«Jamo avoʼntonic»
1. ¿Kʼusi skʼan jpastik jkotoltik?
1 Ta skoj ti koʼol kermano jbatik li ta tsobobbaile, skʼan lek xkil jbatik jkotoltik (1 Ped. 1:22; 2:17). Sventa lek xkil jbatik xchiʼuk li yantike skʼan me jambetik koʼontontik (2 Cor. 6:12, 13, Ch). ¿Kʼu yuʼun tsots skʼoplal ti xkojtikintik lek li kermanotaktik xchiʼuk li kermanataktike?
2. ¿Kʼu yuʼun toj tsots skʼoplal ti lekuk xkil jbatik xchiʼuk li kermanotaktike?
2 Tstsatsub ti kʼu yelan xkil jbatike. Kʼalal mas chkojtikintik li kermanotaktike, mas me ep sbalil chkiltik li xchʼunel yoʼontonike, ti tukʼ yakʼoj sbaike xchiʼuk yan stalelalik ti kʼupilik sbae. Muʼyuk xa mas chkakʼtik ta venta li spaltailike xchiʼuk tstsatsub mas ti kʼu yelan xkil jbatike. Jech xtok, kʼalal mi laj kojtikin jbatik leke, mas xa me jnaʼtik kʼuxi ta jkolta jbatik xchiʼuk ta jtsatsubtasbe jba koʼontontik ta jujuntal (1 Tes. 5:11). Xuʼ jmoj jpatbe jba koʼontontik sventa stsal kuʼuntik li xchopol balumil Satanás ti chakʼ ep jvokoltike (Col. 4:11). Li avi ti slajebal xa kʼakʼale solel ep ta jtatik sujel, jaʼ yuʼun ta jtojtik ta vokol ti xuʼ jtatik kamigotaktik ti jaʼik yajtuneltak Jeovae (Prov. 18:24).
3. ¿Kʼuxi xuʼ jpatbetik yoʼonton li yantike?
3 Li lekil amigoiletike tskoltautik xchiʼuk tspatbutik koʼontontik kʼalal ta jnuptantik tsatsal prevaetike (Prov. 17:17). Jun ermana ti chakʼ persa stsalel ti muʼyuk sbalil chaʼi sbae, xi chvul ta sjole: «Oy kamigotak ti chalbeikun ti oy jlekil talelaltak ti jaʼ la skoltaun ta stsalel li kʼusitik chopol ta jnope». Kʼalal oy kamigotaktik jech kʼuchaʼal taje, jaʼ jun bendision yuʼun Jeova (Prov. 27:9).
4. ¿Kʼuxi xuʼ xkojtikin jbatik mas xchiʼuk li kermanotaktik ta tsobobbaile?
4 Oyuk ta koʼontontik li yantike. ¿Kʼuxi xuʼ jambe koʼontontik li kermanotaktike? Maʼukuk noʼox me ti ta jtsakbetik skʼobik li ta tsobajele, kakʼtik persa ti jchiʼintik lek ta loʼile. Oyuk ta koʼontontik skoltaelik, pe mu me jtikʼ jbatik li ta xkuxlejalike (Filip. 2:4; 1 Ped. 4:15). Yan kʼuxi xuʼ xkakʼtik ta ilel ti oyik ta koʼontontike jaʼ ti xkikʼtik ta veʼele (Luc. 14:12-14). Jech xtok, xuʼ jchap jloʼiltik sventa jmoj xijlokʼ ta cholmantal (Luc. 10:1). Kʼalal voʼotik baʼyel chkakʼtik persa yojtikinel lek li kermanotaktike, ta me xkakʼtik ayanuk jun oʼontonal li ta tsobobbaile (Col. 3:14).
5. ¿Kʼuxi xuʼ jta mas kamigotaktik li ta tsobobbaile?
5 ¿Mi jaʼ noʼox van chkamigointik li buchʼutik koʼol jabilaltik jchiʼuktike o ti koʼol li kʼusi ta jkʼan ta jkuxlejaltike? Muʼyuk me lek mi tʼujbil noʼox buchʼu ta xkamigointik li ta tsobobbaile. Li David xchiʼuk Jonatán, Rut xchiʼuk Noemie solel toj lek laj yil sbaik akʼo mi jelel sjabilalik xchiʼuk ti kʼu yelan chʼiemik tal ta sbikʼtalike (Rut 4:15; 1 Sam. 18:1). ¿Mi xuʼ xkojtikintik mas ermanoetik? Mi jech ta jpastike ta jtatik epal bendisionetik.
6. ¿Kʼusi sbalil ta jtatik mi la jambe koʼontontik li kermanotaktike?
6 Kʼalal ta jambe koʼontontik li yantike, ta me jtsatsubtas-o jbatik ta jujuntal xchiʼuk chkakʼtik ayanuk jun oʼontonal li ta tsobobbaile. Jech xtok, ta me xakʼbutik bendision Jeova mi chkakʼtik ta ilel ti jkʼanojtik li kermanotaktike (Sal. 41:1, 2; Heb. 6:10). ¿Kʼu yuʼun mu xkakʼtik persa yojtikinel mas ermanoetik ti bu kʼalal xuʼ kuʼuntike?