¡Toj lek me ti liʼ xa cha xanavik echʼel li ta be ti mas toj leke!
«Me cuxulutic, o me chijchamutique, yuʼunutic o li Cajvaltique.» (ROM. 14:8)
1. ¿Kʼusi laj yakʼ ta chanel Jesús ta sventa li be ti mas toj leke?
TOJ ep be li ta kuxlejale, pe kʼajomal noʼox jun ti leke, xchiʼuk tskʼan Jeova ti teuk xi jbate. Ta melel, muʼyuk bu yan lek be, jaʼ noʼox lek ti jchʼunbetik li smantaltak ta Vivliae xchiʼuk ti jchanbetik stalelal li xNichʼone. Li Jesuse laj yakʼbe xchan yajtsʼaklomtak kʼuxi ta ichʼel ta mukʼ ta espiritu xchiʼuk ta melel li sTote xchiʼuk laj yakʼbe yabtel sventa spasik ta yajtsʼaklom li krixchanoetike (Mat. 28:19, 20; Juan 4:24, NM). Mi ta jchʼuntik li beiltasel chal Jesuse, xmuyubaj me kuʼuntik li Jeovae xchiʼuk ta me xakʼbutik sbendision.
2. 1) ¿Kʼu yelan laj yaʼiik ep krixchanoetik li aʼyej sventa Ajvalilal yuʼun Dios ta baʼyel sigloe? 2) ¿Kʼu yuʼun chalik ti jaʼ «stamojic Tuqʼuil Be» li baʼyel yajtsʼaklomtak Cristoe?
2 «Scotol li bochʼotic scʼoplal onoʼox chcuxiic sbatel osile» ta sjunul yoʼonton chchʼamik li kʼusitik melele xchiʼuk chichʼik voʼ (Hech. 13:48). Kʼalal jech chkʼot ta pasele, oy lek srasonal ti xi chkalbetike: «¡Toj lek me ti liʼ xa cha xanavik echʼel li ta be ti mas toj leke!» Ta smilal noʼox krixchanoetik ta baʼyel siglo ti ep bu likemik tale ochik ta yajtsʼaklom Cristo xchiʼuk laj yichʼik voʼ sventa chakʼik ta ilel ti yichʼojik ta mukʼ Diose (Hech. 2:41). Jech onoʼox, chalik ti jaʼ «stamojic Tuqʼuil Be[e]» (Hech. 9:2; 19:23). Toj lek ti vaʼ yelan laj yalbeik skʼoplale, yuʼun achʼub xa li xkuxlejalik xkaltike sventa xakʼ ta ilel xchʼunel yoʼontonik ta stojolal li Jesucristoe xchiʼuk ti chchanbeik stalelale (1 Ped. 2:21).
3. 1) ¿Kʼu yuʼun laj kichʼtik voʼ? 2) ¿Jayvoʼ yichʼojik voʼ li avi jaʼtik to lajuneb jabil echʼ tale?
3 Li ta slajebal kʼakʼal liʼe kʼotem ta xa mas ta 230 balumil ti butik chichʼ pasel ta yajtsʼaklom Cristo li krixchanoetike. Li jaʼtik to lajuneb jabil echʼ tale laj yichʼik voʼ 2,700,000 krixchanoetik, —voʼmil ta xemana xkaltik— sventa chakʼik ta ilel ti yakʼoj sbaik ta stojolal Jeovae. Jech tspasik, yuʼun skʼanojik li Jeovae xchiʼuk tskʼan chtunik ta stojolal, yuʼun xojtikinik li Vivliae xchiʼuk kʼotem ta yoʼontonik li chanubtaseletik chakʼe. Stuk noʼox me jech ta batsʼi melel li ichʼ voʼe, yuʼun jaʼ te chlik ti lek xkil jbatik xchiʼuk Jeovae. Jech xtok, ta me xakʼ ta ilel ti jpatoj koʼontontik ta stojolal ti tskoltautik sventa tukʼ xi jxanav batel li ta sbetak xkaltike, jech kʼuchaʼal la skolta li yajtuneltak ta voʼnee (Isa. 30:21).
¿Kʼu yuʼun skʼan xkichʼtik voʼ?
4, 5. Albo kaʼitik skʼoplal jlomuk bendisionetik ti tstaik li buchʼutik chichʼik voʼe.
