«Laj kil, pe muʼyuk xkaʼibe smelolal»

Kʼalal bikʼitun toʼoxe la xtuchʼ snupunelik li jtot jmeʼe, jaʼ yuʼun jaʼ noʼox jmeʼ la stsʼitesunkutik, oy chaʼvoʼ jbankil xchiʼuk jun jvix. Ti vaʼ ora toʼoxe li ololetik ta Francia ti makal xchikinike mu jechuk toʼox chichʼik chanubtasel kʼuchaʼal avie xchiʼuk bateltike toj kʼux tajek ti kʼuyelan chichʼik chanubtasele. Akʼo mi jech, oy onoʼox kʼusi lek kʼot ta pasel ta jtojolal li ta jbikʼtale, ti mu jechuk staojik jlom li buchʼu makal xchikinike. Chkalboxuk ti kʼu yuʼun jech taje.

Te van kʼuk sjalile, ep li buchʼutik chchanubtasik ololetik ti makal xchikinike, yalojik mi skʼan xichʼik chanubtasel sventa snaʼ xkʼopojik xchiʼuk ti xchanik skʼelel kʼusi chal jun krixchano ta yanal ye noʼoxe. Jech xtok, ta Francia yoʼ bu lichʼie, mu jutebuk toʼox xakʼik xikʼopojkutik ta senya kʼop li ta chanobvune. Jlom li buchʼutik te oyik ta chanune chchukbat ta spat li skʼobike.

Kʼalal bikʼitun toʼoxe oy jayibuk ora ta jujun xemana chkʼot skʼelun jun ants ti jaʼ yabtel chchanubtasvan ta kʼopojele. Li ants taje tstsakbun sbakil yolon ke o moʼoje jaʼ li jole, vaʼun tsujilanun sventa oyuk kʼusi chkal, pe li voʼone mi jaʼuk xkaʼi li kʼusi chkale. Mi jaʼuk stakʼ jchiʼin ta loʼil yan ololetik. Li jabiletik taje laj kil tajek jvokol.

Kʼalal vakib xaʼox jabilale la stikʼikun ta jun chanobvun ti jaʼ sventa ololetik ti makal xchikinike. Jaʼ to sba velta te la jchiʼinan yan ololetik jech kʼu kelane. Li te ta chanobvun taje mu xakʼik jtuneskutik xtok li senya kʼope. Mi likʼopojkutik ta senyae ta smajik li stsʼakbenaltak sniʼ jkʼobkutike xchiʼuk tsnitik jolkutik. Pe ta nakʼal lik jkʼopon jbakutik ta senya, voʼonkutik laj kakʼbekutik smelolal li jujun jsenyakutike. ¡Jaʼ to te lik jkʼopon yan ololetik! Jech ximuyubaj tajek chanib jabil.

Pe kʼalal oy xaʼox lajuneb jabilale, la stakikun batel ta jun chanobvun sventa primaria, li ololetik te taje naka xaʼiik kʼoponel. ¡Toj lajem likom! Kaloj mi cham skotol li ololetik ti makal xchikinike, jtuk xa noʼox chkaʼi jba ta Balumil. Li doktoretike chiʼik mi xchʼay xkaʼi li kʼusitik la xchanubtasikune, jech kʼuchaʼal li skʼelel yanal eil sventa jnaʼ kʼusi chalike, jech oxal laj yalbeik kutsʼ kalal ti akʼo mu xchanik li senya kʼope xchiʼuk ti akʼo mu xakʼ jchiʼinik yan ololetik ti makal xchikinik eke. Xvul to ta jol kʼalal bat jkʼelkutik jun doktor ti tskʼel li buchʼu makal xchikinike. Li ta xmexa bu tstsʼibaj-oe te oy jlik livro sventa senya kʼop. Kʼalaluk laj kil li sdivujoaltak ta pajina 1 la jbechkʼobta, vaʼun xi laj kale: «Ta jkʼan leʼe». Ta anil noʼox la snakʼ li doktore.a

TI KʼUXI LA JCHAN LI MANTALE

Li jmeʼkutike la spas persa ti akʼo kakʼ ta jkuxlejalkutik li mantaletik ta Skʼop Diose. Ta xikʼunkutik batel li ta tsobobbail yuʼun stestigotak Jeova ti Mérignac sbie, te nopol ta slumal Burdeos. Mu xkaʼi lek li kʼusi chalik tee, tsjelilan sbaik buchʼu chtal xchiʼinun ta chotlej xchiʼuk ta stsʼibaik ta vun li kʼusi tskʼanik akʼo xkaʼibe smelolale. Kʼot tajek ta koʼonton ti chkʼanvanike xchiʼuk ti oyun ta yoʼontonike. Li jmeʼe ta xchanubtasun ta Vivlia ta jna, pe mu xkaʼibe smelolal skotol li kʼusi chale. Jechtik laj kaʼi jba kʼuchaʼal li j-alkʼop Daniel ti xi laj yal kʼalal albat jun albilkʼop yuʼun jun anjele: «Laj caʼay li cʼusi laj yale, pero muc xcaʼibe smelol» (Daniel 12:8). Yan li voʼon une chkal: «Laj kil, pe muʼyuk xkaʼibe smelolal».

