Muʼyuk chijxiʼ mi ta jpat lek koʼontontik ta stojolal Jeovae
«Chiyaʼibun jcʼop cʼalal ta jcʼopan li Mucʼul Diose.» (SAL. 4:3)
1, 2. 1) ¿Kʼusi tsots vokol ta snup li Davide? 2) ¿Kʼusitik Salmoal ta jchantik?
EP JABIL xaʼox yochel ta ajvalilal ta Israel li David kʼalal laj yil tsots svokole. Li xnichʼone, ti jaʼ li Absalone la slikes kʼop xchiʼuk la spojbe ajvalilal li stote, jaʼ yuʼun li Davide persa ijatav batel. Pe maʼuk noʼox taje, yuʼun ikontrainat yuʼun jun yaj-almantal ti skʼanoj tajeke. X-okʼolet muyel ta sbelel vits Olivatik xchiʼuk chʼabal xonob, te xchiʼuk batel jayvoʼ yajtuneltak ti tukʼik ta stojolale. Pe maʼuk noʼox taje, akʼat ta kʼexlal yuʼun Simeí, jun yutsʼ yalal Saúl, lik sjipbe batel ton, pukuk xchiʼuk oy kʼusitik chopol lik yalbe (2 Sam. 15:30, 31; 16:5-14).
2 ¿Mi ta van xcham-o ta skoj li svokoltak xchiʼuk li kʼusitik chopol tsnuptane? Moʼoj, yuʼun spatoj yoʼonton ta stojolal Jeova jech kʼuchaʼal xvinaj ta Salmo 3. Te chalbe skʼoplal kʼalal ijatav lokʼel li Davide. Li ajvalil taje la stsʼiba xtok li Salmo 4, ti chakʼ ta ilel ek ti xchʼunoj ti chaʼibe xchiʼuk stakʼbe s-orasion li stukʼil yajtuneltak Diose, jech kʼuchaʼal laj yakʼ iluk ta kapitulo 3 (Sal. 3:4; 4:3). Li ta chib kʼejojetik taje chal ti te xchiʼuk Jeova ta kʼakʼal ta akʼobal li buchʼutik tukʼe xchiʼuk ti chakʼanbe bendision sventa staik lekilal xchiʼuk chabiele (Sal. 3:5; 4:8). Jech oxal jchantik batel li chib Salmoe xchiʼuk jkʼeltik kʼuxi xuʼ jtatik spatobil koʼontontik ta stojolal Dios xchiʼuk kʼuxi xuʼ xchabiutik.
«Toj ep li bochʼotic chopol chiyilicune»
3. ¿Kʼusi yakal tsnup David kʼuchaʼal chkiltik ta Salmo 3:1, 2?
3 Jun yaj-ichʼ kʼop li Davide, xi laj yale: «Ep xa israeletic chbatic ta stojol li Absalone» (2 Sam. 15:13). Kʼalal laj yakʼ venta ti ep xa sviniktak li xnichʼone, xi laj yale: «Mucʼul Dios, toj ep li bochʼotic chiscontrainicune, toj ep li bochʼotic chopol chiyilicune. Ep li bochʼotic jech chiyalbicun jcʼoplale: “Leʼe mu xcoltaat yuʼun li Diose”» (Sal. 3:1, 2). Kʼuchaʼal chkiltike ep j-israeletik tsnopik ti muʼyuk chkoltaat yuʼun Jeova li Davide, ta skoj ti yakal chil svokol ta stojolal Absalón xchiʼuk li sviniktake.
4, 5. 1) ¿Kʼusi xchʼunoj lek li Davide? 2) ¿Kʼusi skʼan xal ti «voʼot chavacʼbun lec stsatsal coʼnton», xie?
