KʼUSITIK CHICHʼ JAKʼEL TA SVENTA VIVLIA

¿Kʼusi stu laj yichʼ pasel li Jbalumiltike?

Li Jbalumiltike solel lek chapanbil sventa xuʼ xijkuxi. Oy lek voʼ ti toj jtunel ta sventa li kʼusitik kuxajtike. Li Balumile tsʼetsʼeʼ, chjoyibaj spʼejel xchiʼuk tsjoyibta sjoylej li Kʼakʼale, koliyal taje, li nabe mu xpas ta yelo o mu xtakij. Li Balumil oy jkʼol xpix ti atmósfera sbie xchiʼuk li yip Balumil ti chpix spʼejel sventa mu xjelav tal li kʼusitik chtʼomanuk tal ta akʼole. Jech xtok koʼol tskolta sbaik li chonbolometik xchiʼuk li tsʼiʼleletike. Kʼalal chakʼik venta krixchanoetik taje, ep buchʼutik chkʼot ta nopel yuʼunik ti oy kʼusi stu laj yich pasel li Balumile. (Kʼelo Isaías 45:18.)

Pe ta skoj ti noj ta vokoliletik xchiʼuk ta choplejal li Balumil avie, oy buchʼutik tsjakʼbe sbaik mi jaʼ onoʼox li kʼusi oy ta yoʼonton ta sventa Balumil li Jpasvanej kuʼuntike. (Kʼelo Deuteronomio 32:4, 5.)

¿Mi chkʼot onoʼox ta pasel li kʼusi stu laj yichʼ pasel li Jbalumiltike?

Li Balumile laj yichʼ pasel sventa te xkuxiik krixchanoetik yoʼ xmuyubajikuk noʼoxe, ti xichʼ sbaik ta mukʼe xchiʼuk ti jmojuk skʼanik li Jpasvanej yuʼunike. Taje jaʼ skʼan xal ti mas tsots skʼoplal laj yichʼik pasel li krixchanoetike, ti jaʼ mu sta li tsʼiʼleletik xchiʼuk li chonbolometike. Yuʼun li voʼotike jnaʼojtik Buchʼu la spasutik xchiʼuk xuʼ jchanbetik stalelaltak ti jaʼ li kʼanelale xchiʼuk li tukʼilale. (Kʼelo Eclesiastés 12:13; Miqueas 6:8.)

Li Jpasvanej kuʼuntike tspas skotol li kʼusi oy ta yoʼontone, jaʼ yuʼun xuʼ jpat lek koʼontontik ti tslajes li vokoliletik xchiʼuk li choplejale xchiʼuk ti tskʼatajes ta jun lekil avilal li Jbalumiltik yoʼ xijmuyubaj noʼox te xijkuxie. (Kʼelo Salmo 37:11, 29; Isaías 55:11.)

Mi chakʼanbe to mas yaʼyejale kʼelo li kapitulo 3 ta livro liʼe, ¿Kʼusi chchanubtasvan ta melel li Vivliae?, ti pasbil yuʼun stestigotak Jeovae.

Xuʼ xayales ta www.jw.org/tzo

[Lokʼol ta pajina 16]

Li Balumile laj yichʼ pasel sventa xmuyubajikuk noʼox te xkuxi li krixchanoetike