4 ¿Kʼusi xuʼ xkaltik li ta atojolale? Laj xa van avojtikin buchʼu li Diose, laj xa ajel akuxlejal xchiʼuk jaʼot xa jcholmantal ti muʼyuk avichʼoj voʼe. Mi jaʼ jeche cha jkʼupil kʼoptakutik. Veno, pe ¿mi avakʼoj xa aba ta stojolal Jeova ta orasion un xchiʼuk mi anopoj xa chavichʼ voʼ? Kʼuchaʼal achanoj xa ta Vivliae, li kʼusi mas tsots skʼoplale jaʼ ti xa kʼupil kʼopta li Jeovae maʼuk ti xbat ta avoʼonton spasel li kʼusi cha kʼan atuke mi jaʼuk li saʼel kʼulejale (kʼelo Salmo 148:11-13; Luc. 12:15). Jech xtok, ep me bendision cha ta mi la avichʼ voʼe. ¿Kʼusitik?
5 Mi la nop chavichʼ voʼe, ta me xa tabe lek sbalil li akuxlejale, vaʼun xa muyubaj me ti kʼalal anaʼoj ti jaʼ cha pas li kʼusi lek chil Diose (Rom. 12:1, 2). Ta me xa skoltaot chʼul espiritu ta xchʼiesel talelaletik kʼuchaʼal xchʼunel oʼontonal xchiʼuk jun oʼontonal (Gál. 5:22, 23). Ta me stakʼ aorasiontak li Diose xchiʼuk ta me xakʼbot sbendision ta skoj ti jaʼ jech cha kuxi kʼuchaʼal chal Vivliae. Mas me xkuxet avoʼonton cha pasbe yabtel Dios, mas to me tstsatsub li spatobil avoʼonton sventa kuxlejal sbatel osile, pe ti kʼusi mas tsots skʼoplale jaʼ ti chavakʼ ta ilel ti cha kʼan cha tun ta yajrextiko Jeova kʼalal chavakʼ aba ta stojolale xchiʼuk kʼalal chavichʼ voʼe (Isa. 43:10-12).
6. ¿Kʼusi chkakʼtik ta ilel kʼalal chkichʼtik voʼe?
6 Kʼalal chi jmuki ta voʼe chkakʼtik ta ilel ti laj xa kakʼ jbatik ta stojolal Jeovae xchiʼuk ti jaʼ xa yuʼunutike. Toj lek xi laj yalbe skʼoplal li Pabloe: «Muʼyuc bochʼo cuxul ta stuc noʼox; muʼyuc bochʼo chcham ta stuc noʼox. Me cuxulutique, cuxulutic ta sventa ch-ichʼat ta mucʼ ti Cajvaltique. Me chijchamutique, chijchamutic ta sventa ch-ichʼat ta mucʼ li Cajvaltique. Jaʼ yuʼun me cuxulutic, o me chijchamutique, yuʼunutic o li Cajvaltique» (Rom. 14:7, 8). Yichʼojutik ta mukʼ li Diose yuʼun chakʼ jtʼujtik ti kʼusi ta jkʼantike. Kʼalal jaʼ ta jkʼantik ti chi jxanav ta sbee chkakʼtik ta ilel ti jkʼanojtike xchiʼuk xkuxet me yoʼonton kuʼuntik (Pro. 27:11). Maʼuk noʼox me chkakʼtik ta ilel ta sat krixchanoetik ti laj xa kakʼ jbatik ta stojolale, moʼoj, yuʼun jaʼ jech chkakʼtik ta ilel xtok ti jchʼamojtik ta Ajvalil kuʼuntike xchiʼuk ti te oyutik ta stojolal ta sventa li mukʼul pas mantal yuʼun ta sjunul vinajel-balumile (Hech. 5:29, 32, NM). Vaʼun te oy ta jtojolaltik li Jeova ek une (kʼelo Salmo 118:6). Pe oy to me yan bendision avi xchiʼuk ta tsʼakal ta skoj ti laj kichʼtik voʼe.
Jaʼ jun bendision ti oy ep kermanotaktike
7-9. 1) ¿Kʼusi albatik yuʼun Jesús li buchʼutik laj yiktaik li kʼusitik oy yuʼun sventa tstsʼakliike? 2) ¿Kʼuxi yakal chkʼot ta pasel avi li kʼusi yaloj Jesús ta Marcos 10:29, 30?
