MANTAL TA SLIKEBALTIK PAJINA: ¿KʼUSI XUʼ JCHANTIK YUʼUN LI MOISESE?
¿Buchʼu jaʼ li Moisese?
¿Buchʼu chanopbe skʼoplal kʼalal chavaʼibe sbi li Moisese? ¿Mi jaʼ van chtal ta ajol li . . .
jun olol ti laj yichʼ nakʼel yuʼun smeʼ ta jun moch ta ukʼum Niloe?
jun kerem ti ep toʼox kʼusitik oy yuʼun ta Egipto ta skoj ti jaʼ tsʼitesat yuʼun stseb Faraón, pe ti muʼyuk chʼay xaʼi ti jaʼ jun j-israele?
jun jchabichij ta Madián ti 40 jabil jech la spase?
jun vinik ti la xchiʼin ta loʼil Jeovaa ta jpets chʼix ti tsanem skʼakʼale?
jun vinik ti tsots yoʼonton bat skʼopon ajvalil ta Egipto sventa slokʼes ta mosoil li j-israeletike?
jun vinik ti beiltasbil yuʼun Dios sventa laj yalbe skʼoplal lajuneb vokoliletik ti chkʼot ta stojolal Egipto kʼalal la stoy sba ta stojolal melel Dios li ajvalile?
jun vinik ti la skolta lokʼel ta Egipto li j-israeletike?
jun vinik ti tunesat sventa xchʼak ta oʼlol li Tsajal Nabe?
jun vinik ti laj yakʼbe j-israeletik li Lajuneb Mantaletik yuʼun Diose?
LI Moisese maʼuk noʼox la spas taje. ¡Jaʼ yuʼun mu labaluk chkiltik ti ichʼbil ta mukʼ yuʼun li buchʼutik xchʼunojik Cristoe, li judioetike xchiʼuk li jmusulmanetik eke!
Ta melel li Moisese jaʼ toʼox jun j-alkʼop ti «muʼyuc bochʼo yan jech xcoʼlaj yabtel[e]» (Deuteronomio 34:10-12). Toj labal sba ti kʼuyelan laj yakʼ sba ta tunesel yuʼun li Diose. Pe li stuke jaʼ noʼox jun krixchano ek. Xkoʼolaj kʼuchaʼal li j-alkʼop Eliase, ti laj yakʼ sba ta ilel xchiʼuk Moisés kʼalal la skʼatajes sba Jesús ti liʼ toʼox oy ta Balumile, jech, li Moisese «coʼol cristianoutic jchiʼucti[k]» (Santiago 5:17; Mateo 17:1-9). Li Moisese ep vokoliletik la snuptan jech kʼuchaʼal ta jnuptantik avi eke, pe tsal yuʼun skotol.
¿Mi chakʼan chanaʼ kʼuyelan tsal yuʼun li vokoliletike? Jchanbetik skʼoplal oxibuk slekil talelal li Moisese xchiʼuk jkʼeltik kʼuxi xuʼ jchanbetik.
a Li ta Vivliae chal ti jaʼ Jeova sbi li Diose.