Sventa jtojtik ta vokol li kʼusi la spas Jeovae ¿Kʼusi xuʼ jpastik ta 17 yuʼun avril?
1. ¿Kʼu yelan laj yaʼi sba li jtsʼibajom yuʼun salmo ti xuʼ jech chkaʼi jbatik ek kʼalal jaʼo yorail li sNaʼobil slajel Cristoe?
1 Ta skoj li slekil yoʼonton Jeova xchiʼuk ti kʼuyelan pojvaneme, xi la sjakʼ li jtsʼibajom yuʼun salmoe: «¿Cʼuxi xuʼ ta jtojbe Mucʼul Dios ta sventa scotol li cʼusi lec la spasbune?» (Sal. 116:12). Li yajtunelutik Dios avie oy to mas srasonal kuʼuntik ti jtojbetik ta vokole. Kʼalal echʼ xaʼox jayibuk siglo laj yichʼ tsʼibael li kʼusi laj yal li jtsʼibajom yuʼun salmoe, li Jeovae laj yakʼ jun matanal ti stuk xa noʼox jech sventa li krixchanoetike: jaʼ ti laj yakʼ ta matanal li xNichʼone. Jaʼ yuʼun oy lek srasonal sventa jtojtik ta vokol. ¿Kʼuxi? Jaʼo kʼalal ta jchapan jbatik sventa chi jbat li ta sNaʼobil slajel Cristo ta 17 yuʼun avrile (Col. 3:15).
2. ¿Kʼusitik srasonal oy kuʼuntik sventa jtojtik ta vokol li pojelale?
2 Sbaliltak li pojelale. Ta skoj li pojelale xuʼ «jtatic perdón yuʼun [li] jmultique» (Col. 1:13, 14). Xuʼ sak jol koʼontontik chkichʼtik ta mukʼ li Jeovae (Heb. 9:13, 14). Ta sjunul koʼontontik xuʼ jkʼopontik Dios sventa xi jnopajutik ta stojolal (Heb. 4:14-16). Li buchʼutik chakʼ xchʼunel yoʼontonik li ta pojelale, xuʼ chkuxiik sbatel osil (Juan 3:16).
3. ¿Kʼuxi xuʼ xkakʼtik ta ilel ti ep sbalil chkiltik li pojelale?
3 Kakʼtik ta ilel ti ep sbalil chkiltike. Jtos ti kʼuyelan chkakʼtik ta ilel ti ep sbalil chkiltik li pojelale, jaʼ mi ta jkʼeltik xchiʼuk ta jnopbetik skʼoplal jujun kʼakʼal li loʼil ta Vivlia ti chal sventa li slajel Cristoe. Li mantal chlokʼ ta revista Li Jkʼel osil ta toyole sventa avril-junio ti jaʼ sbi «¿Mi chapalot xa sventa li jun kʼakʼal ti toj tsots skʼoplal li jabil liʼe?» jaʼ tskoltautik sventa spas kuʼuntik taje. Jech xtok xuʼ xkalbetik Jeova ta jun orasion ti kʼu to yepal ta jtojbetik ta vokol li pojelale (1 Tes. 5:17, 18). Mi chi jbat li ta sNaʼobil slajel Cristoe jaʼ jech chkakʼtik ta ilel ti ep sbalil chkiltike, yuʼun jaʼ mantal laj yakʼ Jesús ti jech ta jtsob jbatike (1 Cor. 11:24, 25). Ti kʼu to yepal skʼanoj skotol krixchanoetik li Jeovae xuʼ jchanbetik, taje jaʼo kʼalal ta jtaktik ta ikʼel ti bu kʼalal xuʼ kuʼuntik li krixchanoetik sventa xchiʼinutik li ta tsobajele (Isa. 55:1-3).
4. ¿Kʼusi skʼan oyuk ta koʼontontik jech kʼuchaʼal li jtsʼibajom yuʼun salmoe?
4 Li yajtunelutik Jeovae skʼan mu jnoptik ti xkoʼolaj kʼuchaʼal yan tsobajeletik li sNaʼobil slajel Cristoe. ¡Liʼe stuk noʼox jech tsots skʼoplal ch-echʼ jujun jabil! Ta skoj ti poʼot xa xkʼot skʼakʼalil taje, xuʼ jechuk koʼontontik kʼuchaʼal li jtsʼibajom yuʼun salmo ti xi la stsʼibae: «Ta scotol jol coʼnton chcalilanbe o [Jeova] li slequilale; mu xchʼay o ta coʼnton li cʼusitic lec spasojbune» (Sal. 103:2).