7 Xi la sjakʼbe jun velta Jchanubtasvanej yuʼun li Pedroe: «Qʼuelavil, li vuʼuncutique jcomtsanojcutic scotol, liʼ jchiʼinojotcutic. ¿Cʼusi ta jtacutic ec?» (Mat. 19:27). Tskʼan tsnaʼ kʼusi tstaik ta mas tsʼakal xchiʼuk li yan yajtsʼaklomtak Cristoe. Yuʼun ep kʼusitik stenojik komel sventa jaʼ xakʼ-o ta xkuxlejalik xcholbel skʼoplal li Ajvalilal yuʼun Diose (Mat. 4:18-22). ¿Kʼusi la stakʼ li Jesuse?
8 Li Evanjelio yuʼun Marcos eke te laj yal Jesús ti ep tsta yermanotakike: «Li bochʼotic scomtsanoj snaic, me xchiʼiltac ta voqʼuel, me stot, me smeʼ, me yalab xnichʼnabic, me yosiltac, ti vuʼun ta jcoj xchiʼuc ta scoj li Lequil Aʼyeje, ta stabe ep xqʼuexol. Voʼvinic (100) ta velta jech yepal tsta li cʼusi scomtsanoje: me sna, me xchiʼiltac ta voqʼuel, me stot, me smeʼ, me yalab xnichʼnabic, me yosiltac. Xchiʼuc chichʼ contrainel noxtoc. Tsʼacal to ta xcuxiic sbatel osil» (Mar. 10:29, 30). Kʼuchaʼal laj yal Jesuse, ep yajtsʼaklomtak Cristo —jech kʼuchaʼal Lidia, Aquila, Priscila xchiʼuk Gayo— la xchʼam ta snaik li xchiʼiltakik ta yajtsʼaklom Cristoe xchiʼuk xkoʼolaj kʼuchaʼal «xchiʼiltac ta voqʼuel, [o] smeʼ» kʼotik ta stojolal (Hech. 16:14, 15; 18:2-4; 3 Juan 1, 5-8).
9 Yakal tajek chkʼot ta pasel avi li kʼusi laj yal Jesuse. Ep yajtsʼaklomtak Cristo yiktaoj «yosilta[kik]», jech kʼuchaʼal misioneroetik, buchʼutik chtun ta Betel, xchiʼuk li jtuneletik ti ch-abtejik ta yantik balumile, —yiktaojik xkaltik li kʼusi chkuxiik-oe— yuʼun tskolta sbaik li ta abtelal sventa Ajvalilal yuʼun Dios ta yan lumetike. Junantike yiktaoj snaik xchiʼuk sjutukajesoj li kʼusitik ta xkuxlejalike. Ep ta velta kabinojtik kʼusitik yiloj ta xkuxlejalik ermanoetik ti chakʼ ta ilel ti chabibilik yuʼun Jeovae xchiʼuk ti xmuyubaj noʼox chtunik ta stojolale (Hech. 20:35). Ta melel, skotol li yajtsʼaklomtak Cristo ti yichʼojik xa voʼe xmuyubajik noʼox me mi «baʼyuc [chakʼ sbaik] ta ventainel yuʼun li Diose», jech kʼuchaʼal tspasik ta spʼejel Balumil li ermanoetike (Mat. 6:33).
Jaʼ jun bendision ti «chabibil[utik] yuʼun li Bochʼo te oy ta vinajele»
10, 11. ¿Kʼusi smelolal ti ta jtatik «chabi[e]l yuʼun li Bochʼo te oy ta vinajele», xchiʼuk kʼusi skʼan jpastik sventa xi j-och li bu ta jtatik chabiele?
10 Ta jtatik yan bendision yuʼun xtok ti chkakʼ jbatik ta stojolal Diose xchiʼuk ti chkichʼtik voʼe: jaʼ li «chabi[e]l yuʼun li Bochʼo te oy ta vinajele» (kʼelo Salmo 91:1). ¿Kʼusi smelolal taje? Jaʼ skʼan xal ti ta jsaʼtik o ti chi j-och xkaltik ti bu oy chabiel ta mantale, ti bu muʼyuk bu chi jlaj ta ilbajinel ta mantale. Ti avilal taje mu me snaʼik bu li buchʼutik muʼyuk spatoj yoʼontonik ta stojolal Diose. Xi me chkalbetik Jeova xkaltik mi ta jpastik li kʼusi laj kaltik kʼalal laj kakʼ jbatik ta stojolale xchiʼuk mi ta jpat koʼontontik ta stojolale: «Voʼot jpojubbailot, voʼot jnacʼubbailot, voʼot Diosot cuʼun, jpatoj o coʼnton ta atojol» (Sal. 91:2). Vaʼun jaʼ me jech chkʼot ta Jchabivanej kuʼuntik li Jeovae (Sal. 91:9). ¿Kʼusi mas ta jkʼantik yaʼel un?