Akʼo mi jech, li kʼusitik melel chal ta Vivliae kʼunkʼun lik chʼiuk ta koʼonton. Li kʼusitik laj kaʼibe lek smelolale ta xkakʼ lek ta koʼonton xchiʼuk chkakʼ ta jkuxlejal. Jech xtok, ta skoj li stalelal chkilbe yantike la jchan batel yan kʼusitik sventa Vivlia. Jech kʼuchaʼal liʼe, li Vivliae chal ti skʼan oyuk smalael kuʼuntike (Santiago 5:7, 8). Taje mu toʼox xkaʼibe lek smelolal, jaʼ to laj kaʼi kʼalal laj kil kʼuyelan chakʼ ta xkuxlejalik li kermanotak ta mantale. Mu stakʼ jmuk ti jaʼ la skoltaun tajek li tsobobbaile.

JUN TSATSAL VOKOL XCHIʼUK LI KʼUSI TOJ LEK KʼOT TA PASELE

Kʼalal chex jchʼielun xaʼoxe, oy jun velta laj kil ti chkʼopojik ta senya kʼop jayvoʼ chex jchʼieletik ta kayee. Ta nakʼal lik jchiʼinan xchiʼuk lik jchan li senya kʼop ta Franciae. Muʼyuk laj kikta jba ti chikʼotilan ta tsobajeletike, te taje oy jun kerem ti Stéphane sbie, chakʼ tajek persa skoltaelun xchiʼuk ti xuʼuk xiloʼilajkutike; lek tajek laj kamigoin jbakutik. Akʼo mi jech, oy kʼusi tsots kʼot ta pasel: tikʼat ta chukel li Stéphane ta skoj ti mu skʼan x-och ta soltaroe. Kʼalal muʼyuk xa te jchiʼuke toj lajem likom yuʼun xchiʼuk li-ipaj ta at-oʼonton. Xkaltik leke laj kikta ti chikʼot toʼox ta tsobajeletike.

Kʼalal echʼ xaʼox buluchibuk ue lokʼ ta chukel li Stéphane, sut batel ta sna. Toj labal laj kil kʼalal lik skʼoponun ta senya kʼope. ¡Mu xa noʼox jchʼun li kʼusi laj kile! ¿Kʼusi kʼot ta pasel? La xchan senya kʼop ta chukinab. Laj kil kʼuyelan tsbakʼes skʼob xchiʼuk kʼuyelan tspas sat li Stéphane xchiʼuk limuyubaj tajek kʼalal laj kakʼ venta ti xuʼ xa mas skoltaune.

JAʼ TO LAJ KAʼIBE SMELOLAL LI KʼUSI MELEL TA VIVLIAE

Lik xchanubtasun ta Vivlia li Stéphane. Kʼalal lik xchanubtasune jaʼ to laj kaʼibe lek smelolal li kʼusitik jchanoj xa onoʼox ta baʼyuke. Ta jbikʼtale ta jkʼupin toʼox tajek skʼelel li kʼupil sba lokʼoletik yichʼoj li vunetik lokʼem ta Vivliae, ti jnaʼuk buchʼutik slokʼole xchiʼuk ta jchanbe lek skʼoplal sventa xkom ta jol li loʼiletike. Voʼone jnaʼoj xa onoʼox ta sventa li Abrahame, li snitilulale xchiʼuk ta sventa li «epal cristianoeti[ke]», pe jaʼ to kʼot lek ta koʼonton kʼusi skʼan xal kʼalal laj yalbeikun ta senya kʼope (Génesis 22:15-18; Apocalipsis 7:9). Jech la jta li kʼusi kʼopal xkaʼie xchiʼuk ti mas lek xkʼot ta koʼontone.

Kʼalal xkaʼibe xa lek smelolal li kʼusi ch-echʼ ta tsobajeletike chkʼot ta koʼonton li mantale xchiʼuk mas to oy ta koʼonton ta jchan batel yan kʼusitik. Ta skoj ti la skoltaun li Stéphane mas xa laj kaʼibe smelolal li Vivliae, vaʼun laj kakʼ jkuxlejal ta stojolal Jeova ta 1992 xchiʼuk laj kichʼ voʼ. Akʼo mi chʼiemun xaʼox ta mantal, chixiʼ xchiʼuk xitsʼijet noʼox ta skoj ti mu toʼox stakʼ xiloʼilaj ta senya kʼop xchiʼuk yantik kʼalal bikʼitun toʼoxe.