4 Pe ta skoj ti tspat tajek yoʼonton ta stojolal Dios li Davide muʼyuk chiʼ. Jech oxal xi tskʼejintae: «Pero li voʼote, Mucʼul Dios, voʼot jmac cʼotemot, jlequilal cʼotemot, voʼot chavacʼbun lec stsatsal coʼnton» (Sal. 3:3). Lek xchʼunoj ti chchabiat yuʼun Jeovae, ti chkʼot kʼuchaʼal jun smakobbail soltaro sventa spojobbaile. Akʼo mi nijil xchiʼuk xpixoj sjol chjatav batel li ajvalil ti mol xae, li Diose tsjel ta lekilal li svokole. Lek xa tukʼ chakʼ xanavuk yan velta. Jech oxal tsta ta kʼoponel li Jeovae, lek xchʼunoj ti ch-aʼibate. ¿Mi jech ta jpat koʼontontik li voʼotik eke?
5 Kʼalal «voʼot chavacʼbun lec stsatsal coʼnton» xut Jeova li Davide, jaʼ chakʼ ta aʼyel ti lek xchʼunoj ti jaʼ te chlik talel li koltael tskʼane. Jlik vun ti chchanbe skʼoplal taje chal ti kʼalal chakʼ stsatsal oʼontonal li Diose, ta jta spatel koʼontontik. Li Davide oy srasonal ti ip ta at-oʼonton ta skoj ti pojbat li yabtel ta ajvalilale. Pe ta skoj ti ch-akʼbat stsatsal yoʼontone tsta yip, tstsatsub xchʼunel yoʼonton xchiʼuk mas xa jun yoʼonton yan velta.
«La stacʼbun tal jcʼop»
6. ¿Kʼu yuʼun laj yal David ti chtakʼbat tal yuʼun Jeova ta chʼul vits li skʼope?
6 Ta skoj ti lek spatoj yoʼonton ta stojolal li Jeovae, xi chal li Davide: «Xivocolet ta scʼanel coltael yuʼun li Mucʼul Diose. La stacʼbun tal jcʼop te ta chʼul vits yuʼun» (Sal. 3:4). Li xkaxail smantal Dios ti jaʼ toʼox senyail ti te oy Dios ta stojolalike te yakʼojik ta jol vits Sión, jech kʼuchaʼal laj yal li Davide (kʼelo 2 Samuel 15:23-25). Jech oxal, li Davide laj yal ti chtakʼbat tal ta chʼul vits li skʼope.
7. ¿Kʼu yuʼun muʼyuk ta xiʼ li Davide?
7 Jech kʼuchaʼal xvinaj ta skʼejoje, li Davide snaʼoj lek ti mu jecheʼuk noʼox ta spas li orasione, jaʼ yuʼun muʼyuk chiʼ. Jech oxal xi laj yale: «Li vuʼune jun coʼnton chimochi, jun coʼnton chilic, yuʼun jaʼ chiscoltaun stuc li Mucʼul Diose» (Sal. 3:5). Mi jaʼuk ta xiʼ ta smochan sba manchuk mi ta akʼobaltik ti jaʼo xuʼ nakʼal chtal tsakatuk ta kʼope. Lek spatoj yoʼonton ti kuxul tsakube, yuʼun ep ta velta koltabil yuʼun li sTot ta vinajele. Mi ta jtamtik batel «li be yuʼune» xchiʼuk mi muʼyuk ta jchʼak jbatik ta stojolale, xuʼ jchʼuntik ti jech tskoltautik eke (kʼelo 2 Samuel 22:21, 22).
8. ¿Kʼuxi chakʼ ta ilel David ta Salmo 27:1-4 ti spatoj yoʼonton ta stojolal Diose?
