Li Diose skʼanojan li pakʼchikinetike

Ta spʼejel balumile te van 70 miyon pakʼchikinetik oy xchiʼuk tstunesik li senya kʼop ti oy mas ta chib sien ta chope. Pe li kʼusi chopole, jaʼ ti muʼyuk lek ilbil li pakʼchikinetike, jech kʼuchaʼal xvinaj li ta loʼiletik liʼe:

• «Li ta spʼejel balumile ep ta velta muʼyuk chichʼ tsakbel ta venta sderecho li pakʼchikinetike xchiʼuk li buchʼutik mu xaʼiik leke» (Asociación Nacional de Sordos ta Estados Unidos).

• «Li pakʼchikinetik ti te nakalik li ta lumetik ti povreik noʼoxe mas to toj povreik, jech xtok muʼyuk mas chchanunajik, muʼyuk mas tstaik ta kʼelel aʼyejetik xchiʼuk vokol tsta yabtelik» (Federación Mundial de Sordos).

Li Diose, ¿kʼu yelan chil li pakʼchikinetike? ¿Kʼusi chal Vivlia ta stojolalik? Xchiʼuk, ¿kʼusi yakal tspasik li stestigotak Jeova sventa skoltaike?

Li Diose, ¿kʼu yelan chil li pakʼchikinetike?

Li Vivliae chal ti oy ta yoʼonton pakʼchikinetik li Jeovaea. Li Diose oy ta yoʼonton ti stabeik sbalil li kʼusi chakʼ ta chanele xchiʼuk mu skʼan ti jpʼajtike.

Teksto ta Vivlia: «Mu me xachopol kʼopta li pakʼchikine» (Levitiko 19:14).

Teksto ta Vivlia: «Mu snaʼ xtʼujvan li Diose» (Echos 10:34).

Teksto ta Vivlia: «Lik xanavuk ta skotol jteklumetik xchiʼuk ta bikʼtal lumetik li Jesuse, [...] la xcholbe skʼoplal li lekil aʼyejetik ta sventa li Ajvalilale» (Mateo 9:35).

Teksto ta Vivlia: «Xaʼi xa yuʼun kʼalal ta pakʼchikinetik xchiʼuk xkʼopoj xa yuʼun kʼalal ta umaʼetik [li Jesuse]» (Markos 7:37).

Teksto ta Vivlia: «Chjam xchikinik li pakʼchikinetike» (Isaias 35:5).

Li kʼusi skʼan xale: Li Jeovae yaloj ti chjam xchikin li pakʼchikinetike (Isaias 29:18).

¿Kʼusi yakal tspasik li stestigotak Jeova sventa skoltaik li pakʼchikinetike?

Ta spʼejel balumile li stestigotak Jeovae chkakʼbekutik yil li pakʼchikinetik li kʼusi yaloj tspas Dios ta mas jelavele. ¿Kʼu yelan ta jpaskutik? Jpasojkutik ta video sjunul li Vivlia ta senya kʼope xchiʼuk yan videoetik ti oy ta mas ta sien kʼopetik ta senyae. Jech xtok, chkakʼkutik chanubtaseletik ta Vivlia xchiʼuk chjelav jtsobajelkutik ta senya kʼop. Ta matanal ta jkoltakutik li buchʼutik tskʼan chojtikinik Diose. Ta moton jech ta jpaskutik, yuʼun xi laj yal komel li Jesuse: «Ta moton la˗akʼbatik, jaʼ jech ta moton xavakʼik ek» (Mateo 10:8).

¿Bu ta tael skotol taje? Tey chata liʼe:

Li jpajinakutik jw.org. Li ta yakʼol pajinae xuʼ xanetʼ ti bu stakʼ jeltik ta yan kʼope, vaʼun akʼo ta senya kʼop. Xuʼ xasaʼ li kʼusi chakʼan chachane.

Li aplikasion JW Library Sign Language. Xuʼ xayales ta aselular o ta atavleta. Taje muʼyuk tojbil, vaʼun xuʼ xayales videoetik xchiʼuk xuʼ xakʼel videoetik mi oy a˗internete.

¿Kʼusi jpasojkutik sventa xichʼ chanel li Vivliae?

