Li kʼusi mas tsots skʼoplal skʼan xkaʼitike
1. ¿Kʼuxi laj yakʼ ta ilel Jesús ti mas tsots skʼoplal laj yaʼi li chol mantale?
1 Li Jesuse stuk xa noʼox mas tsots skʼoplal laj yaʼi li chol mantale. Laj yakʼ persa spasel, nom xanav ta sjunul Palestina sventa ep buchʼutik xuʼ xcholbe mantal. Jech xtok, sventa mas xokobe maʼuk bat ta yoʼonton saʼel ep kʼusitik ta xkuxlejal (Mat. 8:20). Kʼalal tskʼanik ox ti xpaj to Jesús sventa xpoxtabat yajchamelik li krixchanoetike, xi laj yale: «Ta persa chibat ta yantic lumetic, yuʼun chbat jcholbe yaʼyic li Lequil Aʼyej ta sventa ventainel yuʼun Diose. Yuʼun jaʼ ta sventa ti tacbilun tale» (Luc. 4:43).
2. ¿Kʼu yuʼun toj tsots skʼoplal laj yaʼi chol mantal li Jesuse?
2 ¿Kʼu yuʼun toj tsots skʼoplal laj yaʼi chol mantal li Jesuse? Baʼyel, yuʼun oy ta yoʼonton ti xichʼ chʼultajesbel sbi li Diose (Mat. 6:9). Jech xtok, yuʼun skʼanoj li sTot ta vinajele, ta skoj taje la spasbe li kʼusi oy ta yoʼontone xchiʼuk la xchʼunbe skotol li smantaltake (Juan 14:31). Maʼuk noʼox taje, yuʼun skʼanoj tajek li krixchanoetike xchiʼuk oy ta yoʼonton ta skoltaan (Mat. 9:36, 37).
3. ¿Kʼuxi chkakʼtik ta ilel ti jaʼ batem ta koʼontontik li chol mantale?
3 Jchanbetik li Jesuse. Xuʼ van mu kʼunuk chkaʼitik mi jech ta jkʼan ta jpastik kʼuchaʼal li Jesús eke, yuʼun xuʼ te chbat jkʼakʼaltik li ta kʼusitik sventa balumile xchiʼuk xuʼ xchʼay-o koʼontontik li kʼusitik chakʼe (Mat. 24:37-39; Luc. 21:34). Jaʼ yuʼun, skʼan jkʼeltik li kʼusi mas tsots skʼoplal chkaʼitik ta jkuxlejaltike, skʼan jchʼakbetik yorail sventa jchapan jbatik xchiʼuk xi jlokʼilan ta chol mantal (Fili. 1:10). Skʼan lekuk noʼox sba li jkuxlejaltike xchiʼuk akʼo mu smosoinutik li kʼusitik sventa balumile (1 Cor. 7:31).
4. ¿Kʼu yuʼun skʼan mas tsots skʼoplal xkiltik chol mantal avie?
4 Kʼalal muʼyuk xa lek yorail kʼusitik tskʼan tspas li jun krixchanoe, li buchʼu pʼije jaʼ tspas li kʼusi mas tsots skʼoplale. Jech kʼuchaʼal liʼe, mi laj yaʼi ti chtal junuk xibal sba chaukil voʼe ta suj sba xchiʼuk chakʼ skotol yip sventa mu kʼusi snup li yutsʼ yalale xchiʼuk chalbe li slakʼnatake. Li kʼusitik muʼyuk mas tsots skʼoplale jaʼ smala to, ¿mi mu jechuk? Veno, poʼot xa tajek skʼan xtal li Armagedone (Sof. 1:14-16; 1 Cor. 7:29). Jaʼ yuʼun, mi ta jkʼan chi jkol li voʼotike xchiʼuk li buchʼutik chaʼibutike skʼan jkʼel jba jtuktik xchiʼuk ti kʼuyelan chi jchanubtasvan ta tsobobbail o li ta chol mantale (1 Tim. 4:16). Jech, ¡skʼan tsots skʼoplal xkaʼitik chol mantal sventa xi jkol!