8 Ta yan skʼejoj li Davide laj yakʼ ta ilel xtok ti lek xchʼunoj ti chichʼ chabiel xchiʼuk ti spatoj yoʼonton ta stojolal Diose, xi laj yale: «Li Mucʼul Diose jaʼ luz cʼotem cuʼun, jaʼ jcoltavanej cuʼun, jech muʼyuc bochʼo xuʼ chixiʼ yuʼun. Li Mucʼul Diose jaʼ sventainojbun jcuxlejal, jech muʼyuc bochʼo xuʼ chisticʼbun xiʼel ta coʼnton. [...] Acʼo me chtal sjoyibtaicun epal soldadoetic, muʼyuc bu xpujpun xa coʼnton ta xiʼel. [...] Jun noʼox li cʼusi jcʼanojbe o li Mucʼul Diose, jun noʼox li cʼusi oy ta coʼnton oe; jaʼ ti te chicom o ta xchʼulna ti jayib cʼacʼal cuxulune» (Sal. 27:1-4). ¿Kʼuyelan chkakʼtik ta ilel ti jech chkaʼi jbatik kʼuchaʼal li Davide? Jaʼ ti xkakʼtik persa ti mu kʼusi smakutik sventa chijbat ta skotol tsobajeletike (Heb. 10:23-25).
9, 10. Ta skoj li kʼusi chal Salmo 3:6, 7, ¿kʼu yuʼun xuʼ xkaltik ti muʼyuk tspak sutel kʼusi tspasbat li Davide?
9 Manchuk mi ikontrainat yuʼun xnichʼon li Davide xchiʼuk ti muʼyuk tukʼ yoʼonton la yakʼ sbaik ta stojolal li smosotake, ta sjunul yoʼonton xi chale: «Mu xixiʼ yuʼun li epal cristianoetic ti tscʼan chiscontrainicune. Mucʼul Dios, laʼme; Dios cuʼun, coltaun me. Lecʼbo ta majel xocon sat li bochʼo chiscontrainune; vocʼbo ta majel yeic li bochʼo chopol chcʼopojique» (Sal. 3:6, 7).
10 Li Davide muʼyuk tspak sutel li kʼusi tspasbate, jech oxal «lecʼbo ta majel xocon sat li bochʼo chiscontrainune» xut li Diose. Li ajvalil ti tukʼ yoʼontone xchaʼlokʼtaoj xa jlik sMantal Dios, jech oxal snaʼoj ti xi chal li Diose: «Vuʼun oy ta jventa ta xcacʼbe spacol, vuʼun jtuc ta xcacʼbe stoj» (Deu. 17:14, 15, 18; 32:35). Li Davide snaʼoj xtok ti Buchʼu skotol xuʼ yuʼune tsvokʼbe «ta majel yeik» ta alel li buchʼu toj chopolike. Jaʼ xkaltik ti mu xa kʼusi x-akʼbat spasike. Li Diose lek snaʼoj buchʼutik ti chopolike, yuʼun «ta [s]qʼuelbe cʼu xʼelan yut yoʼnton» li krixchanoetike (1 Sam. 16:7). ¡Koliyal tajek chkalbetik ti chakʼ xchʼunel xchiʼuk stsatsal koʼontontik sventa chkuch kuʼuntik li kʼusitik tspasbutik Satanase! Poʼot xa tsjip ochel ta natil xab smukʼta kontra li Jeovae. Kʼalal jech taje jaʼ noʼox chkoʼolaj kʼu chaʼal jkʼot leon ti x-avet noʼoxe, ti tanijem stanal yee xchiʼuk ti jaʼ xa noʼox smalaoj slajele (1 Ped. 5:8, 9; Apo. 20:1, 2, 7-10).
«Mucʼul Dios, voʼot noʼox xuʼ chacoltavan»
11. ¿Kʼu yuʼun skʼan jpastik orasion ta stojolal li kermanotaktike?
