Ti Diose cha yalbot ti xuʼ cha kʼot ta yamiko

Ti Diose tskʼan cha kʼot ta yamiko. ¿Mi anaʼoj xa ti xuʼ cha kʼot ta yamiko ti Persona ep ichʼbil ta mukʼ ta vinajel xchiʼuk Balumile? Ti Abrahane, buchʼu ikuxi ta voʼnee, la sbiin amiko yuʼun Dios (Santiago 2:23). Li Bibliae ta xal kaʼitik ta yantik viniketik xchiʼuk antsetik ti jaʼ toʼox yamikotak Dios xchiʼuk ep la yichʼik lekilal. Li kʼakʼal liʼe, ep krixchanoetik ta spʼejel Balumil jaʼik xa yamikoik ti Diose. Voʼote xuʼ cha kʼot ek ta yamiko ti Diose.

Li yamikoinel Diose jaʼ toj echʼem lek ti kʼuchaʼal yamikoinel krixchanoe. Diose mu skomtsan li yamikotak jun yoʼontonike (Salmo 18:25). Yamikoinel Diose jaʼ toj echʼem lek ti kʼuchaʼal kʼulejale. Kʼalal chcham li jkʼulejetike, yan krixchanoetik ta xichʼik komel li stakʼinike. Jech un, buchʼutik yamikoinojik Diose oy skʼulejalik ti muʼyuk buchʼu xuʼ xpojbatike (Mateo 6:19).

Oy van buchʼutik mu skʼan ti voʼot cha chan ta sventa ti Diose. Xuʼ van junantik avamikotak xchiʼuk avutsʼ avalaltak cha yalboxuk jech (Mateo 10:36, 37). Mi oy buchʼu tstseʼintaot xchiʼuk cha yalbot ti ta xakʼ avokole, jakʼbo aba: “¿Buchʼu ta jkʼan ta jlekubtasbe yoʼonton, jaʼ ti krixchanoetike mi jaʼ ti Diose?”. Nopo avaʼi taje: mi oy buchʼu jech cha yalbot muxa xa veʼ, ¿mi ta van xa pas? ¡Moʼoj! Sventa cha kuxie skʼan cha veʼ. Yuʼun jech, ¡ti Diose xuʼ chakʼbot akuxlej sbatel osil! Jaʼ yuʼun, chano batel kʼuxi xuʼ cha pas aba ta yamiko ti Diose xchiʼuk mu xa vikta aba ta pajtsanel (Juan 17:3).