«Oy xa ox kuʼun skotol laj kaʼi»

LI JKUXLEJAL TOʼOXE

Livokʼ ta Montreal ti jaʼ li lum mas mukʼ li ta slumal Canadá ta Quebec. Li oxvoʼ kitsʼinabtak xchiʼuk li voʼone lichʼikutik ta jun utsʼ alalil ti toj lek yoʼontonik ta jun barrio ti Rosemont sbie, li jkuxlejalkutike lek toʼox tajek, yuʼun jun noʼox koʼontonkutik.

Lek toʼox tajek chkaʼi skʼelel Vivlia kʼalal bikʼitun toʼoxe, xvul ta jol ti kʼalal 12 toʼox jabilale, ta jkʼel ta Achʼ Testamento ta sventa xkuxlejal li Jesuse, lek tajek chkaʼi. Lek tajek chkil ti kʼu yelan chkʼanvane xchiʼuk ti oy xkʼuxul yoʼontone, ta jkʼan ti jechukun eke. Kʼux ta alel, pe kʼalal lichʼi xa tale chʼay batel ta koʼonton ti jech toʼox ta jkʼan kʼalal jaʼ lik jchiʼin li buchʼutik muʼyuk lek stalelalike.

Li jtote saxofonista toʼox, maʼuk noʼox laj kichʼbe li saxofone, yuʼun toj lek chkaʼi li musika xtoke. Ta skoj ti lek tajek chkaʼi li musikae. Ta anil noʼox la jchan stijel li guitarrae. Ta mas tsʼakale, la jtsob kamigotak sventa jlikeskutik jun grupo ta rock xchiʼuk ta jtijkutik musika ta kʼinetike. Junantik viniketik ti jaʼ yabtelik saʼel jkʼejimoletike, lek laj yaʼiik ti kʼu yelan ta jtijkutik li sone, vaʼun laj yalbeikun mi jkʼan jpas firmar jun kontrato li bu oy spasobil gravar musikae. Laj yichʼ tajek ojtikinel li jmusikae xchiʼuk persa onoʼox tstijik ta radio Quebec.

Oy xa ox kuʼun skotol laj kaʼi. Keremun toʼox, ojtikinbilun lek xchiʼuk ep ta jpas kanal takʼin xchiʼuk li kʼusi lek tajek xkaʼi spasele. Li ta kʼakʼaltike chibat ta jimnasio, tsjakʼbeikun jloʼil, ta jpas firmar autografo xchiʼuk chilokʼ ta television. Li ta akʼobaltike, ta jtij son xchiʼuk chibat ta kʼinetik. Sventa xkuch kuʼun li sujel ta stojolal li krixchanoetike, ta slikebale pox noʼox chkuchʼ, pe ta tsʼakale lik jlajes droga. Chimulivaj xchiʼuk mu xa jventauk-o kʼusi xuʼ xkʼot ta pasel li ta jkuxlejale.

Ep buchʼutik tskʼanik ti jechuk xkuxlejalik kʼuchaʼal voʼone, yuʼun ximuyubaj noʼox yilel. Pe li koʼontone, mu jechuk-o chaʼi, muʼyuk sbalil chkaʼi li jkuxlejale, mas to kʼalal jtuk oyune, chkat koʼonton xchiʼuk ta jvul koʼonton. Kʼux ta alel, pe kʼalal jaʼo kʼupil tajek chaʼiik li jmusikae, chaʼvoʼ li buchʼutik la saʼikun sventa xikʼejine, chamik ta sida. Mu jchʼun laj kaʼi, ta jkʼupin tajek li musikae, pe li kʼusitik chkʼot ta pasel tee ch-imʼ koʼontontik yuʼun.

TI KʼU YELAN LA SJEL JKUXLEJAL LI VIVLIAE

Akʼo mi lek xbat jkuxlejal, pe chkakʼ venta ti muʼyuk jsetʼuk slekil li balumile. ¿Kʼuxi xa noʼox ti muʼyuk tajek tukʼilale? Ta jakʼbe jba kʼu yuʼun muʼyuk kʼusi tspas li Diose. Ta jpas orasion xchiʼuk chkalbe ti akʼo stakʼbun li kʼusi ta jakʼbee. Ta jun veltae kʼalal jaʼo ta jkux li ta jira ta jpase, lik jkʼel yan velta li Vivliae. Mu xkaʼibe lek smelolal, pe kʼot ta nopel kuʼun ti nopol xa skʼan xtal li slajeb balumile.

