Chanib sjakʼobil ta sventa li kʼusi chlaj skʼoplale

LI Jesucristoe laj yal onoʼox ti oy kʼusi chlaj skʼoplal ta tsʼakale xchiʼuk xi laj yalbe skʼoplal ta sventa taje: «Ta onoʼox xtal li tsots vocole. Muʼyuc onoʼox jech cʼalal ilic li banamile xchiʼuc cʼalal to tana. Muʼyuc ta xcʼot ta pasel jech yan velta noxtoc» (Mateo 24:14, 21).

Ta skoj li albil kʼop liʼe xchiʼuk li yantik chal ta Vivlia ta sventa taje, ep kʼusi tsjakʼbe sba-o li krixchanoetike. Jkʼeltik kʼuxi tstakʼ chanib sjakʼobil li sKʼop Diose. Mi jech xal avoʼontone, xuʼ xa saʼ batel ta aVivlia li tekstoetik liʼ tsakal talele.

1 ¿Kʼusi ti chlaj skʼoplale?

Li Vivliae muʼyuk chchanubtasvan ti chlaj li Balumile; moʼoj, chal ti te oy-o sbatel osile. Chal ti Diose «laj [xchotanbe] lec yic ti banomile yoʼ jech jʼechʼel stsinanoj sba ta yavil» (Salmo 145:5, Ch). Muʼyuk chchanubtasvan xtok ti chlaj ta mukʼta pas kʼop li kuxlejale (Isaías 45:18). Li Jesucristoe laj yal ti oy jvokʼ krixchanoetik kuxul chkom mi tal li slajeb kʼusitik chlaj skʼoplale (Mateo 24:21, 22). Vaʼun chaʼa, ¿kʼusi ti chlaj skʼoplal chal Vivliae?

Li ajvaliletik ti mu skotoluk xuʼ yuʼunik spasele. Xi la stsʼiba j-alkʼop Daniel li kʼusi akʼbat snaʼ yuʼun Diose: «Li Dios te oy ta vinajele ta sliques jun ajvalil; muʼyuc bochʼo xuʼ chtuchʼbat yabtel, mu junuc lum chtal tsalatuc yuʼun. Jaʼ ta stsal, jaʼ ta slajesbe scʼoplal scotol li yantic ajvaliletique; yan li stuque jʼechʼel te chcom o sbatel osil» (Daniel 2:44).

Li pas kʼop xchiʼuk li yikʼubtasel osil-balumile. Xi laj yal li jtsʼibajom yuʼun salmo ta sventa li kʼusi yaloj onoʼox tspas Diose: «Jaʼ tspajes scotol li pleito cʼalal to ta jujujot stiʼ banamile; jaʼ tscʼas li stʼilesubil flechaetique; jaʼ tslilin li lanzaetique; xchiʼuc chchicʼ ta cʼocʼ li caretaetic sventa pleitoe» (Salmo 46:9). Jech xtok, chal ti Diose «ta [s]tubbe scʼoplal ti jsoquesej-banomile» (Apocalipsis 11:18, Ch).

Li milbail xchiʼuk li kʼusitik muʼyuk tukʼe. Li ta Vivliae xi chal ta melel li kʼusi yaloj tspas Diose: «Li bochʼotic tucʼ yoʼntonique te chnaquiic o ta banamil; li bochʼotic lequique jʼechʼel te oyic o. Yan li bochʼotic chopolique ta xichʼic nutsel loqʼuel; li jtoybaetique ta xichʼic bulel loqʼuel» (Proverbios 2:21, 22).

2 ¿Bakʼin chtal li slajeb kʼusitike?

Melel onoʼox ti oy lek «bu ora ta xcʼot ta pasel» yuʼun Dios ti tslajes skotol li buchʼutik chopolike xchiʼuk ti jaʼ tspas mantal ta spʼejel Balumil li Ajvalilal yuʼune (Marcos 13:33). Pe muʼyuk buchʼu snaʼ bakʼin chkʼot ta pasel. «Li cʼusi ora chcʼot yoraile muʼyuc bochʼo snaʼ, me jaʼuc li jʼalmantaletic ta vinajele, me jaʼuc vuʼun li Nichʼonilune. Jaʼ noʼox snaʼ stuc li Totile», xi li Jesuse (Mateo 24:36). Akʼo mi jech, li Jesús xchiʼuk junantik yajtsʼaklomtake laj yalik kʼuyelan li kuxlejal ta Balumil kʼalal nopol xaʼox skʼan xtal li slajeb kʼusitik chlaj skʼoplale. Jaʼ yuʼun, kʼalal mi laj kiltik chkʼot xaʼox ta pasel jmoj skotol taje xchiʼuk ti ta spʼejel Balumile, jnaʼtik ti poʼot xaʼox tajek li slajebe. ¿Kʼusitik ti chkʼotanuk ta pasel taje?