11 Li Davide snaʼoj ti jaʼ noʼox xuʼ sta skolebal ta stojolal Jeovae. Manchuk mi tskʼan xa tajek, maʼuk noʼox tsnop ti kʼusi tskʼan stuke, moʼoj, tsnop ta sventa li steklumal Dios xtoke. Ta skoj taje xi tstsutses li skʼejoj ti akʼbat snaʼ yuʼun Diose: «Mucʼul Dios, voʼot noʼox xuʼ chacoltavan. Acʼbo bendición li jteclum avuʼune» (Sal. 3:8). Manchuk mi epal vokol tsnuptan li Davide, te oy ta sjol sjunlej li jteklume xchiʼuk lek xchʼunoj ti ch-akʼbatik sbendisione. ¿Mi mu van jechuk skʼan jpastik ta stojolal li jchiʼiltaktik ta chʼunolajel eke? Skʼan jta ta alel ta j-orasiontik xchiʼuk jkʼanbetik Jeova akʼo xakʼbe s-espiritu sventa xuʼ tsots-o yoʼontonik xcholik li lekil aʼyeje (Efe. 6:17-20).
12, 13. ¿Kʼusi ikʼot ta stojolal li Absalone, xchiʼuk kʼuyelan laj yaʼi sba li Davide?
12 Ti kʼuyelan kʼexlal sba icham li Absalone jaʼ jun pʼijubtasel sventa li buchʼutik chilbajin xchiʼiltakike xchiʼuk mas to sventa li buchʼutik stsakik ta kʼop li buchʼutik tʼujbil yuʼun Dios, jech kʼuchaʼal li Davide (kʼelo Proverbios 3:31-35). Kʼalal tsalbilik ikʼotik ta pas pleito li jtsop soltaroetik ti tstoy sbaike, kajal xa batel ta machu chjatav li xnichʼon Davide. Pe ta skoj ti natik sjol li Absalone, la syak sba ta skʼob mukʼta tulan, jaʼ jech te jokʼol ikom manchuk mi kuxul, pe mu xa kʼusi xuʼ spas. Jaʼ to te icham kʼalal pajbat ta yoʼonton yuʼun Joab oxchʼix takʼin ti tsʼubajtik sniʼe (2 Sam. 18:6-17).
13 ¿Mi xmuyubaj xa David ta skoj ti ichame? Mi jsetʼuk, jaʼ noʼox xtal xbat ta jujot, ta x-okʼ xchiʼuk xi tsots chale: «¡Cunin nichʼon Absalón, cunin nichʼon Absalón! Vuʼcun chamcune, ¡cunin nichʼon Absalón, cunin nichʼon!» (2 Sam. 18:24-33). Jaʼ noʼox Joab xuʼ chʼani yuʼun li ajvalil ti chat tajek yoʼontone. ¡Toj echʼ xa noʼox chopol ti kʼuyelan icham li Absalone! Ta skoj ti tskʼan tspas li kʼusi tskʼan tajek yoʼontone, la stsak ta kʼop jun ajvalil, pe maʼuk noʼox taje yuʼun jaʼ stot xchiʼuk jaʼ tʼujbil yuʼun Jeova, jech oxal la saʼ stuk li kʼusi ikʼot ta stojolale (2 Sam. 19:1-8; Pro. 12:21; 24:21, 22).
Chchaʼ-al ti spatoj yoʼonton ta Dios li Davide
14. ¿Kʼusi xuʼ xkaltik ta sventa ti kʼu yuʼun laj yichʼ tsʼibael li Salmo 4?
14 Jech kʼuchaʼal li ta Salmo 3, li ta kapitulo 4 li Davide tspas jun orasion ta sjunul yoʼonton ti chakʼ ta ilel ti melel spatoj tajek yoʼonton ta stojolal Jeovae (Sal. 3:4; 4:3). Xuʼ van la stsʼiba sventa chakʼbe ta naʼel Dios ti jun xa yoʼonton xchiʼuk sventa tstojbe ta vokol ta skoj ti te ilaj skʼoplal li kʼop la slikes Absalone. O xuʼ van la stsʼiba sventa li jkʼejimol levietike. Akʼo mi mu jnaʼtik lek kʼu yuʼun laj yichʼ tsʼibael, mas ta jpat koʼontontik ta stojolal Jeova kʼalal ta jnopbetik skʼoplal li Salmo 4.
