Chlaj li Balumile: Jlome chiʼik, tskʼanik akʼo xa xtal o chchibaj yoʼontonik

¿Kʼu yelan chavaʼi aba kʼalal chanop ti oy kʼusi chkʼot ta pasel li ta 21 yuʼun disiembre ta 2012 ti jech chal li kalendario mayae? Xuʼ van chamuyubaj yuʼun li kʼusi amalaoje, chchibaj avoʼonton o mu aventauk-o. ¿Mi jaʼ noʼox van nopbil jech kʼuchaʼal li kʼusitik albil ta sventa li slajeb Balumile?

¿Kʼusi chanop ta sventa li kʼusi chal Vivlia ti chal ti «[ch]laj li balamile»? (Mateo 24:3, Scʼop Riox, ta skʼop Zinacantán.) Junantike chiʼik mi chichʼ chikʼel li Balumile. Jlome lek chilik ti kʼuyelan chakʼik ta ilel ti chlaj li Balumile. Pe li jlome chtavan xa xaʼiik yaʼiel ti poʼot xa chlaj li Balumile. Ti kʼuyelan chavaʼi abae, ¿mi jaʼ van ta skoj ti kʼusuk xa noʼox chalilanik ta sventa taje, ti xuʼ van mu jechuk ta melele?

Yikʼal van labal sba chavaʼi li kʼusi chal ta melel Vivlia ta sventa ti chlaj li balumile. Li ta Vivliae chalbutik srasonaltak ti kʼu yuʼun oy ta koʼontontik ti akʼo lajuk xa li balumile, xchiʼuk chal xtok ti xuʼ xijlubtsaj ta smalael ta skoj ti ta jnoptik ti chjalij tajeke. Jaʼ yuʼun, chkalbotkutik ti akʼo xasabe stakʼobil ta Vivlia li chanib sjakʼobiltak ti jech tsjakʼilanbe sbaik li krixchanoetike.

¿Mi chlaj van ta kʼokʼ li Balumile?

XI TSTAKʼ LI VIVLIAE: «Laj anacan lec ta snacleb li banamile yuʼun jech mu me xbacʼ» (SALMO 104:5).

Li Balumile muʼyuk chlaj ta kʼokʼ o ta yan kʼusitik, moʼoj, yuʼun li Vivliae chchanubtasvan ti tsnaklebinik ta sbatel osil li krixchanoetike. Li ta Salmo 37:29 xi chale: «Li bochʼo tucʼ yoʼntonique jaʼ chuʼuninic o li yosilique» (Salmo 115:16; Isaías 45:18).

Kʼalal la spas Balumil li Diose «toj lec laj yil» xchiʼuk jech-o chil li avie (Génesis 1:31). Li Diose muʼyuk yaloj ti tslajes li Balumile, moʼoj, yuʼun kʼajomal yaloj ti «ta [s]tubbe scʼoplal ti jsoquesej-banomile». Xkaltike muʼyuk chakʼ ti akʼo sokesik-o Balumil li krixchanoetike (Apocalipsis 11:18, Ch).

Pe yikʼal van jaʼ chanop li kʼusi chal ta 2 Pedro 3:7 ti xi chale: «Li vinajel xchiʼuc banamile chapanbil xa scʼoplal ta xcʼacʼ ta cʼocʼ». Li jun teksto taje, ¿mi mu jaʼuk van skʼan xal ti chlaj ta kʼokʼ li Balumile? Bakʼintike, kʼalal chal ta Vivlia vinajel, balumil xchiʼuk kʼokʼ xie, maʼuk chalbe skʼoplal li batsʼi vinajel, Balumil xchiʼuk kʼokʼe. Jech kʼuchaʼal liʼe, li ta Salmo 66:4 xi chale: «Sbejel banamil chayichʼicot ta mucʼ» xi. Ta melel kʼalal «banamil» xie, jaʼ chalbe skʼoplal li krixchanoetike.

Li stsʼak loʼil ta 2 Pedro 3:7, te chakʼ ta ilel ti kʼalal chal vinajel, balumil xchiʼuk kʼokʼ xie, ta babakʼop laj yal. Yuʼun li ta versikulo 5 xchiʼuk 6, tskoʼoltas li kʼusi kʼot ta pasel kʼalal echʼ li Nojelal ta voʼ ta skʼakʼalil Noee. Taje jaʼ laj yakʼbe slajeb li voʼneal balumile, pe muʼyuk xlaj li batsʼi Balumile. Li Nojelal ta voʼe laj yakʼbe slajeb jun «banamil», taje jaʼ skʼoplal li chopol krixchanoetike, kʼalal «vinajel» xie, jaʼ skʼoplal krixchanoetik ti jaʼo ch-ajvalilajike (Génesis 6:11). Jech xtok, li ta 2 Pedro 3:7 chal ti chlaj ta kʼokʼ skotole, taje jaʼ skʼan xal ti chlajik li chopol krixchanoetike xchiʼuk li chopol ajvaliletik yuʼunike.

