Lajcheb srasonal sventa jcholtik mantal

¿Kʼu yuʼun ta jcholtik mantal ta naetik xchiʼuk chijchanubtasvan ta Vivlia? ¿Mi jaʼ noʼox van sventa tsta skolebal li krixchanoetik ti lek yoʼontonike? (Mat. 7:14.) Akʼo mi jaʼ baʼyel chal li ta listae, maʼuk skʼan xal ti jaʼ noʼox tsots skʼoplale. ¿Bu junukal srasonal mas tsots skʼoplal xanaʼ sventa jcholtik mantal li ta slajchebal liʼe?

1. Jaʼ jun abtelal ti chakʼ kuxlejale (Juan 17:3).

2. Jaʼ sventa ta jpʼijubtastik li buchʼutik chopolike (Eze. 3:18, 19).

3. Chkʼot ta pasel yuʼun li albilkʼop ta Vivliae (Mat. 24:14).

4. Jaʼ skʼelobil ti oy stukʼilal li Diose. Muʼyuk buchʼu stakʼ xal ti muʼyuk x-akʼbat yorail sventa sutes yoʼontonik kʼalal mi la slajes Jeova li buchʼutik mu xchʼunik mantale (Hech. 17:30, 31; 1 Tim. 2:3, 4).

5. Kʼalal ta jcholtik mantale jaʼo ta jkoltatik ta mantal li krixchanoetik ti manbilik ta xchʼichʼel Cristoe, yuʼun jaʼ oy ta jbatik spasel (Rom. 1:14, 15).

6. Maʼuk xa ta jmultik chkom mi laj li chopol krixchanoetike (Hech. 20:26, 27).

7. Jaʼ jtos kʼusi skʼan jpastik sventa jta jkolebaltik (Eze. 3:19; Rom. 10:9, 10).

8. Jech xuʼ xkakʼtik ta ilel ti jkʼanojtik li jchiʼiltaktike (Mat. 22:39).

9. Jech chkakʼtik ta ilel ti jchʼunej mantalutik ta stojolal Jeova xchiʼuk Xnichʼone (Mat. 28:19, 20).

10. Jaʼ sventa yichʼel ta mukʼ Dios (Heb. 13:15).

11. Jech chkakʼtik ta ilel ti jkʼanojtik li Diose (1 Juan 5:3).

12. Chchʼultajesbe li sbi Jeovae (Isa. 43: 10-12; Mat. 6:9).

Pe taje maʼuk noʼox me srasonaltak ti ta jcholtik mantale. Yuʼun tstsatsubtas xchʼunel koʼontontik xchiʼuk xuʼ jech jkolta jbatik li ta spasel yabtel Diose (1 Cor. 3:9). Pe li srasonal mas tsots skʼoplal sventa ta jcholtik mantale jaʼ li slajchebale. Yuʼun kʼalal ta jcholtik mantale chchʼultajesbe li sbi Diose, manchuk mi lek o mi muʼyuk lek chtakʼav li krixchanoetike. Jech xtok, jaʼ tspak-o skʼoplal Jeova sventa tstakʼbe li buchʼu chchopol kʼoptavane (Pro. 27:11). Jaʼ yuʼun, oy srasonaltak kuʼuntik sventa «muc [jkomtsantik] xcholbel scʼoplal» li lekil aʼyeje xchiʼuk sventa «scotol cʼacʼal [xijchanubtasvan]» (Hech. 5:42).