15. ¿Kʼu yuʼun xuʼ jkʼopontik Jeova ta sjunul koʼontontik ta sbi li Jesuse?
15 Li Davide, chal yan velta kʼu to yepal spatoj yoʼonton ta stojolal Jeova xchiʼuk ti oy sbalil li orasione. Xi chale: «Dios cuʼun, tuqʼuil jchapanvanej cuʼun, tacʼbun me jcʼop ti cʼalal chajcʼopanote. Cʼalal jaʼo oy ep jvocole, voʼot laj amuqʼuibtasbun coʼnton. Cʼuxubinun, aʼibun me li jcʼope» (Sal. 4:1). Mi jech tukʼ ta jpas jbatik kʼuchaʼal tskʼan Jeovae, xuʼ jech jpat koʼontontik kʼuchaʼal li Davide. Jnaʼojtik ti Diose jaʼ «tuqʼuil jchapanvanej» xchiʼuk ti chakʼbe bendision li tukʼil krixchanoetike. Koliyal li pojelal laj yakʼ Jeova ta stojolal li xNichʼone, xuʼ jkʼopontik ta orasion li Jeovae xchiʼuk xuʼ jchʼuntik ti chchikintabutike (Juan 3:16, 36). ¡Taje chakʼ spatobil koʼontontik!
16. ¿Kʼusi ox van xuʼ xchibajesat li Davide?
16 Bateltike, xuʼ oy kʼusitik ta jnuptik ti xuʼ xchibajesutik xchiʼuk ti mi jaʼuk xa jpat koʼontontik ta jtojolaltik eke. Taje, xuʼ van jech laj yaʼi sba kʼuk sjaliluk li Davide, yuʼun xi la skʼejintae: «Voʼoxuc ti chacontrainicun, ¿baqʼuin to chlaj avoʼntonic ta soquesel li jcʼoplale? ¿Baqʼuin to chlaj avoʼntonic ta snopilanel [“skʼanilanel”, NM] li cʼusi muʼyuc stue, ti jaʼ noʼox puru epalcʼope?» (Sal. 4:2). Kʼalal chal «voʼoxuc ti chacontrainicun[e]» jaʼ skʼoplal li krixchanoetik ti muʼyuk lek chilik li Davide. Li yajkontratake jaʼ noʼox ta snopilanik o tskʼanilanik li kʼusi muʼyuc stue. Li Vivlia Nueva Versión Internacional sbie xi tsjelubtas li versikulo taje: «¿Kʼusi to ora jech-o akʼanojik li kʼusi chʼabal stue xchiʼuk saʼel li santoetike?». Ta skoj taje xuʼ xi jchanbetik li Davide: manchuk mi xchibajesutik stalelal jlom krixchanoetike, skʼan mu xkiktatik skʼoponel ta sjunul koʼontontik li melel Diose xchiʼuk skʼan jpat-o koʼontontik ta stojolal.
17. Alo jtosuk kʼuxi xuʼ xichʼ tunesel li Salmo 4:3.
17 La xchaʼal yan velta David ti spatoj yoʼonton ta stojolal Diose, xi laj yale: «Naʼic me, li Mucʼul Diose jaʼ lec chil li bochʼo tucʼ yoʼnton ta stojole. Naʼic me ti chiyaʼibun jcʼop cʼalal ta jcʼopan li Mucʼul Diose» (Sal. 4:3). Melel onoʼox ti skʼan oyuk stsatsal koʼontontik xchiʼuk lekuk tsots li xchʼunel koʼontontik mi ta jkʼantik tukʼ chkakʼ jbatik ta stojolal Diose. Li talelaletik taje tsots skʼoplal kʼalal tsots tspas smul junuk kutsʼ kalaltik ti chichʼ lokʼesel ta tsobobbail ta skoj ti muʼyuk tsutes yoʼontone. Pe li buchʼutik tukʼ chakʼ sbaik ta stojolal Jeovae xchiʼuk ti tstsakik ta venta li smantaltake ch-akʼbatik sbendision. Jech xtok, kʼalal te oyotik-o ta stojolale xchiʼuk chkakʼtik ta ilel ti jpatoj koʼontontik ta stojolal li Diose, kʼalal jech ta jpastike, jech me ta jkolta jbatik ti oyuk muyubajel li ta steklumale (Sal. 84:11, 12).