11 Ti xuʼ chi j-och xkaltik ti bu oy chabiel chakʼ Jeovae jaʼ me ta skoj ti jtaojtik jun bendisione: jaʼ ti yamigoutike. Ti vaʼ yelan toj lek xkil jbatike jaʼo me te lik kʼalal laj kakʼ jbatik ta stojolale xchiʼuk ti laj kichʼtik voʼe, vaʼun ta kʼunkʼun me tstsatsub echʼel kʼalal ta jchan jVivliatike, ti ta sjunul koʼonton ta jpastik orasion xchiʼuk ti chkakʼbetik yipal ta xchʼunbel smantale (Sant. 4:8). Jaʼ me toj lek xuʼ jchanbetik stalelal li Jesuse, yuʼun muʼyuk buchʼu yan ti nopol oy ta stojolal Jeovae. Ta sjunul onoʼox yoʼonton spatoj yoʼonton ta stojolal li sTote (Juan 8:29). Mu me xi jchibaj ta stojolal li Diose: xuʼ me yuʼun tskoltautik xchiʼuk oy me ta yoʼonton sventa xkʼot ta pasel kuʼuntik li kʼusi laj kaltik kʼalal laj kakʼ jbatik ta stojolale (Ecl. 5:4). Ti chchabiutik ta mantale jaʼ me svinajeb ta melel ti skʼanojutike xchiʼuk ti oy ta yoʼonton ti tskʼan tukʼ xkakʼ jbatik ta spasbel li yabtele.
Jaʼ jun bendision ti oyutik xa ta jun paraiso yaʼeluke
12, 13. 1) ¿Kʼusi skʼan xal ti ta paraiso xa oyutik yaʼeluke? 2) ¿Kʼuxi xuʼ jkoltatik li buchʼutik achʼik toe?
12 Kʼalal chkakʼ jbatik ta stojolal Diose xchiʼuk ti chkichʼtik voʼe xkoʼolaj me kʼuchaʼal oyutik xa ta jun paraiso yaʼeluk. ¿Kʼusi skʼan xal taje? Jaʼ ti jun noʼox koʼonton jmoj oyutike, ti stuk noʼox jech li lekilal ta jkʼupintik xchiʼuk Jeovae xchiʼuk li kermanotaktike (Sal. 29:11; Isa. 54:13). Mi jaʼuk onoʼox xkoʼolaj xchiʼuk li kʼusi chakʼ balumile. Mas to jech xvinaj li ta mukʼta tsobajeletik ta internasional ti bu tstsob sba ep ermanoetik ti jeltos lumetik bu likemik tale, jelel skʼopik xchiʼuk stsʼunbalik, akʼo mi jech, jun noʼox yoʼontonik, jmoj oyik xchiʼuk skʼanoj sbaik.
13 ¡Toj jelel ta jyalel ti kʼuyelan kuxul li krixchanoetik ta balumile! (Kʼelo Isaías 65:13, 14.) Jtaoj jun jmotontik kʼalal ta jcholtik mantale, yuʼun xuʼ jtaktik ta ikʼel li krixchanoetik sventa x-ochik xkaltik li ta paraisoe. Jaʼ me jun matanal xtok ti jkoltatik li buchʼutik jaʼ to yochelik ta mantal sventa xtojobik echʼel mas li ta spasbel yabtel Diose. Mi la skʼanbutik moletik ti akʼo xi jkoltavane, jaʼ me jech xuʼ jkoltatik junantik kʼuchaʼal la spas Aquila xchiʼuk Priscila ti «[laj yalbeik] lec smelol cʼusitic tscʼan [Dios]» li Apolose (Hech. 18:24-26).
Jchanbetik-o stalelal li Jesuse
14, 15. ¿Kʼusitik srasonal oy kuʼuntik sventa jchanbetik-o stalelal li Jesuse?
14 Oy me lek srasonal kuʼuntik sventa jchanbetik-o stalelal li Jesuse. ¿Kʼu yuʼun? Yuʼun kʼalal skʼan toʼox xtal ta Balumile, ta smilal xa noʼox jabil la xchiʼin ta abtel li sTote (Pro. 8:22, 30, NM). Snaʼoj onoʼox lek ti bu mas toj lek li bee, ti jaʼ li spasbel yabtel Jeovae xchiʼuk ti xakʼ ta ojtikinel li smantaltake (Juan 18:37). Snaʼoj onoʼox lek xtok un ti jaʼ toj chopol chcham-o ta skoje (Mat. 20:18, 19, NM; Heb. 4:15). Pe snaʼoj lek xtok ti jaʼ noʼox sventa tsaʼ slekilal stuk xchiʼuk ti mu xkʼot lek xkaltik sat mi yan-o be stam batele. Tukʼ laj yakʼ kiltik ta stalelal kʼusi skʼan jpastik sventa tukʼ koʼontontik ta stojolal li Jeovae.