¿Kʼusi chkʼot ta pasel kʼalal mi laj li balumile?

XI TSTAKʼ LI VIVLIAE: «Pero li banamile xchiʼuc li cʼusi chacʼ batuc coʼntontic yuʼune, ta onoʼox xlaj; yan li bochʼo jaʼ tspasilan cʼusi tscʼan yoʼnton Diose jaʼ ta xcuxi sbatel osil» (1 JUAN 2:17).

«Li banamil» ti ta onoʼox xlaje, maʼuk li batsʼi Balumile, moʼoj, jaʼ li krixchanoetik ti muʼyuk tspasik li kʼusi tskʼan yoʼonton Diose. Jech kʼuchaʼal jun doktor ti tspas operar jun krixchano sventa tslokʼesbe jun kanser chamel sventa mu xchame, jech ek li Diose ta slokʼes ta Balumil li chopol krixchanoetike, taje jaʼ sventa xuʼ xnakiik ta sbatel osil li buchʼutik lekike (Salmo 37:9). Jaʼ yuʼun chaʼa, kʼalal chal ti «[ch]laj li balamile», lek kʼusi chkʼot ta pasel.

Ti vaʼ yelan lek kʼusi chkʼot ta pasele jech chakʼ ta aʼiel li ta junantik Vivliae, yuʼun kʼalal chal ti «[ch]laj li balamile», xi tsjelubtasike: «Slajebal kʼusitik chkʼotanuk ta pasel» (Mateo 24:3, TNM). Vaʼun chaʼa, mi oy chkom krixchanoetik xchiʼuk maʼuk chichʼ lajesel li Balumil kʼalal mi tal li lajelale, ¿mi mu jaʼuk skʼan xal ti oy kʼusi achʼ chkʼotanuk ta pasele? Li Vivliae lek jamal tstakʼ, yuʼun li Jesuse laj yal ti chtal «achʼ banomil[e]» (Lucas 18:30, Ch).

Li Jesuse laj yal ti «chlic achʼubuc scotole». Yuʼun jaʼ tspas ta achʼ skotol jech kʼuchaʼal la spas Dios ta slikebale (Mateo 19:28). Vaʼun xuʼ jkʼupintik li bendisionetik liʼe:

• Li Balumil ti pasem xaʼox ta paraisoe chʼabal xiʼel xchiʼuk ep kʼusitik x-ayan (Isaías 35:1; Miqueas 4:4).

• Oy xa lek abtel ti chakʼ muyubajele (Isaías 65:21-23).

• Ta xchʼay skotol li chameletike (Isaías 33:24).

• Chkeremaj tstsebaj skotol krixchanoetik (Job 33:25).

• Chchaʼkuxiik li buchʼu chamemike (Juan 5:28, 29).

Mi ta jpastik li «cʼusi tscʼan yoʼnton Diose» muʼyuk chijxiʼutik-o ti chtal slajebal li balumile, moʼoj, yuʼun ta jkʼantik xa tajek ti akʼo xtale.

¿Mi poʼot xa xtal li slajeb balumile?

XI TSTAKʼ LI VIVLIAE: «Cʼalal chavilic ta xcʼot ta pasel scotol li cʼusi calojboxuque, jech chanaʼic o ti poʼot xa chlic sventainoxuc li Diose» (LUCAS 21:31).

Li ta livro The Last Days Are Here Again (Li slajebal kʼakʼale chaʼvul xa), li jchanubtasvanej Richard Kyle la stsʼiba ti «kʼuyelan chjel batel li kuxlejale xchiʼuk li tsatsal vokoliletik tsnuptan li krixchanoetike, jaʼ chakʼ ti ep xa ta tos chalbeik skʼoplal ta sventa li slajeb Balumile», pe mas to kʼalal mu xaʼibeik smelolal li kʼusitik chkʼot ta pasele.

Pe li j-alkʼopetik chal Vivliae maʼuk laj yalbeik skʼoplal slajeb balumil ta skoj li kʼusitik chopol kʼotanuk ta pasel ta skʼakʼalilike. Li Diose laj yakʼbe snaʼ j-alkʼopetik sventa stsʼibaik li kʼusitik chkʼot ta pasel ti chakʼ ta ilel ti chtal xa li lajebale. Kʼelo jayibuk albilkʼopetik ta Vivlia xchiʼuk akʼo venta mi yakal xa chkʼot ta pasel o mi muʼyuk.

• Paskʼop, viʼnal, nikel xchiʼuk tsatsal chameletik (Mateo 24:7; Lucas 21:11).

• Jamal xvinaj ti ch-epaj choplejale (Mateo 24:12).

