jaʼ yuʼun tskʼan ti xkojtikintike xchiʼuk ti jnabetikuk lek li slekil talelaltake. ¿Pe kʼuxi xuʼ spas kuʼuntik? Jaʼ ti jchanbetik li sKʼope xchiʼuk ti jtabetik sbalil li sbendision ta jkuxlejaltike (Pro. 10:22; Juan 14:9).
20 ¿Mi tsots skʼoplal chkiltik xchanel jujun kʼakʼal li sKʼop Dios ti baʼyel ta jpastik orasione? ¿Mi xkaʼibetik lek smelolal ti ep sbalil ti chkakʼ ta jkuxlejaltik li beiltaseletik ta Vivliae? (Kʼelo Salmo 19:7-11.) Mi jaʼ jech ta jpastike, ta me stsatsub jujun kʼakʼal li xchʼunel koʼontontik ta stojolal Jeovae xchiʼuk ti jkʼanojtike. Li stuke ta me xnopaj tal ta jtojolaltik ek, xkoʼolaj me kʼuchaʼal tsnit echʼel jkʼobtik xkaltik (Isa. 42:6; Sant. 4:8). Jech ta melel, ta me xakʼbutik sbendision sventa chakʼ ta ilel ti skʼanojutike xchiʼuk ta me xchabiutik ta mantal kʼalal chi jxanav echʼel li ta bikʼit be ti jaʼ sbelel kuxlejal sbatel osile (Sal. 91:1, 2; Mat. 7:13, 14).
¿Kʼusi ta jtakʼtik?
• ¿Kʼu yuʼun tskʼelutik lek li Jeovae?
• ¿Kʼusi ta skoj ti pasik ta yajkontratak Dios junantik krixchanoetike?
• ¿Kʼuxi chkakʼtik ta ilel ti batsʼi kuxul chkiltik li Jeovae?
• ¿Kʼuxi xuʼ ta sjunul koʼontontik xi jtun-o echʼel ta stojolal li Jeovae?
[Lokʼol ta pajina 4]
¿Kʼusi smelolal ti jech tskʼelutik kʼuchaʼal jun jkʼanvanej totil li Jeovae?
[Lokʼol ta pajina 5]
¿Kʼusi ta jchantik li kʼusi kʼot ta stojolal Ananiase?
[Lokʼol ta pajina 6]
¿Kʼusi tskoltautik ti ta sjunul koʼontontik xi jtun-o echʼel ta stojolal Jeovae?