18. Jech kʼuchaʼal chal Salmo 4:4, ¿kʼusi xuʼ jpastik mi oy buchʼu oy kʼusi chopol laj yalbutik o spasbutike?
18 Vaʼun chaʼa, ¿kʼusi xuʼ jpastik mi oy buchʼu oy kʼusi chopol laj yalbutik o spasbutike? Xijmuyubaj-o me mi ta jtsaktik ta mukʼ li mantal chal David liʼe: «Mi cha ilinike, mu me xasaʼ amulik. Alik ta avoʼontonik li kʼusi chakʼan chavalike, ta atemik, vaʼun tsʼijlanik» (Sal. 4:4, NM). Mi oy buchʼu muʼyuk lek la skʼoponutik o mi chopol kʼusi spasbutike, mu me jpaktik sutel (Rom. 12:17-19). Xuʼ xijbat ta jtemtik, vaʼun xuʼ xkal ta koʼontontik li kʼusi ta jkʼan chkaltike. Kʼalal chkalbetik Jeova ta sventa taje, xuʼ van jelel xa ta jnoptik xchiʼuk chlokʼ ta koʼontontik xkakʼtik perton (1 Ped. 4:8). Li jtakbol Pabloe laj yakʼ jun tojobtasel ti la stsak ta venta yilel ta Salmo 4:4: «Me chaʼilinique, mu me teuc xasaʼ amulic o. Mu me sbejeluc cʼacʼal xaʼilinic. Mu me xajambeic sbe li pucuje» (Efe. 4:26, 27).
19. ¿Kʼuxi xuʼ jtunestik Salmo 4:5 kʼalal chkakʼbetik smoton Diose?
19 Li Davide la xchaʼal xtok ti toj tsots skʼoplal skʼan xkakʼ xchʼunel koʼontontik ta stojolal Diose: «Aqʼuic milbil matanaletic ta slequil avoʼntonic; jaʼ noʼox pato avoʼntonic o yuʼun li Mucʼul Diose» (Sal. 4:5). Kʼalal chakʼik matanaletik li j-israeletike, jaʼ noʼox oy sbalil mi ta slekil yoʼonton chakʼike (Isa. 1:11-17). Jaʼ jech li avi eke, li matanal chkakʼbetike jaʼ noʼox me chchʼam mi ta slekil koʼonton ta jpastike xchiʼuk mi lek jpatoj koʼontontik ta stojolale (kʼelo Proverbios 3:5, 6 xchiʼuk Hebreos 13:15, 16).
20. ¿Kʼusi sbalil ta jtatik kʼalal ta jpat koʼontontik ta stojolal Jeovae?
20 Xi to chal li Davide: «Mucʼul Dios, ep li bochʼotic jech chayalboxuque: “Acʼbuncutic li alequilale; lec me xaviluncutic”» (Sal. 4:6). Ta skoj ti jpatoj koʼontontik ta stojolal Jeovae, ta jkʼupintik li sbendisione xchiʼuk xijmuyubaj ti jnaʼojtik ti yakal ta jpastik li kʼusi tskʼan yoʼontone.
21. ¿Kʼusi jnaʼojtik xuʼ jtatik mi ta sjunul koʼontontik chijkʼajave?
