¿Kʼusi chal Vivlia ta sventa li poxe?

LI TA Vivliae muʼyuk chal ti chopol mi oy noʼox smelolal kʼuyepal chichʼ uchʼel li poxe.a Ta melel, li Diose jaʼ laj yakʼ stuk «li yaʼlel tsʼusub sventa xcuxet noʼox yoʼnton [li krixchanoetike] [...], xchiʼuc li aceite sventa ch-achʼub o lec sat yelovic yuʼune, xchiʼuc scotol li veʼliletic ti ch-acʼbat lec stsatsalic oe» (Salmo 104:15). Jech, li Jesucristo eke la skʼatajes ta lekil yaʼlel tsʼusub li voʼ te ta jun skʼinal nupunel sventa junuk-o yoʼontonike (Juan 2:3-10).

Li Jpasvanej kuʼuntike, li jTotik ta vinajele, xojtikin lek kʼuyelan xuʼ ch-abtej ta jbekʼtal jtakopaltik xchiʼuk ta jchinabtik li poxe. Ta skoj ti oy ta yoʼonton akʼo lekuk noʼox li jkuxlejaltike, ti akʼo mu xkil jvokoltike, li ta Vivliae tsots tspʼijubtasutik ta melel sventa mu xi j-echʼ li ta yuchʼel poxe (Isaías 48:17).

Tee xi ta jtatik pʼijubtasele: «Mu xayacubic. Yuʼun ti yacubele ta xʼacʼvan ta chʼayel» (Efesios 5:18, Ti Achʼ Rextomento yuʼun ti Jesucristoe, ta skʼop Chamula). Jech xtok chal ti jyakubeletike «mu xʼochic batel ti bu ta xventainvan ti Diose» (1 Corintios 6:9-11, Ch). Chal xtok ti Diose muʼyuk lek chil li «yacubel, spasel cʼusiuc noʼox ta qʼuinetic, xchiʼuc scotol li cʼusitic yan coʼol sba jech chac leʼe» (Gálatas 5:19-21).

Pe ¿mi chilbajinutik van ta melel mi ep chkuchʼtike?

Kʼusitik xibal sba chkʼot ta pasel mi ep chkuchʼtike

Melel onoʼox ti oy kʼusitik lek chkʼot ta pasel kʼalal jutuk noʼox chkuchʼtike, pe kʼalal ep chbate tsokes li jnopbentike xchiʼuk li kʼuyelan ch-abtej jbekʼtal jtakopaltike. Jkʼeltik kʼusitik chkʼot ta pasel kʼalaluk mi ep chbate:

Mu xa jnaʼtik kʼusi ta jpastik yuʼun, tsokes jnopbentik xchiʼuk chopol xa kʼusitik chkaltik (Proverbios 23:33). Alberto ti laj kalbetik skʼoplal li ta mantal jelave, xi chal ta sventa taje: «Jaʼ jun chamel ti kʼalal meʼinem xaʼox li yuchʼel poxe, maʼuk noʼox tsokes jbekʼtal jtakopaltik; tsokes jnopbentik xtok xchiʼuk li kʼusitik ta jpastike. Mu xkakʼtik venta kʼuyelan chkakʼbetik svokol li yantike».

Mu xa xkaʼitik kʼexlal ta skoj. Xi chal li Vivliae: «Li yuchʼel pasem yaʼlel tsʼusube jaʼ chchʼayes li cʼusi lec ta nopele, li cʼusi lec ta pasele» (Oseas 4:11). Jech maʼ taje, kʼalal ep xa batem yuchʼel li poxe, ep xa kʼusitik chlik jpastik —o xal koʼontontik spasel kʼusitik— ti mu van jpastik kʼalal jkuxojtike. Ta skoj taje, xuʼ mu xa masuk tsots skʼoplal chkiltik spasel li kʼusitik leke, ti mu xa xkakʼ ta koʼontontik li jtalelaltike xchiʼuk ti kʼusuk xa noʼox jpastik ti xuʼ jsaʼ jmultik ta stojolal li Diose.

Jech kʼot ta pasel ta stojolal Juan. Jun veltae la stsak sbaik ta kʼop xchiʼuk li yajnile, kapem lokʼ batel xchiʼuk tukʼ skʼeloj batel kantina. Kʼalal yuchʼoj xaʼox jaypʼisuke nopaj talel jun ants ta stojolal. Laj to yuchʼ jaypʼisuk, vaʼun ilokʼik batel, ta tsʼakale imulivajik. Ta skoj ti chopol tajek chaʼi sbae, li Juane la sta ta alel ta mas tsʼakal ti muʼyuk bu jech ikʼot ta pasel jechuk ti muʼyukuk laj yuchʼ li poxe.

Mu xa jnaʼtik kʼusi chkaltik xchiʼuk kʼusi ta jpastik. «¿Bochʼo ti tsta ep svocole? ¿Bochʼo ti abul sbae? ¿Bochʼo ti puru cʼop noʼox tsta, ti xʼocʼolet noʼoxe?», xi tsjakʼ li Vivliae. Vaʼun xi tstakʼ xtoke: «Jaʼ li bochʼo mu spajes sba ta uchʼ poxe, ti te onoʼox tsaʼilan o li cʼusitic chacʼ yacubele» (Proverbios 23:29, 30). Li krixchano taje xvovet chkom, «xcoʼlaj xa xchiʼuc [kajal] ta barco [chaʼi sba] ti cʼalal xyucʼlajet li nabe; xcoʼlaj xa xchiʼuc [luchul] ta sniʼ steʼel barco [chaʼi]» (Proverbios 23:34). Pe maʼuk noʼox taje, chkʼot skʼakʼalil ta xjulav xchiʼuk xi chale: «Quere, laj la sbalicun ta majel, mi juteb laj caʼi, laj la stsitsicun, mi jutebuc laj quil» (Proverbios 23:35, Ch).

