¿Mi chakʼupin skʼelel li Vivliae?

«KʼALAL lik jkʼelilan li Vivliae jaʼ noʼox chichʼajub-o yuʼun, muʼyuk toʼox ta jkʼupin. Ta skoj ti vokol toʼox chkaʼibe smelolale ta anil noʼox chchʼay koʼonton», xi chal Lorraine.

Oy ep yajtsʼaklom Cristo ti jaʼ jech chaʼi sbaik eke. Pe muʼyuk lubtsajemik, yuʼun snaʼojik ti jaʼ mas leke. Xi chal Marc: «Kʼun tajek chchʼay koʼontontik ta spasel yan kʼusitik ti jaʼ ta xkikta ta tsʼakal li skʼelel xchiʼuk li xchanel Vivliae. Sventa xnop xkaʼi skʼelel jujun kʼakʼal li Vivliae ep la jpas orasion xchiʼuk ep laj kakʼbe yipal».

¿Kʼusi stakʼ xapas sventa mas chakʼupin skʼelel li sKʼop Diose? Jkʼeltik kʼusi xuʼ xapas batel.

Ti kʼusitik xuʼ xapas sventa xakʼupine

Paso orasion xchiʼuk chapano avoʼonton kʼalal skʼan toʼox xlik akʼele. Sventa chavaʼi lek li mantaletike, kʼanbo Jeova akʼo sjambot lek ajol, avoʼonton xchiʼuk sventa oyuk ta avoʼonton xachan li Vivliae (Sal. 119:34). Mi mu jechuk chapase chachʼajub xchiʼuk chachibaj. Xi chal Lynn: «Bakʼintike solel ta anil ta jkʼel batel, ta skoj taje mu xa xkakʼ venta lek li kʼusitik te chale mi jaʼuk li kʼusitik tsotsik skʼoplale. Jech xtok, yan-o kʼusi chlik jnop ta anil. Sventa taje ta jkʼanbe Jeova akʼo skoltaun ti mu jechuk xkʼot ta pasele».

Epuk sbalil chavil li kʼusi yakal chachane. Mi chakʼan chakʼuxi sbatel osile vuleso ta ajol ti skʼan chavaiʼbe smelolal li beiltaseletik ta Vivliae xchiʼuk ti skʼan chavakʼ ta akuxlejale. Ta skoj taje skʼan chavakʼbe yipal ta saʼel kʼusitik skʼan chavakʼ batel ta akuxlejal. Li Chrise xi chale: «Ta jkʼelbe lek skʼoplal sventa skoltaun ta snaʼel butik skʼan jtukʼibtas li ta jnopbene xchiʼuk ti kʼu yuʼun ta jpas li kʼusitike. Akʼo mi mu xkojtikin jbakutik xchiʼuk li jtsʼibajometike, xi muyubaj tajek kʼalal ta jta ta Vivlia xchiʼuk ta vunetik slokʼesoj steklumal Jeova li aʼyejetik ti lek jtunel ta jkuxlejale».

Paso li kʼusi stakʼ noʼox taele. Akʼbo yipal xchanel kʼusitik achʼ ta sventa viniketik xchiʼuk antsetik ti te chalbe skʼoplal ta Vivliae. Sventa xasabe mas smelolale kʼelo ta Vivlia xchiʼuk ta yan vunetik ti oy xa ta akʼope. Mi batsʼi kuxul chavil li krixchanoetike, li kʼuyelan stalelalik xchiʼuk ti kʼuyelan chaʼi sbaik ta jujuntale, mas me chkʼot ta avoʼonton li kʼuyelan xkuxlejalike.

Saʼo yan kʼusitik ta Vivlia sventa xarasonaj-o xchiʼuk li krixchanoetike (Hech. 17:2, 3). Jaʼ li kʼusi tskʼan tspas Sophia kʼalal chchan Vivliae: «Ta jsaʼ kʼusitik achʼik sventa ta jtunes ta chol mantal o ta bu yantik. Jaʼ jech xuʼ mas jamal chkalbe smelolal li kʼusitik melel ta Vivliae. Li revista Li Jkʼel osil ta toyole ep tajek tskoltaun sventa spas kuʼun taje» (2 Tim. 2:15).

