Nopajan ta stojolal Dios

Albil onoʼox skʼoplal chtal jun ajvalilal ti mu xlaj-o skʼoplale

2 Samuel 7:1-16

TI KʼU xa sjalil talel li kuxlejal ta Balumile, ep xa noʼox ti buchʼutik yiktaojik komel li yabtelik ta ajvalilale. Jlome yuʼun muʼyuk xa bu chaʼtʼujatik; li yantik xtoke nutsbil lokʼik. Pe, ¿kʼusi stakʼ xkaltik ta sventa li Jesucristoe, li ajvalil tʼujbil yuʼun Dios sventa tspas mantal ta vinajele? ¿Mi oy van kʼusi chmakat-o sventa tspas li yabtele? Li stakʼobiltak taje xuʼ te jtatik li ta kʼusi albat yuʼun Jeova li Davide, li ajvalil ta voʼneal Israele. Li loʼil taje te ta jtatik ta 2 Samuel kapitulo 7.

Ta slikebal li kapitulo liʼe ta xkiltik ti Davide, ti jaʼ noʼox jun krixchanoe, chopol chaʼi sba ti jaʼ toj kʼupil tajek li snae, ti jaʼ ta karpana noʼox oy li xkaxail smantal Diose.a Jech oxal oy ta yoʼonton svaʼanel jpʼejuk na ti sta-o sventa Diose: junuk chʼulna sventa Jeova (versikulo 2). Akʼo mi jech, li Davide maʼuk ta svaʼan li na taje. Li Jeovae laj yalbe j-alkʼop Natán ti akʼo yalbe ti jaʼ la jun xnichʼon buchʼu tsvaʼan li chʼulnae (versikulo 4, 5, 12 xchiʼuk 13).

Li kʼusi oy ta yoʼonton tspas li Davide, kʼot tajek ta yoʼonton ek li Jeovae. Jech oxal, ta skoj ti oy ta yoʼonton yichʼel ta mukʼ Dios li Davide xchiʼuk ti kʼusi oy onoʼox oy ta yoʼontone, la spas jun trato xchiʼuk: li Jeovae chakʼ ochuk ta ajvalilal sbatel osil jun snitilul li Davide. Li Natane laj yalbe David li kʼusi snopoj tspas Diose: «“Li amomnichʼnabtaque xchiʼuc ti bu cʼalal aventainoje jʼechʼel jech chcom o. Xchiʼuc li avabtel ta ajvalilale te chcom o ta atojolic”, xi li Diose», x-utat (versikulo 16). ¿Buchʼu van jaʼ skʼoplal li trato laj yichʼ pasel taje, ti tspas mantal sbatel osile? (Salmo 89:20, 29, 34-36.)

Li Jesús ti likem ta Nazarete lokʼem tal ta yutsʼ yalal li Davide. Li anjel ti laj yalbe skʼoplal svokʼel li Jesuse xi laj yale: «Li Diose ta xacʼ ochuc ta ajvalilal jech chac cʼu chaʼal li smoltot David ta voʼonee. Jʼechʼel chlic sventainbe o scotol li smomnichʼnab Jacobe. Muʼyuc slajeb li yabtel chichʼe» (Lucas 1:32, 33). Ta melel, kʼot ta pasel ta stojolal Jesucristo li trato laj yichʼ pasel xchiʼuk Davide. Mu jaʼuk laj yichʼ tʼujel yuʼun krixchanoetik sventa sta li yabtele, moʼoj, jech laj yal stuk Dios, jech oxal jaʼ sderecho tspas mantal sbatel osil. Xchiʼuk mu xchʼay xkaʼitik, skotol li kʼusitik chal Diose chkʼot onoʼox ta pasel (Isaías 55:10, 11).

Tana un, oy chaʼtos kʼusitik xuʼ jchantik li ta versikuloetik la jkʼeltik tale. Li baʼyele jaʼ ti muʼyuk kʼusi xchiʼuk muʼyuk buchʼu xuʼ spajtsan sventa tspas yabtel li Jesuse. Taje jaʼ spatobil koʼontontik ti ta melel tspas skotol li kʼusitik yaloj tspase, jaʼ xkaltik, ti akʼo kʼotuk ta pasel kʼusi tskʼan yoʼonton Dios liʼ ta Balumil jech kʼuchaʼal te ta vinajele (Mateo 6:9, 10).

Li xchibal kʼusi xuʼ jchantike jaʼ ta sventa li Jeovae. Vuleso ta ajol ti kʼot ta yoʼonton li kʼusi snopoj tspas Davide. ¿Mi mu jechuk ti tspat koʼontontik snaʼel ti yiloj Jeova ti oy ta koʼontontik yichʼel ta mukʼe? Jech, bateltike ta skoj li kʼusitik chkʼot ta pasel ti mu stakʼ kʼusi xkutike, xuʼ van mi jaʼ chamel o malubel, tspajtsanutik ta spasbel yabtel Dios kʼuchaʼal tskʼan koʼontontike. ¡Ta skoj ti ep tajek sbalil chil Jeova ti oy ta koʼontontik yichʼel ta mukʼ ta melele, jaʼ spatobil koʼontontik chkʼot!

[Tsʼib ta yok vun]