XCHANOBIL 08
Xuʼ me xavamigoin li Jeovae
Li Jeovae tskʼan ti xavojtikin leke. ¿Kʼu yuʼun? Yuʼun snaʼoj ti chakʼan chakʼot ta yamigo mi la avojtikinbe li stalelaltake, ti kʼu yelan tstsak ta venta li krixchanoetike xchiʼuk li kʼusi snopoj tspas ta atojolale. Pe ¿mi xuʼ van xavamigoin ta melel li Jeovae? (Kʼelo Salmo 25:14). ¿Kʼusi van skʼan xapas sventa xakʼot ta yamigoe? Taje te chatabe stakʼobil ta Vivlia xchiʼuk te chalbot kʼu yuʼun ti stuk xa noʼox jech mi la avamigoin li Jeovae.
1. ¿Kʼusi oy ta yoʼonton Jeova ti akʼo xapase?
«Nopajanik ta stojolal Dios, jech chnopaj tal ta atojolalik ek» (Santiago 4:8). ¿Kʼusi skʼan xal taje? Jaʼ ti oy ta yoʼonton Jeova ti xavamigoine. Ta skoj ti mu xkiltik li Diose, junantike vokol chaʼiik xchʼunel ti xuʼ xkʼot ta yamigoike. Li ta Vivliae, te chalbutik li stalelaltak Jeovae, taje jaʼ tskoltautik sventa xijnopaj ta stojolal. Kʼalal mi la jchantik ta Vivlia li kʼusi tskʼan chalbutik li Jeovae, mas to me chijnopaj ta stojolal akʼo mi mu xkiltik.
2. ¿Kʼu yuʼun toj lek mi jaʼ la avamigoin li Jeovae?
Stuk xa noʼox jech skʼanojot li Jeovae, tskʼan ti xamuyubaje xchiʼuk ti xakʼanbe koltaele. Xuʼ xavakʼbe sbain skotol li kʼusi chavul-o avoʼontone, yuʼun oyot ta yoʼonton (1 Pedro 5:7). Li Jeovae te oy-o skotol ora sventa skoltaot, spat avoʼonton xchiʼuk ti xaʼi li kʼusi chavalbee (kʼelo Salmo 94:18, 19).
3. ¿Kʼusi skʼan jpastik sventa xijkʼot ta yamigo li Jeovae?
Skʼanoj skotol krixchanoetik li Jeovae, pe mas to lek tajek xil sba xchiʼuk li buchʼu tukʼe (Proverbios 3:32). Li Jeovae oy ta yoʼonton ti jaʼ akʼo spasik kʼusitik lekik li yamigotake xchiʼuk ti jaʼ spʼajik li kʼusitik chopol chile. Junantike tsnopik ti mu spas yuʼunik li kʼusi chkʼanbatik yuʼun li Jeovae. Pe xaʼibe smelolal ti kʼu yelan chkaʼi jbatike. Kʼalal chkakʼbetik ta ilel ti jkʼanojtike xchiʼuk ti chkakʼtik persa spasel li kʼusi lek chile, ta xamigoinutik (Salmo 147:11; Echos 10:34, 35).
JCHANTIK TO BATEL MAS
Jkʼeltik batel kʼuxi xuʼ xijkʼot ta yamigo li Jeovae xchiʼuk ti kʼu yuʼun stuk noʼox jech mi la avamigoine.
4. Li Abraane laj yamigoin li Jeovae
Li sloʼilal Abraane (ti Abran yan sbi xtoke) chakʼ kiltik kʼusi skʼan jpastik sventa xkamigointik li Diose. Kʼelik kʼusi chal ta stojolal Abraan li Jenesis 12:1-4 xchiʼuk albeik skʼoplal li sjakʼobiltak liʼe:
¿Kʼusi albat yuʼun Jeova li Abraane?
¿Kʼusi albat yuʼun Jeova ti ch-akʼbate?
¿Kʼusi la spas Abraan kʼalal albat xa ox yuʼun Jeova li kʼusi skʼan spase?
