Mi jaʼ xa ox kom ta skʼob skotol li Diose, li krixchanoetike tskʼupinik ti jun xa yoʼontonike xchiʼuk ti jmoj xa oyike.

¿Kʼu yuʼun chtun kuʼuntik li Ajvalilal yuʼun Diose?

Ta slikebal li stsʼunbal krixchanoetike kʼajomal toʼox stuk tspas mantal li Jpasvanej kuʼuntik ti Jeova sbie xchiʼuk ta slekil yoʼonton tspas mantal. Jaʼ yuʼun, toj kʼupil sba ti bu laj yakʼ nakluk li baʼyel jtot jmeʼtike, te laj yakʼ ta jun nichimaltik ti Eden sbie ti bu xuʼ sta lek sveʼelike xchiʼuk kʼupil sba li yabtel akʼbatike (Jenesis 1:28, 29; 2:8, 15). Ti lajuk kakʼtik ti jaʼuk spasutik-o ta mantal li Diose, jun noʼox koʼontontik avi ti jechuke.

[Lokʼol ta pajina 5]Li Adane te stsakoj li sat teʼ ti mu xuʼ slajesik ti ja laj yakʼ li Evae — Li baʼyel jtot jmeʼtike muʼyuk la skʼanik ti jaʼuk spasatik ta mantal yuʼun li Diose.

Li Vivliae chal ti oy jun jtoyba anjel ti jaʼ li Diablo Satanas ti la xchibal kʼopta ti kʼu yelan tspas mantal li Diose. Laj yakʼ ta aʼiel ti mas to la xmuyubajik mi muʼyuk tspasatik ta mantal yuʼun li Diose. Taje jaʼ jech la spasik li Adan xchiʼuk Eva kʼalal la spas ta jmoj sjolik xchiʼuk li Satanase xchiʼuk la stoy sbaik ta stojolal li Diose (Jenesis 3:1-6; Apokalipsis 12:9).

Kʼalal muʼyuk la xchʼunbeik li smantal Jeovae xchiʼuk kʼalal muʼyuk xa la stsakik ta mukʼ kʼuchaʼal Ajvalil yuʼunike, nutsatik lokʼel li ta nichimaltike, vaʼun lik ipajikuk xchiʼuk mu xa xuʼ xkuxiik sbatel osil (Jenesis 3:17-19). Li kʼusi la spasike laj to staik ta makiel li yalab xnichʼnabik ti laj yilik ta mas tsʼakale. Li Vivliae chal ti kʼalal la stoy sba li Adane, «och talel li mulil ta balumile, jech ta skoj mulil och talel ek li lajelale» (Romanos 5:12). Li mulil xtoke laj to yakʼ yan vokolil, yuʼun «ti kʼu sjalil spasoj sbaik ta mantal li krixchanoetike yakʼojbe sba svokol stukik» (Eklesiastes 8:9). Taje jamal chakʼ ta ilel ti chkil ep jvokoltik mi ta jpas jba ta mantal jtuktike.

LI KRIXCHANOETIKE LIK AJVALILAJIKUK

Li Nemrode xtoyet tajek chaʼi sba, li ta spate oy buchʼutik te oyik ti oy kʼusi yakal tsvaʼanike — Li Nemrode la stoy sba ta stojolal Jeova.

Li buchʼu baʼyel ajvalilaj chal Vivliae jaʼ li Nemrode, ti la skontrain ti kʼu yelan tspas mantal li Diose. Vaʼun jaʼ xa te lik talel ti solel ch-ilbajinvanik li buchʼutik yichʼoj yabtelike. Jaʼ yuʼun xi la stsʼiba li ajvalil Salomon leʼ xa ta oxmil jabile: «Laj kilbe yaʼlel satik li buchʼutik ilbajinbilike, muʼyuk buchʼu xpatbat yoʼontonik [...]. Yuʼun oy sjuʼelik li buchʼutik ch-ilbajinvanike» (Eklesiastes 4:1).

Li avie, jech yakal ta jnuptantik ek. Li Naciones Unidas laj yal ta 2009 ti mas xa ep buchʼutik tsnopik «ti jaʼ ta smul skotol jvokoltik» li chopol ajvaliletike.

STA XA YORAIL TSPAS MANTAL

Li krixchanoetike tskʼanik ti oyuk buchʼu xtojob lek ta ajvalile. Taje jaʼ li kʼusi yaloj tspas li Jpasvanej kuʼuntike.

Li lokʼoletike chakʼ ta ilel li kʼusitik chopol chkʼotanuk ta pasel ta skoj ti tspas sba ta mantal stukike: 1) jun ants te spetoj yol ta kaye ti yakal ch-okʼ li olole; 2) jun mol te tikʼil ta ospital; 3) soltaroetik ti yakalik ta paskʼope; 4) krixchanoetik ti kapem tajek sjolik tspasik marchae xchiʼuk stsakoj spankartaik; 5) kʼalal kʼot ta sna li jun ants xchiʼuk stsebe, vokʼem kʼot sta li snenal stiʼ snae; 6) jun jteklum ti noj ta kavle xchiʼuk fafrika ti yan sba chlokʼ chʼaile — Akʼo mi oy ajvaliletik ti lek tspasik mantale, muʼyuk chʼayem yuʼunik li svokol krixchanoetike.

Li Diose xchapanoj jun Ajvalil ti jaʼ chkʼot ta xkʼexol skotol li ajvaliletik liʼ ta balumile xchiʼuk «stuk xa noʼox te chkom sbatel osil» (Daniel 2:44). Taje jaʼ me li buchʼu tskʼanilanik ta padrenuestro li epal krixchanoetike (Mateo 6:9, 10). Pe maʼuk ch-och ta Ajvalil stuk li Diose, yuʼun jaʼ stʼujoj li buchʼu ay kuxiuk kʼuchaʼal jun krixchano liʼ ta balumile. ¿Buchʼu jaʼ taje?