Li Diose yaloj ti chlekub yan velta li balumile

Taje jaʼ jech laj yalik jtsop sientifikoetik ti ojtikinbilik lek ta spʼejel balumil kʼalal laj yalbeik skʼoplal ti kʼu yelan jelem talel li sikil o xkʼixnal balumile. ¿Mi achʼunoj ti oy jun Dios ti kʼuxutik ta yoʼontone? Mi jeche, jaʼ van chakʼ anop li kʼusi laj yal sientifikoetik ti jaʼ onoʼox jech spasoj Dios ti tsmeltsan sba stuk li kʼusitik oy ta balumil kʼalal tsoke.

Pe mu xa baluk-o ti kʼu yelan pasbil yoʼ smeltsan sba stuk li balumile, yuʼun ep xa sokesoj li krixchanoetike. Pe ¿kʼu yuʼun xuʼ jpat koʼontontik ta stojolal Dios ti muʼyuk chakʼ lajuk li balumil xchiʼuk li kʼusitik kuxajtik tee?

Li tekstoetik chvinaj ta rekuadroe chakʼ ta ilel ti muʼyuk onoʼox chlaj skʼoplal li balumile xchiʼuk li kʼusitik kuxajtik tee.

• Li Diose jaʼ la spas li balumile. «Li ta slikebale, li Diose la spas vinajel xchiʼuk balumil» (Jenesis 1:1).

• Li Diose jaʼ yajval li balumile. «Jaʼ yuʼun balumil li Jeovaea xchiʼuk skotol li kʼusitik oye» (Salmo 24:1).

• Li Diose la smeltsan balumil sventa teuk-o ta sbatel osile. «Achotanoj lek ta snakleb li balumile; sbatel osil muʼyuk bu chichʼ lokʼesel ta yavil» (Salmo 104:5).

• Li Diose jamal yaloj ti oy-o kuxlejal ta sbatel osil li ta balumile. «Ti jaʼ melel Diose, ti jaʼ li buchʼu la spas li balumile, […] ti mu jecheʼuk noʼox la smeltsane, ti la smeltsan sventa xichʼ naklebinele» (Isaias 45:18).

• Li Diose jamal yaloj ti te chnakiik-o ta sbatel osil ta balumil li krixchanoetike. «Chuʼuninik balumil li buchʼutik tukʼike xchiʼuk te chkuxiik-o sbatel osil» (Salmo 37:29).

Ti kʼu yelan smeltsanoj Dios li balumile xuʼ jun noʼox koʼontontik te xijnaki, pe jaʼ noʼox me mi muʼyuk chichʼ sokesele. Li albil kʼopetik ta Vivliae chal ti Jeova Diose yakʼojbe xa yorail sventa slajes li buchʼutik tsokes balumile xchiʼuk ti muʼyuk xa noʼox smelol li kʼusitik tspasik ta sba balumile (Apokalipsis 11:18).

Li Vivliae chal ti mi kʼot xa ox ta pasel skotol taje, li Diose tslekubtas yan velta li balumile. Tspas ta jun kʼupil sba paraiso xchiʼuk tsjam skʼob yoʼ xakʼbe «kʼusi tskʼan yoʼontonik skotol li kʼusitik kuxajtike» (Salmo 145:16).