Teuk xa akʼeloj yilel li kʼusi chkʼot ta pasele. Li Hebreos 4:12 xi chale: «Li scʼop Diose cuxul». Yakaluk xa chkʼot ta pasel chavil li kʼusi chachan ta Vivliae. Akʼo persa xakʼel, xachikinta xchiʼuk jechuk chavaʼi aba jech kʼuchaʼal li buchʼu chakʼelbe skʼoplale. Xi xa jakʼbe abae: «¿Kʼuyelan xkoʼolaj li jkuxlejalkutike? Kʼalal ta jta prevaetik ta jkuxlejale, ¿kʼuxi xuʼ jchanbe stalelalik?». Taje jaʼ tskoltaot ta yaʼibel smelolal xchiʼuk chvul-o ta ajol li loʼiletike.

Chano li tekstoetik ti tsotsik chavaʼie xchiʼuk sabo smelolal li ta vunetik ti bu chalbe smelolale. Chʼakbo lek yorail kʼalal chachanunaje. Sabo lek smelolal li kʼusitik lek la avaʼie, saʼo kʼusi skʼan xal li kʼopetik ti mu xavaʼie xchiʼuk kʼelo li kʼusitik tsʼibabil ta yok Vivliae xchiʼuk li yan tekstoetik bu chtakvan batele. Kʼalal mas chavojtikin xchiʼuk chavakʼ ta akuxlejal li kʼusitik chachane, chavakʼ venta ti kʼunkʼun chamuyubaj yuʼun li sKʼop Diose. Vaʼun jaʼ jech chavaʼi aba jech kʼuchaʼal laj yalbe Jeova li jtsʼibajom yuʼun salmoe: «Jaʼ jmoton o sbatel osil chcaʼay li amantaltaque, yuʼun jaʼ te ta jta o xcuxetel coʼnton» (Sal. 119:111).

Mu toj aniluk xachanunaj. Chʼakbo lek yorail. Naʼo xtok ti skʼan chachapan aba sventa li tsobajeletike. «Bakʼintike mu xa jnaʼ kʼusi ta jpas, jaʼ yuʼun mu xa xkaʼi li kʼusi ta jchane —jech tsloʼilta li Raquele—. Jech oxal, ta jujuvokʼtik xa chichanunaj. Kʼalal jech ta jpase mas lek chkaʼibe smelolal.» Li Chris xi chal xtoke: «Kʼalal sujom chichanunaje, chopol chkaʼi li jol koʼontone, yuʼun mu xkom ta jol li kʼusi ta jkʼele xchiʼuk mu xkʼot ta koʼonton». ¿Kʼusi stakʼ jpastik? Jaʼ ti xachʼakbe lek yoraile.

Tsʼiteso tajek ta avoʼonton skʼelel li sKʼop Diose. Xi laj yal mantal li jtakbol Pedroe: «Jaʼuc jechoxuc jech chac cʼu chaʼal ololetic ti naca to chvoqʼuique, ti tsaʼilan xchuʼique. Jaʼuc jechoxuc ta saʼilanbel sveʼel avoʼntonic li voʼoxuque, yuʼun jech chachʼiic ta sventa li scʼop Dios ti jaʼ melele, jech chacolic» (1 Ped. 2:2). Kʼalal chvokʼ li ololetike, solel tskʼan xchuʼik, yan li voʼotike skʼan jtsʼitestik ta koʼontontik ti ta jkʼan ta jmakʼlin jbatik li ta Vivliae. Ti mi chanopes aba ta skʼelel jun pajina ta kʼakʼale, chavakʼ venta ti mas chakʼan chachan batele. Ta slikebale xuʼ van toj tsots chavaʼi, pe mu jaluk chavaʼi ti chlik akʼupine.

Nopbo skʼoplal li kʼusi chakʼele. Mas chatabe sbalil kʼalal chanopbe smelolal li kʼusi chakʼele. Mi jech chapase chavakʼ venta ti chata amukʼta motone, ti jaʼ li apʼijile (Sal. 19:14; Pro. 3:3).