Nikel, nojelal ta voʼ o yan kʼusitik, ti mu sta yav li ajvaliletike xchiʼuk li xkuxlejal krixchanoetik ti muʼyuk toʼox jech vinajeme. Jun velta li yajtsʼaklomtak Jesuse la sjakʼik kʼusi skʼelobil li slajeb kʼakʼale. Li Jesuse xi la stakʼe: «Ta to xlic scontrain sbaic cristianoetic ta jujun banamil. Ta to xlic scontrain sbaic ajvaliletic noxtoc. Ta xʼechʼ niqueletic ta buticuc noʼox banamilal. Ta to xtal tsots viʼnal. Leʼe jaʼ sliquebal xa xcʼuxul li cʼusi achʼ ta xvoqʼue» (Marcos 13:8). Li jtakbol Pabloe xi to laj yal yan kʼusitike: «Cʼalal poʼot xa slajebal cʼacʼale ta to xlic tsots vocol. Yuʼun li cristianoetique jaʼ noʼox tspasic cʼusi tscʼan stuquic. Ta xbat yoʼntonic yuʼun taqʼuin. Tstoy sbaic. Stuc noʼox xaʼay sbaic. Yan xichʼ xalic. Mu xchʼunbeic smantal stot smeʼic. Mu cʼusi snaʼ stojic ta vocol. Muʼyuc ta yoʼntonic yichʼel ta mucʼ Dios. Muʼyuc slequil yoʼntonic, muʼyuc xcʼuxul yoʼntonic, ta saʼbeic smul yantic, muʼyuc spajeb chaʼyic li cʼusi tscʼan yoʼntonique, solel mu xqʼuexovic o, simaronijemic o ta jyalel, jaʼ tscontrainic o li cʼusitic leque. Ta xʼacʼvanic ta cʼabal; sujoj noʼox sbaic o. Toj mucʼ chacʼ sbaic. Jaʼ batem ta yoʼntonic o li cʼusi tscʼan stuquique; mu jaʼuc tsaʼic li Diose» (2 Timoteo 3:1-5).

Jun kampanya ta xcholel mantal ta epal kʼopetik ta spʼejel Balumil. Li Jesuse xi laj yale: «Persa baʼyuc ta xichʼ cholel ta sbejel banamil li Lequil Aʼyej ta jventae; jaʼ to ta xtal li slajebal cʼacʼale» (Mateo 24:14).

3 ¿Kʼusi chkʼot ta pasel ta tsʼakal?

Li sKʼop Diose muʼyuk chal mi ta x-ikʼatik muyel ta vinajel skotol li lekil krixchanoetike xchiʼuk ti te chnakiik-o sbatel xchiʼuk li Diose. Moʼoj, li Diose la spas krixchanoetik sventa chnakiik sbatel osil liʼ ta Balumile, li Jesuse laj yal ti chkʼot ta pasel ta melel taje: «Xcuxet noʼox yoʼnton li bochʼo mucʼ noʼox yoʼntonique, yuʼun jaʼ ch-acʼbat sventainic [o xrextoinik] li banamil ti albil scʼoplale» (Mateo 5:5; 6:9, 10). ¿Kʼusi chkʼot ta pasel ta stojolal li buchʼutik chchamik kʼalal mu toʼox chvul slajeb li kʼusitik chlaj skʼoplale? Li Vivliae chal ti chchaʼkuxesatike (Job 14:14, 15; Juan 5:28, 29). ¿Kʼusi chkʼot ta pasel un?

Li Jesuse ch-ajvalilaj tal ta vinajel kʼuchaʼal ajvalil li ta Ajvalilal yuʼun Diose. Li j-alkʼop Daniele xi laj stsʼibae: «Calal te to jbatsʼil o vaychinele, laj quil oy Bochʼo chyal tal ta toc ta vinajel xcoʼlaj xchiʼuc cristiano yilel [Jesús ti chaʼkuxiem xaʼoxe]. Te ivul yoʼ bu oy li Bochʼo mu snaʼ xlaj yoraile [Jeova Dios]; te la snopajesic batel ta stojol. Laj yichʼ acʼbel tsots yabtel [li Jesuse]; laj yichʼ acʼbel svuʼel, xchiʼuc laj yichʼ acʼbel spas mantal. Li cristianoetic ta jujun lum, ta jujun banamil, ta jujuchop cʼope te chtunic ta stojol. Li yabtel iʼacʼbate mu xlaj scʼoplal o; li yabtel ta ajvalilale mu xuʼ chichʼ tuchʼbel o» (Daniel 7:13, 14; Lucas 1:31, 32; Juan 3:13-16).