Ta jta jchameltik yuʼun. Ta Proverbios 23:32 chalbutik ti poxe «ta tsʼacal ta jta ep jvocoltic yuʼun, jaʼ jech chac cʼu chaʼal cʼalal tstiʼutic jcot jtiʼval chon [«ti chikta komel svenenoale», NM]». Kʼuchaʼal chal li versikulo taje, li doktoretike yilojbeik lek skʼoplal ti mi ep tajek chichʼ uchʼel li poxe, li yipale xkoʼolaj xa kʼuchaʼal veneno ti chmilvane. Lek nabil ti oy jaytos chamel chakʼ ayanuke, ep ta tos kanser, hepatitis alcohólica, cirrosis, pancreatitis, li buchʼutik ipik ta askal chamele chaʼiik hipoglucemia, chil svokolik li uni ololetik kʼalal chiʼinbilik toe, derrames cerebrales xchiʼuk xuʼ chpaj ta abtel li koʼontontike xchiʼuk yan chameletik. Bateltike manchuk mi jun noʼox velta chbat yuchʼel li poxe, xuʼ xi jlajutik yuʼun o chʼayem chi jkom ti mu xa xbakʼ li jbekʼtaltike. Pe li kʼusi mas vokol chkʼot ta pasel kʼalal ep chbat yuchʼel li poxe muʼyuk tsʼibabil ta junuk slivroal poxiletik.

Ti bu mas ta jta jvokoltik yuʼune. Manchuk mi mu xi jyakub, pe mi ep chbate xuʼ mu xa lekuk xkil jbatik xchiʼuk li Diose. Xi chal ta Vivlia li j-alkʼop Isaiase: «Toj abul abaic voʼoxuc ti sob chaliquic batel ta yacubele, ti te ch-icʼub o avuʼunic, jaʼ to ti cʼalal chchʼay avoʼntonic o yuʼun li poxe». ¿Kʼu yuʼun jech laj yat yoʼonton? Yuʼun snaʼoj ti tsokesutik ta mantal kʼalal jech jtalelaltike: «Jaʼ mu [xa] xavacʼ asatic ta sqʼuelel cʼusi tspas li Mucʼul Diose; mu [xa] xatucʼulanic cʼu xʼelan li yabtele», xi (Isaías 5:11, 12).

Li Diose chalbutik ta sKʼop ti akʼo mu jechukutik kʼuchaʼal «li buchʼutik ep chuchʼik poxe» (Proverbios 23:20, NM). Li yijil antsetike ch-albatik ti akʼo mu «xmosoinatik yuʼun epal poxe» (Tito 2:3, NM). Pe, ¿kʼu yuʼun skʼan jkʼel jbatik? Yuʼun li yakubele ta kʼunkʼun chlik, li jun krixchanoe mas nopoltik xa noʼox chuchʼ xchiʼuk mas xa ep-eptik chakʼbe. Mu xakʼ lek venta, pe xi tsnop vayele: «Cʼalal [ch]vul ti jchʼulele, [ch]lic to cuchʼ yan» (Proverbios 23:35, Ch). Mi oy buchʼu persa tskʼan jpʼisuk sventa chetʼesbe xchamelal ta jujun sob ta skoj ti ep bat yuʼun yuchʼel pox li ta akʼobaltike, echʼ xa ta mas maʼ taje.

Li Vivliae ta spʼijubtas xtok ti buchʼutik chbat ta yoʼontonik ta «yacubele [o «ti ep chuchʼik poxe», NM], xchiʼuc iʼechʼ ta bis [y]uʼunic li veʼel uchʼbajele» yuʼun ta «xichʼic chapanel yuʼun li Bochʼo chapal sventa chacʼbe stoj smul li bochʼotic cuxulique xchiʼuc li bochʼotic chamenique» (1 Pedro 4:3, 5). Li Jesús eke, laj yal ta jun albil kʼop ti snitojbe sba skʼoplal kʼalal chvul li skʼakʼalil Jeova ta jkʼakʼaliltike, xi laj yale: «Qʼuelo me aba atuquic. Mu me stsatsub avoʼntonic ta scoj li cʼusitic tscʼan abecʼtalique, ta sventa li yacubele [o li «yuchʼel ep poxe», NM], xchiʼuc ta sventa scʼop oʼntonal ti cʼu xʼelan chacuxiique. Yuʼun jech mu chʼayemuc avoʼntonic cʼalal chcʼot ta pasel» li skʼakʼalil Jeovae (Lucas 21:34, 35).

Li avi une, li krixchanoetik ti meʼinem xa yuʼunik li yuchʼel ep poxe, ¿kʼusi van xuʼ spasik sventa xkom yuʼunik?

[Tsʼib ta yok vun]

[Lokʼol ta pajina 4]

Ep vokolal chakʼ ayanuk li yuchʼel ep poxe