Li Moisese bikʼit laj yakʼ sba

¿KʼUXI CHAKʼ TA ILEL JUN KRIXCHANO TI BIKʼIT CHAKʼ SBAE?

Li jun krixchano ti bikʼit chakʼ sbae muʼyuk tstoy sba, muʼyuk bikʼit skʼoplal chil li yantike xchiʼuk snaʼoj ti oy noʼox spajeb kʼusi spas yuʼune.

¿KʼUXI LAJ YAKʼ TA ILEL TI BIKʼIT LAJ YAKʼ SBA LI MOISESE?

Kʼalal akʼbat yabtele muʼyuk bu la stoy-o sba. Kʼalal ch-akʼbat jutuk yabtel jun krixchanoe te chvinaj mi bikʼit ta xakʼ sba o mi tstoy sba. Jun jtsʼibajom ta balunlajuneb siglo ti Robert G. Ingersoll sbie xi laj yale: «Mi chakʼan chanaʼ kʼuyelan ta melel li jun krixchanoe akʼbo yabtel, vaʼun jaʼ te chavakʼ venta mi bikʼit chakʼ sba». Ta sventa taje, li Moisese jaʼ jun slekil kʼelobil kuʼuntik. ¿Kʼuxi?

Li kʼusi akʼbat spas yuʼun Jeova li Moisese jaʼ jun mukʼta abtelal, yuʼun jaʼ tsbeiltas li j-israeletike. Akʼo mi jech, muʼyuk la stoy-o sba. Jech kʼuchaʼal liʼe, oy jun velta kʼalal oy kʼusi jakʼbat yuʼun tsebetik ta sventa xrextoike te laj yakʼ ta ilel ti bikʼit yakʼoj sbae (Números 27:1-11). Li kʼusi jakʼbate toj tsots skʼoplal, yuʼun maʼuk noʼox chchapaj-o skʼop li tsebetik taje, yuʼun jech xuʼ xchapaj-o yan kʼusitik ta tsʼakal.

¿Kʼusi van tspas li Moisese? ¿Mi stakʼ van xchapan ta skoj noʼox ti jaʼ tsbeiltas li j-israeletike? ¿Mi laj van spat yoʼonton ta skoj ti xtojob chaʼi sbae, ti oy xa sjabilale o ta skoj ti xojtikin li kʼusitik tsnop Jeovae?

Ti yuʼun jtoybauke xuʼ van jech la spas. Xi chal li Vivliae: «Li Moisese bat yal ta stojol Mucʼul Dios li yaʼyej antsetique» (Números 27:5). Jnoptik ta sventa liʼe, oy xa van ta 40 jabil ti tsbeiltas li j-israeletike, akʼo mi jech la skʼanbe koltael Jeova, maʼuk la spat yoʼonton ta spʼijil stuk. Taje chakʼ ta ilel ti bikʼit tajek laj yakʼ sbae.

Li Moisese muʼyuk chopol chil mi akʼbat tsots yabtel li yantike. Kʼalal oy yan j-israeletik albatik yuʼun Jeova ti xtunik ta j-alkʼope, muyubaj (Números 11:24-29). Kʼalal albat yuʼun smolniʼ ti akʼo stʼuj viniketik sventa xkoltaat li ta yabtele, bikʼit laj yakʼ sba, yuʼun la xchʼun li kʼusi albate (Éxodo 18:13-24). Kʼalal poʼot xaʼox xchame, akʼo mi tsots toʼox li Moisese laj yalbe Jeova ti akʼo sabat xkʼexol sventa sbeiltas li j-israeletike. Kʼalal laj yichʼ tʼujel yuʼun Jeova li Josuee, li Moisese ta sjunul yoʼonton la skolta akʼo mi kerem to li Josuee, xchiʼuk xtok, laj yalbe j-israeletik ti akʼo xchikintabeike, yuʼun jaʼ tsbeiltasatik batel li ta Albil Balumile (Números 27:15-18; Deuteronomio 31:3-6; 34:7). Ta melel, li Moisese jaʼ jun mukʼta matanal laj yaʼi sbeiltasel j-israeletik sventa li yichʼel ta mukʼ Diose. Pe maʼuk toj tsots skʼoplal laj yaʼi sba ta skoj yabtel ti jaʼ muʼyuk xa tsots skʼoplal chil li yantike.

¿KʼUSITIK XUʼ JCHANTIK?

Mi oy jtaoj kabteltik o mi oy kʼusi lek xijtojobutik spasele mu me jtoy-o jbatik ta skoj. Vuleso ta ajol liʼe: sventa stunesutik li Jeovae maʼuk tsots skʼoplal ti oy kʼusi lek xijtojobutik spasele, jaʼ ti bikʼituk xkakʼ jbatike (1 Samuel 15:17). Mi bikʼit kakʼoj jbatik ta melele ta xkakʼtik persa yakʼel ta jkuxlejaltik li tojobtasel chal Vivlia liʼe: «Jaʼ noʼox pato avoʼnton ta stojol li Mucʼul Diose; mu me jaʼuc xapat avoʼnton yuʼun li abijil atuque» (Proverbios 3:5, 6).

Li slekil kʼelobil yuʼun Moisese chakʼ jchantik ti maʼuk tsots skʼoplal xkaʼitik mi oy jtaoj kabteltike.

¿Mi ta van jtabetik sbalil ti bikʼit chkakʼ jbatik kʼuchaʼal li Moisese? Tana. Mi bikʼit chkakʼ jbatike muʼyuk chkakʼbetik svokol li buchʼutik ta jpat jxokontike. Pe li kʼusi mas to tsots skʼoplale jaʼ ti ta jlekubtasbetik yoʼonton li Jeovae ti jaʼ chakʼ ta ilel li lekil talelal taje (Salmo 18:35). «Li Diose chopol chil li jtoybaetique; yan li bochʼo biqʼuit chacʼ sbaique jaʼ chcʼuxubin.» (1 Pedro 5:5.) Oy lek srasonal kuʼuntik sventa bikʼit xkakʼ jbatik kʼuchaʼal Moisés.