¿Mi chavikta komel ta mas tsʼakal?
¿Kʼusi jaʼ skʼoplal taje? Jaʼ skʼoplal li snojesel Directriz anticipada y carta poder para atención médica (DACP) ti oy kuʼuntik li yajrextikoutik Jeova ti kichʼojtik xa voʼe. Ta skoj ti «mi jaʼuc [jnaʼtik] cʼusi ta xcʼot ta pasel ocʼom[e]», tsots skʼoplal skʼan xa nop kʼusi jtosuk poxilal xchiʼuk poxtaeletik cha chʼam kʼalal oy kʼusi tsots chkʼot ta pasel ta atojolale, xchiʼuk skʼan xa tsʼiba ta vun li kʼusi cha nope (Sant. 4:14, Ch; Hech. 15:28, 29). Sventa xa skoltaot ta snopel leke laj yichʼ pasel li video Asistencia médica sin transfusiones. Necesidades y derechos del paciente. Kʼelo baʼyel, ta tsʼakale paso junuk orasion, vaʼun tuneso li sjakʼobiltak tsakal tal ta olone sventa ta jaypʼeluk noʼox kʼop xaval li kʼusitik la achane. (Li totil-meʼiletike chichʼik albel ti skʼan me oyuk spʼijilik kʼalal ta skʼelik li pelikula xchiʼuk li yalab xnichʼnabik ti bu bikʼitik toe yuʼun chakʼ ta ilel uni jutuk kʼuyelan ta xichʼ pasbel operasion li krixchanoetike.)
1) Jlom doktoretike, ¿kʼu yuʼun ta xchaʼnopbeik skʼoplal stikʼbel chʼichʼ li krixchanoetike? 2) Albo skʼoplal oxtos operasion ti toj tsots ta pasel ti bu mu persauk chichʼ tunesel chʼichʼe. 3) ¿Jayvoʼ doktoretik xchiʼuk jatvanejetik mu skʼan stunesik chʼichʼ sventa chpoxtaik li buchʼu ipe? ¿Kʼu yuʼun ti jech oy ta yoʼontonik spasele? 4) Oy jayib ospitaletik la xchanbeik skʼoplal li stunesel chʼichʼe, vaʼun, ¿kʼusi laj yalik ta sventa taje? 5) ¿Kʼusitik xibal sba xuʼ chkʼot ta pasel kʼalal ta xichʼ ichʼel chʼichʼe? 6) Epal jpoxtavanejetik ti lek chanemike, ¿kʼusi la sbalil chalik chichʼ tael kʼalal chichʼ tunesel li jeltos poxtaeletik ti bu muʼyuk chichʼ tunesel chʼichʼe? 7) ¿Kʼuxi chlik li anemia chamele? Li jbekʼtaltike, ¿bu to kʼalal xkuch yuʼun li anemia chamele? ¿Kʼusi stakʼ pasel sventa ch-epaj li chʼichʼe? 8) ¿Kʼusi stakʼ pasel sventa xichʼ epajesel eritrocitos (glóbulos rojos) ta sbekʼtal li buchʼu ipe? 9) ¿Kʼusitik poxtaelal xuʼ xichʼ pasel sventa mu xmal batel ep xchʼichʼel jun krixchano kʼalal chichʼ operasione? 10) Li jeltos poxtaeletik ti bu muʼyuk chichʼ tunesel chʼichʼe, ¿mi stakʼ van tunesel ta jun olol o kʼalal toj echʼ xa noʼox tsots ip jun krixchanoe? 11) ¿Kʼusi mantal o chanubtasel toj tsots skʼoplal yichʼojik li doktoretik sventa lek tskʼelik li buchʼutik ipike? 12) Li yajtsʼaklomutik Cristoe, ¿kʼu yuʼun tsots skʼoplal ti kak xa noʼox xkaltik kʼusi jnopojtik ta sventa li poxtaeletik ti bu muʼyuk chichʼ tunesel chʼichʼe? ¿Kʼu yelan xuʼ jpastik?
Li poxtaeletik ivinaj ta pelikulae, jujuntal me ta jnoptik mi chkichʼtik o mi moʼoj, jech skʼan jnoptik ti kʼuyelan chanubtasbil ta Vivlia li jol koʼontontike. ¿Mi xtʼuj xa avuʼun kʼusi jtosukal poxil xchiʼuk poxtael cha kʼan chavichʼ voʼot xchiʼuk sventa li avalab anichʼnabe, xchiʼuk mi la nojes xa li vun taje? Chavichʼik albel ti akʼo xa kʼelik li livro «Scʼuxul yoʼnton ti Diose» xchiʼuk li yan vunetik bu chtakvan batele, yuʼun jaʼ te cha taik lek tsʼakal yaʼyejal ta sventa taje. Jech xtok kʼelo ta stsʼakleb Kabteltik sventa Dios yuʼun noviembre ta 2006 ti bu chal «¿Kʼu van yelan chkil li sbikʼtal chʼakbenaltak chʼichʼe xchiʼuk li poxtaeletik chakʼ doktoretik ti bu persa chichʼ tunesel jchʼichʼele?». Ta slajebal xae, kʼelo ti jech koʼol la lokʼta ta vun DACP li kʼusitik kʼot ta nopel avuʼune. Li buchʼu avaʼanoj sventa chkʼopoj ta atojolale xchiʼuk buchʼuuk noʼox ta avutsʼ avalal ti maʼuk yajrextiko Jeovae skʼan xavalbe li kʼusi chkʼot ta nopel avuʼune.
[Rekuadro ta pajina 3]
• ¿Mi tʼuj xa avuʼun kʼusi jtosukal poxil xchiʼuk poxtael cha kʼan chavichʼ voʼot xchiʼuk sventa li avalab anichʼnabe?
• Ta skoj ti mu jnaʼtik mi oy kʼusi tsots ta jnuptantike, ¿mi te noʼox xkuchet avuʼun li vun DACP ti nojesbile?