Mu jecheʼuk chachʼay akʼakʼal

Maʼuk kʼun li ta jnopes jbatik ta skʼelel Vivliae, pe ep ta jtatik bendisionetik. June jaʼ ti chavaʼibe mas smelolal li sKʼop Diose (Heb. 5:12-14). Jech noxtok, chata mas apʼijil xchiʼuk chanaʼ skʼelel kʼusi lek xchiʼuk kʼusi chopol sventa chamuyubaj-o xchiʼuk oyuk noʼox alekilal. Naʼo me li pʼijilal ta Vivliae jaʼ «teʼ sventa cuxlejal» sventa li buchʼutik tsaʼik xchiʼuk chakʼ ta xkuxlejalik li beiltaseletik tee (Pro. 3:13-18).

Kʼalal lek chachanbe skʼoplal li sKʼop Diose chapas ta jun krixchano ti lek snaʼ snopele (Pro. 15:14). Jaʼ mas lek chakolta-o ta mantal li yantike yuʼun ta Vivlia chalokʼes li kʼusi chavalbee. Mi chatsak ta mukʼ li Vivlia xchiʼuk li vunetik tslokʼes li «jʼabtel ti jun [«tukʼ», NM] yoʼnton [...], ti lec bije» kʼalal oy kʼusi chanop chapase, chata li spatobil avoʼonton chakʼ sKʼop Diose (Mat. 24:45). Jech xtok, mas noʼox xamuyubaj xchiʼuk mas chatsatsub ta mantal. Pe maʼuk noʼox taje, yuʼun skotol li kʼusitik chapas sventa chatun ta stojolal Jeovae lek chbat avuʼun skotol (Sal. 1:2, 3).

Jaʼ me stij koʼontontik yalel kʼusi jchʼunojtik mi jkʼanojtik ta sjunul koʼontontik li Jeovae. Taj xtoke chakʼ muyubajel. Sventa chkʼot ta yoʼonton krixchanoetik li kʼusi chal Sophiae, yakʼoj ta yoʼonton tsvules ta sjol xchiʼuk tstunes epal tekstoetik li ta chol mantale, li avi une mas xa lek li kʼuyelan chchol mantale. «Toj alakʼ sba ta kʼelel li kʼuyelan chaʼi sbaik li krixchanoetik kʼalal jkʼelbeik li Vivliae», xi chal li Sophiae.

Li sbalil mas lek chatabe mi chakʼel li Vivliae, jaʼ ti mas lek chavil aba xchiʼuk Jeovae. Kʼalal chachan li Vivliae chavaʼibe mas smelolal li smantaltak Diose xchiʼuk li stalelaltake, jech kʼuchaʼal kʼanelal, slekil yoʼonton xchiʼuk li stukʼilale. Chʼabal xa noʼox yan kʼusi stakʼ jpastik ti tsots skʼoplal xchiʼuk ti chakʼ muyubajele. Jaʼ yuʼun, akʼo persa xachʼak akʼakʼal sventa xachan li sKʼop Diose. Jech kʼuchaʼal chkiltike, li skʼelel skʼop Diose jaʼ li kʼusi mas lek xuʼ jpastike (Sal. 19:7-11).

[Rekuadro ta pajina 5]

TI KʼUSITIK XUʼ XAPAS SVENTA XAKʼUPIN LI SKʼELEL VIVLIAE

▪ Paso orasion xchiʼuk chapano avoʼonton kʼalal skʼan toʼox xlik akʼele.

▪ Epuk sbalil chavil li kʼusi yakal chachane.

▪ Paso li kʼusi stakʼ noʼox taele.

▪ Saʼo yan kʼusitik ta Vivlia sventa xarasonaj-o xchiʼuk li krixchanoetike.

▪ Teuk xa akʼeloj yilel li kʼusi chkʼot ta pasele.

▪ Chano li tekstoetik ti tsotsik chavaʼie xchiʼuk sabo smelolal li ta vunetik ti bu chalbe smelolale.

▪ Mu toj aniluk xachanunaj.

▪ Tsʼiteso tajek ta avoʼonton skʼelel li sKʼop Diose.

▪ Nopbo skʼoplal li kʼusi chakʼele.

[Lokʼol ta pajina 4]

Nopo ti jech yakal chkʼot ta pasel li kʼusi chakʼel ta Vivliae