15 Lik pasatuk ta preva yuʼun Satanás kʼalal mu toʼox jaluk yichʼoj voʼ li Jesuse sventa sten komel li bee, pe mu jechuk la spas (Mat. 4:1-11). Taje jaʼ skʼan xal ti xuʼ tukʼ-o koʼonton xkakʼ jbatik akʼo mi oy kʼusi spas li Diabloe. Li stuke jaʼ mas chakʼ sat ta stojolal li buchʼutik chichʼik xa voʼe o ti buchʼutik jaʼ to laj yichʼike (1 Ped. 5:8). ¿Kʼusi tspasbe? Jaʼ tstunes li utsʼ-alaliletik ti oy slekil yoʼontonike, pe ti mu xojtikinik lek li kabteltike. Akʼo mi jech, xuʼ jaʼo oy kʼusi te jtakʼtik kʼalal jech chkʼot ta pasele, te ta jcholbetik mantal xchiʼuk ti te ta jtsʼitestik stalelal yajtsʼaklomtak Cristo jech kʼuchaʼal ti chi j-ichʼvan ta mukʼe xchiʼuk ti xkichʼ jpʼijiltike (1 Ped. 3:15, 16). Kʼalal jech ta jpastike, ep me tstabeik sbalil li buchʼutik chaʼi kʼusi chkaltike (1 Tim. 4:16).
Mu me jtentik komel li be ti mas toj leke
16, 17. 1) ¿Kʼuxi oxtos skʼan xichʼ pasel chal Deuteronomio 30:19, 20 sventa jta jkuxlejaltike? 2) ¿Kʼuxi to laj yalbeik skʼoplal Jesús, Juan xchiʼuk Pablo taje?
16 Kʼalal skʼan toʼox van 1,500 jabil xtal ta balumil li xNichʼon Diose, li Moisese laj yalbe jteklum Israel ti jaʼ akʼo stʼujik li be ti mas lek li vaʼ kʼakʼal taje. Xi laj yalbee: «Ta jvaʼan ta testigo ta atojolic li vinajel xchiʼuc li banamile [sventa chkakʼ] atʼujic li cʼusi chacʼanique: ¿Me jaʼ chacʼanic li cuxlejale, o me jaʼ chacʼanic li lajele? ¿Me jaʼ chacʼanic li bendicione, o me jaʼ chacʼanic li stojol mulile? Jaʼ lec jaʼ cʼanic li cuxlejale yuʼun jech chacuxiic li voʼoxuque xchiʼuc li anichʼnabique xchiʼuc li amomnichʼnabique. Jaʼ me cʼanic li Mucʼul Dios avuʼunique. Chʼunbeic li cʼusi chayalboxuque, xchiʼuc junuc avoʼntonic o ta stojol» (Deu. 30:19, 20). Melel onoʼox ti muʼyuk tukʼ laj yakʼ sba li jteklum taje, pe maʼuk me jel-o li kʼusi oxtos skʼan xichʼ pasel ti laj yalbe skʼoplal Moisés sventa xichʼ tael li kuxlejale. Jech ta melel, li Jesús xchiʼuk yantik yajtuneltak Diose laj to yalbeik skʼoplal.
17 «Me [ta jkʼantik] li Mucʼul Dios [kuʼuntike]» jaʼ me jech chkʼot ta pasel kuʼuntik jtos li kʼusi chi jkʼanbate, jech oxal chaʼa skʼan me xkakʼ ta jkuxlejaltik li stukʼil mantaltake (Mat. 22:37). Li xchaʼtosale jaʼ ti jpastik liʼe: «Chʼunbeic li cʼusi chayalboxuque». Taje ta jpastik kʼalal ta jchantik li Vivliae xchiʼuk ti jpastik li kʼusi chal ta smantaltake (1 Juan 5:3). Jaʼ yuʼun toj tsots skʼoplal ti xi jbat ta skotol tsobajeletik ti bu chichʼ chapbel smelolal sKʼop Diose (Heb. 10:23-25). Ta slajebal une, skʼan «junuc [koʼontontik] ta stojol» o jnochʼan jbatik ta stojolal li Jeovae. Oyuk-o me xchʼunel koʼontontik ta stojolal xchiʼuk jtsʼaklibetik-o li xNichʼone, akʼo mi oy kʼusi xkʼot ta jtojolaltik.
