Jelbat˗o xkuxlejalik yuʼun li Vivliae
¿KʼUSI tijbat-o yoʼonton sventa sjel xkuxlejal jun jtajimol ta kaʼ xchiʼuk j-elekʼ ta naetike? Kakʼtik akʼo stakʼ stuk.
«Ta jkʼupin toʼox tajek li anilajel ta kaʼe» (RICHARD STEWART)
KʼUSI ORA VOKʼ: 1965
SLUMAL: JAMAICA
KʼU TOʼOX YELAN XKUXLEJAL: JTAJIMOL XCHIʼUK J-ELEKʼ
LI JKUXLEJAL TOʼOXE: Lichʼi ta jun jteklum ti abol noʼox sba li ta Kingston skapital Jamaicae, ti bu chʼabal lek abtel xchiʼuk ep j-elekʼetike. Li krixchanoetik ti te nakalike xiʼemik ta skoj jtsop krixchanoetik ti toj chopolike. Skotol kʼakʼal chaʼiik ti tstʼomesik tukʼe.
Li jmeʼe smiloj sba ta abtel sventa smakʼlintas li kitsʼin, kixlel xchiʼuk voʼone, jech xtok tskʼan ti xibatkutik ta chanune. Pe li voʼone ta jkʼupin li anilajel ta kaʼe, maʼuk li chanune. Bakʼintike muʼyuk chikʼot ta chanun sventa xbat jkʼel li j-anilajeletik ta kaʼe. Laj onoʼox jkajlebin jaykotuk kaʼetik.
Ta tsʼakal jutuke, ayan mas ta koʼonton li anilajel ta kaʼe xchiʼuk la jsaʼ ep kantstak. Ta jlajes marivana sventa jkʼupin li jkuxlejale sventa xman kuʼune lik elkʼajkun, jech oxal la jman ep jtukʼ. ¡Pe bal to ti muʼyuk buchʼu la jmil kʼalal chi-elkʼaje!
La staikun ta tsakel xchiʼuk li-och yuʼunik ta chukel, kʼalal lilokʼ xa oxe, mas xa chopol kʼusitik lik jpas. Muʼyuk chopol chkaʼi li kʼusi ta jpase, pimubemun xa, toj pukujun xchiʼuk chopol krixchanoun. Jaʼ xa noʼox ta jnop ta jventa jtuk.
TI KʼU YELAN LA SJEL JKUXLEJAL LI VIVLIAE: Li jmeʼe jaʼo lik xchan Vivlia xchiʼuk kʼot ta stestigo Jeova kʼalal chopol toʼox kʼusitik ta jpase. Ti kʼu yelan jelbat xkuxlejal li jmeʼe, jaʼ la stijbun koʼonton. Oy ta koʼonton ta jnaʼ li kʼusi koltaat-oe, jech oxal, la jkʼopon li stestigotak Jeovae.
Ta anil noʼox laj kakʼ venta ti jelel li kʼusi chchanubtasvanike, ti mu xkoʼolaj kʼuchaʼal li yan relijionetike. Yuʼun li stukike chchanubtasvanik ta Vivliae. Jech noʼox xtok, li stukike chcholik mantal ta naetik jech kʼuchaʼal la spasik li baʼyel jchʼunolajeletike (Mateo 28:19; Echos 20:20). Ta skoj ti kʼu yelan skʼanoj sbaik ta jujuntale, laj kil ti jaʼik li melel relijione (Juan 13:35).
Kʼalal lik jchan li Vivliae, laj kakʼ venta ti skʼan jel li jtalelale. Yuʼun li Jeovae spʼajoj li mulivajele, jaʼ yuʼun sventa xmuyubaj kuʼune skʼan xkikta li kʼusi chilbajin-o jbekʼtale (2 Korintios 7:1; Ebreos 13:4). Li kʼusi la jchane jaʼ ti li Jeovae xuʼ la chat-o yoʼonton kuʼun o xmuyubaj kuʼun ta sventa li kʼusi ta jpase (Proverbios 27:11). Vaʼun, kʼot ta nopel kuʼun ti muʼyuk xa ta jlajes li marivana xchiʼuk stunesel li jtukʼtake, laj kakʼ kipal ta sjelel li jtalelale. Pe li kʼusi mas tsots laj kaʼi yiktaele, jaʼ li kantstake xchiʼuk li anilajel ta kaʼe.
Mu ox jkʼan xkalbe kamigotak ti yakal xa ta jchan Vivlia xchiʼuk li stestigotak Jeovae. Pe jel kʼusi ta jnop kʼalal la jkʼel li kʼusi laj yal Jesus ta Mateo 10:33: «Pe li buchʼu tspʼajun ta stojolal krixchanoetike jaʼ jech ta jpʼaj ta stojolal Jtot ta vinajel ek». Vaʼun, laj kalbe kamigotak li kʼusi yakal ta jchane. Mu chʼunbaj laj yaʼiik xchiʼuk labal sba laj yaʼiik kʼalal laj kalbeik ti ta jkʼan chikʼot ta jchʼunolajele. Akʼo mi jech, laj kalbeik ti ta jkʼan ta jel li jtalelale.
KʼUSITIK SBALIL JTAOJAN: Li jmeʼe xmuyubaj tajmek kʼalal chil ti yakal ta xkakʼ ta jkuxlejal li beiltaseletik ta Vivliae. Muʼyuk xa chat yoʼonton ti bu oyune. Xchiʼuk xtok, toj lek chkaʼi jchaʼvoʼalkutik sloʼiltael li kʼanelal chkaʼikutik ta stojolal li Jeovae. Kʼalal chvul ta jol ti kʼu toʼox kelan ta voʼnee, ta melel vokol ta chʼunel chkaʼi ti kʼu yelan jel li jkuxlejale, koliyal ti la skoltaun li Diose. Li avie, muʼyuk xa lek chkil li mulivajele xchiʼuk li saʼel takʼine.
Ti muʼyukuk la jchʼam li chanubtasel ta Vivliae, xuʼ van te tikʼilun ta chukel o chamemun xa. Ta skoj li kʼusi yakal ta jchane ximuyubaj xchiʼuk li kutsʼ kalale. Lek snaʼ skoltaun li kajnile xchiʼuk oy jun jtseb ti snaʼ x-ichʼvan lek ta mukʼe, jkotolkutik chitunkutik ta stojolal Jeova. Mu jnaʼ kʼuxi xuʼ jtojbe ta vokol li buchʼu la xchanubtasun ta Vivliae. Chkakʼ persa ti bu kʼalal xuʼ kuʼun sventa xkalbe yantik ta sventa li Vivliae. Ta jtojbe ta vokol Jeova ta skoj ti laj yikʼun tal li ta steklumale.
[Tsʼib ti mukʼtik sletraile]
«Li kʼusi la jchane jaʼ ti li Jeovae xuʼ la chat-o yoʼonton kuʼun o xmuyubaj kuʼun ta sventa li kʼusi ta jpase»
[Tsʼib ti mukʼtik sletraile]
Ti kʼu yelan jelbat xkuxlejal li jmeʼe, jaʼ la stijbun koʼonton
[Tsʼib ti mukʼtik sletraile]
Kajnil xchiʼuk jtseb