Kʼuxi xuʼ jtojbetik ta vokol li mukʼta matanal laj yakʼ Diose
1. ¿Kʼusi ti stuk noʼox jech matanal laj yakʼ Jeova ti skʼan jtojbetik ta vokole?
1 Li ta skotol kʼusitik lek yakʼojbutik Jeova ti mas ep tajek sbalile, jaʼ ti la spojutik ta skoj slajel xNichʼone (San. 1:17). Ta skoj taje ep bendisionetik xuʼ jtatik, jech kʼuchaʼal li perton ta sventa jmultike (Efe. 1:7). ¿Mi mu jechuk ti ep ta jtojtik ta vokole? Jech oxal, li ta yorail sNaʼobil slajel Cristoe jaʼo lek skʼakʼalil jnopbetik skʼoplal li stuk noʼox jech matanal kichʼtik akʼbele.
2. ¿Kʼusi xuʼ jpastik xchiʼuk kutsʼ kalaltik sventa mas jkʼuxubintik li pojelale?
2 Kʼuxi xuʼ jkʼuxubintik mas li pojelal laj yakʼ Diose. Li sNaʼobil slajel Cristo li jabil liʼe chkʼot ta pasel ta 30 yuʼun marso. Sventa mas jkʼuxubintik li matanal laj yakʼ Diose, xuʼ jchʼakbetik yorail sventa jchanbetik mas skʼoplal li pojelal li ta Akʼobal sventa Yichʼel ta Mukʼ Jeova ta Kutsʼ Kalaltike. Jech xtok xuʼ jkʼeltik jujun kʼakʼal li loʼil ta Vivlia chal ta sventa li slajel Cristoe. Ta jujun tal skʼan jnopbetik skʼoplal kʼuyelan jtaojbetik sbalil xchiʼuk kʼuyelan skoltaojutik sventa lek chilutik li Jeovae, sventa lek chavil aba atuk xchiʼuk lek xavil li yantike, xchiʼuk ta sventa li kuxlejal ta jelavele. Jech xtok, ¿kʼu yuʼun mu jchantik skʼejintael li chib achʼ kʼejoj chichʼ tunesel sventa sNaʼobil slajel Cristoe, ti jaʼik li numero 8 xchiʼuk 5? (Sal. 77:12.)
3. ¿Kʼuxi xuʼ xkakʼtik ta ilel ti ta jtojtik ta vokol li pojelale?
3 Kʼuyelan chkakʼtik ta ilel ta ketik ti ta jtojtik ta vokol li pojelale. Ta skoj ti ta jkʼuxubintik tajek li pojelale tstij koʼontontik sventa chkalbetik yantik ta sventa li Jeovae xchiʼuk ti la stak talel xNichʼone, ti jaʼ senyail ti skʼanojutike (Sal. 145:2-7). Jech oxal, oy jlom utsʼ-alaliletike tskʼelik kʼusitik xuʼ spasik sventa chtun ta prekursor auksiliar junukal yuʼunik li ta marso, avril xchiʼuk mayoe. Mi mu spas avuʼunik kʼuchaʼal taje, ¿mi xuʼ van xa «tunesic lec li [akʼakʼalik]» sventa mas xavepajes li chol mantal cha pasike? (Efe. 5:16). Ta skoj ti ta jkʼan ta jtojtik ta vokole, ta jsabetik smelolal sventa ta jkoltatik yan krixchanoetik sventa xuʼ xbatik li ta sNaʼobil slajel Cristoe (Apo. 22:17). Kak xa noʼox tsʼibao ta vun buchʼutik anopoj cha kʼan chavikʼ batel; xuʼ van jaʼ li buchʼutik cha chaʼvulaʼane, li avajchanuntake, avutsʼ avalaltak, achiʼiltak ta abtel xchiʼuk alakʼnatak. Jech xtok un, kʼalal jaʼo yorail tʼujbil sventa chichʼ pukel li uni vun sventa sNaʼobil slajel Cristoe puko bu kʼalal xuʼ avuʼune.
4. ¿Kʼusi ta jpastik sventa lek jtunes jkʼakʼaltik li ta yorail sNaʼobil slajel Cristoe?
4 Li ta yorail sNaʼobil slajel Cristoe ep kʼusitik achʼ xuʼ jpastik sventa xkakʼbetik yil Jeova kʼu to yepal ta jtojbetik ta vokol li matanal laj yakʼbe krixchanoetike. Lek jtunes jkʼakʼaltik sventa mas xchʼi xchiʼuk mas xkakʼtik iluk ti ta jkʼuxubintik li pojelale xchiʼuk li «mu noʼox albajuc yutsilal [...] scʼulejal» li Cristoe (Efe. 3:8, Ch).