18. 1) ¿Kʼusi laj yal ta 1914 ta sventa kʼusi melel li revista liʼe? 2) ¿Kʼu yelan chkaʼi jbatik ti jaʼ jun matanal ti chi jxanavutik ta sakil osil ta sventa mantale?
18 ¡Toj jun xa noʼox yutsil ti chkakʼ ta jkuxlejaltik li kʼusitik melele! Xi laj yal ta inglés ta 1914 li revista liʼe: «¿Mi mu jechuk ti jaʼutik jun jteklum ti xi jmuyubaj noʼox xchiʼuk ti ep bendision jtaojtike? ¿Mi mu jechuk ti tukʼ li jDiostike? Jaʼ yuʼun mi oy buchʼu snaʼ ti oy jun be ti mas to leke, akʼo batuk te. Mi oy buchʼu avuʼunik ti oy kʼusi la sta ti mas to leke, alik kaʼitik avokolikuk. Stuk noʼox jech toj lek jtaojkutik li kʼusi jchanojkutik ta sKʼop Diose, muʼyuk kʼusi yan, mi jaʼuk onoʼox stabe j-oʼlol slekil li kʼusi jtaojkutike. [...] Mu xa noʼox stakʼ alel li lekilal, li muyubajel xchiʼuk li bendisionetik yakʼoj ta koʼontontik xchiʼuk ta jkuxlejaltik li yojtikinel lek melel Diose. Ti kʼu xa yepal tal sloʼilal li pʼijilal, tukʼilal, juʼelal xchiʼuk li kʼanel yuʼun Diose jaʼ me xkuxet noʼox yuʼun jnopbentik xchiʼuk koʼontontik. Liʼ xa noʼox paj li kʼusi ta jsaʼtike. Li kʼusi xa noʼox ta jkʼantike jaʼ ti x-ayan batel mas yojtikinel kuʼuntik li Diose». (The Watch Tower ta 15 yuʼun disiembre ta 1914, pajina 377 xchiʼuk 378). Mu xlaj jtojtik-o ta vokol li sakil osil ta mantale. Mi jaʼuk, mas to oy srasonal sventa xi jmuyubaj avi ti chi jxanavutik «ta saquil osil yuʼun li Mucʼul Diose», li Jeovae (Isa. 2:5; Sal. 43:3; Pro. 4:18).
19. ¿Kʼu yuʼun skʼan noʼox xichʼik voʼ li buchʼutik spas xa yuʼunik li kʼusi chichʼik kʼanbele?
19 Mi cha kʼan cha xanav «ta saquil osil yuʼun li Mucʼul Diose» pe ti muʼyuk to bu avichʼoj voʼe, mu me masuk xa nop. Akʼo persa sventa xa pas li kʼusi chkʼanbatik buchʼutik chichʼ voʼe, yuʼun me jaʼ noʼox jech toj lek xuʼ xavakʼ ta ilel ti koliyal tajek chaval li kʼusitik spasoj Jeova xchiʼuk Jesuse. Akʼbo Dios li kʼusi mas toj tsots skʼoplal oy avuʼune: li akuxlejale. Akʼbo yil ti cha kʼan cha pasbe li kʼusi tskʼan yoʼontone xchiʼuk ti cha tsʼaklibe-o li xNichʼone (2 Cor. 5:14, 15). Jech ta melel chaʼa, muʼyuk me bu cha ta yan be ti mas toj leke.
¿Kʼusi cha takʼ?
• ¿Kʼusi skʼan xal li ichʼ voʼe?
• ¿Kʼusitik bendision tstaik li buchʼutik chakʼ sbaik ta stojolal Dios xchiʼuk ti chichʼik voʼe?
• ¿Kʼu yuʼun toj tsots skʼoplal ti jchanbetik stalelal Jesuse?
• ¿Kʼusi tskoltautik sventa mu jtentik komel li be ti mas toj leke?
[Lokʼol ta pajina 25]
Kʼalal chkichʼtik voʼe jaʼ te chkakʼtik ta ilel ti jaʼ la jtʼujtik li be ti mas toj leke
[Lokʼol ta pajina 26]
¿Mi asaʼoj xa li «chabi[e]l yuʼun li Bochʼo te oy ta vinajele»?