CHKAKʼ PERSA STSALEL TI XITSʼIJET NOʼOXE

Lik batkun ta jun uni grupo sventa senya kʼop ti ta mas tsʼakale lik stsob sbaik xchiʼuk li tsobobbail Pessac, ta jteklum Burdeos. Taje la jtabe sbalil, yuʼun jaʼ la skoltaun sventa xichʼi-o ta mantal. Toj jutuk toʼox jnaʼ li senya kʼope, pe li kamigotake chakʼik persa sventa xkaʼibe smelolal li kʼusitik chalbeikune. Li jun nupultsʼakal ti Gilles xchiʼuk Elodie sbiike, chakʼik tajek persa sventa chchiʼinikun ta loʼil. Kʼalal chlaj li tsobajeletike, ep ta velta chikʼikun ta veʼel o ta uchʼ kafe, vaʼun jaʼ jech lik kamigoin jbakutik xchiʼukik. ¡Ximuyubaj tajek ti jaʼ ta jchiʼinan li buchʼutik chchʼunbeik smantaltak Diose!

Li ta tsobobbail taje te laj kojtikin jun tseb ti lek tajek stalelale, Vanessa sbi. Ta skoj ti lek tajek yoʼonton xchiʼuk ti oy ta yoʼonton li buchʼutik oy svokolike, jaʼ la stijbun-o koʼonton. Muʼyuk chmakvan laj yil ti makal jchikine, moʼoj, laj yakʼ ta yoʼonton xchanel kʼuxi xuʼ xchiʼin ta loʼil li buchʼu makal xchikinike. La jkʼan tajek li Vanessae, jaʼ yuʼun linupunkutik ta 2005. Akʼo mi toj vokol chkaʼi ti xiloʼilaje, li Vanessae jaʼ skoltaojun sventa stsal kuʼun ti xitsʼijet noʼoxe xchiʼuk ti masuk lek xiloʼilaje. Ta jtoj tajek ta vokol ti tskoltaun sventa spas kuʼun li kʼusitik oy ta jbae.

LAJ YAKʼBUN YAN JMOTON LI JEOVAE

Li ta sjabilal 2005 kʼalal linupunkutike li Betel yuʼun stestigotak Jeova ta Francia, ta Louviers, la stakun ta ikʼel sventa xkichʼ chanubtasel kʼuchaʼal jelubtasej kʼop ta senya ti jalij jun ue. Achʼtik toe li Betele spasoj xa onoʼox svideoal epal vunetik li ta senya kʼop ta Franciae, pe oy to ep kʼusitik skʼan pasel, jaʼ yuʼun li buchʼutik tsjelubtasik ta senya kʼope tskʼanik koltael.

Li voʼon xchiʼuk Vanessae jaʼ jun mukʼta matanal yakʼoj Jeova chkilkutik ti xuʼ xitun ta Betele, akʼo mi jech chkat koʼontonkutik xtok. ¿Kʼusi van chkʼot ta pasel li ta grupo sventa li buchʼu makal xchikinik ti bu oyunkutik toʼoxe? ¿Kʼusi van chkut li jnakutike? ¿Mi ta van sta yabtel li Vanessae? Li Jeovae toj lek li kʼuyelan la xchapan ta jujutos li jvokolkutike. Laj kil ta melel ti kʼuyelan skʼanojunkutik li Diose xchiʼuk ti skʼanoj skotol li buchʼu makal xchikinike.

KOLTABILUNKUTIK TA JUN JTEKLUM TI LEK TSOBOLE

Ti ta jelubtas kʼope skoltaojun sventa xkaʼibe smelolal ti kʼusitik skʼan pasel sventa xichʼ koltael li buchʼu makal xchikinike. ¡Toj lek tajek chkil ti oy ep ermanoetik chakʼik persa xchanel senya kʼop sventa xchiʼinikun ta loʼile! Mu jechuk chkaʼi jba ti muʼyuk ichʼbilun ta ventae. Ti jech chakʼik ta ilel kʼanelale jaʼ svinajeb ti jaʼ li steklumal Jeova ti lek tsobole (Salmo 133:1).

Ta jtojbe tajek ta vokol Jeova ti la stunes ermanoetik ta tsobobbail sventa skoltaikune. Jech xtok, ta jtoj ta vokol ti xuʼ jkolta buchʼu makal xchikinik sventa xojtikinik li Jpasvanej kuʼuntik ti kʼanvaneme xchiʼuk ti xuʼ xnopajik ta stojolale. Oy tajek ta koʼonton ti muʼyukuk xa kʼusi xmakvan sventa xijloʼilaj kʼuchaʼal jun utsʼ alalil ti lek tsobole xchiʼuk ti jkotoltik jaʼuk xa jtunestik «lequil cʼop», jaʼ xkaltik li kʼusi melel ta sventa Diose xchiʼuk li kʼusi tskʼan tspase (Sofonías 3:9).