LI JKUXLEJALTIKE
Chapalukot noʼox mi oy kʼusi la anuptane
¿Kʼu yuʼun skʼan chapalutik noʼox? Yuʼun ta anil noʼox xuʼ tsots xij-ipaj o ti xkichʼtik tikʼel ta ospitale. Yoʼ to mu jech jnuptantike, skʼan xa noʼox jchapan jbatik xchiʼuk jkʼeltik li kʼusitik xuʼ skoltautik mi ta jkʼantik lek poxtaele. Jaʼ jech chkakʼtik ta ilel ti tsots skʼoplal chkiltik li jkuxlejaltike xchiʼuk ti ta jchʼuntik li kʼusi chal Jeova ta sventa li chʼichʼe (Ech 15:28, 29).
¿Kʼuxi xuʼ jchapan jbatik?
Kʼalal mi laj xa ox anopbe skʼoplal xchiʼuk la apas orasione, nojeso li atarjeta (DPA)a ti bu chal kʼu yelan chakʼan poxtaele. Li buchʼutik yichʼoj xa voʼe xuʼ skʼanbeik tarjeta li buchʼu sbainoj skʼanel vunetike, yan li totil meʼiletike xuʼ skʼanik li Tarjeta de identidad (ic) sventa li yalab xnichʼnabik ti skʼan to 18 sjabilalike.
Li buchʼu xchiʼuk yole xuʼ skʼanbe li moletik ta tsobobbail li vun Información para mujeres embarazadas (S-401) ti xuʼ xkoltaat sventa snaʼ kʼusi xuʼ spas o kʼusi poxil xuʼ xchʼam kʼalal xchiʼuk yole xchiʼuk kʼalal chvokʼ xa li yole.
Mi skʼan xavichʼ jtosuk poxil o ti chavichʼ tikʼel ta ospitale, skʼan baʼyuk xavalbe li moletik ta tsobobbaile xchiʼuk li doktoretik ti chakʼan chbat skʼelot junuk stestigo Jeovae.
¿Kʼuxi xuʼ xkoltavanik li moletik ta tsobobbaile? Xuʼ skoltaot ta snojesel li DPA, pe mu xuʼ xalboxuk li kʼusi tsnop stukike o kʼusi poxilal xuʼ o mu xuʼ xachʼam, yuʼun voʼot chanop atuk (Ro 14:12; Gal 6:5). Mi laj avalbe li moletik ta atsobobbail ti xuʼ van xalboxuk doktoretik ti persa skʼan xavichʼ chʼichʼ ta skoj li kʼusi yakal chanuptane, li moletike tskʼoponik batel ta anil li Komite ti Tsbeiltasvan batel ta Ospitaletike.
¿Kʼuxi chkoltavan li Komite ti Tsbeiltasvan batel ta Ospitaletike? Li ermanoetik ti chtunik li ta komite taje chichʼik lek chanubtasel sventa xalbeik doktoretik xchiʼuk li buchʼutik ch-abtejik ta stojolal ajvalil ti kʼu yuʼun muʼyuk ta xkichʼtik chʼichʼe. Li ermanoetik taje xuʼ xalbeik doktoretik li kʼusitik yan xuʼ spasik ti bu mu persauk tstunesik chʼichʼe. Jech xtok, xuʼ xkoltavanik ta saʼel doktoretik ti oy ta yoʼonton chkʼelvanike.
MI LA AKʼELIK LI VIDEO ¿KʼUXI XUʼ JNOP LEK TI KʼU YELAN TA JKʼAN TSTUNESIK LI JCHʼICHʼELE?, TAKʼIK LI SJAKʼOBIL LIʼE:
¿Kʼusitik xuʼ xapas sventa chapalukot kʼalal oy kʼusi chanuptan ta anil ti xuʼ xavichʼ-o tikʼbel chʼichʼe?
a Li ta xchanobil 39 li ta livro Kʼupino akuxlejal xuʼ skoltaot sventa lekuk kʼusi xkʼot ta nopel avuʼun ta sventa li chʼichʼe.