Li ta Snaʼobil slajel Cristoe xuʼ xkakʼtik ta ilel taje

1. Li ta Snaʼobil slajel Cristoe, ¿kʼusi xuʼ xkakʼtik ta ilel ti toj tsots skʼoplale?

¹ Li ta Snaʼobil slajel Cristo ta 14 yuʼun avrile jaʼo yorail xuʼ jtsʼitestik xchiʼuk xkakʼtik ta ilel ti ta jtojtik ta vokol li slekil yoʼonton Jeovae. Li ta Lucas 17:11-18 te chakʼ ta ilel li kʼusi tsnopik Jeova xchiʼuk Jesús ta sventa li talelal taje. ¡Kʼux ta alel ti jaʼ noʼox jun la stoj ta vokol li ta slajunebal viniketik ti tsakbilik toʼox ta kʼaʼemal chamele! Koliyal ti laj yakʼ pojelal li Diose, li ta jelavele chlaj skotol li choplejale xchiʼuk ta jtatik kuxlejal sbatel osil. Vaʼun, skotol me kʼakʼal ta jtojbetik ta vokol Jeova ta sventa li bendisionetik taje. Pe, ¿kʼuxi xuʼ xkakʼtik ta ilel ti ta jtojtik ta vokol li pojelal li ta xemanaetik chtale?

2. ¿Kʼuxi xuʼ mas ep sbalil xkiltik li pojelale?

² Jtsʼitestik ta koʼontontik li stojel ta vokole. Ta koʼontontik ch-ayan lokʼel tal kʼalal ta jtojtik ta vokole. Yoʼ mas ep sbalil xkiltik li pojelale, chapanbil programaetik sventa skʼelel Vivlia li ta yorail Snaʼobil slajel Cristoe, xuʼ te jtatik ta kalendario xchiʼuk li ta foyeto Jkʼeltik skotol kʼakʼal li Skʼop Diose. ¿Kʼu yuʼun mu jmojuk xakʼelik xchiʼuk avutsʼ avalal? Mi jech ta jpastike mas me ch-epaj sbalil chkiltik li pojelale. Vaʼun, ta jtabetik sbalil ta jkuxlejaltik (2 Cor. 5:14, 15; 1 Juan 4:11).

3. Li ta yorail Snaʼobil slajel Cristoe, ¿kʼutik yelan xuʼ xkakʼtik ta ilel ti ta jtojtik ta vokol li pojelale?

³ Kakʼtik ta ilel ti ta jtojtik ta vokole. Li kʼusitik ta jpastike jaʼ te chvinaj mi ta jtojtik ta vokole (Col. 3:15). Li vinik ti tsakbil toʼox ta kʼaʼemal chamele la saʼ Jesús sventa tstojbe ta vokol ti poxtaate. Ta melel ta sjunul van yoʼonton laj yalbe skotol krixchanoetik ti kʼu yelan laj yichʼ poxtael ta jun skʼelobil juʼelale (Luc. 6:45). Ta skoj ti ta jkʼantik ta jtojtik ta vokol li pojelale, ¿mi tstij van koʼontontik yoʼ baxbolukutik ta spukel li uni vun sventa Snaʼobil slajel Cristoe? Ti kʼu yelan xuʼ jtojtik ta vokol xtoke, jaʼ ti xij-och ta prekursor auksiliare o jchʼakbetik mas yorail cholmantal li ta yorail Snaʼobil slajel Cristoe. Ta skoj ti oy ta koʼontontik ta jtojtik ta vokole, kʼalal jaʼo xaʼox li Snaʼobil slajel Cristoe ta sjunul koʼontontik ta jchʼamtik li buchʼutik tsvulaʼanutike xchiʼuk ta jkolta jbatik stakʼel li kʼusitik tsjakʼike.

4. ¿Kʼusitik xuʼ jpastik li ta yorail Snaʼobil slajel Cristo sventa mu chopoluk xkaʼi jbatik ta tsʼakale?

⁴ ¿Mi jaʼ van slajeb ta x-echʼ kuʼuntik li Snaʼobil slajel Cristo li avi jabile? (1 Cor. 11:26.) Mu jnaʼtik. Pe li kʼusi jnaʼojtike, mi jaʼ li slajeb xa ch-echʼ kuʼuntik li avie, mu xa me kʼu xkutik chkakʼtik ta ilel yan velta ti ta jtojtik ta vokol jech kʼuchaʼal ta jpastik li ta Snaʼobil slajel Cristoe. ¿Mi ta van xkakʼtik ta ilel ti ta jtojtik ta vokol li avie? Li kʼusi chlokʼ ta ketik sventa stojel ta vokole xchiʼuk li kʼusi ta jnopilan ta koʼontontike jaʼuk me li kʼusi lek chil li Jeovae, ti jaʼ li Buchʼu laj yakʼ li pojelal ta slekil yoʼontone (Sal. 19:14).