¿Mi xa naʼ kʼusitik yan xuʼ xa pas?

Mas xa ch-epaj jujun kʼakʼal li ospitaletik ta spʼejel Balumil ti muʼyuk tstunesik chʼichʼ kʼalal tspasik operasione. Li voʼote, ¿mi xa naʼ kʼusitik yan xuʼ xa pas sventa mu xavichʼ chʼichʼ kʼalal cha kʼan poxtaele? Skʼan xa naʼ sventa xa tojob stʼujel kʼuyelan cha kʼan chavichʼ pasbel li operasione xchiʼuk sventa xa naʼ stʼujel li poxtaeletik chakʼ doktoretike. Cha kalbotkutik ti xa kʼel baʼyel li pelikula La negativa a la sangre. La medicina acepta el reto. Vaʼun, paso orasion kʼalal cha kʼel kʼuyepal la achane, ta sventa taje tuneso li sjakʼobiltak ta olone. Pʼijan me: Li pelikulae chakʼ ta ilel jutuk kʼuyelan ta xichʼ operasion li krixchanoetike, jaʼ yuʼun totil-meʼiletik skʼan me oyuk apʼijilik kʼalal cha kʼel xchiʼuk avalab anichʼnabik ti bu bikʼitik toe.

1) ¿Kʼusi srasonal mas tsots skʼoplal oy yuʼunik li yajrextikotak Jeova ti mu skʼan xichʼik chʼichʼe? 2) Li yajrextikotak Jeovae, ¿kʼu yelan tskʼanik akʼo xpoxtaatik yuʼun li doktoretike? 3) ¿Kʼusi sderecho tsots skʼoplal oy yuʼun li jchamele? 4) Kʼalal ta jtʼujtik jtosuk poxtael ti bu mu jkʼantik tikʼbel chʼichʼe, ¿kʼu yuʼun oy srasonal ti jech ta jpastike xchiʼuk ti voʼotik oy ta jbatik snopele? 5) Kʼalal oy buchʼu ep tajek chmal batel xchʼichʼele, ¿kʼusi chaʼtos skʼan spasik ta anil li doktoretike? 6) ¿Kʼusi chantos tstsakik ta venta li doktoretik sventa mu stikʼbeik chʼichʼ jun jchamele? 7) Li doktoretike, ¿kʼusi xuʼ spasik sventa 1) mu epuk xmal batel chʼichʼ, 2) xichʼ chʼakel komel glóbulos rojos, 3) xichʼ epajesel chʼichʼ xchiʼuk 4) xichʼ tsobel li chʼichʼ chlokʼe? 8) Alo kʼusitik chichʼ pasel li ta poxtael 1) ti hemodilución sbie xchiʼuk 2) ti recuperación de sangre sbie. 9) ¿Kʼusitik skʼan xa jakʼ kʼalal cha yalboxuk ti xuʼ xavichʼ yan poxtael ti mu persauk xa stikʼboxuk chʼichʼe? 10) ¿Mi xuʼ van mu persauk xichʼ tikʼbel chʼichʼ jun krixchano manchuk mi tsots tajek li xchamele xchiʼuk ti vokol tajek ta pasel li operasione? 11) ¿Kʼusi xa lek yakal tspasik tana li doktoretike?

Ti kʼuyelan chanubtasbil ta Vivlia li sjol yoʼonton li jujun yajtsʼaklom Cristoe, jaʼ me ta snop stuk mi chchʼam o mi moʼoj li poxtaeletik jech kʼuchaʼal chvinaj ta pelikulae. ¿Mi laj xa anop bu junukal poxil xchiʼuk poxtael cha kʼan chavichʼ ti bu muʼyuk chichʼ tunesel chʼichʼe? xchiʼuk ¿mi laj xa atʼuj ek sventa li avalab anichʼnab ti bikʼitik toe? ¿Mi la atsʼiba xa ta vun DPA (directriz médica) li kʼusi la anope? Kʼalal skʼan to xa tsʼibae, kʼelo baʼyel li mantal ti lek tsʼakal xchiʼuk bikʼitik chalbe smelolal ta «Preguntas de los lectores» ta La Atalaya 15 yuʼun junio ta 2004 xchiʼuk ta 15 yuʼun oktuvre ta 2000. Ta tsʼakale, sventa xa naʼ kʼusi cha chʼam o kʼusi moʼoje, chano li sjakʼobiltak ilokʼ ta stsʼakleb Kabteltik sventa Dios yuʼun noviembre ta 2006 ti bu chal «¿Kʼu van yelan chkil li sbikʼtal chʼakbenaltak chʼichʼe xchiʼuk li poxtaeletik chakʼ doktoretik ti bu persa chichʼ tunesel jchʼichʼele?». Kʼalal mi kʼot xaʼox lek ta nopel avuʼune, tsʼibao li ta vun DPA. Li buchʼu chkʼopoj ta atojolal xchiʼuk li avutsʼ avalal ti maʼuk yajrextiko Jeovae skʼan me xavalbe li kʼusitik kʼotem avuʼun ta nopele.