Xijmuyubaj jchapan jbatik li ta yorail Snaʼobil slajel Cristoe

1. ¿Kʼusi xuʼ jpastik li ta yorail Snaʼobil slajel Cristoe?

¹ Li ta Snaʼobil slajel Cristo li jabil liʼe, ti ta xkʼot ta martes 26 yuʼun marsoe, jaʼo xuʼ mas xijmuyubaj ti la spojutik li Diose (Is. 61:10). Kʼalal xijmuyubajutik noʼoxe jaʼ tskoltautik sventa lek jchapan jbatik kʼalal skʼan toʼox xkʼot yoraile. ¿Kʼuxi xuʼ jpastik taje?

2. ¿Kʼusi tstij koʼontontik sventa xlik jchapantik li kʼusitik skʼan pasel ta yorail Snaʼobil slajel Cristoe?

² Skʼan jchapan jbatik. Li Veʼlil ta bat kʼakʼal yuʼun Kajvaltike lek noʼox ti kʼuyelan ch-echʼe, pe toj tsots skʼoplal. Akʼo mi jech, skʼan onoʼox baʼyel xichʼ chapanel sventa jech jtsaktik ta mukʼ skotol li kʼusitik skʼan pasele (Prov. 21:5). Skʼan kʼelel lek li yorail xchiʼuk ti bu ch-echʼe. Skʼan me saʼel lek li pan xchiʼuk yaʼlel tsʼusube. Jech xtok, li yavil bu ch-echʼe skʼan me lekuk chapanbil xchiʼuk lekuk chʼubabil. Li buchʼu chetʼes mantale skʼan me xchapan sba lek, jech xtok, li buchʼutik tsjelubtasik pan xchiʼuk yaʼlel tsʼusube xchiʼuk li jcholvanejetike skʼan xichʼik albel lek li kʼusi stakʼ spasike. Jutuk mu skotoluk li kʼusitik taje pasbil xa. Li kʼusi tstij koʼontontik sventa jchapan jbatik leke, jaʼ ti ta jtojtik ta vokol ti laj yakʼ Dios li kʼuxi xuʼ jta-o jkolebaltike (1 Ped. 1:8, 9).

3. ¿Kʼuxi xuʼ jchapan koʼontontik ta sventa li Veʼlil ta bat kʼakʼal yuʼun Kajvaltike?

³ Jchapan li koʼontontike. Tsots skʼoplal jchapan koʼontontik sventa xkaʼibetik lek smelolal ti kʼu yuʼun tsots skʼoplal li Snaʼobil slajel Cristoe (Esd. 7:10). Sventa jech jpastike, skʼan jchʼakbetik yorail sventa jchantik li skʼelel Vivlia sventa Snaʼobil slajel Cristoe xchiʼuk jnopbetik skʼoplal li kʼusitik la spas Jesús kʼalal jayib xaʼox kʼakʼal kuxule. Kʼalal ta jnopbetik skʼoplal ti muʼyuk la xkʼuxubin sba stuk li Jesuse jaʼ tstij koʼontontik sventa jchanbetik li stalelale (Gál. 2:20).

4. ¿Kʼusi jtosukal sbalil pojelal ti mas chamuyubaj yuʼune?

⁴ Li slajel Cristoe jaʼ tstoybe skʼoplal li mukʼul pas mantal yuʼun Jeovae. Jaʼ tspojutik-o xtok li ta mulil xchiʼuk lajele (1 Juan 2:2). Jech xtok, jaʼ chakʼ ti lek xkil jbatik xchiʼuk li Diose xchiʼuk ti xijkuxi ta sbatel osile (Col. 1:21, 22). Jech xtok, jaʼ tskoltautik sventa jpastik-o batel li kʼusi laj kalbetik Diose xchiʼuk ti tukʼuk-o xkakʼ jbatik ti jaʼutik yajtsʼaklom Cristoe (Mat. 16:24). Yoʼ to chachapan aba sventa xabat li ta Snaʼobil slajel Cristoe, ¡mas me ch-epaj li muyubajel avuʼune!