21 Li Davide lek snaʼoj ti ch-akʼbat smuyubajel ti chjelav to jech kʼuchaʼal li buchʼutik tstsobbeik sat li kʼusi tstsʼunik li j-abteletike. Jaʼ yuʼun xi tskʼejinta li Jeovae: «Pero li voʼote laj xa avacʼbun ep xcuxetel coʼonton; xjelov to jech chac cʼu chaʼal li bochʼo oy ep strigo xchiʼuc yaʼlel stsʼusube» (Sal. 4:7). Jnaʼojtik lek ek ti mas ep chijmuyubaj mi ta sjunul koʼontontik chijkʼajav ta mantale (Luc. 10:2). Ta skoj ti jaʼ jbabeetik ta chol mantal li buchʼutik tʼujbil yuʼun Diose, xijmuyubajutik kʼalal chkiltik ti yakal ch-epaj li jkʼajojetike. Jaʼ yuʼun xuʼ xijakʼbe jbatik ta jujuntale: «¿Mi yakal ta jkʼupin xchiʼuk chimuyubaj yuʼun li chol mantale?».
Jpat-o batel koʼontontik ta stojolal li Diose
22. Jech kʼuchaʼal chal li beiltasel ta Salmo 4:8, ¿kʼusi ikʼot ta pasel kʼalal chchʼunbeik sMantaltak Dios li j-israeletike?
22 Xi tstsutses skʼejimol li Davide: «Jun coʼnton chivay, ta ora noʼox ch-och jvayel, yuʼun voʼot noʼox ta aventa, Mucʼul Dios, ti jun coʼnton cuxulun ta banamile» (Sal. 4:8). Kʼalal la xchʼunik sMantaltak Jeova li j-israeletike, xkuxet noʼox yoʼontonik xchiʼuk muʼyuk noʼox kʼusi chiʼtaik. Jech kʼuchaʼal kʼalal i-ajvalilaj li Salomone, «lec jun yoʼnton [ikuxiik li] Judá xchiʼuc ta Israel[e]» (1 Rey. 4:25). Jun noʼox yoʼontonik li buchʼutik spatoj yoʼontonik ta stojolal Diose, akʼo mi ch-ilbajinatik yuʼun li jyanlumetike. Jaʼ jech chkʼot ta pasel ta jtojolaltik kʼuchaʼal li Davide: jun noʼox koʼontontik chijvayutik, mu kʼusi chijxiʼo.
23. ¿Kʼusi ta jtatik mi solel ta jpat koʼontontik ta stojolal Diose?
23 Jech oxal ta sjunul koʼontontik tunkutik-o ta stojolal li Diose. Kʼalal ta sjunul koʼontontik ta jkʼopontik ta orasion li Diose ta jtatik jun oʼontonal ti «echʼem to xjelov jech chac cʼu chaʼal ta jnop ta jcʼantic li vuʼutique» (Fili. 4:6, 7). ¡Jaʼ jun muyubajel chkaʼitik! Ta melel, mi solel jpatoj koʼontontik ta stojolal Jeovae, xijmuyubaj noʼox ch-echʼ kuʼuntik jujun kʼakʼal.
¿Kʼusi ta jtakʼtik?
• ¿Kʼusitik tsatsal vokolil la snuptan David ta skoj li Absalone?
• ¿Kʼuxi chakʼ spatobil koʼontontik li kʼusi chal Salmo 3?
• ¿Kʼuxi chakʼ spatobil koʼontontik ta stojolal Jeova li kʼusi chal Salmo 4?
• ¿Kʼusi sbaliltak ta jtatik mi solel ta jpat-o koʼontontik ta stojolal Diose?
[Lokʼol ta pajina 29]
Li Davide la spat-o yoʼonton ta stojolal Jeova, manchuk mi jatav ta skoj Absalón
[Lokʼol ta pajina 32]
¿Mi solel jpatoj koʼontontik ta stojolal li Jeovae?