Kʼusuk noʼox ora xa tunes

1. ¿Kʼusi chtun-o kuʼuntik li tratado Li kʼusi melele?

¹ Li tratado ¿Mi cha kʼan cha naʼ li kʼusi melele? yichʼoj pasel sventa chi skoltautik slikesel chanubtaseletik ta Vivlia, pe jech noxtok chtun kuʼuntik sventa jpuktik batel li mantale (Ecl. 11:6). Jech oxal, kalbetik batel smelolal kʼuxitik ta tunesel li abtejebal ti jtunele.

2. ¿Kʼuxi xuʼ jtunestik li tratado sventa jlikes jloʼiltike?

² Sventa jlikes jloʼiltik. Akʼbo tratado li yajval nae, akʼbo yil li sjakʼobiltak ta baʼyel pajinae, xchiʼuk xi xa jakʼbee: «¿Bu junukal sjakʼobil oy jech ajakʼojbe aba li voʼote?». Mi la avaʼi xaʼox li kʼusi la stakʼe, vaʼun tuneso li tratado sventa xavakʼbe yil stakʼobil ta Vivlia li sjakʼobil la stʼuje xchiʼuk kʼelbo junuk teksto ti te tsakal tale. Vaʼun, kʼelbo o albo jutuk skʼoplal kʼusi chal li slajeb pajinae xchiʼuk akʼbo li livro Chchanubtasvane. Manchuk mi muʼyuk bu xchʼam li livroe, ta skoj ti la xchʼam li tratadoe xuʼ xakʼ yibel ta yoʼonton li mantale (Mat. 13:23).

3. ¿Kʼusi xuʼ jpastik mi muʼyuk xokol li yajval nae?

³ Kʼalal muʼyuk xokol li yajval nae. Xuʼ xi xa valbee: «Ta skoj ti muʼyuk xokolot chkile jaʼ noʼox chkiktabot komel li tratado liʼe. Yichʼoj talel vakib sjakʼobiltak ti jutuk mu jkotoltikuk jakʼojbe jbatike xchiʼuk chakʼ ta ilel kʼusi chal Vivlia ta sventa li jujun sjakʼobile. Ta yan velta mi li sut tale te xavalbun kʼuyelan la avil kʼusi chal li vun liʼe».

4. ¿Kʼusi xuʼ xkaltik kʼalal ta jcholtik mantal ta kayeetike?

⁴ Kʼalal ta jcholtik mantal ta kayeetike. Xuʼ van xi xkaltike: «¿Bu cha bat? ¿Mi oy xa jakʼbe aba jech kʼuchaʼal chal li vun liʼe? [Akʼo stakʼ.] Li tratado liʼe chalbe stakʼobiltak ti lokʼemik ta Vivliae, jamalik lek smelolal chal xchiʼuk ti jun koʼontontik chi jkom yuʼune». Mi muʼyuk sujom chkiltik li krixchanoe, xuʼ van jkʼeltik junuk li stakʼobil chal ta tratadoe xchiʼuk xuʼ xkakʼbetik li livro Chchanubtasvane.

5. ¿Kʼuxi van xuʼ jtunestik bakʼintik li tratado mi chʼabal te li yajval nae?

⁵ Kʼalal chʼabal te li yajval nae. Ta junantik yosilal chol mantale, li jcholmantaletike nopem xaʼiik chchʼikik o tstikʼik komel junuk vun kʼalal chʼabal te oy li yajval nae. Mi jaʼ jech nopem xavaʼiik li ta atsobobbaile, ¿kʼu yuʼun mu xavikta komel bakʼintik li tratado Li kʼusi melele? Mi sut akʼele, xuʼ xi xavale: «Ta skoj ti muʼyuk liʼ la jtaotkutik li jun velta li echʼkutike, laj kiktakutik ta stiʼ ana li tratado liʼe. ¿Mi oy van ta avoʼonton cha kʼan cha nabe stakʼobil junuk li sjakʼobiltak liʼe?».

6. ¿Kʼu yuʼun jaʼ jun lekil abtejebal xuʼ jtunestik ta chol mantal li tratado Li kʼusi melele?

⁶ Li ta tratado Li kʼusi melele jamal lek xchiʼuk kʼun noʼox ta aʼyel chal li aʼyejetik ta Vivliae. Tstijbe yoʼonton skotol krixchanoetik, kʼusuk noʼox srelijionik o stalelal xkuxlejalik. Jech noxtok, kʼun noʼox ta akʼel: yuʼun x-akʼ yuʼunik ek li achʼ jcholmantaletike xchiʼuk li chex kerem-tsebetike. ¿Mi yakalot stunesel ta buyuk noʼox?