Ti kʼusi xuʼ jpastik li ta yichʼel ta mukʼ Jeova ta kutsʼ kalaltik xchiʼuk ta jtuktike
LI TA sjabilal 2009 ta Eneroe, li yajrextikotak Jeova ta spʼejel Balumile lik ketʼestik ta jun xa noʼox velta li tsobajel ti chib toʼox velta ta jtsob jbatike. Li Jtsop Jbeiltasvaneje laj yalbutik ti skʼan jchʼakbetik yorail li yichʼel ta mukʼ Jeova ta kutsʼ kalaltike o li xchanel Vivlia ta jtuktik li akʼobal xokol xa ikome. ¿Mi yakal ta jtunestik batel lek li akʼobal taje?
Ep ermanoetik sjakʼojbe sbaik kʼusitik xuʼ xchanik li ta akʼobal taje. Melel onoʼox, ti mu stakʼ ti jkotoltik xa jech ta jchantik jujun xemana li kʼusitik stakʼ chanele, yuʼun jujun utsʼ alalil, o li buchʼu muʼyuk snup xchiʼile, skʼan skʼel stukik li kʼusi mas chtun yuʼunike.
¿Kʼusitik stakʼ pasel li ta akʼobal taje? Oy buchʼutik chchapanik li kʼusitik ch-echʼ ta tsobajeletike, pe maʼuk noʼox stakʼ pasel taje. Xuʼ jkʼeltik li Skʼop Diose, xkalbetik skʼoplal jlikuk jvuntik o jpastik junuk elov ta teatro xkaltik, mas to skʼan jech jpastik mi oy ololetike. Jech xtok, li Akʼobal sventa Yichʼel ta Mukʼ Jeova ta Kutsʼ Kalaltike maʼuk me skʼan xal ti mu xa stakʼ xijtseʼin o ti mu xa kʼusi stakʼ xichʼ pasele, ti jaʼ noʼox chichʼ jakʼel xchiʼuk chichʼ takʼel ti jech xa ta jpastik jech kʼuchaʼal ta tsobajeletik ta Salone. Jaʼ mas lek ti xijmuyubaj noʼoxe, yuʼun mi jech ta jpastike xuʼ xlik jloʼiltik ti tspat oʼontonale, vaʼun mas me kʼun chal sloʼilik li yantik eke. Li kʼusi tskʼan chalike ta anil noʼox me ch-al yuʼunik xchiʼuk li yichʼel ta mukʼ Diose lek noʼox me ch-echʼ kuʼuntik.
Jun ermano ti oy oxvoʼ xnichʼone xi la stsʼibae: «Li kʼusi onoʼox ta jpaskutike jaʼ ti ta jkʼelkutik Vivliae. Jkotolkutik kak ta jkʼelkutik li kapituloetike, xchiʼuk li ololetike chchanbeik mas smelolal ti kʼusi lek laj yaʼiike. Vaʼun ta jtsob jbakutik sventa chalbunkutik li kʼusi la xchanike. Li Michael [ti vukub sjabilale] xuʼ van tspas junuk divujo o tstsʼiba junuk uni parafo. Li David xchiʼuk Kaitlyn [ta 13 xchiʼuk ta 15 sjabilalike] nopem xaʼiik tstsʼibaik loʼiletike, kʼalal jech tspasike te xa skʼeloj stukik yaʼeluk li kʼusi chkʼot ta pasele. Kʼalal la jkʼelkutik [ta kapitulo 40 yuʼun Génesis] ta sventa li xvayich jpaspan xchiʼuk li j-akʼyaʼlel tsʼusub yuʼun faraone, li Kaitlyne la stsʼiba jun loʼil ti jaʼ te xchiʼuk ta chukel yilel li Josee».
Ta skoj ti jelel li jujun utsʼ alaliletike, xuʼ van li voʼote jaʼ mas lek chavaʼi mi yan-o kʼusi chatunese. Li ta pajina chtale, te chata yan kʼusitik xuʼ xapas sventa li yichʼel ta mukʼ Jeova ta kutsʼ kalaltike o li xchanel Vivlia ta jtuktike. ¿Mi oy to van yan kʼusi stakʼ jpastik?
[Rekuadro ta pajina 7]
Utsʼ alaliletik ti oy xchex kerem tsebike:
• Kʼelik xchiʼuk albeik skʼoplal junuk kapitulo li ta livro Los jóvenes preguntan.
• Kʼelik junuk loʼil ta Vivlia xchiʼuk xi xajakʼbe abaike: «¿Kʼusi van la apas ti voʼotuke?» (kʼelo La Atalaya 15 yuʼun mayo ta 1996, pajina 14, parafo 17 xchiʼuk 18).
• Loʼiltaik li kʼusi oy ta avoʼontonik stael ti xuʼ noʼox xichʼ taele xchiʼuk li kʼusitik xuʼ xata ta mas tsʼakale.
• Kʼelo xchiʼuk albo skʼoplal junuk pelikula ti chalbe skʼoplal Vivliae.
• Chanik li bu chal: «Sventa kerem tsebetik» ta revista Li Jkʼel osil ta toyole.
Nupultsʼakaletik ti muʼyuk yalab xnichʼnabike:
• Kʼelik li kapitulo 1, 3 xchiʼuk 11 kʼalal ta 16 li ta livro Ti kʼuyelan ta tael muyubajel ta utsʼ-alalile.
• Chano xchiʼuk alo kʼusi laj achan ta junuk versikulo kʼalal laj akʼel li Vivliae.
• Chapano aba li ta Xchanel Vivlia ta Tsobobbaile o chapano aba li ta Xchanel Li Jkʼel osil ta toyole.
• Kʼelik kʼu yelan xuʼ x-epaj li avabtelik ta cholmantal xchiʼuk li anup achiʼile.
Li buchʼu muʼyuk snup xchiʼilike o ermanoetik ti stuk oyik ta mantale:
• Xchanel vunetik ti chlokʼ ta jujun mukʼta tsobajeletik ta oxib kʼakʼale.
• Kʼelo li Anuario ti lokʼ li jabil liʼe o jaʼ li echʼ xae.
• Saʼo stakʼobil li kʼusitik chavichʼ jakʼbel li bu chachol mantale.
• Kak chanik kʼutik yelan xuʼ xalikes a loʼilik ti bu chacholik mantale.
Utsʼ alaliletik ti oy yalab xnichʼnabik ti kʼoxik toe:
• Akʼo yichʼ akʼel ta ilel junuk loʼil ta Vivlia.
• Tajinanik jech kʼuchaʼal ta xal ta pajina 30 xchiʼuk 31 li ta revista ¡Despertad!
• Pasik kʼusitik ti xuʼ tstunes snopben li ololetike (kʼelo li bu chal: «Estudiamos la Biblia en el zoológico», ta revista ¡Despertad! 8 yuʼun marso ta 1996, pajina 16 kʼalal ta 19).
• Chanik li bu chal: «Chanubtaso avalab anichʼnabik», ta revista Li Jkʼel osil ta toyole.