¿Mi jtunel kuʼuntik li beiltaseletik ta Vivliae?

JLOME CHALIK TI MUʼYUKE. Jun doktor laj yal ti kʼalal ta jtunestik li Vivlia sventa ta jsaʼtik beiltaseletike xkoʼolaj la kʼuchaʼal chichʼ tunesel jlikuk livro ti lokʼ ta sjabilal 1920 sventa xichʼ akʼel chanubtasel ta Química (xchanbel skʼoplal poxiletik o yan kʼusitik). Li buchʼu muʼyuk kʼusi xchʼunoje xuʼ van chalbot ti mu sta-o ti jaʼ xakʼelbe svunal jun mol komputadora sventa xachan stunesel li achʼ komputadorae. Taje jaʼ tskʼan chakʼik ta aʼiel ti muʼyuk xa sbalil li Vivlia ta skoj ti toj voʼne xa yichʼoj tsʼibaele.

Li avie toj ep xa kʼusitik achʼ lokʼemik talel, ¿mi oy van buchʼu tskʼan tstunes li beiltaseletik ti toj voʼneik xae? Mas to ti ep beiltaseletik tsmuyesik o chal yaʼyejik li ta Internete. Xchiʼuk oy programaetik ti bu chal yaʼyejik xchiʼuk chjakʼbat sloʼil xkuxlejalike, te chakʼik beiltaseletik xtok li psicólogos (buchʼutik chchanbeik stalelal krixchanoetik), jchanubtasvanejetik ta relijion Hindú xchiʼuk li jtsʼibajometike. Li buchʼutik tslokʼesik vunetike epal koltael ta xakʼik talel li ta livroetike, taje jaʼ te tsta-o stakʼinik li mukʼtikil empresaetike.

Ta skoj ti ep xa bu xuʼ jtatik aʼyejetik ta anil noʼoxe, ¿mi oy to van sbalil ti jsaʼtik koltael li ta Vivlia ti oy xa van ta chaʼmil jabil laj yichʼ tsʼibaele? Xchiʼuk li buchʼutik muʼyuk kʼusi xchʼunojike, ¿mi oy van srasonik ti chalik ti xkoʼolaj kʼuchaʼal jlik livro sventa Química o slivroal voʼneal komputadora li Vivliae? Ti melel xkaltike, mu lekuk ti jech chichʼ koʼoltasele. Li siensia xchiʼuk li kʼusitik achʼ chlokʼanuk talele toj anil ta xjel batel, pe ¿mi yakal chjel ti kʼu yelan li krixchanoetike? Muʼyuk, yuʼun jech-o tskʼanik ti xmuyubajikuk noʼoxe, ti muʼyukuk kʼusi tsvul-o yoʼontonike, ti jmojuk oy xchiʼuk li yutsʼ yalalike, ti oyuk slekil yamigoike xchiʼuk ti oyuk sbalil xaʼi li xkuxlejalike.

Akʼo mi toj voʼne xa tajek li Vivliae, jech-o chalbe skʼoplal li kʼusitik tskʼan krixchanoetike xchiʼuk yan kʼusitik. Jech noxtok, chal ti jaʼ laj yakʼ ta naʼel li Jpasvanej kuʼuntike. Yichʼoj tojobtaseletik ta sventa li jkuxlejaltike xchiʼuk chchapanutik ta sventa li kʼusitik tsotsik chtal ta tsʼakale (2 Timoteo 3:16, 17). Pe li kʼusi mas tsots skʼoplale jaʼ ti chal ti te oy-o sbatel osil li tojobtaseletik yuʼune, ti muʼyuk chlaj-o sbalile. Xi chal li Vivliae: «Kuxul li skʼop Diose» (Evreos 4:12).

¿Mi melel van li kʼusi laj xa kaltike? ¿Mi ta melel kuxul li Vivliae? O ¿mi muʼyuk xa sbalil li kʼusi chale o mi jaʼ mas jtunel kʼuchaʼal li yan livroetike? Li mantaletik ta revista liʼe jaʼ tskoltaot ta stakʼel li sjakʼobiltak taje.