5. ¿Kʼusi tskʼan Jeova ti akʼo spas li yamigotake?
Jutuk mu skotoluk veltae oy kʼusi ta jkʼantik ti akʼo spas ta jtojolaltik li kamigotaktike.
Li voʼote, ¿kʼusi chakʼan akʼo spas ta atojolal li avamigotake?
Kʼelik 1 Juan 5:3 xchiʼuk albeik skʼoplal li sjakʼobil liʼe:
¿Kʼusi tskʼan ti akʼo spas yamigotak li Jeovae?
Sventa jchʼunbetik smantal li Jeovae, skʼan van jel jtalelaltik. Kʼelik Isaias 48:17, 18 xchiʼuk albeik skʼoplal li sjakʼobil liʼe:
¿Kʼu yuʼun tskʼan Jeova ti akʼo sjel stalelal li yamigotake?
Li jun lekil amigoile tsvules ta joltik li kʼusi skʼan jpastik sventa mu kʼusi chopol jnuptantike, jaʼ jech tspas li Jeova eke.
6. Li kʼusi tspas Jeova ta stojolal li yamigotake
Li Jeovae tskolta yamigotak sventa xkuch batel yuʼunik li vokoliletike. Kʼelik li VIDEOE xchiʼuk albeik skʼoplal li sjakʼobil liʼe:
Li ants ta videoe, ¿kʼuxi koltaat yuʼun Jeova sventa mu chopoluk kʼusi snop xchiʼuk ti mu chopoluk xaʼi sbae?
Kʼelik Isaias 41:10, 13 xchiʼuk albeik skʼoplal li sjakʼobiltak liʼe:
¿Kʼusi yaloj Jeova tspas ta stojolal li yamigotake?
¿Mi jaʼ van jun lekil amigoil xanaʼ li Jeovae? ¿Kʼu yuʼun ti jech chanope?
Li melel amigoiletike chkoltavanik kʼalal jaʼo chtun kuʼuntike, jaʼ me jech tspas ta atojolal li Jeova eke.
7. Skʼan jchiʼintik ta loʼil xchiʼuk jchikintatik li kʼusi chal Jeovae
Sventa masuk lek xkil jbatik xchiʼuk li kamigotaktike, skʼan jchiʼintik ta loʼil. Kʼelik Salmo 86:6, 11 xchiʼuk albeik skʼoplal li sjakʼobiltak liʼe:
¿Kʼuxi xuʼ jchiʼintik ta loʼil li Jeovae?
¿Kʼuxi chchiʼinutik ta loʼil li Jeovae?
Li voʼotike ta jkʼopontik ta orasion li Jeovae, pe li stuke tskʼoponutik ta Vivlia.
JUNANTIKE XI CHALIKE: «Mu xuʼ xkamigointik maʼ li Diose».
¿Kʼusi van tekstoal chakʼ avil ti xuʼ xkamigointik li Jeovae?
¿KʼUSI LA ACHAN?
Li Jeovae tskʼan ti xakʼot ta yamigoe xchiʼuk tskoltaot sventa xanopaj ta stojolal.
Svulesobil ta joltik
¿Kʼuxi tskolta yamigotak li Jeovae?
Li Jeovae, ¿kʼu yuʼun chalbe yamigotak ti sjel stalelalike?
¿Mi toj ep kʼusi tskʼan akʼo jpastik Jeova sventa xkamigointike? ¿Kʼu yuʼun ti jech chanope?
XUʼ TO XAKʼEL LIʼE
¿Kʼusi sbalil chatabe mi la avamigoin li Diose?
«Oy sbalil mi laj kojtikintik li Jeovae» (Li Jkʼel-osil ta toyole, xchanobil)
Kʼelavil kʼuxi xuʼ xavamigoin li Diose.
Kʼelavil kʼuxi jelbat-o xkuxlejal jun ants kʼalal laj yamigoin li Jeovae.
Chikintao avaʼi kʼusi tsnop kerem tsebetik ta stojolal li Jeovae.