Li Vivlia ta senya kʼope. Li Skʼop Dios sventa Achʼ Balumil ta senya kʼop ta Estados Unidose jaʼ li baʼyel Vivlia laj yichʼ jelubtasel ta senya kʼope. Li Skʼop Dios sventa Achʼ Balumile jelubtasbil ta jvokʼ o ta sliklej ta jeltos kʼopetik ta senya. Chichʼ jelubtasel ta yan kʼopetik jujun jabil. (Sventa xavil ta kʼusitik kʼopal oy li Vivliae o ti xakʼel li Vivlia mi oy a˗internete, kʼelo li rekuadro «Li Skʼop Dios sventa Achʼ Balumil ta senya kʼope).

• Sventa xavil kʼu yelan chichʼ jelubtasel li Vivlia ta senya kʼope, kʼelo li video Oy xa sliklej li Xchʼul Kʼop Dios sventa Achʼ Balumil ta senya kʼop ta inglese.

• Sventa xatabe lek sbalil li xchanel Vivliae, yaleso li aplikasion JW Library Sign Language. Li ta aplikasion liʼe xuʼ xatʼuj kʼusi tekstoal ta Vivlia chakʼan chakʼel.

• Li Dmytro xchiʼuk Vitae jaʼ pakʼchikinetik, pe li chaʼvoʼ yalab xnichʼnabike maʼuk pakʼchikinetik. Kʼelavil kʼuxi staojbeik sbalil li xchanel Vivlia ta senya kʼop jujun kʼakʼale.

Videoetik ti chchapbe smelolal Vivliae. Li stestigounkutik Jeovae ta jpaskutik videoetik ta senya kʼop sventa jkoltakutik li krixchanoetik ta yaʼibel smelolal xchiʼuk ta yakʼel ta xkuxlejalik li tojobtaseletik ta Vivliae. ¿Buchʼutik sventa li tojobtaseletike?

• Sventa nupultsʼakaletik xchiʼuk utsʼ alalil

• Sventa kerem tsebetik

• Sventa ololetik

Chanubtasel ta Vivlia. Mi lachʼam li chanubtasel ta Vivlia chkakʼkutike, voʼot chaval kʼu sjalil chakʼan chachan xchiʼuk ta senya kʼop chachan. Jech xtok, oy buchʼu tskoltaot batel ta xchanel. Kʼano junuk chanubtasel ta Vivlia, vaʼun te chavakʼ venta kʼu yelan li matanal chanubtasel chkakʼkutike.

Li Jeson Senajonon te nakal ta Filipinas. Kʼelavil kʼuxi koltaat li chanubtasel ta Vivlia sventa xkʼot ta yamigo li Diose.

Li Mario Antúnez jaʼ toʼox jun pastor ta Honduras. Kʼelo li sloʼil xkuxlejal ti xi sbie: «Ep kʼusi ta jakʼbe jba, pe junantik ta jtabe stakʼobil». Tey chavakʼ venta kʼuxi la stabe stakʼobil li kʼusitik tsjakʼbe sba ta sventa li Vivliae.

Tsobajeletik xchiʼuk asambleaetik. Ta spʼejel balumile oy tsobobbailetik xchiʼuk grupoetik ta senya kʼop ti jaʼ te tstsob sbaik jujun xemana li pakʼchikinetik sventa xichʼik ta mukʼ Dios xchiʼuk sventa xchanik Vivliae. Jech xtok, jujun jabile mas to ep ta jtsob jbakutik ta j˗asambleakutik sventa jchanbekutik skʼoplal li Vivliae. Li ta jtsobajelkutik xchiʼuk j˗asambleakutike li pakʼchikinetik ti mu xilik osil xtoke chichʼ nikesbel skʼobik sventa xjelubtasbatik ta senya kʼop li mantale. Jech xtok, chkakʼkutik ta matanal vunetik ta braile kʼop.

• Saʼo junuk tsobobbail ti bu nopol xavile.

• Kʼelbo skʼoplal li j˗asambleakutik ch˗echʼ jujun jabile.

• Batan li ta Snaʼobil slajel Jesus ti jaʼ li tsobajel mas tsots skʼoplal ch˗echʼ jujun jabile.

Li José Luis Ayala ti te nakal ta Méxicoe pakʼchikin vokʼ xchiʼuk ta tsʼakale pas ta maʼsat. Kʼelo avil kʼuxi kʼot ta jun lekil jchanubtasvanej ta Vivlia ta skoj ti koltaat yuʼun yantike.