Jvokʼ ti bu oy sjakʼobile

◼ ¿Kʼuxi xuʼ xichʼik koltael li buchʼutik jal xa yiktaoj sbaik ta mantal sventa xlik spas yuʼunik li kʼusitik chichʼ kʼanbel sventa xlik xcholik mantale?

Xijmuyubajutik kʼalal chkiltik ti chakʼ ta ilel ta melel ti oy ta yoʼonton chtun ta stojolal Jeova li buchʼu laj yikta sba ta mantale (Luc. 15:4-6). Xuʼ van jaʼ ta skoj li kontrainel laj yichʼe o ta skoj li vokoliletik la snuptan ti laj yikta xchanel Vivlia ta stuke, ti laj yikta li tsobajeletike xchiʼuk li cholmantale. ¿Kʼuxi van xuʼ jkoltatik lek sventa xchʼi li ta mantale?

Jkotoltik skʼan oy kʼusi xlik jpastik sventa xkakʼbetik yil ti jkʼanojtik kʼuchaʼal kermanotik li buchʼu yiktaoj sba ta mantale. Li moletik ta tsobobbaile ta anil noʼox tskʼelik kʼuxi xuʼ skoltaik ta mantal (Sant. 5:14, 15). Mi muʼyuk to jal yiktaoj sba ta mantale, xuʼ van jaʼ noʼox skʼan koltael yuʼun jun jcholmantal ti lek chanem yoʼ xlik xchol mantal yan veltae. Pe mi jal xa tajek namajem ta stojolal li tsobobbaile, xuʼ van skʼan mas koltael. Xuʼ jaʼ lek ti xichʼ akʼbel jun chanubtasel ta Vivlia ti jaʼ chichʼ tunesel jlikuk vun ti xuʼ xkoltaat sventa stsatsub li xchʼunel yoʼontone xchiʼuk ti oyuk sbalil chil li mantale. Mi jech taje, li jkʼelcholmantale jaʼ oy ta sba ti xalbe junuk jcholmantal ti lekuk chanem sventa xakʼbe chanubtasele (Heb. 5:12-14; kʼelo ti bu chal: «Sección de preguntas» ta Nuestro Ministerio del Reino yuʼun noviembre ta 1998). Mi xavojtikin buchʼu ti tskʼan koltaele, albo li jkʼelcholmantal ta tsobobbaile.

Kʼalal skʼan toʼox xichʼ albel ti xbat xchol mantal li buchʼu jal xa yiktaoj sba ta mantale, tsots skʼoplal ti skʼan stsob sbaik xchiʼuk chaʼvoʼ moletik ta tsobobbail sventa xilik mi spas yuʼun li kʼusitik chichʼ kʼanbel sventa xlik xchol mantale. Li tsobajel taje, jech tspasik kʼuchaʼal kʼalal tstsob sbaik xchiʼuk li buchʼutik tskʼan ch-ochik ta achʼ jcholmantaletike (kʼelo La Atalaya 15 yuʼun noviembre ta 1988, paj. 17). Li buchʼu yiktaoj sba ta mantale skʼan me xvinaj ti ta sjunul yoʼonton tskʼan chchol lekil aʼyeje. Jech xtok skʼan xichʼ kʼelel mi spas yuʼun li kʼusitik chichʼ kʼanel sventa xchol mantal jech kʼuchaʼal chal li ta stsʼakleb Kabteltik sventa Dios yuʼun disiembre ta 2006, ti bu chal: «Sventa chichʼ kʼejel», paj. 3 (li ta españole jaʼ ta livro Organizados pajina 79 kʼalal ta 81), xchiʼuk ti xbatilan xtok li ta tsobajeletike.

Sventa stsatsub li buchʼu yiktaoj toʼox li mantale xchiʼuk ti lekuk xil sbaik xchiʼuk li Jeovae xchiʼuk ti te oyuk-o li ta be ti ch-ikʼvan batel ta kuxlejal sbatel osile, skʼan lekuk xchanilan Svivlia xchiʼuk li yan vunetike (Mat. 7:14; Heb. 10:23-25). Mi «scotol avoʼntonic chavaqʼuic persa» xchiʼuk mi chatsʼitesik talelaletik ti jech chakʼik ta ilel li yajtsʼaklomtak Cristo ti jech-o tspasike, mi jech taje «oy atuic, jech chvinaj ta avabtelic» jech kʼuchaʼal li yajtsʼaklomtak Cristoe (2 Ped. 1:5-8).