Kʼalal la jkʼel li Vivliae, laj kakʼ venta ti 40 kʼakʼal la spas ayuno ta taki xokol balumil li Jesuse (Mateo 4:1, 2). La jnop ti mi jech la jpas eke, xuʼ van xakʼ sba ta ilel ta jtojolal li Diose, jaʼ yuʼun, la jchʼakbe yorail sventa xlik jpas li ayunoe. Kʼalal chib toʼox xemana skʼan jlikes li ayunoe, chaʼvoʼ stestigotak Jeova kʼotik ta jna, vaʼun laj kalbeik ti x-ochike xkoʼolaj ti ta xa onoʼox jmalaike. La jkʼelbe sat li june, ti Jacques sbie, vaʼun xi laj kalbee: «¿Kʼuxi xuʼ jnaʼtik lek ti ta slajebal xa kʼakʼal kuxulutike?». La sjam li Svivliae vaʼun la skʼelbun 2 Timoteo 3:1-5. Toj ep to kʼusi lajakʼbeik, pe labal to sba laj kil ti oy lek srasonal ti kʼu yelan tstakʼbeikun ta Vivliae. Ta jun chib velta ay svulaʼanikune laj kakʼ venta ti mu persauk jpas ayunoe.

Lik jchan Vivlia xchiʼuk li stestigotak Jeovae. Ta tsʼakale laj kʼok li stsotsil jole xchiʼuk libat ta skotol tsobajeletik li ta Salon sventa tsobobbaile. Ta skoj ti ta slekil yoʼonton la xchʼamikun li ta tsobajeletike, mas to kʼot ta koʼonton ti jaʼ li melele.

Melel onoʼox ti ep kʼusi lajel li ta jkuxlejal sventa jpas li kʼusi chal Vivliae. Jech kʼuchaʼal liʼe, skʼan xkikta slajesel li drogae xchiʼuk ti chimulivaj toʼoxe. Jech noxtok, skʼan xkikta ti jaʼ noʼox ta jpas li kʼusi ta jkʼan jtuke xchiʼuk ti xkakʼ ta koʼonton li yantike. Ta skoj ti oy chaʼvoʼ jnichʼnabtak ti jtuk ta jkʼele, skʼan jchanubtas lek li ta mantale xchiʼuk ta sventa ti kʼu yelan chaʼi sbaike. Jaʼ yuʼun laj kikta stijel li sone vaʼun lik abtejkun ta jun favrika akʼo mi mu lekuk tstojikun.

Ti melel xkaltike, mu kʼunuk laj kaʼi ti jel li jkuxlejale. Kʼalal chkikta xa ox kaʼi slajesel li drogae ep ta velta muʼyuk xkuch kuʼun ta skoj ti nopem tajek xkaʼie (Romanos 7:19, 21-24). Pe li kʼusi mas to toj vokol laj kaʼi yiktaele, jaʼ li mulivajele. Jech noxtok, chilub tajek li ta abtele xchiʼuk jutuk tajek ti kʼu yepal tstojikune, taje jaʼ chichibaj-o. Ti kʼu yepal ta jpas kʼanal ta oxib ue, jaʼ jech yepal ta jpas kanal ta chib noʼox ora kʼalal ta jtij toʼox musikae.

Li kʼusi la skoltaun sventa xkom kuʼun li kʼusitik nopem tajek xkaʼi spasele, jaʼ li orasione. Xchiʼuk toj tsots skʼoplal ti jkʼelilan jujun kʼakʼal li Vivliae. Xvul ta jol ti oy junantik versikuloetik ti la spatbun tajek koʼontone. June jaʼ li kʼusi chal li 2 Korintios 7:1, ti chalbe mantal krixchanoetik sventa «Jsakubtas jbatik ta sventa li kʼusi tsokes jbekʼtaltike xchiʼuk li kʼusi oy ta jnopbentike». Yan teksto ti la skoltaun sventa xkakʼ venta ti xuʼ kuʼun yiktael li kʼusitik chopol nopem xkaʼi spasele jaʼ li kʼusi chal Filipenses 4:13, ti xi chale: «Oy jtsatsal ta skotol ta sventa li buchʼu chakʼbun juʼele». La stakʼbun Jeova li j-orasione xchiʼuk la skoltaun sventa xkaʼibe smelolal xchiʼuk xkakʼ ta jkuxlejal li beiltaseletik ta Vivliae. Taje jaʼ la stijbun koʼonton sventa xkakʼ jkuxlejal ta stojolal li Jeovae (1 Pedro 4:1, 2). Li ta 1997, laj kichʼ voʼ kʼu chaʼal stestigo Jeova.

KʼUSITIK SBALIL JTAOJAN

Ti jechuk-o la jpas talele, voʼone xa chamemun ti jechuke. Pe li avie ximuyubaj ta melel. Li kajnil ti toj kʼupil sba stalel ti Elvie sbie, jaʼ jun bendision kʼotem ta jtojolal. Jchaʼvoʼalkutik chitunkutik ta tsʼakal ora jchiʼuk ta jkʼupinkutik xchanubtasel ta Vivlia li krixchanoetike. Ximuyubaj tajek xchiʼuk jun tajek koʼonton. Ta jtojbe tajek ta vokol Jeova ti laj yikʼun talel ta stojolale (Juan 6:44).