¿Mi chichʼ lajesel li balumile?
Li kʼusi chal Vivliae
Muʼyuk. Li jbalumiltike muʼyuk onoʼox bu chichʼ lajesel, muʼyuk chichʼ chikʼel xchiʼuk muʼyuk chichʼ jelel. Li Vivliae chchanubtasvan ti jaʼ la spas balumil li Diose xchiʼuk ti jaʼ sventa te xnakiik ta sbatel osil li krixchanoetike.
«Li bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o» (Salmo 37:29).
«[Dios,] laj anacan lec ta snacleb li banamile yuʼun jech mu me xbacʼ» (Salmo 104:5).
«Staoj yav o li banamile» (Eclesiastés 1:4).
«Li bochʼo la spas banamile; ti la xchapan leque, ti lec nacal icom yuʼun sventa acʼo oyuc bochʼotic te chnaquie» (Isaías 45:18).
¿Mi tslajes balumil li krixchanoetike?
Li Diose muʼyuk chakʼ ti akʼo slajesik balumil ta skoj li paskʼope, li yikʼubtasel balumile xchiʼuk li yan kʼusitike. Li Vivliae chal ti jaʼ chichʼ lajesel «li buchʼutik yakal tsokesik li balumile» (Apokalipsis 11:18). ¿Kʼuxi chkʼot ta pasel?
Li Diose tsjel ta tukʼil Ajvalil ta vinajel li ajvaliletik ta balumil sventa slajes skotol li kʼusitik tsokes balumile (Daniel 2:44; Mateo 6:9, 10). Li Ajvalil taje jaʼ li Xnichʼon Diose, li Jesukristoe (Isaías 9:6, 7). Kʼalal ay ta balumil li Jesuse laj yakʼ ta ilel ti oy sjuʼel sventa spas ta mantal li tsatsal ikʼe xchiʼuk li nabe (Markos 4:35-41). Kʼalal mi lik sventain balumil li Ajvalil Jesuse, ta me spas ta mantal li nabe, li ikʼe xchiʼuk li yan kʼusitik ta balumile. Jech xtok, ta me xachʼubtas li balumile, jaʼ xkaltik, kʼalal mi lik sventaine jaʼ jech tspas kʼuchaʼal li nichimaltik Eden ta voʼnee (Mateo 19:28; Lukas 23:43).
¿Mi muʼyuk chal Vivlia ti chichʼ chikʼel ta kʼokʼ li balumile chaʼa?
Muʼyuk. Maʼuk melel ti kʼu yelan chalbeik smelolal li kʼusi chal ta 2 Pedro 3:7: «Kʼejbilik sventa kʼokʼ li vinajel xchiʼuk balumil ti oy avie». Jkʼeltik batel chib srasonal ti toj tsots skʼoplale xchiʼuk ti jaʼ tskoltautik sventa xkaʼibetik smelolale:
Oy jayibuk smelolal li vinajel, balumil xchiʼuk kʼokʼ chalbe skʼoplal Vivliae. Jech kʼuchaʼal li ta Salmo 66:4 xi chale: «Sbejel banamil chayichʼicot ta mucʼ, ta xqʼuejinic ta atojol, tsqʼuejintaic li achʼul bie». Kʼalal «banamil» xie, jaʼ skʼoplal li krixchanoetike.
Li ta 2 Pedro kapitulo 3 chal kʼusi smelolal li «vinajel», «balumil» xchiʼuk li kʼokʼe. Li ta versikulo 5 xchiʼuk 6 jaʼ chalbe skʼoplal li Nojelal ta voʼ ta skʼakʼalil Noee. Li buchʼutik laj yichʼ lajesel li vaʼ orae jaʼ li krixchanoetike, maʼuk li «banamile» (Génesis 6:11). Jech xtok laj yichʼ lajesel li vinajele, jaʼ xkaltik, li ajvaliletik ti tsventain krixchanoetik li vaʼ kʼakʼale. Jaʼ yuʼun chaʼa, maʼuk laj yichʼ lajesel li balumil bu nakalutike, jaʼ laj yichʼ lajesel li chopol krixchanoetike. Jaʼ xa noʼox kuxul komik li Noe xchiʼuk yutsʼ yalale, vaʼun lik snojesik li balumil kʼalal echʼ xa ox li Nojelal ta voʼe (Génesis 8:15-18).
Jaʼ jech kʼuchaʼal laj yakʼbe slajeb chopol krixchanoetik li Nojelal ta voʼ ta skʼakʼalil Noee, li kʼokʼe o li lajelal chal ta 2 Pedro 3:7 jaʼ me chakʼbe slajeb li chopol krixchanoetike, maʼuk li balumile. Xi jamal yaloj li Diose: «Oy achʼ vinajel xchiʼuk jun achʼ balumil [...], oy-o xa tukʼilal te» (2 Pedro 3:13). Li «achʼ balumil» o li achʼ jnaklejetike oy «achʼ vinajel» yuʼunik, jaʼ xkaltik, achʼ ajvalil ti jaʼ li Ajvalilal yuʼun Diose. Li Ajvalilal taje tsjoypʼin ta jun paraiso li balumil ti naka xa jun oʼontonale (Apokalipsis 21:1-4).