¿Kʼusi chal Vivlia ta sventa li amigoiletike?
Li kʼusi chal Vivliae
Li kamigotaktike tskoltautik sventa xijmuyubajutik xchiʼuk ti lekuk xbat li jkuxlejaltike. Li lekil amigoiletike tskoltautik ta spasel li k’usi leke xchiʼuk chlekub yuʼun jtalelaltik (Proverbios 27:17).
Li Vivliae chal ti tsots skʼoplal ti jtʼujtik lek li kamigotaktike xchiʼuk chalbutik ti chkil jvokoltik mi la jchiʼintik li chopol krixchanoetike (Proverbios 13:20; 1 Korintios 15:33). Jech xtok, muʼyuk lek k’usi chkʼot ta nopel kuʼuntik ta skojik xchiʼuk xuʼ sokes li jlekil talelaltike.
Li ta mantal liʼe ta jkʼeltik batel:
¿Buchʼutik chalbe skʼoplal Vivlia ti lek laj yamigoin sbaike?
Tekstoetik ta Vivlia ti chalbe skʼoplal ta sventa li amigoile
¿K’u yelan stalelal li lekil amigoile?
Maʼuk no’ox ti koʼol k’usi ta jkʼupintike o ti koʼol k’usi ta jkʼan ta jtatike, yuʼun xi chal li ta Salmo 119:63: «Jaʼ kamigotak skotol li buchʼutik chiʼtaikotea xchiʼuk skotol li buchʼutik chchʼunik li kʼusitik avaloje». Li jtsʼibajom yuʼun salmo li’e chal ti jaʼ no’ox tstʼuj ta yamigotak li buchʼu tskʼan lek ch˗ilatik yuʼun li Diose xchiʼuk ti chchʼunbeik li smantaltake.
Li Vivlia chal k’u yelan stalelal li jun lekil amigoile. Jkʼeltik echʼel jun chibuk:
«Li melel amigoile skotol ora chakʼ ta ilel ti chkʼanvane xchiʼuk jaʼ jchiʼiltik ta vokʼel chkʼot kʼalal oy jvokoltike» (Proverbios 17:17).
«Oy buchʼutik ti xchiʼil sbaike ta anil noʼox tsyayijes sbaik ta jujuntal, pe oy jun amigoil ti mas to kʼanvanem kʼuchaʼal junuk jchiʼiltik ta vokʼele» (Proverbios 18:24).
Li tekstoetike chak’ iluk ti jun lekil amigoile tukʼ yoʼonton, chkʼanvan, lek yoʼonton xchiʼuk lek xtʼolpʼij. Maʼuk noʼox, yuʼun tskoltautik k’alal chkil jvokoltike. Jech xtok, Jamal chalbutik mi chil ti oy k’usi chopol ta jpastike o ti oy k’usi ta jnop ta jpastik ti xuʼ xakʼ jvokoltike (Proverbios 27:6, 9).
¿Buchʼutik chalbe skʼoplal Vivlia ti lek laj yamigoin sbaike?
Li Vivliae chal ti oy buchʼutik lek laj yamigoin sbaik akʼo mi jelel bu likemik tal, jeltos stalel xkuxlejalik, sjabilalik o yabtelik. Jkʼeltik echʼel ti buchʼu lek laj yamigoin sbaike:
Rut xchiʼuk Noemi. Li Rute jaʼ alibal. Jaʼ yuʼun, jaʼ mas to tseb. Jech xtok, yan-o slumal. Akʼo mi jech, lek tajek laj yil sba xchiʼuk li Noemi ti jaʼ li smeʼ alibe xchiʼuk koʼol skʼanoj sbaik (Rut 1:16).
David xchiʼuk Jonatan. Yaʼeluke, li Jonatane 30 jabil mas bankilal kʼuchaʼal li Davide. Pe li Vivliae chal ti «batsʼi lik yamigoin sbaik» tajeke (1 Samuel 18:1).
Jesus xchiʼuk yajtakboltak. Li Jesuse tsots yabtel yichʼoj ta stojolal li yajtakboltake, yuʼun ‹Jchanubtasvanej› yuʼunik xchiʼuk jaʼ ‹Yajvalik› (Juan 13:13). Manchuk mi jech, yamigotak laj yil li yajtakboltake. Jech xtok, lek laj yil li buchʼutik la xchʼamik li chanubtasel laj yale. Xi laj yalanbee: «Kamigooxuk xa chkalboxuk, yuʼun laj xa kakʼ anaʼik skotol li kʼusitik kaʼioj tal ta stojolal li Jtote» (Juan 15:14, 15).
¿Mi xuʼ xkamigointik li Diose?
Xuʼ, li krixchanoetik kʼuchaʼal voʼotike xuʼ xkamigointik li Diose. Li Vivliae xi chale: «Li buchʼu tukʼe lek tajek xil sba xchiʼuk [li Diose]» (Proverbios 3:32). Jaʼ xkaltik, li Diose jaʼ tstʼuj ta yamigotak li buchʼutik lek stalelalike, ti melel xkʼopojike xchiʼuk ti chakʼ ta xkuxlejalik li mantaletik yuʼune. Li Vivliae chal ti tukʼ laj yakʼ sba li Abraane, jaʼ yuʼun kʼot ta yamigo Dios (2 Kronikas 20:7; Isaias 41:8; Santiago 2:23).
a Kʼalal chal ta salmo chiʼtaikot xie jaʼ skʼan xal ti jaʼ chichʼ xiʼtael li Diose.