Li krixchanoetike muʼyuk xa ch-ipajik, muʼyuk xa chiʼik xchiʼuk chkuxiik sbatel osil. Jech kʼuchaʼal laj yal li j-alkʼop Isaiase «chlic spas lec snaic, chlic naquiicuc stuquic; chlic stsʼunic lec stsʼusubic, ta sloʼbeic sat stuquic. Mu alticuc tspas lec snaic, mu yanuc bochʼo te chnaqui; mu alticuc tstsʼun lec stsʼusubic, mu yanuc bochʼo tsloʼbe sat» (Isaías 65:21-23). Li jtakbol Juane, xi la stsʼiba ta sventa li kʼakʼaletik taje: «Liʼi jaʼ xa snaic xchiʼuc cristianoetic li Diose. Te ta xchiʼin o ta naclej. Jaʼ xa steclumal chcʼot o, jech ec li stuquique jaʼ Dios yuʼunic o. Li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol ti jech toʼox oy ta baʼyuque» (Apocalipsis 21:3, 4).

4 ¿Kʼusi skʼan jpastik sventa kuxul xi jkome?

Li jtakbol Pedroe laj yal ti junantik buchʼutik chkuxiik ta slajebal kʼakʼale chlabanvanik ta skoj ti mu xchʼunik ti xuʼ tslajes Dios li kʼusitik chopol liʼ ta Balumile (2 Pedro 3:3, 4). Manchuk mi jech, xi laj yal mantal kʼusitik skʼan jpastik li buchʼutik chi jkuxiutik ta slajebal kʼakʼale:

Teuk ta joltik li kʼusitik kʼot ta pasel ta voʼnee. Jech kʼuchaʼal laj yal jtakbol Pedroe, «li Diose muʼyuc la spasbe perdón li cristianoetic ta voʼonee, jech laj yacʼ tal pulel ta voʼ ta stojol li chopol cristianoetique. Jaʼ noʼox icol li Noé xchiʼuc yan vucub xchiʼiltaque, yuʼun laj yal ta jamal cʼusi tucʼ ta pasel» (2 Pedro 2:5). Xi to laj yal ta sventa li buchʼutik chlabanvanike: «Leʼe scʼancʼun xaʼyic muc xacʼ ta yoʼntonic cʼu xʼelan imeltsaj ta voʼone li vinajel xchiʼuc banamile. Snaʼic ti ta jbel noʼox scʼop Dios ilocʼ tal ta voʼ li banamile xchiʼuc ti cacal ta voʼ icom li banamile. Jech noxtoc ta sventa pulel ta voʼ ichʼay li banamile. Jech noxtoc liʼ ta orae, li vinajel xchiʼuc banamilea chapanbil xa scʼoplal ta xcʼacʼ ta cʼocʼ ti cʼalal yorail chapanele, jaʼ ta scʼop noxtoc li Diose. Xchiʼuc jaʼ yorail chbatic ta chʼayel li chopol cristianoetique» (2 Pedro 3:5-7).

Akʼo jchʼunbetik li smantaltak Diose. Li Pedroe laj yalbe ti skʼan tukʼ spas sbaik xchiʼuk j-echʼel chichʼik-o ta mukʼ Dios li buchʼutik tskʼan chkolike (2 Pedro 3:11). Jech kʼuchaʼal chkiltike, sventa xi jkole maʼuk noʼox bal mi chkaltik ti oy xchʼunel koʼontontik o ti ta jkʼan xa ta jlekubtasbetik yoʼonton Dios kʼalal mi chlaj xaʼox li kʼusitik albil skʼoplal chlaje, moʼoj, chakʼ ta ilel ti skʼan tukʼ jpas jbatik xchiʼuk ti xkichʼtik-o ta mukʼ li Diose.

Vaʼun, ¿kʼusi smakoj ti tukʼ skʼan jpas jbatik xchiʼuk ti xkichʼtik-o ta mukʼ Dios kʼuchaʼal laj yal Pedroe? ¿Mi oy ta avoʼonton cha kʼan cha tabe stakʼobil ta aVivlia atuk? Li yajrextikotak Jeovae ta sjunul yoʼonton cha skoltaik. Jech taje, xuʼ muʼyuk xa cha xiʼ yuʼun li kʼusitik chkʼot ta pasel ta jelavele xchiʼuk xuʼ xa pat avoʼonton ti chlekub skotole.

[Tsʼib ta yok vun]

[Lokʼol ta pajina 7]

Li Diose muʼyuk tslajes li Balumile, moʼoj, jaʼ tslajes li buchʼutik yakalik sokesele