«Jech me xapasilanic» Ch-echʼ ta 5 yuʼun avril li Snaʼobil slajel Cristoe
1. ¿Kʼu yuʼun tsots tajek skʼoplal li Snaʼobil slajel Cristoe?
1 «Jech me xapasilanic, yuʼun jech chanaʼilanicun o.» (Luc. 22:19.) Kʼalal jech laj yal li Jesuse, laj yalbe mantal yajtsʼaklomtak ti akʼo staik ta naʼel ti laj yakʼ sba ta milel sventa tspoj li krixchanoetike. Ta skoj ti oy lek kʼusitik kʼotem ta pasel yuʼun li pojelale toj tsots skʼoplal chkiltik li yajtsʼaklomutik Cristoe. Li jabil liʼe ch-echʼ ta 5 yuʼun avril, pe, ¿kʼuxi chkakʼtik ta ilel ti ta jtojbetik ta vokol Jeova kʼalal skʼan toʼox xkʼot li kʼakʼal taje? (Col. 3:15.)
2. ¿Kʼuxi chkakʼtik ta ilel ti tsots skʼoplal chkaʼitik li Snaʼobil slajel Cristoe?
2 Jchapan jbatik. ¿Mi mu jechuk ti ta jchapan jbatik kʼalal oy kʼusi tsots skʼoplal ta jpastike? Jech me xuʼ jchapan koʼontontik sventa li Snaʼobil slajel Cristoe. ¿Kʼuxi chkutik? Jaʼ mi ta jchan xchiʼuk kutsʼ kalaltik xchiʼuk ta jnopbetik skʼoplal li kʼusitik kʼot ta pasel kʼalal poʼot xaʼox xichʼ milel li Jesuse (Esd. 7:10). Li ta kalendario xchiʼuk ta foyeto Jkʼeltik skotol kʼakʼal li sKʼop Diose chal jun-chibuk versikuloetik ta Vivlia ti chalbe skʼoplal taje. Li ta revista Li Jkʼel osil ta toyole ti jaʼ sventa avril-junio ta 2011 ta pajina 23 xchiʼuk 24, mas tsʼakal slistail tekstoetik yichʼoj talel ti chtakvan batel ta skapituloaltak li livro El hombre más grande de todos los tiempos.
3. ¿Kʼusi yan xuʼ jpastik ta skoj ti tsots skʼoplal chkaʼitik li Snaʼobil slajel Cristoe?
3 Jcholtik mantal. Yan kʼuxi xuʼ xkakʼtik ta ilel ti tsots skʼoplal chkaʼitik li Snaʼobil slajel Cristoe jaʼ mi mas chkakʼtik persa xcholel mantale (Luc. 6:45). Li ta sabado 17 yuʼun marsoe chlik jun kampanya ta spʼejel Balumil sventa ta jtaktik ta ikʼel li krixchanoetike. ¿Mi xuʼ van xasabe yorail sventa xalokʼ mas ta cholmantal o ti xa-och ta prekursor auksiliare? ¿Kʼu yuʼun mu xaloʼilta xchiʼuk avutsʼ avalal li xtal Akʼobal sventa Yichʼel ta Mukʼ Jeova ta Kutsʼ Kalaltike?
4. ¿Kʼuxi ta jtabetik sbalil kʼalal chijbat li ta Snaʼobil slajel Cristoe?
4 ¡Jujun jabil toj ep sbalil ta jtatik kʼalal chijbat li ta Snaʼobil slajel Cristoe! Kʼalal ta jnopbetik slekil yoʼonton Jeova ta skoj ti laj yakʼ sventa jpojeltik li jun noʼox Xnichʼone tspat tajek koʼontontik xchiʼuk mas ta jkʼantik-o (Juan 3:16; 1 Juan 4:9, 10). Taje jaʼ tstij koʼontontik sventa maʼuk noʼox jsaʼtik li kʼusi tskʼan koʼontontike (2 Cor. 5:14, 15). Jech xtok mas chkʼot ta koʼontontik yalbel slekilal ta buyuk noʼox li Jeovae (Sal. 102:19-21). Li yajtunelutik Jeovae oy ta koʼontontik xkʼot li 5 yuʼun avrile, yuʼun jaʼ jech xuʼ xkaltik-o batel ti «icham li Cajvaltique» (1 Cor. 11:26).