• Tsokesik Balumil li krixchanoetike (Apocalipsis11:18, Ch).

• Li krixchanoetike skʼanoj sba stukik, chbat ta yoʼontonik li takʼine, tspas li kʼusi lek chaʼi stukike, jaʼ muʼyuk ta yoʼontonik li Diose (2 Timoteo 3:2, 4).

• Ta xchʼak sba li utsʼ alaliletike (2 Timoteo 3:2, 3).

• Mu xchʼunik li senyailtak ti poʼot xa li lajebale (Mateo 24:37-39).

• Chichʼ cholel lekil aʼyej ta sventa Ajvalilal yuʼun Dios ta spʼejel Balumil (Mateo 24:14).

Kʼalal chkiltik «scotol li cʼusi laj» yal Jesuse, jaʼ tskoltautik sventa xkakʼtik venta ti chnopaj xa tal li lajebale (Mateo 24:33). Li stestigounkutik Jeovae jchʼunojkutik ti melel li senyailtake, jaʼ yuʼun ta jcholkutik mantal ta 236 mukʼta lumetik xchiʼuk ta bikʼtal lumetik.

Kʼalal mu jechuk chkʼot ta pasel li kʼusi chichʼ alel ta sventa li lajebale, ¿mi jaʼ van skʼan xal ti muʼyuk xa chtal-oe?

XI TSTAKʼ LI VIVLIAE: «Cʼalal jech chal li cristianoetique: “Jun coʼntontic, muʼyuc cʼusi xiʼbal sba”, me xiique, jaʼo ta ora noʼox chvul ta loqʼuel tsots vocol ta stojolic. Jaʼ jech chac cʼu chaʼal jun ants ti ta ora noʼox chlic xaʼay cʼalal oy xchʼute. Me junuc muʼyuc bochʼo xuʼ chjatov» (1 TESALONICENSES 5:3).

Li Vivliae tskoʼoltas li lajebal jech kʼuchaʼal kʼalal chlik xkʼuxul xchʼut jun ants ti oy yole: li xkʼuxul xchʼute mu stselpʼuj xchiʼuk ta anil noʼox chlik. Jaʼ jech ek ti kʼu sjalil xchiʼuk li kʼusitik chkʼot ta pasel kʼalal mu to chtal li lajebale, jech xkoʼolaj kʼuchaʼal jun ants ti smalaoj xa kʼusitik chkʼot ta pasel kʼalal poʼot xa x-ayan li sneneʼe. Akʼo mi mu x-ayan jech kʼuchaʼal laj yalbe yorail li doktore, li meʼile snaʼoj xa onoʼox ti chvokʼe. Jaʼ yuʼun chaʼa, akʼo mi mu jechuk yorail chkʼot ta pasel li kʼusitik albil ta sventa li lajebale, muʼyuk chjel li senyailtak ti kuxulutik xa li ta «slajeb cʼacʼale» (2 Timoteo 3:1).

Yikʼaluk van xuʼ xi xajakʼbe abae: «Mi lek jamal xvinaj ti kuxulutik xa ta slajebal kʼakʼale, ¿kʼu yuʼun oy ep krixchanoetik ti mu xchʼunike?». Li Vivliae yaloj xa onoʼox ti kʼalal poʼot xa xtal li lajebale ep buchʼutik mu xchʼunik manchuk mi jamal lek xvinaj li senyailtake. Mu stsʼetan xchikinik ta sventa li kʼusitik chkʼot ta pasel li ta slajebal kʼakʼale, kʼajomal xi chlabanvanike: «Yuʼun bisil o ti cʼu onoʼox xʼelan cʼalal ichamic li jmoltot jyameʼtique. Ti cʼu onoʼox xʼelan ta sliquebal cʼalal imeltsaj li banamile, jaʼ jech o cʼalal to tana» (2 Pedro 3:3, 4). Ta jaypʼeluk noʼox kʼope, akʼo mi jamal lek xvinaj li senyailtake, jutuk mu skotolikuk li krixchanoetike mu stsakik ta mukʼ (Mateo 24:38, 39).

Li ta xchanobil liʼe jayib noʼox senyailtak laj yichʼ albel skʼoplal ta Vivlia ti poʼot xa slajeb li balumile.a ¿Mi chakʼan chanabe mas smelolal? Mi jeche, ta xkalbotkutik ti xuʼ xajakʼbe junuk stestigo Jeova sventa xakʼanbe junuk chanubtasel ta Vivlia ti ta moton chakʼike. Xuʼ xavichʼ chanubtasel ta ana, ta telefono o jaʼ ti bu mas lek chavaʼie. Li kʼusi noʼox chavichʼ kʼanbele jaʼ ti xachʼak akʼakʼale, yuʼun toj ep sbalil chatabe.